“ခင်ဗျား​ဟာ သိပ်တန်ဖိုးထားရတဲ့သူ ဖြစ်”

ကိုယ့်ကိုယ်ကိုယ် တန်ဖိုး​မရှိဘူးလို့ ဘုရား​ကျေးကျွန်​တချို့ ခံစားကြရတယ်။ လူတွေရဲ့ ဆက်ဆံပုံ​ကြောင့် အဲဒီလိုခံစားရတာ ဖြစ်နိုင်တယ်။ သင်​ကော အဲဒီလို​ခံစားနေရသလား။ တကယ်တော့ မိမိ​ကျေးကျွန်​အားလုံးကို ယေဟောဝါ​ဘုရား သိပ်တန်ဖိုးထားတယ်။ ဒါကို ဘယ်လို စိတ်ချ​လာနိုင်သလဲ။

^၂ တစ်နည်းကတော့ လူတွေ တန်ဖိုးထား​ဆက်ဆံခံရတာကို ယေဟောဝါ လိုလား​ကြောင်း ဖော်ပြတဲ့ ကျမ်းမှတ်တမ်းတွေ သုံးသပ်ခြင်း​ပါပဲ။ ဥပမာ၊ လူတွေကို သားတော်​ယေရှု လေးလေးစားစား ဆက်ဆံ​တယ်၊ ဂုဏ်တင်တယ်။ ဒါက ကိုယ့်ကိုယ်ကိုယ် အရေးမပါဘူးလို့ ခံစားရသူတွေ​ကို အဖ​ယေဟောဝါနဲ့ ယေရှု သိပ်​တန်ဖိုးထား​မှန်း သိစေတယ်။ (ယော. ၅:၁၉။ ဟီ. ၁:၃) ဒီဆောင်းပါးမှာ (၁) ယေဟောဝါ တန်ဖိုးထားတယ်လို့ လူတွေ ခံစားရအောင် ယေရှု ဘယ်လို ကူညီပေးသလဲ၊ (၂) ကိုယ့်ကို ယေဟောဝါ သိပ်​တန်ဖိုးထား​မှန်း ကျွန်တော်တို့ ဘယ်လို စိတ်ချ​လာနိုင်သလဲ​ဆိုတာ ဆွေးနွေး​သွားပါမယ်။—ဟဂ္ဂဲ ၂:၇။

ယေဟောဝါ တန်ဖိုးထားတယ်လို့ လူတွေ ခံစားရအောင် ယေရှု ကူညီပေးပုံ

^၃ ဂါလိလဲ​နယ်မှာ ယေရှု တတိယ​အကြိမ် လှည့်လည်​ဟောပြောနေ​တုန်း တရားစကား နားထောင်ချင်​လို့၊ ရောဂါ​ဝေဒနာ ကုသ​ခံချင်လို့ လူတွေ အုပ်လိုက်​ကြီး လိုက်​လာကြတယ်။ “လူတွေဟာ အရေခွံ​ဆုတ်ပြီး ပစ်ထား​ခံရတဲ့ သိုးတွေ၊ ထိန်းသူမရှိတဲ့ သိုးတွေလို ဖြစ်နေ” တယ်လို့ ယေရှု ပြောတယ်။ (မ. ၉:၃၆) ဘာသာရေး​ခေါင်းဆောင်တွေ​က သူတို့ကို အရေး​မလုပ်တဲ့​အပြင် “ကျိန်ခြင်း​ခံရသူတွေ” လို့​တောင် ခေါ်ကြတာ။ (ယော. ၇:၄၇-၄၉) ယေရှုကတော့ သူတို့ကို အရေးတယူ အချိန်ပေးပြီး သွန်သင်တယ်၊ ရောဂါ​ဝေဒနာ ကုသ​ပေးတယ်။ (မ. ၉:၃၅) နောက်ထပ် လူအများကြီးကို ကူညီပေးနိုင်ဖို့ တမန်တော်တွေကို ဟောပြောတတ်​အောင် လေ့ကျင့်ပေးတယ်။ ရောဂါကုသ​နိုင်​တဲ့ တန်ခိုး​အာဏာ ပေးတယ်။—မ. ၁၀:၅-၈။

