ခိုင်မြဲတဲ့​မေတ္တာတော် ထာဝစဉ် တည်မြဲတယ်

မုန်တိုင်း​ထန်​တဲ့ ပင်လယ်ပြင်​ထဲက လှေ​တစ်စင်း​ကို မြင်ယောင်​ကြည့်ပါ။ လှိုင်းလုံး​ကြီး​တွေ​ပေါ်မှာ လှေ​ဟာ နိမ့်ချည်​မြင့်ချည် လူးလွန့်​နေတယ်။ ကျောက်ဆူး မချ​မချင်း မျော​ချင်​ရာ မျော​နေ​တော့​မှာ။ ကျောက်ဆူး​ချ​လိုက်ရင်​တော့ လှေ​ငြိမ်​သွားမယ်။ လှိုင်း​နဲ့ မျော​ပါ​မသွားတော့ဘူး။

^၂ အခက်အခဲ ကြုံ​ချိန်​မှာ သင်လည်း အဲဒီ​လှေလို ဖြစ်နေနိုင်တယ်။ ခံစားချက်တွေ တက်လိုက်​ကျလိုက် ဖြစ်နေ​မယ်။ ကိုယ့်ကို ယေဟောဝါ​ဘုရား ချစ်ပြီး ထောက်မပေး​နေ​တယ်​လို့ တစ်ရက်​မှာ စိတ်ချလိုက်၊ နောက်​တစ်ရက် ရောက်တော့ ကိုယ်​ကြုံနေရတာ​တွေ ယေဟောဝါ သိတောင် သိရဲ့လား​လို့ သံသယဝင်​လိုက် ဖြစ်နေ​မယ်။ (ဆာ. ၁၀:၁။ ၁၃:၁) မိတ်ဆွေ​တစ်ယောက်ရဲ့ အားပေး​စကားကြောင့် ခဏတစ်ဖြုတ် စိတ်သက်သာသွားတယ်။ (ပညာ. ၁၇:၁၇။ ၂၅:၁၁) မကြာ​ဘူး၊ သံသယဝင်​လာပြန်တယ်။ ကိုယ့်ကို ယေဟောဝါ စွန့်ပစ်​လိုက်ပြီ​လို့​တောင် တွေး​လာနိုင်တယ်။ ဘဝ​မုန်တိုင်းထန်​ချိန်​မှာ ဘယ်လို ကျောက်ဆူး​ချထား​နိုင်သလဲ။ တစ်နည်းအားဖြင့် ကိုယ့်ကို ယေဟောဝါ ချစ်ပြီး ထောက်မပေးမယ်​ဆိုတာ ဘယ်လို စိတ်ချ​မြဲ စိတ်ချ​နေနိုင်သလဲ။

^၃ အခက်အခဲ ကြုံတဲ့အခါ စိတ်​တည်ငြိမ်​နေနိုင်တဲ့ တစ်နည်း​ကတော့ ယေဟောဝါရဲ့ ခိုင်မြဲတဲ့​မေတ္တာတော်​အကြောင်း သတိရခြင်း​ပါပဲ။ (ဆာလံ ၃၁:၇။ ၁၃၆:၁ ကို ဖတ်ပါ။) “ခိုင်မြဲတဲ့​မေတ္တာ” ဆိုတာ နက်ရှိုင်း​ပြီး မပျက်ပြယ်​တဲ့ ချစ်ခင်​တွယ်တာမှု​ကို ဆိုလိုတယ်။ ယေဟောဝါဟာ ခိုင်မြဲတဲ့​မေတ္တာ ပြရာမှာ ပြိုင်စံရှား​ပါပဲ။ “ခိုင်မြဲတဲ့​မေတ္တာနဲ့ သစ္စာတရား ကြီးမားတဲ့​ဘုရား” လို့ ကျမ်းစာမှာ ဖော်ပြထားတယ်။ (ထွ. ၃၄:၆၊ ၇) “ဆုတောင်းသူ အားလုံးအပေါ် ခိုင်မြဲတဲ့​မေတ္တာတော် ကြီးမားလှပါတယ်” လို့လည်း ဆိုထားတယ်။ (ဆာ. ၈၆:၅) သစ္စာရှိ ကျေးကျွန်တွေကို ယေဟောဝါ ဘယ်တော့မှ မစွန့်ပစ်​ဘူး​ဆိုတာ ဒီကျမ်းပိုဒ်တွေက ဖော်ပြနေတယ်။ ယေဟောဝါ သစ္စာရှိတယ်​ဆိုတာ သတိရတာက ဘဝ​မုန်တိုင်း​ထန်​ချိန်​မှာ ကျွန်တော်တို့ကို စိတ်​တည်ငြိမ်​နေ​စေနိုင်တယ်။—ဆာ. ၂၃:၄။

