တခြားသူတွေ​အတွက် သတိတရ ဆုတောင်းပေးကြပါ

ဆုတောင်းခြင်း​ဟာ အဖိုးတန် လက်ဆောင်ပါ။ စဉ်းစားကြည့်ပါ– ကောင်းကင်တမန်တွေကို ယေဟောဝါ​ဘုရား တာဝန်​တချို့ ပေးထားတယ်။ (ဆာ. ၉၁:၁၁) သားတော်ကို​လည်း အရေးကြီး​တာဝန်တွေ လွှဲအပ်​ထားတယ်။ (မ. ၂၈:၁၈) ဆုတောင်းသံ​တွေ နားထောင်ဖို့​ကော ဘယ်သူ့ကို တာဝန်​ပေးထားသလဲ။ ဘယ်သူ့ကိုမှ ပေးမထားဘူး။ ယေဟောဝါ​ကိုယ်တိုင် နားထောင်တယ်။ ယေဟောဝါဟာ “ဆုတောင်းသံ​ကို နားထောင်တဲ့​အရှင်” ဖြစ်တယ်။—ဆာ. ၆၅:၂။

^၂ ကိုယ့်အတွက် ဆုတောင်း​သလို တခြားသူတွေ​အတွက်​လည်း ဆုတောင်း​ပေးသင့်တယ်။ တမန်တော် ပေါလုရဲ့ စံနမူနာကို သုံးသပ်ကြည့်ပါ။ “ခင်ဗျားတို့အတွက် အမြဲ ဆုတောင်းပါတယ်” ဆိုပြီး ဧဖက်​အသင်းတော်ဆီ စာရေးတယ်။ (ဧ. ၁:၁၆) တစ်ယောက်ချင်းစီ​အတွက်​လည်း ဆုတောင်းပေးတယ်။ ဥပမာ၊ “မင်းကို သတိရပြီး နေ့​ည​မပြတ် တိုးလျှိုး​အသနားခံ​တဲ့​အခါတိုင်း ဘုရားသခင်ကို ကျေးဇူးတင်​မိတယ်” လို့ တိမောသေကို ပြောတယ်။ (၂ တိ. ၁:၃) ပေါလုမှာ သူ့​အပူ​နဲ့​သူ ဆုတောင်း​စရာ အများကြီး ရှိတယ်။ (၂ ကော. ၁၁:၂၃။ ၁၂:၇၊ ၈) ဒါပေမဲ့ တခြားသူတွေ​အတွက် ဆုတောင်းပေးတယ်။

^၃ တခြားသူတွေ​အတွက် ဆုတောင်းပေးဖို့ ကျွန်တော်တို့ တစ်ခါတလေ မေ့​သွားနိုင်တယ်။ ဘာကြောင့်လဲ။ အကြောင်းရင်း​တစ်ခု​နဲ့​ပတ်သက်ပြီး ညီအစ်မ ဆာဘရီးနာa ဒီလိုပြောတယ်– “အားလုံးက ကိုယ့်​ကိစ္စနဲ့​ကိုယ် လုံးလည်​လိုက်နေ​ကြ​တာ။ ကိုယ့်အတွက် ဆုတောင်း​ရတာနဲ့​တင် တခြားသူတွေ​အတွက် ဆုတောင်းဖို့ အာရုံ​မရောက်တော့ဘူး။” သင်​ကော တစ်ခါတလေ အဲဒီလို​ဖြစ်သွား​တတ်​သလား။ ဒါဆိုရင် ဒီဆောင်းပါး​က သင့်အတွက် အကူအညီ ဖြစ်နိုင်တယ်။ (၁) တခြားသူတွေ​အတွက် ဆုတောင်းပေးဖို့ ဘာကြောင့် အရေးကြီးသလဲ၊ (၂) ဘယ်လို ဆုတောင်းပေးနိုင်​သလဲ​ဆိုတာ ဒီဆောင်းပါးမှာ ဆွေးနွေး​သွားပါမယ်။

