ဆင်းရဲ​ခက်ခဲမှု​တွေ​ကို ခံရပ်နိုင်ဖို့ ယောဘ​ကျမ်းက ကူညီပေး

အခုတလော ယောဘ​ကျမ်းကို ဖတ်​ဖြစ်သလား။ လွန်ခဲ့တဲ့ နှစ်ပေါင်း ၃၅၀၀ လောက်​က ရေးခဲ့တဲ့​ကျမ်း​ဖြစ်ပေမဲ့ ကမ္ဘာ့​အကောင်းဆုံး စာပေ​စာရင်းထဲမှာ ပါ​နေဆဲပဲ။ နားလည်ရ​လွယ်ပြီး ကျစ်လစ်တဲ့ ရေးဟန်​ကြောင့် ယောဘ​ကျမ်း​ရေးသူကို “လက်ရာမြောက် ကလောင်ရှင်” လို့တောင် တင်စား​ခေါ်ဝေါ်​ကြတယ်။ ယောဘ​ကျမ်းကို ရေးသားခဲ့​သူဟာ မောရှေ​ဖြစ်ပေမဲ့ အာဘော်ရှင်​ကတော့ ယေဟောဝါ​ဘုရားသခင်ပါ။—၂ တိ. ၃:၁၆။

^၂ ယောဘ​ကျမ်းဟာ အရေးကြီးတဲ့ အကြောင်းအရာတွေ​ပါတဲ့ ကျမ်း​တစ်ကျမ်း​ဖြစ်တယ်။ ယေဟောဝါရဲ့ နာမတော် သန့်ရှင်း​မြင့်မြတ်​ရေး​ကိစ္စ​အကြောင်း ဖော်ပြထားလို့​ပါ။ အဲဒီ​အရေးကိစ္စမှာ ကောင်းကင်တမန်တွေ​ရော လူသားတွေ​ပါ ပါဝင်​ပတ်သက်နေတယ်။ အဲဒီအပြင် မေတ္တာ၊ တရားမျှတမှု၊ ဉာဏ်ပညာနဲ့ တန်ခိုး​လိုမျိုး ယေဟောဝါရဲ့ အရည်အသွေးတွေ အကြောင်းလည်း ပါတယ်။ ဥပမာ၊ ယောဘ​ကျမ်းထဲမှာ ယေဟောဝါ​ဘုရားကို “အနန္တ​တန်ခိုးရှင်” လို့ ၃၁ ကြိမ် ခေါ်ဆိုထားတယ်။ ဒါက ကျန်တဲ့​ကျမ်းစောင်​အားလုံးပေါင်း​မှာ ခေါ်ဆို​ထားတဲ့ အရေအတွက်ထက် ပိုများတယ်။ ဘဝနဲ့ပတ်သက်တဲ့ မေးခွန်းတွေရဲ့​အဖြေကိုလည်း ယောဘ​ကျမ်းမှာ တွေ့နိုင်တယ်။ ဆင်းရဲ​ခက်ခဲမှု​တွေကို ဘုရားသခင် ဘာကြောင့် ခွင့်ပြုထား​သလဲ ဆိုတဲ့ မေးခွန်းရဲ့ အဖြေ​လည်း​ပါတယ်။

^၃ ယောဘ​ကျမ်း​ဖတ်တာကို တောင်တက်​တာ​နဲ့ နှိုင်းယှဉ်​ကြည့်နိုင်တယ်။ တောင်ထိပ်​ရောက်တဲ့အခါ မြင်ကွင်း ပို​ရှင်း​သွား​သလိုပဲ ယောဘ​ကျမ်းကို​ဖတ်​ရင် ဆင်းရဲဒုက္ခ​နဲ့ပတ်သက်တဲ့ ဘုရားရဲ့ အမြင်ကို ရှင်းရှင်းလင်းလင်း မြင်လာမယ်။ ယောဘရဲ့ အဖြစ်အပျက်က အစ္စရေးတွေ​ကို ဘယ်လို​အကျိုးပြု​ခဲ့​နိုင်သလဲ၊ ကျွန်တော်တို့အတွက်​ကော ဘာအကျိုး​ရနိုင်သလဲ​ဆိုတာ ဒီဆောင်းပါးမှာ လေ့လာ​သွားပါမယ်။ ယောဘ​ကျမ်းကို သုံးပြီး တခြားသူတွေကို ကူညီပေးနိုင်ပုံ​အကြောင်းလည်း ဆွေးနွေး​သွားပါမယ်။