^၄ လူ​အထင်အမြင်​သေး​ခံရသူတွေ​ကို အဖ​ဘုရားနဲ့ ယေရှု သိပ်​တန်ဖိုးထား​မှန်း ယေရှုရဲ့ ဆက်ဆံပုံ​ကနေ သိရတယ်။ ယေဟောဝါကို ဝတ်ပြု​နေပေမဲ့ ကိုယ့်ကိုယ်ကိုယ် တန်ဖိုး​မရှိဘူးလို့ သင် ခံစားနေရသလား။ ဒါဆိုရင် တရားစကား နားထောင်ချင်​သူတွေကို ယေရှု ဘယ်လို ဆက်ဆံသလဲ​ဆိုတာ စဉ်းစား​ကြည့်​လိုက်ပါ။ ယေဟောဝါရဲ့ အမြင်မှာ သင် ဘယ်လောက် တန်ဖိုးရှိမှန်း သိလာမယ်။

^၅ လူတွေကို သွန်သင်ပေးတဲ့​အခါ အုပ်စုလိုက်​ကို​သာမက တစ်ယောက်ချင်းစီ​ကိုလည်း ယေရှု အာရုံစိုက်တယ်။ ဥပမာ၊ ဂါလိလဲ​နယ်မှာ ဟောပြောနေ​တုန်း ၁၂ နှစ်လုံး သွေးသွန်နာ​စွဲနေ​တဲ့ အမျိုးသမီးတစ်ယောက်​နဲ့ ယေရှု ဆုံတယ်။ (မာ. ၅:၂၅) မောရှေ​ပညတ်​အရ အဲဒီ​အမျိုးသမီး မစင်ကြယ်ဘူး။ သူ့ကို ထိမိ​ကိုင်မိ​သူ​တွေ​လည်း မသန့်ရှင်း​ဘူး။ ဒါကြောင့် သူ့ခမျာ လူတောမတိုး​ဘဲ ဖြစ်နေတယ်။ ယေဟောဝါကို ဝတ်ပြုဖို့ တရား​ဇရပ် မသွားနိုင်၊ ပွဲတော် မတက်နိုင် ဖြစ်နေ​ရှာတယ်။ (ဝတ်. ၁၅:၁၉၊ ၂၅) ရောဂါ​တစ်ဖက်၊ သိမ်ငယ်စိတ်​တစ်ဖက်​နဲ့ တော်တော်​ခံစားရမှာ။—မာ. ၅:၂၆။

^၆ သွေးသွန်နာ​စွဲနေ​တဲ့ အမျိုးသမီးဟာ ရောဂါ​သက်သာ​ချင်ပေမဲ့ ကုသ​ပေးဖို့ ယေရှုကို တိုက်ရိုက်​မတောင်းဆိုဘူး။ ဘာကြောင့်လဲ။ ရှက်ရွံ့​လို့ ဖြစ်နိုင်တယ်။ မစင်မကြယ် ဖြစ်​နေပါလျက်​နဲ့ လူအုပ်​ထဲ တိုးဝင်​လာတဲ့အတွက် ယေရှု မောင်းထုတ်​လိုက်​မှာ ကြောက်လို့ ဖြစ်နိုင်တယ်။ ဒါနဲ့ ယေရှုရဲ့ ဝတ်လုံကို တို့​လိုက်တယ်။ “သူ့​ဝတ်လုံကို တို့လိုက်ရုံနဲ့ ငါ့​ရောဂါ သက်သာ​သွားမှာပဲ” လို့ တွေး​နေခဲ့တာ။ (မာ. ၅:၂၇၊ ၂၈) ချက်ချင်း​ဆိုသလို ရောဂါ​သက်သာ​သွားတယ်။ ယုံကြည်ခြင်း ခိုင်မာတဲ့​အတွက် ဆုချ​ခံ​လိုက်ရတာပါပဲ။ ဒါပေမဲ့ “ကျွန်တော့်​ဝတ်လုံကို ဘယ်သူ တို့​တာ​လဲ” လို့ ယေရှု မေး​လာလို့ ဝန်ခံ​လိုက်​ရတော့တယ်။ ယေရှု ဘယ်လိုများ တုံ့ပြန်မလဲ။