ကိုယ့်ကို ယေဟောဝါ ချစ်တယ်ဆိုတာ အခြေခံ ကျမ်းစာ​သွန်သင်ချက် ဖြစ်ကြောင်း သတိရပါ

^၄ စိတ်​တည်ငြိမ်​နေနိုင်တဲ့ နောက်​တစ်နည်း​ကတော့ ကိုယ့်ကို ယေဟောဝါ ချစ်တယ်​ဆိုတာ အခြေခံ ကျမ်းစာ​သွန်သင်ချက် ဖြစ်ကြောင်း သတိရခြင်း​ပါပဲ။ “အခြေခံ ကျမ်းစာ​သွန်သင်ချက်” လို့ ပြောလိုက်ရင် ဘာကို ပြေးမြင်​မိ​သလဲ။ ဘုရားသခင့်​နာမည်​ဟာ ယေဟောဝါ ဖြစ်တယ်၊ ယေရှုဟာ ဘုရားသခင်ရဲ့ တစ်ဦးတည်းသော သားတော် ဖြစ်တယ်၊ လူသေတွေဟာ ဘာမှ မသိဘူး၊ ပရဒိသု​ကမ္ဘာမြေမှာ လူတွေ ထာဝစဉ် အသက်ရှင်​ရမယ် စတဲ့ ကျမ်းစာကနေ သင်ယူ​သိရှိလာတဲ့ သွန်သင်ချက်တွေကို ပြေးမြင်​မိ​နိုင်တယ်။ (ဆာ. ၈၃:၁၈။ ဒေ. ၉:၅။ ယော. ၃:၁၆။ ဗျာ. ၂၁:၃၊ ၄) အဲဒီ​သွန်သင်ချက်တွေကို သံသယ​မရှိ သင် လက်ခံ​ယုံကြည်တယ်။ ဘာကြောင့်လဲ။ အခြေအမြစ် ခိုင်လုံတဲ့ အမှန်တရား ဖြစ်မှန်း သိသွား​လို့​ပါပဲ။ ကိုယ့်ကို ယေဟောဝါ ချစ်တယ်​ဆိုတာ အခြေခံ ကျမ်းစာ​သွန်သင်ချက် ဖြစ်ကြောင်း လက်ခံမယ်ဆိုရင်​ကော။ ကိုယ်​ကြုံ​နေတာတွေကို ယေဟောဝါ မသိဘူး၊ ဂရုမစိုက်ဘူး​ဆိုတဲ့ သံသယတွေ ဖျောက်ဖျက်​နိုင်​သွားမယ်။