ယောဘ ဆင်းရဲဒုက္ခ​ကြုံဖို့ ယေဟောဝါ ခွင့်ပြု

^၄ အီဂျစ်ပြည်​မှာ အစ္စရေးတွေ ကျွန်ဘဝ​ရောက်နေချိန် ယောဘ​လို့ခေါ်တဲ့​လူတစ်ယောက် ဥဇ​ပြည်မှာ ရှိနေတယ်။ ဥဇ​ပြည်​ဆိုတာ ကတိထားရာပြည် အရှေ့ဘက်၊ အာရပ်​ပြည်​မြောက်ပိုင်း​လောက်​မှာ ရှိပုံ​ရတယ်။ အီဂျစ်ပြည်​မှာရှိတဲ့ အစ္စရေး​တချို့ မှောက်မှားတဲ့ ဘုရားတွေ​ကို ကိုးကွယ်​လာကြပေမဲ့ ယောဘ​ကတော့ ယေဟောဝါကို သစ္စာရှိရှိ ဝတ်ပြုတယ်။ (ယရ. ၂၄:၁၄။ ယေဇ. ၂၀:၈) ဒါကြောင့် ယောဘ​နဲ့ပတ်သက်ပြီး “ကမ္ဘာပေါ်မှာ သူ့လိုလူ တစ်ယောက်မှ မရှိဘူး”a လို့ ယေဟောဝါ ပြောတယ်။ (ယောဘ ၁:၈) ယောဘဟာ ကျိကျိတက် ချမ်းသာပြီး ဂုဏ်​အရှိန်အဝါ​ကြီးတယ်။ အရှေ့​ပြည်သားတွေထဲမှာ အချမ်းသာဆုံး​ပုဂ္ဂိုလ်​ဖြစ်တယ်။ (ယောဘ ၁:၃) လူအများ​လေးစား​ခံရတဲ့ ယောဘလို​ပုဂ္ဂိုလ်​မျိုး​က ယေဟောဝါကို သစ္စာရှိရှိ ဝတ်ပြုနေတာ စာတန်​ကြည့်ပြီး ကြိတ်​မနိုင်​ခဲမရ ဖြစ်နေ​မှာပဲ။

^၅ ယောဘ​သာ ဒုက္ခရောက်ရင် ယေဟောဝါကို စွန့်ပစ်မှာပဲ​လို့ စာတန် စွပ်စွဲတယ်။ (ယောဘ ၁:၇-၁၁။ ၂:၂-၅) ယောဘကို ယေဟောဝါ သိပ်ချစ်မြတ်နိုးတယ်။ ဒါပေမဲ့ စာတန်ရဲ့ မလိုတမာ​စွပ်စွဲချက် မှန်မမှန် သက်သေပြဖို့ အခွင့်အရေး​ပေး​လိုက်ရတယ်။ (ယောဘ ၁:၁၂-၁၉။ ၂:၆-၈) ယောဘရဲ့ သိုး​နွား​တိရစ္ဆာန်​အားလုံး ဆုံးရှုံး​လိုက်ရတယ်။ သားသမီး ဆယ်ယောက်စလုံး သေဆုံး​သွားကြတယ်။ ယောဘ​ကိုယ်တိုင်လည်း ခေါင်း​အစ ခြေ​အဆုံး ဆိုးဝါး​တဲ့ အနာစိမ်း​တွေ ပေါက်လာတယ်။ ဒုက္ခ​အကြီးအကျယ် ကြုံရပေမဲ့ ယေဟောဝါအပေါ် ယောဘ ဆက်သစ္စာရှိတယ်။ (ယောဘ ၁:၂၀-၂၂။ ၂:၉၊ ၁၀ ကို ဖတ်ပါ။) နောက်တော့ ယေဟောဝါရဲ့ အကူအညီနဲ့ ယောဘ ပြန်ကျန်းမာလာ​တယ်။ အရင်တုန်းက​လို ကြွယ်ဝ​လာပြီး လူတွေရဲ့​လေးစားမှု ပြန်ရတယ်။ သားသမီး​ဆယ်ယောက် ထပ်​ရတယ်။ ယေဟောဝါက ယောဘကို နောက်ထပ် နှစ်ပေါင်း ၁၄၀ အသက်ရှင်စေတယ်။ သားသမီး​မြေး​မြစ်တွေ​ရပြီး မျိုးဆက်​လေးဆက်​ကို မြင်ရတယ်။ (ယောဘ ၄၂:၁၀-၁၃၊ ၁၆) ဒီ​မှတ်တမ်းက အတိတ်က ဘုရား​ကျေးကျွန်တွေကို ဘယ်လို​အကျိုးပြု​ခဲ့နိုင်သလဲ။ ကျွန်တော်တို့အတွက်​ကော ဘယ်လို​အကျိုးပြုနိုင်သလဲ။