^၇ ရောဂါ​နှိပ်စက်​တဲ့​ဒဏ်​ခံနေရတဲ့ အမျိုးသမီးကို ယေရှု ထောက်ထား​တယ်၊ ကရုဏာနဲ့ ဆက်ဆံ​တယ်။ သူ “ကြောက်လို့ တဆတ်ဆတ်​တုန်နေ” တာ ယေရှု သတိထားမိတယ်။ (မာ. ၅:၃၃) သူ့​ခံစားချက်ကို ထည့်တွက်​ပြီး စိတ်အေးသွား​စေ​မယ့်​စကား ပြောတယ်။ “သမီး” လို့​တောင် ခေါ်​လိုက်တယ်။ ဒီ​အခေါ်အဝေါ်​ဟာ ယဉ်ကျေးမှု ရှိရုံသာမက မေတ္တာ​အငွေ့အသက် ပါတယ်။ (မာကု ၅:၃၄ ကို ဖတ်ပါ။) “အမျိုးသမီးတစ်ယောက်ကို ‘သမီး’ လို့ ယေရှု ခေါ်ဝေါ်​တာ ကျမ်းစာမှာ ဒီ​တစ်နေရာ​ပဲ မှတ်တမ်းတင်ထားတယ်။ အမျိုးသမီး ‘တဆတ်ဆတ်​တုန်နေ’ တာ မြင်လို့ ဒီလို​ခေါ်​လိုက်တာ ဖြစ်နိုင်တယ်” လို့ လေ့လာမှု​မှတ်စု​က ဆိုတယ်။ ကောင်းကင်ဘုံစံ​အဖရဲ့ အဖိုးတန်​သမီး​လို့ ခံစားရအောင် ယေရှု ကူညီပေး​လိုက်တာပဲ။ အမျိုးသမီး ဘယ်လောက် စိတ်သက်သာ​သွား​လိုက်မလဲ။ ယေရှု​သာ စိတ်အေးစေ​မယ့်​စကား မပြောခဲ့ဘူး​ဆိုရင် သူ့ခမျာ ရောဂါ​ပဲ သက်သာ​ပြီး စိတ်မလုံမလဲ ဖြစ်​ကျန်ခဲ့​နိုင်တယ်။

^၈ ဒီနေ့လည်း ဘုရား​ကျေးကျွန်​တချို့ဟာ ကျန်းမာရေး ချို့ယွင်း​လို့ သိမ်ငယ်​ကြတယ်။ ဥပမာ၊ ဘရာဇီး​နိုင်ငံက မှန်မှန်ရှေ့ဆောင် ညီအစ်မ မာရီယာa ဟာ မွေးကတည်းက ခြေ​နှစ်ဖက်၊ ဘယ်​လက်တစ်ဖက် ပါ​မလာဘူး။ “မသန်စွမ်း​လေး ဖြစ်နေလို့ ကျောင်းမှာ အမြဲ​အနိုင်ကျင့်​ခံရတယ်။ နာမည်ပြောင်​တွေ ပေးကြတယ်။ မိသားစုဝင်တွေက​အစ နှိမ်ကြတယ်” လို့ မာရီယာ ပြောတယ်။

^၉ မာရီယာ ယေဟောဝါ​သက်သေ ဖြစ်​လာတော့ ညီအစ်ကို/မတွေ​က ဝိုင်း​ဖေးမ​ကြတယ်။ ကိုယ့်ကို ယေဟောဝါ မြင်သလို မြင်​တတ်လာအောင် ကူညီပေးကြတယ်။ “ကူညီပေး​သူ​တွေ​ရဲ့ နာမည် မှတ်စု​စာအုပ်မှာ ချ​ရေး​ရင် နေရာလွတ်​တောင် ကျန်​မှာ မဟုတ်ဘူး။ မေတ္တာပြည့်ဝတဲ့ ဒီလို​မိသားစုကြီး ပေးထားလို့ ယေဟောဝါကို သိပ်ကျေးဇူးတင်တာပဲ” လို့ မာရီယာ ပြောတယ်။ ညီအစ်ကို/မတွေရဲ့ ကူညီပေး​မှု​ကြောင့် ယေဟောဝါ​အတွက် မိမိ သိပ်တန်ဖိုးရှိမှန်း မာရီယာ သိနေ​ပြီ။