တခြားသူတွေ​အတွက် ဘာကြောင့် ဆုတောင်းပေး​ရမလဲ

^၄ တခြားသူတွေ​အတွက် ဆုတောင်းပေးတာ​ဟာ “အစွမ်းထက်ပြီး အကျိုးသက်ရောက်မှု ရှိတယ်။” (ယာကုပ် ၅:၁၆ ကို ဖတ်ပါ။) ကျွန်တော်တို့ ဆုတောင်းပေး​လိုက်လို့ တခြားသူတွေရဲ့ အခြေအနေ ပြောင်းလဲသွားတာ​မျိုး ဖြစ်နိုင်​သလား။ ဖြစ်နိုင်တယ်။ မိမိကို တမန်တော် ပေတရု ငြင်းပယ်​တော့မယ်​ဆိုတာ ယေရှု သိနေတဲ့​အတွက် “ခင်ဗျားရဲ့ ယုံကြည်ခြင်း အားမနည်း​သွား​အောင် ကျွန်တော် တိုးလျှိုး​အသနားခံ​ထားတယ်” လို့ ပြောတယ်။ (လု. ၂၂:၃၂) ဆုတောင်းပေးတာ​က အခြေအနေ​တစ်ခုကို ပြောင်းလဲသွား​စေနိုင်​မှန်း ပေါလုလည်း သိတယ်။ ပေါလု ရောမ​မြို့မှာ မတရား​ထောင်ချ​ခံ​ရတုန်း​က “ခင်ဗျားတို့ရဲ့ ဆုတောင်းချက်​ကြောင့် မကြာခင် လွတ်မြောက်ပြီး ခင်ဗျားတို့ဆီ ရောက်လာဖို့ မျှော်လင့်တယ်” ဆိုပြီး ဖိလေမုန်​ဆီ စာရေးတယ်။ (ဖိ​လေ. ၂၂) တကယ်လည်း သိပ်မကြာခင်မှာပဲ ပေါလု ထောင်က လွတ်လာပြီး ပြန်​ဟောပြော​လာနိုင်တယ်။

^၅ မိမိ​ကျေးကျွန်တွေ ဘာအတွက် ဘယ်လောက် စိုးရိမ်​ပူပန်​ပြီး ဆုတောင်းသလဲ ယေဟောဝါ သတိပြုမိတယ်။ တောင်းတဲ့​အတိုင်း ဖြည့်ဆည်းပေး​တဲ့​အချိန်တွေ ရှိတယ်။ ဒါကြောင့် ကိစ္စ​တစ်ခု​နဲ့ပတ်သက်ပြီး စိတ်အား​ထက်သန်စွာ ဆုတောင်း​ပြီးပြီ​ဆိုရင် ယေဟောဝါ အကောင်းဆုံး ဖြေကြား​ပေးမယ်​ဆိုတာ စိတ်ချရင်း လက်တော်​ထဲ အပ်​ထားနိုင်တယ်။ (ဆာ. ၃၇:၅။ ၂ ကော. ၁:၁၁) ဒါပေမဲ့ ဆုတောင်းတိုင်း ယေဟောဝါ အကုန်​ဖြည့်ဆည်းပေးမယ်လို့​တော့ မဆိုလိုဘူး။

^၆ ဆုတောင်းပေးတာ​က တခြားသူတွေကို “ချစ်ခင်​စာနာ” တတ်လာ​စေ​တယ်။ (၁ ပေတရု ၃:၈ ကို ဖတ်ပါ။) စာနာ​တယ်​ဆိုတာ တခြားသူတွေရဲ့ ဒုက္ခ​ကို သတိထားမိပြီး ကူညီပေးချင်တဲ့​ဆန္ဒ ရှိတာကို ဆိုလိုတယ်။ (မာ. ၁:၄၀၊ ၄၁) “တခြားသူတွေ​အတွက် ဆုတောင်းပေး​တော့​မှ​ပဲ သူတို့ ဘယ်လောက် ခက်ခဲ​သလဲ ပိုနားလည်လာတယ်။ သူတို့ကို ပိုချစ်လာတယ်။ သူတို့ သတိထားမိ​မလား​တော့ မသိပေမဲ့ သူတို့နဲ့ ပိုရင်းနှီး​သွား​သလိုပဲ” ဆိုပြီး အကြီးအကဲ ညီအစ်ကို မိုက်ကယ် ပြောတယ်။ အကျိုးကျေးဇူး နောက်​တစ်ခု​အကြောင်း အကြီးအကဲ ညီအစ်ကို ရစ်ချက် ဒီလိုပြောတယ်– “တစ်ယောက်ယောက်​အတွက် ဆုတောင်းပေးတဲ့​အခါ သူ့အတွက် တစ်ခုခု လုပ်ပေး​ချင်လာ​တတ်တယ်။ ကိုယ်​ဆုတောင်းပေး​သူကို လက်တွေ့ကျကျ ကူညီပေးတာ​ဟာ သူ့အတွက် ကိုယ့်​ဆုတောင်း ပြည့်​ဖို့ တစ်ဖက်​တစ်လမ်း​ကနေ ကူညီ​လိုက်တာပဲ။”

