Hilhciannate
1. A Lian Babylon Khentel Theih Dan
“A Lian Babylon” pen biakna man lo etsakna ahihlam koci theih i hiam? (Maangmuhna 17:5) Hih thute ngaihsun in:
Leitung khempeuhah thu nei hi. A Lian Babylon in “minam tuamtuam, pau nam tuamtuam a zang mihonpite” tungah tu-in “leitung kumpi khempeuh tungah ukna” nei hi.—Maangmuhna 17:15, 18.
Gam vai le sumbawlna tawh kisai thuneite hithei lo. Suksiatna a thuak ciangin, “leitung kumpite” le ‘sumbawlte’ nungta lai uh hi.—Maangmuhna 18:9, 15.
Pasian mindaisak hi. Sumlepai le hamphatna dang a ngah nadingin kumpite tawh kipawl ahih manin a paktat numei kici hi. (Maangmuhna 17:1, 2) Amah in minam khempeuh lampialsak hi. Ama hangin mi tampi in sihlawh uh hi.—Maangmuhna 18:23, 24.
Sin ding thu 13 thu 6 paikikna
2. Messiah Bang Hun Ciang Hong Pai Ding A Hiam?
Lai Siangtho in “kum sagih mun sagih” le “kum sawmguk le nih mun sagih” a bei ciangin Messiah a hong pai ding thu genkhol hi.—Daniel 9:25 sim in.
Tua hun sung pen bang hunin kipan a hiam? B.C.E. 455 kumin kipan hi. Tua kumin Jerusalem khuapi ‘lamkik’ dingin Nehemiah hong tung hi.—Daniel 9:25; Nehemiah 2:1, 5-8.
Tua hun sung pen bang tanvei sawt a hiam? “Kum sagih mun sagih” pen kum 49 hi a, “kum sawmguk le nih mun sagih” pen kum 434 hi. Tua ahih manin, a niha gawm pen kum 483 (49 + 434 = 483) sawt hi.
Tua hun pen bang ciangin bei a hiam? B.C.E. 455 kum panin kum 483 sim kipan leng, C.E. 29-ah hong bei hi.a Tua kum pen Jesuh tui kiphumin Messiah a hong hih kum ahi hi!—Luka 3:1, 2, 21, 22.
Sin ding thu 15 thu 5 paikikna
3. Sisan A Kihel Zatui Kikhoinate
Cina ii sisan zanga kikhoi theih dan om hi. Sisan piak le ki-at sunga zat dinga sisan lakkhiat kholh pen Khristiante in sang lo uh hi.—Thu Hilhkikna 15:23.
Ahih hangin, zatui kikhoina pawlkhat pen kisang thei hi. Tuate lakah sisan kisitna, kal sawpna, sisan khal loh nadinga bawlna, pumpi sung pan hong pusuak sisan pen siangsaka thunkikna, ahih kei leh lungtang-tuap ading set zatnate kihel hi. Zatui kikhoina, cidamna kisittelna, ahih kei leh tu laitaka na kikhoina-ah na sisan zat dan ding pen Khristian khat ciat ii khensat ding thu hi. Siavuan khatlekhat’ mi a khoi dan uh kibang lo thei hi. Tua ahih manin ki-atna, cidamna kisittelna, ahih kei leh zatui kikhoina khat peuhpeuh i sanma-in i sisan zat dan ding pen kician taka i theih ding kisam hi. A nuai-a dotnate ngaihsun in:
Ka sisan pen pumpi pualamah kiheikhia-in tawlkhat sung bang sisan luang kei leh ka bangci ngaihsut tam? Tua sisan pen ka pumpi tawh a kizom lai, ‘buakkhiat’ a kisam lo banga ngaihsun dingin sia le pha ka theihna in a phal hiam?—Thu Hilhkikna 12:23, 24.
Zatui kikhoi hun sungin pumpi pana a luangkhia sisan pen siangthosakin kithunkik pah leh ee? Tua in Lai Siangtho tawh a kiseek sia le pha ka theihna a nawngkaisak hiam? Ahih kei leh tua bang kikhoina ka sang thei ding hiam?
Sin ding thu 39 thu 3 paikikna
4. Nupa Tuam Omna
Nupate tuam om dingin Lai Siangtho in gen lo hi. Tuam om mana zi neikik, pasal neikik thei cihna zong hi lo hi. (1 Korin 7:10, 11) Ahih hang, Khristian pawlkhat adingin tuam om theihna dinmunte om hi.
Vak nop lohna: Pasal in a innkuan vak nuam lo ahih manin nekledawn haksatna tuak.—1 Timoti 5:8.
Nasia taka bawlsiatna: Cidamna sukha thei dongin le nuntakna ading a lauhuai zah donga bawlsia.—Galati 5:19-21.
Jehovah bia thei het lo dinga khaktanna: Jehovah a biak theih het loh nadingin a zi ahih kei leh a pasal in khaktan.—Sawltak 5:29.
5. Pawi Bawlnate
Khristiante in Jehovah’ deih loh pawi bawlnate-ah kihel lo uh hi. Ahih hang, Khristian khat ciat in midangte’ pawi bawl huna i tuah theih dinmunte i vensak dan ding pen Lai Siangtho tawh a kiseek sia le pha theihna lungsim tawh kizui-in i khensat ding kisam hi. A nuai-a dinmunte ngaihsun in.