^၆ အစ္စရေးတွေ အကျိုး​ရခဲ့​နိုင်​ပုံ။ အီဂျစ်ပြည်​မှာ အစ္စရေးတွေ​ရဲ့ ဘဝဟာ မလွယ်​လှဘူး။ ဥပမာ၊ ယောရှု​နဲ့ ကာလက်​ဟာ ငယ်​ဘဝကို ကျွန်တွေ​အဖြစ် ဖြတ်သန်း​ခဲ့​ရတယ်။ မိမိတို့​အမှား မပါဘဲ နှစ်ပေါင်း ၄၀ လုံးလုံး တောကန္တာရ​ထဲ လှည့်လည် သွားလာ​ခဲ့​ရတယ်။ ယောဘ​ကြုံခဲ့ရတာ​တွေ၊ နောက်ပိုင်း ဘုရား​ကောင်းချီး​ခံစားခဲ့ရတာတွေ​ကို အစ္စရေးတွေ​သာ သိရင် ဆင်းရဲ​ခက်ခဲမှု​တွေကို ဖြစ်ပေါ်စေ​သူဟာ စာတန်​ဖြစ်တယ်၊ ယေဟောဝါ​မဟုတ်ဘူးဆိုတာ သဘောပေါက်ခဲ့မှာပဲ။ ဆင်းရဲ​ခက်ခဲမှု​တွေ​ကြုံဖို့ ယေဟောဝါ ဘာကြောင့် ခွင့်ပြုခဲ့တယ်၊ သစ္စာရှိတဲ့သူ​တွေ​ကို ဆုချတယ်ဆိုတာ​ကိုလည်း နားလည်ခဲ့​မှာပဲ။

^၇ ကျွန်တော်တို့ အကျိုး​ရနိုင်ပုံ။ အခု​အချိန်မှာ​လည်း လူကောင်းတွေ ဘာကြောင့် အခက်အခဲ​ကြုံနေရသလဲ​ဆိုတာ လူတွေ မသိကြဘူး။ ဒါကြောင့် ဘုရား​ရှိတယ်၊ လူတွေကို ဂရုစိုက်တယ်ဆိုတာ မယုံကြတော့ဘူး။ ရဝမ်ဒါ​နိုင်ငံက ဟေဇယ်bအကြောင်း စဉ်းစားကြည့်ပါ။ ငယ်ငယ်တုန်းကတော့ ဘုရားကို ယုံတယ်။ နောက်ပိုင်း မိဘတွေ ကွာရှင်းပြတ်စဲ​လိုက်​ကြပြီး အမေက နောက်​အိမ်ထောင်ပြု​လိုက်လို့ ပထွေး နှိပ်စက်​တဲ့​ဒဏ် ခံရတယ်။ ဆယ်ကျော်သက်​အရွယ်မှာ အမျိုးသားတစ်ယောက်​ရဲ့ လိင်​ပိုင်း မတရားပြု​ကျင့်​တာ ခံရတယ်။ နှစ်သိမ့်မှု ရလိုရငြား သူ​ဝတ်ပြု​နေကျ​နေရာကို သွား​ပေမဲ့ မျှော်လင့်​ထား​သလို ဖြစ်​မလာဘူး။ ဒါနဲ့ “ဘုရားသခင်၊ ကျွန်မ ကောင်းတာတွေ ကြိုးစား​လုပ်နေ​ပေမဲ့ အဖြစ်ဆိုးတွေနဲ့​ပဲ ဘာလို့ ကြုံနေရတာ​လဲ။ ဘုရားကို ကျွန်မ မယုံတော့ဘူး။ စိတ်ကြိုက်ပဲ နေ​တော့​မယ်” လို့ ဘုရားကို သူ​ပြောလိုက်တယ်။ ဒုက္ခတွေ ကြုံရတာ ဘုရားကြောင့်​လို့ ဟေဇယ်​လို ထင်နေ​ကြ​သူတွေကို တွေ့ရတာ ဝမ်းနည်းစရာပါပဲ။