^၇ တခြားသူတွေ​အတွက် ဆုတောင်းပေးတာ​က ကိုယ့်​အခက်အခဲ​ကို​ပဲ အာရုံမစိုက်​မိ​ဖို့ ကူညီပေးတယ်။ (ဖိလိပ္ပိ ၂:၃၊ ၄ ကို ဖတ်ပါ။) တစ်လောက​လုံး မာရ်နတ်ရဲ့ ဩဇာ​အောက်မှာ ရှိနေလို့ ယောက်တိုင်း​မှာ အခက်အခဲ​ကိုယ်စီ ရှိတယ်။ (၁ ယော. ၅:၁၉။ ဗျာ. ၁၂:၁၂) တခြားသူတွေ​အတွက် ဆုတောင်းပေး​တဲ့​အကျင့် ရှိတာက “ကမ္ဘာတစ်ဝန်းမှာ ရှိတဲ့ ညီအစ်ကို​အသင်းအပင်း တစ်ရပ်လုံး​လည်း ဆင်းရဲဒုက္ခ​ကို ထပ်တူ ခံစား​နေ​ရ​မှန်း” သတိရစေတယ်။ (၁ ပေ. ၅:၉) “တခြားသူတွေ​အတွက် ဆုတောင်းပေး​တော့​မှ​ပဲ သူတို့မှာ​လည်း အခက်အခဲ ရှိပါ​လား​ဆိုတာ သတိ​ရလာတယ်။ ဒီတော့ ကိုယ့်​အခက်အခဲ​ကို​ပဲ အလွန်အမင်း အာရုံ​မစိုက်​မိ​တော့​ဘူး” လို့ ရှေ့ဆောင် ညီအစ်မ ကက်သရင်း ပြောတယ်။

ကျွန်တော်တို့ ဆုတောင်းပေး​ရမယ့်​သူ​တွေ

^၈ ဘယ်သူတွေ​အတွက် ဆုတောင်းပေးနိုင်​သလဲ။ ကျောင်းမှာ ရွယ်တူချင်း​တွေ လှောင်ပြောင်တာ၊ အမှား​လုပ်ဖို့ သွေးဆောင်​တာ ခံနေရတဲ့ လူငယ်တွေ၊ နေထိုင်​မကောင်းသူ​တွေ၊ ဇရာထောင်း​လာ​သူ​တွေ စသဖြင့် အုပ်စုလိုက်​အတွက် ဆုတောင်းပေးနိုင်တယ်။ ညီအစ်ကို/မ​များစွာဟာ မိသားစုဝင်တွေ ဆန့်ကျင်တာ၊ အစိုးရ​အာဏာပိုင်တွေ ဖိနှိပ်​တာ ခံကြရတယ်။ (မ. ၁၀:၁၈၊ ၃၆။ တ. ၁၂:၅) တချို့က နိုင်ငံရေး မငြိမ်သက်မှု​ကြောင့် နေရပ်​စွန့်ခွာ​ကြရတယ်။ တချို့ကျတော့ သဘာဝဘေးကြောင့် ဒုက္ခရောက်ကြတယ်။ အဲဒီ​ညီအစ်ကို/မတွေကို ကျွန်တော်တို့ လူ​ချင်း သိချင်​မှ သိမယ်။ ဒါပေမဲ့ သူတို့​အတွက် ဆုတောင်းပေးတာ​ဟာ “အချင်းချင်း ချစ်ကြပါ” ဆိုတဲ့ ယေရှုရဲ့ မိန့်မှာချက်ကို လိုက်နာတာ​ပဲ။—ယော. ၁၃:၃၄။