^၅ ကျမ်းစာ​စ​လေ့လာ​တုန်းက သွန်သင်ချက်​အမှားတွေကို စွန့်လွှတ်​နိုင်ဖို့ ဘာလုပ်ခဲ့သလဲ။ သင့်​ဘာသာတရား​က သွန်သင်ပေးတာ​နဲ့ ကျမ်းစာ သွန်သင်ပေးတာ​ကို နှိုင်းယှဉ်​ကြည့်​တာ ဖြစ်နိုင်တယ်။ ဥပမာ၊ ယေရှုဟာ အနန္တ​တန်ခိုးရှင် ဘုရားသခင် ဖြစ်တယ်လို့ သင် ယုံကြည်ခဲ့တယ်​ဆိုပါစို့။ ကျမ်းစာ​လေ့လာတော့ ‘ဒီ​သွန်သင်ချက် တကယ် မှန်ရဲ့လား’ လို့ စဉ်းစား​လာတယ်။ ကျမ်းစာ​အထောက်အထားတွေ ဆန်းစစ်ပြီးနောက်​မှာ အဲဒီ​သွန်သင်ချက် မှားမှန်း သိသွားတယ်။ ဒါနဲ့ သွန်သင်ချက်​အမှားကို စွန့်​လွှတ်လိုက်တယ်။ ယေရှုဟာ “ဖန်ဆင်းရာ​အားလုံးမှာ သားဦး၊” “ဘုရားသခင်ရဲ့ တစ်ဦးတည်းသော​သား” ဖြစ်တယ်​ဆိုတဲ့ သွန်သင်ချက်​အမှန်ကို လက်ခံ​လိုက်တယ်။ (ကော. ၁:၁၅။ ယော. ၃:၁၈) သွန်သင်ချက်​အမှားတွေဟာ “အခိုင်အမာ အမြစ်စွဲနေ” ပြီး ဖြိုဖျက်​ဖို့ ခက်​နိုင်ပါတယ်။ (၂ ကော. ၁၀:၄၊ ၅) ဒါပေမဲ့ သွန်သင်ချက်​အမှားတွေကို ဖြိုဖျက်လိုက်ပြီးနောက် သင် ဘယ်တော့မှ ပြန်​မယုံတော့ဘူး မဟုတ်လား။—ဖိ. ၃:၁၃။

^၆ သင့်ကို ယေဟောဝါ ချစ်တယ်​ဆိုတဲ့ ကျမ်းစာ​သွန်သင်ချက်ကို ယုံကြည်​လက်ခံဖို့​လည်း အဲဒီ​အဆင့်​တွေ​အတိုင်း လုပ်နိုင်တယ်။ အခက်အခဲ ကြုံ​လို့ ယေဟောဝါရဲ့ မေတ္တာကို သံသယ​ဝင်​လာပြီ​ဆိုရင် ‘ငါ့​စဉ်းစားပုံ မှန်ရဲ့လား’ လို့ ကိုယ့်ကိုယ်ကိုယ် မေးကြည့်ပါ။ သင့်​သံသယ​ကို ဒီဆောင်းပါးရဲ့ အဓိက​ကျမ်းချက် ဖြစ်တဲ့ ဆာလံ ၁၃၆:၁ နဲ့ နှိုင်းယှဉ်​ကြည့်လိုက်ပါ။ “ခိုင်မြဲတဲ့​မေတ္တာတော် ထာဝစဉ် တည်မြဲတယ်” ဆိုပြီး ဆာလံ ၁၃၆ မှာ​တင် ၂၆ ကြိမ် ဖော်ပြထားတယ်။ သင် လွယ်လင့်​တကူ လက်ခံခဲ့​တဲ့ ကျမ်းစာ​သွန်သင်ချက်တွေ​လိုပဲ မိမိလူမျိုးကို ယေဟောဝါ ခိုင်မြဲတဲ့​မေတ္တာနဲ့ ချစ်တယ်​ဆိုတာ အခြေခံ ကျမ်းစာ​သွန်သင်ချက် ဖြစ်ကြောင်း ဒီကနေ သိရတယ်။ သင့်ကို ယေဟောဝါ တန်ဖိုး​မထားဘူး၊ မချစ်ဘူး​လို့ တွေးနေတာ​ဟာ မှားတယ်။ တခြား​သွန်သင်ချက်​အမှားတွေကို ပြတ်ပြတ်သားသား စွန့်လွှတ်​သလိုပဲ အဲဒီ​အတွေး​ကို စွန့်လွှတ်​လိုက်ပါ။