^၈ ဒုက္ခတွေ ကြုံရတာ​ဟာ ဘုရားကြောင့်​မဟုတ်ဘဲ စာတန်ကြောင့်​ဆိုတာ ယောဘ​ကျမ်းကနေ ကျွန်တော်တို့ သိထားကြတယ်။ ဒါပေမဲ့ ဒုက္ခတွေ​ကြုံရတိုင်း ကိုယ်​စိုက်တဲ့​အတိုင်း ကိုယ်​ရိတ်​ရတာ​လို့ တထစ်ချ​ပြော​လို့ မရ​ပြန်ဘူး။ “လူအားလုံးဟာ မျှော်လင့်​မထားတဲ့ အချိန်မှာ မျှော်လင့်မထားတဲ့ ဖြစ်ရပ်တွေ ကြုံရ​တတ်” တယ်လို့ ကျမ်းစာ​ဆိုတယ်။ (ဒေ. ၉:၁၁။ ယောဘ ၄:၁၊ ၈) အခက်အခဲတွေ​ကြား ဘုရားအပေါ် ဆက်သစ္စာရှိနေရင် စာတန်ဟာ မုသာကောင်​ဖြစ်ကြောင်း သက်သေထူ​လိုက်တာပါပဲ။ (ယောဘ ၂:၃။ ပညာ. ၂၇:၁၁) ဟေဇယ် ယေဟောဝါ​သက်သေတွေ​နဲ့ ကျမ်းစာ​လေ့လာရင်း ဘာသိလာသလဲ။ သူ​ကြုံခဲ့ရတဲ့ ဒုက္ခတွေ​ဟာ ဘုရားကြောင့်​မဟုတ်မှန်း သိလာတယ်။ “အခုတော့ ကျွန်မရဲ့ ခံစားချက်တွေကို ဘုရားဆီ ပြန်​ရင်ဖွင့်​နိုင်ပြီ။ ဘုရားကို မယုံဘူး​လို့ ပြောခဲ့​မိ​ပေမဲ့ တကယ်​မယုံတာ​တော့ မဟုတ်ပါဘူး။ ဘုရားအကြောင်း အမှန်အတိုင်း မသိခဲ့​လို့ပါ။ ယေဟောဝါ ကျွန်မကို ချစ်တယ်ဆိုတာ နားလည်​သွားပါပြီ။ ဒါကြောင့် ကျွန်မ သိပ်ပျော်တယ်” လို့ သူပြောတယ်။ ဆင်းရဲဒုက္ခတွေကို ဘုရား ဘာကြောင့်​ခွင့်ပြုထား​သလဲ ကျွန်တော်တို့ သိခွင့်​ရထားတာ ကျေးဇူးတင်စရာပါပဲ။ အခက်အခဲတွေ ကြုံနေရချိန်မှာ ဘယ်လို ခံနိုင်ရည်​ရှိစေ​ကြောင်း ယောဘ​ကျမ်းကနေ ဆက်​လေ့လာ​ကြရအောင်။

ယောဘ​ကျမ်းက ခံနိုင်ရည်​ရှိစေ

^၉ တစ်ကိုယ်လုံး အနာစိမ်း​တွေ​ပေါက်ပြီး နာနာကျင်ကျင်​နဲ့ ပြာ​ထဲ​ထိုင်နေတဲ့ ယောဘ​အဖြစ်ကို မြင်ယောင်​ကြည့်ပါ။ အနာ​ကြောင့် အသားအရေ ညိုမည်း​နေပြီး လူလည်း ပိန်ချုံး​နေတယ်။ အားအင်တွေ ကုန်ခန်း​ပြီး အနာ​ကို အိုးခြမ်းပဲ့​နဲ့ ခြစ်​နေရင်း စိတ်ပျက်လက်ပျက် ဖြစ်နေ​ရှာတယ်။ တကယ်တော့ ယောဘဟာ အသက်ရှင်ရုံ​လေး မဟုတ်ဘဲ ခံနိုင်ရည် တင်ပြ​နေတာ။ (ယာကုပ် ၅:၁၁ ကို ဖတ်ပါ။) ဘာက ယောဘကို ခံနိုင်ရည် ရှိစေတာလဲ။