^၁၀ ယေရှု ကူညီပေးခဲ့သူ နောက်တစ်ယောက် ဖြစ်တဲ့ မာဂဒလမာရိ​အကြောင်းလည်း စဉ်းစားကြည့်ပါ။ မာရိဟာ နတ်ဆိုး​ခုနစ်ကောင် နှောင့်ယှက်တာ​ခံခဲ့ရတယ်။ (လု. ၈:၂) နတ်ဆိုးပူး​လို့ ထူးထူးဆန်းဆန်း​တွေ ပြုမူခဲ့​မှာ​ပဲ။ သူ့ကို လူတွေ ရှောင်ကြ​မှာ​ပဲ။ ဒါကြောင့် ကိုယ့်ကို ချစ်ခင်​မယ့်​သူ မရှိဘူး၊ ကူ​ကယ်​ပေးမယ့်​သူ မရှိဘူးလို့ ခံစားရနိုင်တယ်။ ဒါပေမဲ့ နတ်ဆိုး​နှောင့်ယှက်မှု​ကနေ လွတ်ကင်း​သွား​အောင် ယေရှု ကူညီပေး​လိုက်​ပုံ​ပဲ။ ဒီလိုနဲ့ မာရိဟာ ယေရှုနောက်​လိုက် ဖြစ်လာတယ်။ ယေဟောဝါ​အတွက် သိပ်တန်ဖိုးရှိတယ်​လို့ မာဂဒလမာရိ ခံစားရအောင် ယေရှု ဘယ်လို ထပ်​ကူညီ​သေးသလဲ။

^၁၁ မြို့ရွာ​တွေ​ကို မိမိ လှည့်လည်​ဟော​ပြောချိန်မှာ မာဂဒလမာရိ​ကို ယေရှု လိုက်ပါ​ခွင့်ပြုတယ်။b ဒါကြောင့် ယေရှုရဲ့ တရားတော်​တွေ​ကို မာရိ ကြားနာ​ခွင့်​ရတယ်။ ယေရှု ရှင်ပြန်ထမြောက်​တဲ့​နေ့မှာ မာရိ​ကို ကိုယ်ထင်ပြ​တယ်။ အဲဒီ​နေ့ ယေရှုနဲ့ ဦးဆုံး စကားပြောခွင့်​ရသူတွေ​ထဲ​မှာ မာရိ ပါတယ်။ ယေရှု ထမြောက်​ပြီ ဖြစ်ကြောင်း တမန်တော်တွေကို သွား​ပြောဖို့​တောင် တာဝန်​ပေး​ခံရတယ်။ ယေဟောဝါ​အတွက် သိပ်တန်ဖိုးရှိတယ်​လို့ မာဂဒလမာရိ ခံစားရအောင် ယေရှု ကူညီပေး​လိုက်တာပါပဲ။—ယော. ၂၀:၁၁-၁၈။

^၁၂ မာဂဒလမာရိ​လိုပဲ ဒီနေ့ခေတ်မှာ လူများစွာဟာ ကိုယ့်ကို ချစ်ခင်​မယ့်​သူ မရှိဘူးလို့ ခံစားကြရတယ်။ စပိန်​နိုင်ငံက ညီအစ်မ လေးဒီယာ​အကြောင်း သုံးသပ်ကြည့်ပါ။ သူ့ကို ကိုယ်ဝန်ဆောင်​ထား​တုန်း အမေဖြစ်သူက ဖျက်​ချဖို့ လုပ်တယ်။ ဖျက်​မ​ချ​ဖြစ်​ဘဲ မွေး​လာတော့လည်း ဂရုမစိုက်ဘဲ ပစ်ထား​တယ်။ စိတ်ဒဏ်ရာ​ရစေမယ့်​စကားတွေ ပြောတယ်။ “‘ဘဝ​ပန်းတိုင်က ဘာလဲ’ လို့ အမေး​ခံရတဲ့အခါ ‘လူတွေရဲ့ ချစ်ခင်​နှစ်သက်မှု ရဖို့​ပါ’ လို့ ဖြေ​မိ​တဲ့​အထိ မေတ္တာ​ငတ်​ခဲ့​တာ။ ကိုယ့်ကို ဒုက္ခ​အိုး​တစ်ယောက်လို အမေ ပြောဆို​ဖန်​များတော့ တကယ်ပဲ လူ​ချစ်​မခံရ​မှာ ကြောက်မိတယ်” လို့ လေးဒီယာ ပြောတယ်။