^၇ ယေဟောဝါရဲ့ မေတ္တာကို စိတ်ချ​စေ​တဲ့ တခြား​အထောက်အထား အများကြီး ကျမ်းစာမှာ ရှိတယ်။ ဥပမာ၊ “ခင်ဗျားတို့​ဟာ စာငှက်​လေး​တွေ​ထက် ပိုတန်ဖိုးရှိပါတယ်” လို့ နောက်လိုက်တွေကို ယေရှု ပြောတယ်။ (မ. ၁၀:၃၁) “မင်းကို ခိုင်ခံ့စေမယ်၊ ကူညီပေးမယ်။ ဖြောင့်မတ်တဲ့ ညာလက်နဲ့ မြဲမြဲ​ကိုင်ထားမယ်” လို့ လူမျိုးတော်ကို ယေဟောဝါ​ကိုယ်တိုင် ပြောတယ်။ (ဟေရှာ. ၄၁:၁၀) အဲဒီ​ဖော်ပြချက်​တွေ ဘယ်လောက် ရှင်းလင်း​ပြတ်သား​သလဲ သတိပြုပါ။ ‘ခင်ဗျားတို့ ပိုတန်ဖိုးရှိ​မှာ​ပါ’ လို့ ယေရှု မပြောဘူး။ ‘မင်းကို ကူညီ​ကောင်း ကူညီပေးမယ်’ လို့ ယေဟောဝါ မပြောဘူး။ “ပိုတန်ဖိုးရှိပါတယ်၊” “ကူညီပေးမယ်” လို့ ပြော​ထား​ကြ​တာ။ ကိုယ့်ကို ယေဟောဝါ ချစ်တယ်​ဆိုပြီး ဖြေသိမ့်​နိုင်ဖို့ မဟုတ်ဘဲ အခိုင်အမာ ယုံကြည်စိတ်ချနိုင်​ဖို့ အဲဒီ​ကျမ်းပိုဒ်တွေ​က ကူညီပေးတယ်။ အခြေအမြစ် ခိုင်လုံတဲ့ အမှန်တရား​ပါပဲ။ ဆုတောင်းပြီး ဒီလို​ကျမ်းပိုဒ်တွေ​ကို တွေးတော​မယ်​ဆိုရင် “ကျွန်တော်တို့ကို ဘုရားသခင် ချစ်မြတ်နိုး​မှန်း သိ​လည်း​သိတယ်။ ယုံလည်း​ယုံတယ်” လို့ ပြော​နိုင်မယ်။—၁ ယော. ၄:၁၆။a

^၈ ယေဟောဝါရဲ့ မေတ္တာကို တစ်ခါတလေ သံသယဝင်​မိ​တုန်းပဲ​ဆိုရင်ကော။ သင် ခံစားရတာ​ကို သင် သိထားတာနဲ့ နှိုင်း​ယှဉ်ကြည့်ပါ။ ခံစားချက်​ဟာ ပြောင်းလဲ​တတ်တယ်။ အမှန်တရားက​တော့ မပြောင်းလဲ​တတ်​ဘူး။ သင့်ကို ယေဟောဝါ ချစ်တယ်​ဆိုတာ ကျမ်းစာ​အမှန်တရား ဖြစ်တယ်။ ဒါကြောင့် သင် ဘယ်လိုပဲ ခံစားရ​ပါ​စေ “ဘုရားသခင်ဟာ ချစ်ခြင်း​မေတ္တာ ဖြစ်” တယ်​ဆိုတဲ့ အမှန်တရားဟာ မပြောင်းလဲဘူး။ မေတ္တာဟာ ယေဟောဝါရဲ့ အဓိက အရည်အသွေး ဖြစ်တယ်။—၁ ယော. ၄:၈။

ယေဟောဝါရဲ့ ‘ချစ်ခင်​တွယ်တာမှု’ အကြောင်း စဉ်းစားပါ

^၉ “အဖ​ဘုရားကလည်း ခင်ဗျားတို့ကို ချစ်ခင်​တွယ်တာ​တယ်” လို့ တပည့်တွေကို ယေရှု ပြောတယ်။ ဒီ​ကနေလည်း ယေဟောဝါရဲ့ မေတ္တာ​အကြောင်း သိနိုင်တယ်။ (ယောဟန် ၁၆:၂၆၊ ၂၇ ကို ဖတ်ပါ။) တပည့်တွေကို ဖြေသိမ့်​ပေးဖို့​သက်သက် ယေရှု ဒီလို​ပြောတာ မဟုတ်ဘူး။ သူတို့ရဲ့ ခံစားချက်​အကြောင်း မဟုတ်ဘဲ ဆုတောင်းခြင်း​အကြောင်း အဓိက ပြော​ရင်း​နဲ့ ဒီစကားတွေကို ပြော​ထားတာ။