^၉ အဖွဲ့အစည်းကို ဦးဆောင်နေသူတွေ​အတွက်​လည်း ဆုတောင်းပေးနိုင်တယ်။ အဲဒီထဲမှာ အုပ်ချုပ်ရေး​အဖွဲ့နဲ့ အကူ​တွေ၊ ဌာနခွဲ​ကော်မတီဝင်တွေ၊ ဌာနခွဲရုံးက ဌာန​ကြီးကြပ်မှူးတွေ၊ တိုက်နယ်​ကြီးကြပ်မှူးတွေ၊ အသင်းတော်​အကြီးအကဲတွေ၊ အသင်းတော်​အမှုထမ်းတွေ ပါတယ်။ ညီအစ်ကိုများ​စွာ​ဟာ သူ့​စိုးရိမ်​ပူပန်​စရာ​နဲ့​သူ ရှိတဲ့​ကြား​က ကျွန်တော်တို့​အတွက် ကိုယ်ကျိုးမငဲ့ ပေးဆက်​နေကြတာ။ (၂ ကော. ၁၂:၁၅) ဥပမာ၊ “အဝေးမှာ အမှုဆောင်​နေ​ရတော့ သက်ကြီး​မိဘတွေ​အတွက် နောက်ဆံတင်း​တယ်။ မိဘ​နှစ်ပါး​စလုံး ကျန်းမာရေး ကောင်း​ကြ​တာ မဟုတ်ဘူး။ မိဘတွေကို အစ်မတို့​လင်မယား​က​ပဲ ပြုစု​စောင့်ရှောက်ပေး​နေကြတာ။ ကိုယ်တိုင်​ကိုယ်ကျ မပြုစု​နိုင်​လို့ စိတ်မကောင်း​ဖြစ်​မိတယ်” လို့ တိုက်နယ်​ကြီးကြပ်မှူး မာ့ခ် ပြောတယ်။ အလုပ်​ကြိုးစားတဲ့ ဒီညီအစ်ကိုတွေ​မှာ ဘယ်လို စိုးရိမ်​ပူပန်​စရာ​တွေ ရှိနေမှန်း သိသည်​ဖြစ်စေ၊ မသိသည်​ဖြစ်စေ သူတို့​အတွက် သတိတရ ဆုတောင်း​ပေးသင့်တယ်။ (၁ သက်. ၅:၁၂၊ ၁၃) ညီအစ်ကိုတွေ တာဝန် ဆက်​ထမ်းဆောင်နိုင်ဖို့ ထောက်မပေး​နေတဲ့ ဇနီးတွေ​အတွက်​လည်း ဆုတောင်းပေးနိုင်တယ်။

^၁၀ ဆွေးနွေးခဲ့တဲ့​အတိုင်း ဘယ်သူ​ဘယ်ဝါ​အတွက်​ရယ်​လို့ မဟုတ်ဘဲ ထောင်ကျနေသူတွေ၊ ချစ်ရသူ ဆုံးပါး​သွား​လို့ နှစ်သိမ့်မှု လိုအပ်​နေ​သူ​တွေ​အတွက် ခြုံပြီး ဆုတောင်းပေးနိုင်တယ်။ “ဒုက္ခရောက်နေတဲ့ ညီအစ်ကို/မတွေ အများကြီး​ပဲ။ ဒါကြောင့် အားလုံး​အတွက် ပါ​သွား​အောင် ခြုံပြီး ဆုတောင်းပေးတယ်” လို့ အကြီးအကဲ ညီအစ်ကို ဒေါ်နယ်လ် ပြောတယ်။