^၁၀ ယောဘဟာ ခံစားချက်တွေကို ဘုရားဆီ ရင်ဖွင့်တယ်။ (ယောဘ ၁၀:၁၊ ၂။ ၁၆:၂၀) ဥပမာ၊ သူ​ကြုံရတဲ့ အဖြစ်ဆိုးတွေကြောင့် ထွက်ပေါ်လာ​တဲ့ ခံစားချက်တွေကို အခန်းကြီး ၃ မှာ တွေ့ရတယ်။ ဒုက္ခ​ကြုံရတာ ဘုရားကြောင့်​လို့ သူ​ထင်ခဲ့တာ။ မိတ်ဆွေ သုံးဦး ရောက်လာပြီး ယောဘ​အပြစ်ရှိ​လို့ ဘုရား ဒဏ်ခတ်​တာ​လို့ အထပ်ထပ်​ပြောကြတယ်။ ယောဘ​ကလည်း ဘုရားအပေါ် သစ္စာ​မပျက်​ခဲ့​ကြောင်း အခိုင်အမာ ချေပ​ပြောဆိုတယ်။ ဘုရားသခင်​ထက် သူ ပို​ဖြောင့်မတ်တယ်လို့ ပြောတဲ့​အထိ​တောင် ဖြစ်ခဲ့​တာ။ (ယောဘ ၁၀:၁-၃။ ၃၂:၁၊ ၂။ ၃၅:၁၊ ၂) မိမိ ဖြောင့်မတ်ကြောင်း သက်သေပြ​ချင်​လွန်းလို့ “မဆင်မခြင် ပြောလိုက်​မိ​တာ” လို့ နောက်ပိုင်း ယောဘ ဝန်ခံတယ်။ (ယောဘ ၆:၃၊ ၂၆) အခန်းကြီး ၃၁ အရ မိမိ အပြစ်​မရှိကြောင်း​ကို ထုတ်ဖော်​ပြောပေးဖို့​တောင် ဘုရားကို တောင်းဆို​လိုက်​သေးတယ်။ (ယောဘ ၃၁:၃၅) တကယ်ဆိုရင် ယောဘ အဲဒီလို မတောင်းဆို​သင့်ဘူး။

^၁၁ ယောဘ အပူတပြင်း​တောင်းဆိုတာကို ကြည့်ရင် ဘုရားနဲ့​သူ့​ဆက်ဆံရေး ဘယ်လောက်​ခိုင်မာ​တယ်​ဆိုတာ သိနိုင်တယ်။ ဘုရားက သူ့ရဲ့​သစ္စာရှိမှုကို အသိအမှတ်ပြု​မယ်​ဆိုတာ စိတ်ချကြောင်း​လည်း ဖော်ပြတယ်။ ယေဟောဝါက လေမုန်တိုင်း​ထဲကနေ ယောဘကို စကားပြောတယ်။ ယောဘ ဒုက္ခ​ကြုံရတဲ့ အကြောင်းရင်းကို​တော့ အသေးစိတ် မပြောဘူး။ ယောဘရဲ့ မကျေနပ်ချက်​တွေ၊ သူ​ဖြောင့်မတ်ကြောင်း ပြောတာ​တွေ​ကိုလည်း အပြစ်မတင်ဘူး။ ဖခင်​တစ်ယောက်လို ယောဘကို ကြင်ကြင်နာနာ တည့်မတ်ပေးတယ်။ တကယ်​မေတ္တာပါတဲ့ ပဲ့ပြင်ပေး​မှု​ပါပဲ။ (ယောဘ ၃၁:၆။ ၄၀:၄၊ ၅။ ၄၂:၁-၆) ဒီမှတ်တမ်းကနေ အတိတ်က ဘုရား​ကျေးကျွန်တွေ ဘာအကျိုး​ရခဲ့​နိုင်သလဲ။ ကျွန်တော်တို့​ကော ဘာအကျိုး​ရနိုင်သလဲ။