^၁၃ လေးဒီယာ အမှန်တရား သိလာ​တော့ အမြင်​ပြောင်းသွားတယ်။ ယေဟောဝါဆီ ဆုတောင်းလို့၊ ကျမ်းစာဖတ်​လို့၊ ညီအစ်ကို/မတွေ မေတ္တာ​ပြ​ကြ​လို့ ယေဟောဝါ​အတွက် မိမိ သိပ်တန်ဖိုးရှိမှန်း သိလာတယ်။ “ကျွန်မ​ခင်ပွန်း​က ကျွန်မကို သိပ်ချစ်တဲ့​အကြောင်း တဖွဖွ ပြောတယ်။ ကျွန်မရဲ့ ကောင်းကွက်တွေ​ကို အမြဲ​ချီးကျူး​တယ်။ ညီအစ်ကို/မတွေ​လည်း အဲဒီလိုပဲ” လို့ လေးဒီယာ ပြောတယ်။ ယေဟောဝါ​အတွက် တန်ဖိုး​ရှိတယ်လို့ ခံစားရအောင် သင် ကူညီပေးနိုင်သူ တစ်ယောက်ယောက်ကို စဉ်းစားမိ​သလား။

ကိုယ့်ကို ယေဟောဝါ မြင်သလို မြင်တတ်​လာနိုင်​ပုံ

^၁၄ သင့်ကို လောကက လူတွေ မြင်သလို ယေဟောဝါ မ​မြင်​ကြောင်း သတိရပါ။ (၁ ရှမွေလ ၁၆:၇ ကို ဖတ်ပါ။) ရုပ်သွင်၊ ပိုင်ဆိုင်မှု၊ ပညာရေး​ကို ကြည့်ပြီး သင့်​တန်ဖိုးကို ယေဟောဝါ မ​ပိုင်းဖြတ်​ဘူး။ (ဟေရှာ. ၅၅:၈၊ ၉) ဒါကြောင့် သင်လည်း လောက​စံနှုန်းနဲ့ မဟုတ်ဘဲ ယေဟောဝါရဲ့ စံနှုန်းနဲ့ သင့်​တန်ဖိုးကို တိုင်းတာ​ပါ။ ကိုယ့်ကိုယ်ကိုယ် တန်ဖိုး​မရှိဘူးလို့ ခံစားခဲ့ရတဲ့ ဧလိယ၊ နောမိ၊ ဟန္န​တို့ကို ယေဟောဝါ တန်ဖိုးထားကြောင်း ဖော်ပြတဲ့ ကျမ်းမှတ်တမ်းတွေ ဖတ်ပါ။ သင့်ကို ယေဟောဝါ ချစ်ခင်​တန်ဖိုးထားကြောင်း ပေါ်လွင်​တဲ့ ကိုယ်ပိုင်​အတွေ့အကြုံတွေ ချရေးထားပါ။ လူ့​တန်ဖိုးအကြောင်း ဆွေးနွေးထားတဲ့ အဖွဲ့အစည်း​စာပေတွေ ရှာ​ဖတ်ပါ။c