^၁၁ အဲဒီလို​ဆုတောင်းချက်တွေကို ယေဟောဝါ နှစ်သက်​သလား။ နှစ်သက်တယ်။ ဘာကြောင့် အဲဒီလို​ပြောနိုင်သလဲ။ အဲဒီလို​ဆုတောင်းပေးတာ​က “ညီအစ်ကို​အသင်းအပင်း တစ်ရပ်လုံး​ကို ချစ်” ကြောင်း ပြရာရောက်တယ်။ (၁ ပေ. ၂:၁၇) ဒါ့အပြင် ညီအစ်ကို/မ တစ်ယောက်ချင်းစီ ဘာလိုအပ်နေတယ်​ဆိုတာ ကျွန်တော်တို့ အမြဲ မသိနိုင်ဘူး။ ဒါကြောင့် အုပ်စုလိုက်အတွက် ဆုတောင်းပေးတာ သင့်တော်ပါတယ်။—ယော. ၁၇:၂၀။ ဧ. ၆:၁၈။

တစ်ယောက်ချင်းစီ​အတွက် ဆုတောင်းပေးပါ

^၁၂ မျက်စိရှင်ရှင် ထားပါ။ ညီအစ်ကို/မ အုပ်စုလိုက်​အတွက် ဆုတောင်းပေး​တဲ့​အပြင် တစ်ယောက်ချင်းစီ​အတွက်​လည်း နာမည်​တပ်ပြီး ဆုတောင်း​ပေးသင့်တယ်။ သင့်အသင်းတော်မှာ နာတာရှည်​ရောဂါ ခံစား​နေ​ရသူ ရှိသလား။ ကျောင်းတွင်း သွေးဆောင်မှု များလွန်းလို့ စိတ်ဓာတ်ကျ​နေတဲ့ လူငယ်​တစ်ယောက်ယောက် ရှိသလား။ “ယေဟောဝါ မိန့်မှာတဲ့အတိုင်း [သားသမီး] ကို ဆုံးမ​သွန်သင်​ပြီး ပြုစုပျိုးထောင်” နေတဲ့ ကြင်ဖော်မဲ့​မိဘ ရှိသလား။ (ဧ. ၆:၄) အကင်းပါး​မယ်​ဆိုရင် တခြားသူတွေကို ပို​စာနာ​တတ်လာ​ပြီး သူတို့အတွက် ဆုတောင်းပေး​ချင်လာ​မယ်။b—ရော. ၁၂:၁၅။

^၁၃ နာမည်​တပ်ပြီး ဆုတောင်းပေးပါ။ လူ​ချင်း မသိ​သူ​တွေ​အတွက်​တောင် နာမည်တပ်ပြီး ဆုတောင်းပေးနိုင်တယ်။ ဥပမာ၊ ခရိုင်းမီးယား၊ အီရီထရီးယား၊ ရုရှား၊ စင်္ကာပူ စတဲ့ နိုင်ငံ​ဒေသတွေမှာ ထောင်ကျ​နေတဲ့ ညီအစ်ကို/မတွေ​အကြောင်း စဉ်းစားကြည့်ပါ။ သူတို့ရဲ့ နာမည်ကို jw.org မှာ ရှာ​ကြည့်​နိုင်တယ်။c “ထောင်ကျ​နေတဲ့ ညီအစ်ကို/မ​တစ်ယောက်ရဲ့ နာမည်ကို ချ​ရေးပြီး အသံထွက်​ကြည့်တယ်။ ဒီတော့ သူ့နာမည်ကို မှတ်မှတ်ရရ ဖြစ်နေ​ပြီး ဆုတောင်းတဲ့​အခါ သူ့အတွက် ထည့်​တောင်း​ဖြစ်သွားတယ်” လို့ တိုက်နယ်​ကြီးကြပ်မှူး ဘရိုင်ယန် ပြောတယ်။