^၁၀ မိမိဆီ မဟုတ်ဘဲ မိမိ​နာမည်ကို အမှီပြုပြီး ဆုတောင်းသင့်တယ်​လို့ ရှေ့​အခန်းငယ်​တွေ​မှာ ယေရှု ပြောတယ်။ (ယော. ၁၆:၂၃၊ ၂၄) ဒါကို တပည့်တွေ သိထားဖို့ သိပ်အရေးကြီးတယ်။ ယေရှု ရှင်ပြန်​ထမြောက်လာတဲ့​အခါ ယေရှု​ဆီ သူတို့ ဆုတောင်း​ချင်​မိ​နိုင်တယ်။ ဘာကြောင့်လဲ။ ယေရှုကို မိတ်ဆွေ​အဖြစ် သိကျွမ်း​ထား​ကြ​လို့ ဖြစ်တယ်။ သူတို့ကို ယေရှု သိပ်ချစ်တဲ့​အတွက် သူတို့ရဲ့ တောင်းဆိုချက်တွေကို နားထောင်ပေးမယ်၊ အဖ​ဘုရားဆီ အသနားခံ​ပေးမယ်​လို့ တွေးမိနိုင်တယ်။ ဒါပေမဲ့ အဲဒီလို​မတွေး​သင့်​ဘူး။ “အဖ​ဘုရားကလည်း ခင်ဗျားတို့ကို ချစ်ခင်​တွယ်တာ​တယ်” လို့ ယေရှု ပြောတယ်။ ‘ခင်ဗျားတို့ကို ကျွန်တော်​ပဲ ချစ်တာ မဟုတ်ဘူး။ အဖ​ဘုရားလည်း ချစ်တယ်။ ဒါကြောင့် အဖ​ဘုရားဆီ ယုံယုံကြည်ကြည် ဆုတောင်းပါ’ လို့ ပြော​လိုက်တာပါပဲ။ ဆုတောင်းခြင်းနဲ့​ပတ်သက်တဲ့ အခြေခံ ကျမ်းစာ​သွန်သင်ချက်​ထဲ​မှာ ဒီအချက် ပါတယ်။ ဒါ သင်နဲ့​လည်း ဘယ်လို သက်ဆိုင်သလဲ​ဆိုတာ စဉ်းစားကြည့်ပါ– ကျမ်းစာ​လေ့လာရင်း ယေရှုကို သင် သိကျွမ်း​ပြီး ချစ်​လာတယ်။ ယေရှုလည်း သင့်ကို ချစ်တယ်။ (ယော. ၁၄:၂၁) ဒါပေမဲ့ ယေရှု​ပဲ ချစ်တာ မဟုတ်ဘူး၊ အဖ​ဘုရားလည်း ချစ်တယ်။ ဒါကြောင့် သင်လည်း ယေရှုတပည့်တွေ​လိုပဲ အဖ​ဘုရားဆီ ယုံယုံကြည်ကြည် ဆုတောင်းနိုင်တယ်။ ဆုတောင်းတဲ့ အကြိမ်တိုင်း ဒီကျမ်းစကားကို ယုံကြည်​ကြောင်း ပြနေတာ​ပဲ။—၁ ယော. ၅:၁၄။

ဘာကြောင့် သံသယဝင်​မိတယ်​ဆိုတာ သိထားပါ

^၁၁ ယေဟောဝါရဲ့ မေတ္တာကို ဘာကြောင့် သံသယ​ဝင်​မိ​နိုင်သလဲ။ စာတန်ကြောင့်​ပါ။ ကျွန်တော်တို့ကို “ဝါးမျို​ဖို့” စာတန် ကြံစည်​နေတယ်။ (၁ ပေ. ၅:၈) ယေဟောဝါ ချစ်လို့ ပြင်ဆင်ပေးတဲ့ ရွေးဖိုး​နဲ့ ကျွန်တော်တို့ မထိုက်တန်ဘူးလို့ ခံစားစေချင်တယ်။ (ဟီ. ၂:၉) ဒါပေမဲ့ စဉ်းစားကြည့်ပါ။ ယေဟောဝါရဲ့ မေတ္တာကို ကျွန်တော်တို့ သံသယ​ဝင်​ရင် ဘယ်သူ အမြတ်​ထွက်​မလဲ။ စာတန်​ပါ။ ယေဟောဝါကို ဝတ်မပြုတော့တဲ့​အထိ စိတ်ဓာတ်ကျ​သွား​ရင်​ကော ဘယ်သူ ဝမ်းသာ​မလဲ။ စာတန်​ပါပဲ။ တကယ်တမ်း ယေဟောဝါရဲ့ မေတ္တာ သူ မရတော့​တာကို ကျွန်တော်တို့ မရဘူးလို့ ခံစားရအောင် ကြံစည်​နေတာ။ ဒါ “ဉာဏ်နီဉာဏ်နက်​များတဲ့ လုပ်ရပ်” ပဲ။ (ဧ. ၆:၁၁) ရန်သူ​စာတန် ဘာ​ကြံစည်​နေသလဲ​ဆိုတာ သိထားလို့ အစွမ်းကုန် “ခုခံ​တွန်းလှန်” ကြရအောင်။—ယာ. ၄:၇။