^၁၂ အစ္စရေးတွေ အကျိုး​ရခဲ့​နိုင်​ပုံ။ ယောဘ အဖြစ်အပျက်ကနေ အစ္စရေးတွေ သင်ခန်းစာ ရခဲ့​နိုင်တယ်။ မောရှေ​အကြောင်း စဉ်းစားကြည့်ပါ။ အစ္စရေးလူမျိုးကို ဦးဆောင်​ရတာ မလွယ်ဘူး။ ယေဟောဝါကို သူတို့ အကြိမ်ကြိမ် ပုန်ကန်​ကြ​လို့ မောရှေ စိတ်ပျက်ရတယ်။ ယေဟောဝါကို ဆန့်ကျင်​ကြတဲ့ အစ္စရေးတွေ​လို မဟုတ်ဘဲ မောရှေက​တော့ ယေဟောဝါဆီ သူ့​ခံစားချက်တွေကို ဆုတောင်း​ပြောပြတယ်။ (ထွ. ၁၆:၆-၈။ တော. ၁၁:၁၀-၁၄။ ၁၄:၁-၄၊ ၁၁။ ၁၆:၄၁၊ ၄၉။ ၁၇:၅) မောရှေ တည့်မတ်​ခံရချိန်​တုန်းက​လည်း ယောဘရဲ့​အဖြစ်​က အထောက်အကူပြု​ခဲ့​မှာပဲ။ အစ္စရေးတွေ တောကန္တာရ​ထဲ လှည့်လည်​သွားလာ​တာ အနှစ် ၄၀ ပြည့်​ချိန်​မှာ ကာဒေရှ​အရပ်​ကို ရောက်လာတယ်။ အဲဒီ​နေရာမှာ မောရှေဟာ အစ္စရေးတွေ​ကို ဒေါသထွက်ပြီး “မဆင်မခြင် ပြောမိ” တဲ့​အပြင် ယေဟောဝါကိုလည်း ဂုဏ်တင်ဖို့ ပျက်ကွက်ခဲ့​တယ်။ (ဆာ. ၁၀၆:၃၂၊ ၃၃) ဒါနဲ့ မောရှေ ကတိထားရာပြည်ကို ဝင်ခွင့်​မရတော့ဘူး။ (တရား. ၃၂:၅၀-၅၂) မောရှေ​အတွက် စိတ်ထိခိုက်စရာ​ဖြစ်ပေမဲ့ ဆုံးမတာကို နှိမ့်ချမှုရှိရှိ လက်ခံတယ်။ နောင်လာမယ့် အစ္စရေး​မျိုးဆက်​တွေ​လည်း အခက်အခဲ​ကို ခံနိုင်ရည်​ရှိဖို့၊ သူတို့​ခံစားရတဲ့​အတိုင်း ယေဟောဝါကို ပြောပြဖို့၊ ယေဟောဝါ​ထက် ပို​ဖြောင့်မတ်တယ်လို့ မထင်​မိဖို့ ယောဘ​ဆီကနေ သင်ခန်းစာ ရခဲ့​မှာပဲ။ ယေဟောဝါ ပဲ့ပြင်ပေး​တာကို နှိမ့်ချမှုရှိရှိ လက်ခံတတ်​ဖို့လည်း သင်ယူခဲ့​ရမှာ။

^၁၃ ကျွန်တော်တို့ အကျိုး​ရနိုင်ပုံ။ ခရစ်ယာန်တွေအနေနဲ့ ကျွန်တော်တို့လည်း ခံနိုင်ရည်​ရှိဖို့ လိုတယ်။ (ဟီဘရူး ၁၀:၃၆ ကို ဖတ်ပါ။) ညီအစ်ကို/မတချို့ ကျန်းမာရေး​ပြဿနာ၊ မိသားစု​ပြဿနာ၊ ချစ်ရသူ​ဆုံးရှုံးရတဲ့ ဝေဒနာ ဒါမှမဟုတ် တခြား ဆိုးရွားတဲ့​ပြဿနာတွေ ကြုံနေရတယ်။ အဲဒီ​ကြား​က တခြားသူတွေရဲ့ အပြောအဆို၊ လုပ်ရပ်တွေကြောင့် အခြေအနေ ပိုဆိုး​သွား​တတ်တယ်။ (ပညာ. ၁၂:၁၈) ဒါပေမဲ့ ကျွန်တော်တို့ရဲ့ ခံစားချက်တွေကို ယေဟောဝါဆီ အိတ်သွန်ဖာမှောက် ရင်​ဖွင့်နိုင်တယ်။ ဘုရား​နားထောင်ပေးမယ်ဆိုတာ ယောဘ​ကျမ်းက စိတ်ချစေတယ်။ (၁ ယော. ၅:၁၄) ယောဘလို ကျွန်တော်တို့ရဲ့​ခံစားချက်တွေ ပြင်းထန်​လာလို့ “မဆင်မခြင် ပြောမိ” ရင်တောင် ယေဟောဝါ ဗွေမယူ​ဘူး။ ခံရပ်နိုင်အောင် အစွမ်း​ခွန်အား​နဲ့ ဉာဏ်ပညာ ဘုရားပေး​မယ်​ဆိုတာ စိတ်ချနိုင်တယ်။ (၂ ရာ. ၁၆:၉။ ယာ. ၁:၅) ယောဘကို တည့်မတ်ပေး​ခဲ့​သလို ကျွန်တော်တို့ကိုလည်း လိုအပ်ရင် တည့်မတ်ပေး​မယ်။ ယေဟောဝါက ကျမ်းစာ၊ အဖွဲ့အစည်းနဲ့ ရင့်ကျက်တဲ့ ညီအစ်ကို/မတွေ​ကတစ်ဆင့် ကျွန်တော်တို့ကို အကြံ​ပေး​တည့်မတ်​လာနိုင်တယ်။ ယေဟောဝါ တည့်မတ်ပေး​တဲ့အခါ ခံနိုင်ရည်​ရှိဖို့ လိုကြောင်း ယောဘ​အဖြစ်ကနေ သိရတယ်။ (ဟီ. ၁၂:၅-၇) တည့်မတ်ပေး​တာကို ယောဘလို နှိမ့်ချမှုရှိရှိ လက်ခံရင် ကျွန်တော်တို့လည်း ကောင်းချီး​ခံစားရမယ်။ (၂ ကော. ၁၃:၁၁) ယောဘ​ကျမ်းကနေ ရရှိတဲ့ သိပ်ကောင်းတဲ့ သင်ခန်းစာ​တွေ​ပါပဲ။ တခြားသူတွေကို​ကော ဘယ်လို​ကူညီပေးနိုင်သလဲ သုံးသပ်ကြည့်​ရအောင်။