^၁၄ သတ်သတ်မှတ်မှတ် ဆုတောင်းပေးပါ။ “ထောင်ကျ​နေတဲ့ ညီအစ်ကိုတွေ​အကြောင်း jw.org မှာ ဖတ်တဲ့​အခါ သူတို့​နေရာမှာ ကိုယ်သာ​ဆိုရင် ဘယ်လိုများ နေမလဲလို့ စဉ်းစား​လိုက်တယ်။ မိန်းမ​အတွက် စိတ်ပူ​မှာ​ပဲ။ သူ့ကို အဆင်ပြေပြေ​လေး ကျန်​နေ​ခဲ့​စေ​ချင်မှာပဲ။ အဲဒီလို​စဉ်းစား​လိုက်တော့ ထောင်ကျ​နေတဲ့ အိမ်ထောင်သည် ညီအစ်ကိုတွေ​အတွက် သတ်သတ်မှတ်မှတ် ဘာ​ဆုတောင်းပေး​ရမလဲ​ဆိုတာ ခေါင်းထဲ ပေါ်လာတယ်” လို့ အစောပိုင်းမှာ ဖော်ပြခဲ့တဲ့ ညီအစ်ကို မိုက်ကယ် ပြောတယ်။—ဟီ. ၁၃:၃၊ အောက်ခြေမှတ်ချက်။

^၁၅ ထောင်ထဲမှာ ညီအစ်ကိုတွေ တစ်နေ့​တစ်နေ့ ဘယ်လို ဖြတ်သန်း​ကြ​ရသလဲ စဉ်းစား​ကြည့်လိုက်တဲ့အခါ​လည်း သတ်သတ်မှတ်မှတ် ဆုတောင်းပေးနိုင်​တဲ့​အချက်တွေ တွေ့​လာတယ်။ ဥပမာ၊ ညီအစ်ကိုတွေ​အပေါ် ထောင်စောင့်တွေ ကောင်း​ဖို့၊ လွတ်လွတ်လပ်လပ် ဝတ်ပြုခွင့် အာဏာပိုင်တွေ ပေးဖို့ ဆုတောင်းနိုင်တယ်။ (၁ တိ. ၂:၁၊ ၂) ထောင်ကျ​နေတဲ့ သစ္စာရှိ ညီအစ်ကိုတွေရဲ့ စံနမူနာ​ကြောင့် အသင်းတော်က ညီအစ်ကို/မတွေ အားရှိ​ကြ​ဖို့ ဆုတောင်းနိုင်တယ်။ ဒါမှမဟုတ် ထောင်ကျ​နေတဲ့ ညီအစ်ကိုတွေရဲ့ အမူ​အကျင့်ကောင်းကို မယုံကြည်သူတွေ သတိထားမိပြီး သတင်းကောင်း နားထောင်ချင်​လာဖို့ ဆုတောင်းနိုင်တယ်။ (၁ ပေ. ၂:၁၂) တခြား​အခက်အခဲ ကြုံနေရတဲ့ ညီအစ်ကို/မတွေ​အတွက် ဆုတောင်းပေးတဲ့အခါ​လည်း ဒီ​နည်းတွေအတိုင်း လုပ်နိုင်ပါတယ်။ မျက်စိရှင်ရှင် ထားတာ၊ နာမည်​တပ်ပြီး ဆုတောင်းပေးတာ၊ သတ်သတ်မှတ်မှတ် ဆုတောင်းပေးတာ​က ‘အချင်းချင်း​ကို ချစ်တဲ့​မေတ္တာ တိုးပွား​များပြား’ နေ​စေ​ကြောင်း ပြတာပဲ။—၁ သက်. ၃:၁၂။