^၁၅ ကိုယ့်ရဲ့ သစ္စာရှိမှုကို ယေဟောဝါ တန်ဖိုးထားကြောင်း စိတ်ချပါ။ အသက် ၁၀၀ နီးပါး ရှိနိုင်​ပြီ ဖြစ်တဲ့ ပရောဖက် ဒံယေလဟာ စိတ်ဓာတ်ကျပြီး “အကြီးအကျယ် နွမ်းလျ​နေတယ်။” (ဒံ. ၉:၂၀၊ ၂၁) ဒါနဲ့ ယေဟောဝါ ဘယ်လို အားပေးသလဲ။ ဒံယေလဟာ “သိပ်တန်ဖိုးထားရတဲ့သူ” ဖြစ်ကြောင်း၊ သူ့​ဆုတောင်းသံ​တွေ​ကို မိမိ ကြား​ကြောင်း ကောင်းကင်တမန် ဂါဗြေလ​ကို သွား​ပြော​ခိုင်းတယ်။ (ဒံယေလ ၉:၂၃ ကို ဖတ်ပါ။) ဒံယေလကို ယေဟောဝါ ဘာကြောင့် သိပ်​တန်ဖိုးထားသလဲ။ ဖြောင့်မတ်မှုကို မြတ်နိုး​လို့၊ သစ္စာရှိလို့​ပဲ။ (ယေဇ. ၁၄:၁၄) ကျွန်တော်တို့အတွက် နှစ်သိမ့်မှု ဖြစ်စေဖို့ ဒီ​မှတ်တမ်းကို ကျမ်းစာမှာ ယေဟောဝါ ထည့်သွင်း​ထားတာ။ (ရော. ၁၅:၄) ဖြောင့်မတ်မှုကို မြတ်နိုးတဲ့၊ သစ္စာရှိရှိ အမှုဆောင်နေတဲ့ သင့်ကိုလည်း ယေဟောဝါ သိပ်တန်ဖိုးထားတယ်။ သင့်​ဆုတောင်းသံ​တွေ​ကို ကြားတယ်။—မိ. ၆:၈။ ဟီ. ၆:၁၀။

^၁၆ ယေဟောဝါကို မေတ္တာပြည့်ဝတဲ့ ဖခင်လို့ မြင်ပါ။ ယေဟောဝါက သင့်ကို ကူညီပေးချင်တယ်။ အမှား​လိုက်​မ​ရှာ​ဘူး။ (ဆာ. ၁၃၀:၃။ မ. ၇:၁၁။ လု. ၁၂:၆၊ ၇) ဒီအချက်ကို သတိရတာက ကိုယ့်ကိုယ်ကိုယ် တန်ဖိုး​မရှိဘူးလို့ ခံစားရသူ​များစွာ​ကို အားတက်လာ​စေ​တယ်။ စပိန်​နိုင်ငံက ညီအစ်မ အီလီအာနာ​အကြောင်း စဉ်းစားကြည့်ပါ။ စိတ်ဒဏ်ရာ​ရအောင် ခင်ပွန်း​ဖြစ်သူ ပြောဆို​လွန်းလို့ ကိုယ့်ကိုယ်ကိုယ် အချစ်​မခံရဘူး၊ အသုံးမကျဘူးလို့ ခံစားခဲ့ရတယ်။ “အသုံးမကျ​ဘူး​ဆိုတဲ့ ခံစားချက် ဝင်လာပြီ​ဆိုရင် ယေဟောဝါရဲ့ မေတ္တာ​ရင်ခွင်​ထဲ​မှာ ထွေးပိုက်​ခံထားရ​တယ်​ဆိုပြီး ကိုယ့်ကိုယ်ကိုယ် မြင်ယောင်​ကြည့်လိုက်​တယ်” လို့ အီလီအာနာ ပြောတယ်။ (ဆာ. ၂၈:၉) တောင်အာဖရိကမှာ နေတဲ့ ညီအစ်မ လော်ရန်​လည်း ဒီလိုပြောတယ်– “ကျွန်မကို မေတ္တာ​ကြိုး​နဲ့ ယေဟောဝါ ညင်ညင်သာသာ ဆွဲငင်​ခဲ့တယ်၊ နှစ်တွေ​တစ်လျှောက်​လည်း မေတ္တာ​ကြိုး​နဲ့ ဆက်​ရစ်ပတ်​ထားတယ်၊ တခြားသူတွေကို သွန်သင်ပေးဖို့​တောင် သုံး​နေတယ်​ဆိုမှတော့ ကျွန်မကို သေချာပေါက် ချစ်ပြီး တန်ဖိုးထားလို့​ပဲ​ပေါ့။”—ဟော. ၁၁:၄။