ယောဘ​ကျမ်းကို သုံးပြီး တခြားသူတွေကို ကူညီပေးနိုင်

^၁၄ လူကောင်းတွေ ဘာကြောင့် အဖြစ်ဆိုး​ကြုံနေရသလဲ​လို့ မေးတဲ့​သူနဲ့ အမှုဆောင်မှာ ကြုံဖူးသလား။ ဘယ်လို အဖြေ​ပေးခဲ့သလဲ။ ဧဒင်မှာ ဖြစ်ပျက်ခဲ့ရာ​ကို ကျမ်းစာ​သုံးပြီး ရှင်းပြခဲ့​မှာပဲ။ ပထမ​လူသား​မောင်နှံ ဘုရားကို ပုန်ကန်​အောင် လိမ်လည်​ပြောဆိုခဲ့တဲ့ စာတန်​အကြောင်း​ကနေ စ​ခဲ့​နိုင်တယ်။ (က. ၃:၁-၆) အာဒံနဲ့​ဧဝ​ရဲ့ ပုန်ကန်မှု​ကြောင့် ဆင်းရဲဒုက္ခ​နဲ့ သေခြင်း လူ့​လောက​ထဲ ဝင်လာတဲ့​အကြောင်း ပြောပြတာ ဖြစ်နိုင်တယ်။ (ရော. ၅:၁၂) စာတန်ဟာ မုသာကောင်​ဖြစ်ကြောင်း သက်သေပြဖို့ ဘုရား အချိန်​ပေးလိုက်ကြောင်း၊ အနာဂတ်မှာ ဆင်းရဲဒုက္ခတွေ ပပျောက်​ပြီး လူတွေ ထာဝစဉ် အသက်ရှင်​ရမှာဖြစ်ကြောင်း ရှင်းပြခဲ့​တာ​ဖြစ်မယ်။ (ဗျာ. ၂၁:၃၊ ၄) လူကောင်းတွေ အဖြစ်ဆိုး ကြုံနေရတဲ့ အကြောင်းရင်းကို ဒီလို ရှင်းပြ​ပေးတာ ထိ​ရောက်ပါတယ်။

^၁၅ ယောဘ​အကြောင်း သုံးပြီး​လည်း လူကောင်းတွေ အဖြစ်ဆိုး ကြုံရတဲ့​အကြောင်းရင်းကို ရှင်းပြနိုင်ပါတယ်။ အရင်ဆုံး မေးခွန်း​မေး​တဲ့အတွက် ချီးမွမ်း​ပေးနိုင်တယ်။ အဲဒီနောက် လူကောင်း​တစ်ယောက်​ဖြစ်တဲ့ ယောဘ အဖြစ်ဆိုး ကြုံခဲ့ရ​ကြောင်း၊ အဖြစ်ဆိုး ကြုံရတာ ဘုရားကြောင့်​လို့ ယောဘ ထင်ခဲ့​ကြောင်း ရှင်းပြနိုင်တယ်။ (ယောဘ ၇:၁၇-၂၁) ဒီလို​မေးခွန်း​မေးတာ သူ​တစ်ယောက်​ထဲ မဟုတ်မှန်း သိသွား​ရင် ပို​စိတ်ဝင်စား​သွားမှာ။ ယောဘ​အဖြစ်​က ဘုရား​လုပ်လို့​မဟုတ်ဘဲ စာတန်ကြောင့်​ဖြစ်တယ်ဆိုတာ ကျမ်းစာ​သုံးပြီး ပြောပြပါ။ လူတွေ ဘုရားကို ဝတ်ပြုတယ်​ဆိုတာ အကျိုး​ရလို့၊ ဒုက္ခရောက်​ရင် ဘုရားကို စွန့်ပစ်​မယ်​လို့ မာရ်နတ် စွပ်စွဲခဲ့​တာ။ အခက်အခဲ​ရှိပေမဲ့ မိမိအပေါ်​သစ္စာရှိ​မယ့်​သူ​တွေ​ရှိတယ်ဆိုတာ ဘုရား​ယုံတယ်။ ဒါကြောင့် စာတန် မှားကြောင်း သက်သေပြဖို့ အချိန်ပေး​ရတဲ့​အကြောင်း၊ ဆက်သစ္စာရှိ​လို့ နောက်ပိုင်းမှာ ယောဘကို ဘုရား​ကောင်းချီးပေးတဲ့​အကြောင်း ရှင်းပြနိုင်တယ်။ အခက်အခဲ ကြုံရတာ ယေဟောဝါ​ကြောင့် မဟုတ်ဘူးဆိုတာ​ကို ပြောပြ​ရင်း နှစ်သိမ့်​အားပေးနိုင်တယ်။