^၁၂ ယေဟောဝါရဲ့ မေတ္တာကို ဘာကြောင့် သံသယ​ဝင်​မိ​နိုင်​သေးသလဲ။ ကျွန်တော်တို့ အမွေ​ရထားတဲ့ အပြစ်ကြောင့်​ပါ။ (ဆာ. ၅၁:၅။ ရော. ၅:၁၂) အပြစ်က ယေဟောဝါနဲ့ ဆက်ဆံရေးကို ထိခိုက်စေ​တယ်။ ဒါ့အပြင် ကျွန်တော်တို့ရဲ့ တွေးခေါ်ပုံ၊ ခံစားချက်၊ ကျန်းမာရေးကို​လည်း ထိခိုက်စေ​တယ်။

^၁၃ အပြစ်က ကျွန်တော်တို့ရဲ့ ခံစားချက်ကို ချွတ်ချော်​စေ​ပြီး အပြစ်​ရှိတယ်​ဆိုတဲ့​စိတ်၊ စိုးရိမ်​စိတ်၊ မလုံမလဲ​ဖြစ်တဲ့​စိတ်၊ ရှက်စိတ် ဝင်လာ​စေ​တယ်။ အပြစ်​လုပ်တဲ့အခါ ဒီ​ခံစားချက်တွေ ဝင်လာတာ သဘာဝပါပဲ။ ဒါပေမဲ့ အပြစ်​မလုပ်ဘဲ​နဲ့​ကော ဘာကြောင့် ဒီ​ခံစားချက်တွေ ဝင်လာ​တတ်​သလဲ။ အပြစ်သား ဖြစ်တယ်​ဆိုတဲ့ အသိကြောင့်​ပါ။ လူတွေ အပြစ်သား ဖြစ်သွား​တာ​ဟာ ယေဟောဝါ နဂို​ပုံစံပြုထား​တဲ့ ဒီဇိုင်း​ကနေ လွဲချော်​သွားတာ​ပဲ။ (ရော. ၈:၂၀၊ ၂၁) ဘီး​လေ​လျော့နေတဲ့အခါ လေ​အပြည့် ရှိတုန်းက​လို ကားမောင်း​ရတာ အဆင်မပြေ​ဘူး။ အဲဒီလိုပဲ လူတွေဟာ အပြစ်သား ဖြစ်သွားတဲ့​အတွက် ယေဟောဝါ နဂို​ပုံစံပြုထား​တုန်းက​လို အစစ​အရာရာ အဆင်ပြေ​မနေဘူး။ မဝင်​သင့်​တဲ့ ခံစားချက်တွေ ဝင်လာတယ်။ ဒါကြောင့် ကိုယ့်ကို ယေဟောဝါ မချစ်ဘူး​ဆိုတဲ့ သံသယတွေ​လည်း တစ်ခါတလေ ဝင်လာတာ။ အဲဒီလို​သံသယ​ဝင်​လာပြီ​ဆိုရင် ယေဟောဝါဟာ “ကိုယ်တော့်ကို ချစ်ပြီး ပညတ်​စောင့်ထိန်း​သူတွေကို ခိုင်မြဲတဲ့​မေတ္တာ​ပြတဲ့ အရှင်” ဖြစ်တယ်​ဆိုတာ သတိရသင့်တယ်။—နေ. ၁:၅။