ကျိုးနွံမှု ရှိပါ

^၁၆ သိခဲ့​ရတဲ့​အတိုင်း ကျွန်တော်တို့ ဆုတောင်းပေး​လိုက်လို့ တစ်ယောက်ယောက်ရဲ့ အခြေအနေ ပြောင်းလဲသွားတာ​မျိုး ဖြစ်နိုင်တယ်။ ဒါပေမဲ့ ကျွန်တော်တို့ ကျိုးနွံမှု ရှိရမယ်။ ဆုတောင်းတယ်​ဆိုတာ ယေဟောဝါ မသိသေးတဲ့ ကိစ္စ​တစ်ခုခုကို အသိပေးတာ မဟုတ်ဘူး။ ဒီကိစ္စကို ဘယ်လို ကိုင်တွယ်​ရင် အကောင်းဆုံး ဖြစ်မယ်ဆိုပြီး အကြံ​ပေးတာ​လည်း မဟုတ်ဘူး။ မိမိ​ကျေးကျွန်တွေ ဘာလိုအပ်သလဲ ယေဟောဝါ သိတယ်။ ကာယကံရှင်​ဖြစ်ဖြစ်၊ ကျွန်တော်တို့​ဖြစ်ဖြစ် မသိခင်ကတည်းက သိနေတာ။ (မဿဲ ၆:၈ ကို ဖတ်ပါ။) ဒါဆိုရင် တခြားသူတွေ​အတွက် ကျွန်တော်တို့ ဘာကြောင့် ဆုတောင်းပေးကြ​သလဲ။ ဆွေးနွေး​ခဲ့​ပြီးတဲ့ အကြောင်းရင်းတွေ​အပြင် အကြောင်းရင်း နောက်တစ်ခု ရှိတယ်။ ဆုတောင်းပေးတာ​ဟာ အချင်းချင်း ဂရုစိုက်ကြောင်း ပြတဲ့​နည်း ဖြစ်လို့​ပါပဲ။ ကျွန်တော်တို့ အချင်းချင်း ချစ်လို့ ဆုတောင်းပေးကြတယ်။ မိမိကို အတုယူပြီး ကျေးကျွန်တွေ မေတ္တာ​ပြတာ မြင်တဲ့အခါ ယေဟောဝါ သိပ်ဝမ်းသာတယ်။

^၁၇ ကျွန်တော်တို့ရဲ့ ဆုတောင်းချက်တွေ​က အခြေအနေ​တစ်ခုကို ပြောင်းလဲသွား​စေ​ပုံ မပေါက်ရင်​တောင် ညီအစ်ကို/မ တွေကို ချစ်ကြောင်း ပြရာရောက်တယ်။ ဒါကို ယေဟောဝါ သတိထားမိတယ်။ သား​တစ်ယောက်၊ သမီး​တစ်ယောက် ရှိတဲ့ မိသားစုကို မြင်ယောင်​ကြည့်ပါ။ သား​ဖြစ်သူ နေမကောင်း ဖြစ်နေတယ် ဆိုပါစို့။ “အစ်ကိုကြီး​အတွက် တစ်ခုခု လုပ်ပေးပါ​ဦး။ သူ တအား​ဖျားနေ​တာ” ဆိုပြီး ဖခင်ကို သမီးလေး ပြောတယ်။ သားဖြစ်သူကို ဖခင် ချစ်တယ်။ နေမကောင်း​မှန်း​လည်း သိတယ်။ နေ​ပြန်ကောင်းအောင်​လည်း ပြုစု​ပေးနေတယ်။ ဒါပေမဲ့ အစ်ကို​အတွက် သမီးလေး စိတ်ပူ​ပြီး အခုလို လာ​တောင်းဆိုတဲ့​အခါ ဖခင် ဘယ်လောက် ပီတိ​ဖြစ်​လိုက်မလဲ။

^၁၈ အဲဒီလိုပဲ အချင်းချင်း ဂရုစိုက်ပေးဖို့၊ ဆုတောင်းပေးဖို့ ကျွန်တော်တို့ကို ယေဟောဝါ တိုက်တွန်း​ထားတယ်။ ကျွန်တော်တို့ဟာ ကိုယ့်အတွက်ပဲ ကြည့်တဲ့​သူ မဟုတ်ကြောင်း၊ ညီအစ်ကို/မတွေကို တကယ်​ချစ်ကြောင်း ကျွန်တော်တို့ရဲ့ ဆုတောင်းချက်တွေ​က ဖော်ပြနေတယ်။ ဒါကို ယေဟောဝါ မှတ်သားထားတယ်။ (၂ သက်. ၁:၃။ ဟီ. ၆:၁၀) ဒါ့အပြင် ကျွန်တော်တို့ရဲ့ ဆုတောင်းချက်တွေ​က တစ်ခါတလေမှာ အခြေအနေ​တစ်ခုကို ပြောင်းလဲသွား​စေ​တာ​လည်း ဖြစ်နိုင်​လို့ တခြားသူတွေ​အတွက် သတိတရ ဆုတောင်းပေးကြ​ရအောင်။