^၁၇ ယေဟောဝါရဲ့ မျက်နှာသာ ရထားကြောင်း စိတ်ချပါ။ (ဆာလံ ၅:၁၂ ကို ဖတ်ပါ။) ယေဟောဝါရဲ့ မျက်နှာသာ​ဟာ “ဒိုင်းလွှား​ကြီး​လို” ဖြောင့်မတ်သူတွေကို ကာကွယ်ပေးတယ်​လို့ ဒါဝိဒ် ပြောတယ်။ တန်ဖိုး​မရှိဘူးဆိုတဲ့ အတွေး​နဲ့ ကိုယ့်ကိုယ်ကိုယ် ထိုးနှက်​မိ​ချိန်​မှာ ယေဟောဝါရဲ့ မျက်နှာသာ ရထားတယ်​ဆိုတဲ့​အသိ​က ဒိုင်းလွှား​ကြီး​လို ကာကွယ်ပေးတယ်။ ယေဟောဝါရဲ့ မျက်နှာသာ ရထားကြောင်း ဘယ်လို သိရသလဲ။ ကျွန်တော်တို့ကို သိပ်​တန်ဖိုးထားကြောင်း ကျမ်းစာကတစ်ဆင့် ယေဟောဝါ ပြောတယ်။ သိပ်​တန်ဖိုးထားကြောင်း အကြီးအကဲတွေ၊ ညီအစ်ကို/မတွေကို သုံးပြီး သတိပေးတယ်။ ဒါဆိုရင် တစ်ယောက်ယောက် အားပေး​စကား ပြော​လာတဲ့အခါ ဘယ်လို တုံ့ပြန်သင့်သလဲ။

^၁၈ ကိုယ့်ကို ချစ်ခင်​သူ​တွေ စိတ်ရင်းမှန်နဲ့ ချီးမွမ်း​လာတဲ့အခါ ‘မဟုတ်​ရ​ပါ​ဘူး’ ဆိုပြီး မငြင်း​ပါ​နဲ့။ မိမိရဲ့ မျက်နှာသာ ရထားကြောင်း သင် သိစေဖို့ သူတို့ကို ယေဟောဝါ သုံး​နေတာ ဖြစ်နိုင်တယ်။ အစောပိုင်းမှာ ဖော်ပြခဲ့တဲ့ အီလီအာနာ အခုလို​ပြောတယ်– “ချီးမွမ်း​စကားတွေကို တဖြည်းဖြည်း လက်ခံတတ်​လာပါပြီ။ မကောင်း​ပြောတာ​ပဲ ကြားခဲ့​ရတော့ ကိုယ့်​မှာ ကောင်းကွက်တွေ ရှိတယ်ဆိုတာ ယုံဖို့ ခက်နေတာ။ ဒါပေမဲ့ ယေဟောဝါ ယုံကြည်​လက်ခံ​စေချင်​မှန်း ကျွန်မ သိတယ်။” အကြီးအကဲတွေ မေတ္တာပါပါ ကူညီပေးလို့​လည်း ယေဟောဝါ​အတွက် မိမိ သိပ်တန်ဖိုးရှိမှန်း အီလီအာနာ သိနေ​ပြီ။ အခုဆိုရင် ရှေ့ဆောင်​လုပ်ရင်း ဗေသလအတွက်​လည်း အိမ်ကနေ အလုပ်လုပ်​ပေးနေတယ်။

^၁၉ ကောင်းကင်ဘုံစံ​အဖ​အတွက် ကျွန်တော်တို့ သိပ်တန်ဖိုးရှိတယ်​ဆိုတာ ဘာကြောင့် စိတ်ချနိုင်သလဲ။ ယေရှု အာမခံ​ထားလို့ပါ​ပဲ။ (လု. ၁၂:၂၄) ယေဟောဝါ​အတွက် တန်ဖိုး​ရှိတယ်ဆိုတာ ကိုယ်တိုင် လက်ခံ​သလို တခြားသူတွေ​လည်း လက်ခံတတ်​လာအောင် အတတ်နိုင်ဆုံး ကူညီပေးကြ​ရအောင်။