^၁၄ ယေဟောဝါရဲ့ မေတ္တာနဲ့ မထိုက်တန်ဘူးလို့ တစ်ခါတလေ ခံစားရနိုင်ပါတယ်။ တကယ်တော့ မထိုက်တန်တာ အမှန်​ပါပဲ။ မထိုက်တန်​ဘဲ ချစ်​ပေး​လို့လည်း ယေဟောဝါရဲ့ မေတ္တာဟာ ထူးခြား​နေတာ။ ကျွန်တော်တို့ ကောင်းတာ​တစ်ခုခု လုပ်ထားလို့ မဟုတ်ဘဲ ချစ်လို့ ရွေးဖိုး​ပြင်ဆင်​ပေးတယ်။ (၁ ယော. ၄:၁၀) ဒါ့အပြင် စုံလင်သူ​တွေ​ကို မဟုတ်ဘဲ အပြစ်သားတွေကို ကယ်တင်ဖို့ ယေရှု အသေခံခဲ့တယ်။ (ရောမ ၅:၈ ကို ဖတ်ပါ။) ကျွန်တော်တို့​တစ်ယောက်မှ ခြောက်ပြစ်ကင်း​သဲလဲစင် မဖြစ်နိုင်သလို ယေဟောဝါ​လည်း မမျှော်လင့်ပါ​ဘူး။ အမွေ​ရထားတဲ့ အပြစ်ကြောင့် ယေဟောဝါရဲ့ မေတ္တာကို သံသယ​ဝင်​မိ​တတ်​မှန်း သိထားလို့ ကိုယ့်​အတွေး​ကို အပြစ်​ထိန်းချုပ်တာ မခံဖို့ ဆုံးဖြတ်ထား​ကြရအောင်။—ရော. ၇:၂၄၊ ၂၅။

သစ္စာစောင့်သိ​နေပါ

^၁၅ ယေဟောဝါက ကျွန်တော်တို့ကို ရွေးချယ်မှု မှန်ကန်​စေချင်တယ်။ ဒါဆိုရင် မှန်ရာကို ဘယ်လို ရွေးချယ်​နိုင်သလဲ။ ယေဟောဝါကို “တွယ်တာ​နေ” ခြင်း​အားဖြင့်​ပါ။ (တရား. ၃၀:၁၉၊ ၂၀) ကျွန်တော်တို့ဘက်က တွယ်တာ​နေ​ရင် ယေဟောဝါဘက်​ကလည်း သစ္စာ​ရှိရှိ တွယ်တာ​နေမယ်။ (၂ ရှမွေလ ၂၂:၂၆ ကို ဖတ်ပါ။) ကျွန်တော်တို့ သစ္စာစောင့်သိ​နေ​သရွေ့ ဘဝမှာ ကြုံလာနိုင်တဲ့ ဘယ်လို အခက်အခဲ​ကို​မဆို ရင်ဆိုင်နိုင်ဖို့ ယေဟောဝါ ကူညီပေးမယ်​ဆိုတာ စိတ်ချနိုင်တယ်။

^၁၆ သိခဲ့​ရတဲ့​အတိုင်း ဘယ်လိုပဲ ဘဝ​မုန်တိုင်း​ထန်​ပါ​စေ စိတ်​တည်ငြိမ်​နေနိုင်တယ်။ ကျွန်တော်တို့ကို ယေဟောဝါ ချစ်ပြီး ထောက်မပေးမယ်​ဆိုတာ သိထားလို့​ပါပဲ။ ဒါ ကျမ်းစာ​သွန်သင်ချက် ဖြစ်တယ်။ ယေဟောဝါရဲ့ မေတ္တာကို သံသယ​ဝင်​လာပြီ​ဆိုရင် ကိုယ်​ခံစားရတာ​ကို မဟုတ်ဘဲ ကိုယ်​သိထားတာကို အာရုံစိုက်​လိုက်ပါ။ ခိုင်မြဲတဲ့​မေတ္တာတော် ထာဝစဉ် တည်မြဲတယ်​ဆိုတဲ့ အခြေခံ ကျမ်းစာ​သွန်သင်ချက်ကို စိတ်ချ​မြဲ စိတ်ချ​နေပါ။