Mi khat peuhpeuh in pawi ni muakna kammal tawh hong hopih. “Lungdam ei,” ci-in kidawng thei hi. A theih beh nop a leh, pawi ni na bawl lohna a hang hilhcian thei hi teh.
Jehovah Teci ahi lo na zi ahih kei leh na pasal in pawi ni-ah tanaute tawh an nekawm dingin hong sam. Na sia le pha theihna lungsim in pai dingin hong phal ahih leh, a man lo ngeinate-ah kihel lo ding na hihlam hilhkhol thei hi teh.
Pawi hunah na nasepna pu in letsongin sum hong pia. Letsongin sum hong kipiak ciangin nial a kul hiam? Nial teitei ding cihna om lo hi. Na pu in pawi ni ading ngima tawh hong pia maw, ahih kei leh nasep na hahkat mana lungdam koh nadinga hong pia?
Pawi bawl hunah mi khat in letsong hong pia. Letsong hong piate in: “Pawi na bawl lohlam thei mah ing, ahih hang hih hong pia nuam ing,” ci-in hong gen thei hi. Itna tawh hong kipia zong hi thei hi. Na upna hong ze-et nuam maw, ahih kei leh pawi bawlna-ah hong kihelsak nuam? Hih thu na ngaihsut khit ciangin letsong pen sang ding maw, sang lo ding cih pen nangma khensat ding hi. Bangbang i khensat zongin, i sia le pha theihna lungsim siangthosakin Jehovah tungah i citak nuam hi.—Sawltak 23:1.
Sin ding thu 44 thu 1 paikikna
6. A Kilawh Thei Natna
Mite i it manin midangte natna lawh lo dingin i kidawm mahmah hi. A kilawh thei natna i neihlam i thei cian zongin, i thei cian kei zongin i kidop mahmah kul hi. Bang hang hiam cih leh Lai Siangtho in: “Nang na ki-it bangin na vengte na it in,” cih thukham hong pia ahih man hi.—Rom 13:8-10.
A kilawh thei natna a neite in hih thukham pen koi bangin zui thei ding a hiam? Mite tungah itna a lah nadingin va kawi ahih kei leh va nam cihte ahih ding kilawm lo hi. A innkuanpihte a lawh ding a lau manin pawlkhat in a innah a hawhsak nop kei leh zong a heh ding kilawm lo hi. Tui a kiphumma-in zong pawlpi upate coordinator kiangah ama’ dinmun pen a genkholh ding kisam hi. Tua hileh tui kiphum ding dangte a lawh loh nadingin kivaihawm thei ding hi. A kilawh thei natna nei dinga a kiummawhte in zawl a helma-in ama ut thu tawh cidamna a sittel ding kisam hi. Tua bangin ‘ei ii phattuam nading bek a ngaihsun lo, midangte’ phattuam nading zong a ngaihsutsak zaw’ ihihlam i lak hi.—Filippi 2:4.
Sin ding thu 56 thu 2 paikikna
7. Sumbawlna le Upadi Tawh Kisai Thute
Sumlepai le sumbawlna vaite-ah Khristian tuak ihi zongin thukimna lai tawh bawlna in buainate hong pelhsak thei hi. (Jeremiah 32:9-12) Khat veivei ciangin Khristian khatlekhat in sumlepai le vai dangah kithutuak lohna nei thei uh hi. Tua bang hun ciangin a kisaipih mite tawh kilemna a bawlpah ding uh kisam hi.
Zuau genna ahih kei leh mi gensiatna cih banga thu liante pen koi bangin vengsak ding i hiam? (Matthai 18:15-17 sim in.) Zuih ding a kisam thu thumte Jesuh in hong pia hi:
No tegel bek theihin buaina vensak sawm un.—A neu 15 en in.
Buaina a ven theih kei leh pawlpi sunga a picing mi khat le nih sam un.—A neu 16 en in.
Buaina a ven theih tuan kei leh pawlpi upate kiangah huhna ngen un.—A neu 17 en in.
Thu a tamzawah i unaupihte pen zumah i khiat ding kilawm lo hi. Jehovah le pawlpi mindaisak thei ahih man hi. (1 Korin 6:1-8) Ahih hang, ta kep theihna, zi maksa vakna, liau sum ngetna, nupa kimakna lai bawlna, sumbat a mai theih nading bawlna le kimatna pan suahtak nadinga kamciam piakna, cih banga zumah bek a kisiangsak thei vaite om thei hi. Tua bang vaite zumah ahi thei zah a, kilemkik nadinga a sem Khristian khat in hih Lai Siangtho thuhilhna palsat lo hi.
Mi buanna, naupang khoihsiatna, khutkhialhna, guktakna lian le mi thahna cih banga mawhna liante hanga leitung kumpite kianga thu a puak Khristian in zong Lai Siangtho thuhilhna palsat lo hi.
a B.C.E. 455 panin B.C.E. 1 ciang dong pen kum 454. B.C.E. 1 panin C.E. 1 ciang dong pen kum 1. (Kum bem om lo). C.E. 1 panin C.E. 29 ciang dong kum 28. A vekin gawm leng, kum 483 ahi hi.