^၁၆ ၂၀၂၁ ခုနှစ်လောက်​မှာ ညီအစ်မ​တစ်ယောက် ဖုန်းဆက် သက်သေခံတယ်။ ပထမဆုံး ဖုန်း​ကိုင်တဲ့​သူရဲ့​နာမည်​က မာရီယို​လို့ ခေါ်တယ်။ ညီအစ်မက ကျမ်းချက်​တစ်ချက် ဖတ်ပြတယ်။ ဘုရားက ဆုတောင်းချက်တွေကို နားထောင်​ပေးတဲ့​အပြင် သိပ်ကောင်းတဲ့ အနာဂတ်​မျှော်လင့်ချက်​ကတိ​လည်း ပေးထားကြောင်း ရှင်းပြတယ်။ ဘယ်လို​ထင်သလဲ​လို့ ညီအစ်မ မေးတဲ့အခါ မာရီယို​က ကိုယ့်ကိုယ်ကိုယ် အဆုံးစီရင်​ခါနီး မိသားစုကို နှုတ်ဆက်​စာ​ရေးနေတာ​ဖြစ်ကြောင်း ပြောပြတယ်။ “ကျွန်တော် ဘုရားကို​တော့ ယုံပါတယ်။ ဒါပေမဲ့ ဘုရား ကျွန်တော့်ကို ဂရုမစိုက်ဘူး” လို့ မာရီယို ပြောတယ်။ ဒုတိယ​အကြိမ် ဖုန်း​ပြောတော့ ယောဘ အဖြစ်ဆိုး​ကြုံရတဲ့​အကြောင်း အတူ ဆွေးနွေးဖြစ်ကြတယ်။ ဒါနဲ့ မာရီယို​က ယောဘ​ကျမ်းကို ဖတ်ချင်တဲ့​အကြောင်း ပြော​လာတယ်။ ညီအစ်မက ကမ္ဘာသစ်ဘာသာပြန်ကျမ်း လင့်ခ် ပို့ပေးတယ်။ မိမိကို ဂရုစိုက်တဲ့​မေတ္တာရှင် ဘုရားအကြောင်း လေ့လာချင်လို့ မာရီယို ကျမ်းစာ​သင်အံမှု လက်ခံ​လိုက်တယ်။

^၁၇ ဆင်းရဲဒုက္ခ ကြုံနေရသူ အပါအဝင် လူတွေရဲ့​ဘဝကို ကျမ်းစာက ပြောင်းလဲပေးနိုင်စွမ်း​ရှိမှန်း သိခဲ့ကြပြီ။ (ဟီ. ၄:၁၂) ယောဘ​အကြောင်း ကျမ်းစာမှာ ယေဟောဝါ ထည့်သွင်း​ဖော်ပြပေး​ထားတာ ကျေးဇူးတင်စရာပါပဲ။ (ယောဘ ၁၉:၂၃၊ ၂၄) “ဘုရားက ဆိုးညစ်​တာကို မလုပ်” မှန်း ယောဘ​ကျမ်းကနေ သိရတယ်။ (ယောဘ ၃၄:၁၂ ကို ဖတ်ပါ။) ဆင်းရဲဒုက္ခတွေကို ဘုရား ဘာကြောင့် ခွင့်ပြုထား​ရသလဲ၊ ဘယ်လို​ခံရပ်နိုင်​သလဲ​ဆိုတာကိုလည်း သိခဲ့​ရပြီ။ အဖြစ်ဆိုး ကြုံနေရသူတွေကို​လည်း ယောဘ​အကြောင်း ပြောပြီး နှစ်သိမ့်​ပေးနိုင်​ကြတယ်။ နောက်ဆောင်းပါးမှာ တခြားသူတွေကို ထိထိရောက်ရောက် အကြံ​ပေးနိုင်​ပုံ​အကြောင်း ယောဘ​ကျမ်းကနေ ဘာ​သင်ယူနိုင်တယ်​ဆိုတာ ဆွေးနွေး​သွားပါမယ်။