Liv Izai i kapab rekonfort ou

1-2. Ki mannyer Zeova i reazir ler nou fer fas avek bann sityasyon ki fer nou sagren?

IMAZIN en pti zanfan ki pe plere asodlarm. Petet son fanmir pe al reste dan en nouvo landrwa e sa i vedir ki i bezwen kit son bann zanmi. Oubyen i vreman sagren akoz in fer en fot. Dan en moman koumsa, ki mannyer en manman ki kontan son zanfan pou reazir? I pou anmay son zanfan, ekout li anmezir i pe koz lo sa ki pe fatig li e asir li ki i kontan li.

² Dan Labib, Zeova i konpar son lekor avek en manman ki kontan son zanfan e ki rekonfort li. Zeova i dir: “Zis parey en manman i konsol son garson, mon pou kontinyen konsol zot.” (Iza. 66:13) Zeova i kontan nou plis ki okenn paran i kapab kontan son zanfan. (Iza. 49:15) Atraver Son Parol Labib, Zeova i rekonfort nou e i donn nou sa lafors ki nou bezwen ler nou dekouraze oubyen pe soufer.—Rom. 15:4.

3. Ki nou pou vwar dan sa lartik?

³ Dan liv Izai, i annan en kantite parol rekonfortan ki Zeova ti dir son pep. (Iza. 40:1) Nou Papa ki kontan nou, ti enspir profet Izai pour ekri sa liv pour rekonfort son pep ki ti pe reste Zida dan en moman ki ti annan en kantite problenm. Nou osi nou pe viv dan “en letan vreman difisil” e nou bezwen rekonfor. (2 Tim. 3:1) Annou vwar serten verse dan liv Izai ki kapab soulaz e donn nou lafors (1) ler nou sirkonstans i sanze san ki nou ekspekte, (2) ler nou kontinyen santi nou koupab pour en fot ki nou’n fer oubyen (3) ler nou sagren akoz en dimoun ki nou kontan in mor.

LER NOU SIRKONSTANS I SANZE SAN KI NOU EKSPEKTE

4. Ki mannyer nou kapab santi si nou sirkonstans i sanze san ki nou ekspekte?

⁴ Nou lavi i kapab sanze san ki nou ekspekte. (Ekle. 9:11; 1 Kor. 7:31) Nou kapab tonm malad en sel kou, annan problenm larzan oubyen i kapab annan problenm politik dan nou pei ouswa ou ganny demande pour sanz ou servis. Bann sanzman koumsa i kapab fer nou enkyet oubyen konfize. I normal pour nou mazinen kote nou’n al mal. En frer ki apel Joseph ki ti ganny demande pour al fer pionye ordiner, apre ki i ti’n servi pour apepre 17 an dan Betel i dir: “I ti vreman difisil pour mwan konmans en nouvo lavi apre ki mon’n dan Betel pour en kantite letan. Mon pa ti konnen ki pour fer e ki i ti pou arive avek mwan.” Ki mannyer Zeova i rekonfort nou atraver liv Izai si nou sirkonstans i sanze san ki nou ekspekte?

5. Dapre Izai 42:16, ki Zeova i promet pour fer pour nou? (Vwar portre.)

⁵ Lir Izai 42:16. Zeova i promet ki i pou gid bann ki aveg lo bann santye ki zot pa abitye e i pou fer fernwanr vin lalimyer. I kapab ki sa bann lekspresyon “aveg,” “santye ki zot pa abitye,” “fernwanr,” “laplenn ki kabose” pe dekrir lafason ki nou santi konsernan nou lavenir ler nou sirkonstans i sanze san ki nou ekspekte. Nou kapab santi konmsi nou pe mars dan en lafore ki bwaze e nou pa vwar semen kot nou pou ale. Me kantmenm sa, Zeova i asir nou ki nenport sityasyon ki nou fer fas avek, i pou gid nou e i pa pou zanmen abandonn nou. I pou tenir nou lanmen e i pou gid nou dan fernwanr, i pou kler nou semen e i pou fer nou semen vin plat. Ki mannyer Zeova i fer sa? I fer sa par donn nou bann konsey saz atraver son Parol ek lorganizasyon. (Ps. 119:105; Iza. 30:21) I osi servi nou bann frer ek ser ek lezot dimoun pour ed nou dan bann fason pratik. Menm ler sa semen devan nou pa kler e i paret difisil, nou kapab annan konfyans ki Zeova pou gid nou akoz i kontan nou e i konpran ki mannyer nou santi.—Iza. 41:10; 1 Pyer 5:6, 7.

6. Ki nou kapab asire si nou sirkonstans i sanze san ki nou ekspekte?

⁶ Joseph ki’n ganny mansyonnen pli boner i eksplike ki mannyer Zeova ti demontre lanmour anver li ek son madanm e siport zot apre ki zot ti’n kit Betel. I dir: “Nou ti vwar ki mannyer Zeova ti ed nou e montre ki i kontan nou pandan sa sanzman. I ti servi nou bann frer ek ser pour ed nou. I ti ed nou pour ganny bann keksoz ki nou ti bezwen e i ti rekonfort nou dan sa bon moman e i pe kontinyen fer sa.” Si ou sirkonstans i sanze san ki ou ekspekte, ou osi ou kapab asire ki Zeova pou donn ou sa lafors ek gidans ki ou bezwen menm si sa sanzman i paret vreman difisil. (Iza. 54:10; 58:11) Joseph ti dir ki en original song ti rekonfort li e ti asir li ki nenport kwa ki i pe fer fas avek, Zeova pou toultan avek li.a Joseph i osi dir: “Menm si keksoz pa al dapre sa ki nou’n plàn, nou kapab asire ki Zeova pou ed nou.”

LER NOU KONTINYEN SANTI NOU KOUPAB POUR EN FOT KI NOU’N FER

7. Ki mannyer serten i kapab santi akoz bann fot ki zot in fer dan lepase?

⁷ Ler nou konfes en pese grav avek bann ansyen, avek lanmour zot pou ed nou e apre sa, nou fer tou sa ki nou kapab pour pa repet menm fot. (Prov. 28:13; Zak 5:14-16; 1 Zan 1:9) Me i kapab ki menm apre ki Zeova in pardonn nou, nou kontinyen santi nou koupab. Nou kapab mazinen ‘Ki mannyer Zeova i kapab pardonn mwan pour sa ki mon’n fer?’ (2 Kor. 2:7) Sa santiman i normal parski i kapab difisil pour oubliy bann fot ki nou’n fer e zot kapab fer nou sagren pour en kantite letan. Lerwa David ti ekri: “Napa lape dan mon lezo akoz mon pese.” I ti osi dir: “Mon lekor i angourdi e i konpletman kraze.” (Ps. 38:3, 8) Si ou santi koumsa konsernan bann fot ki ou’n fer dan lepase, liv Izai i kapab rekonfort ou.

8-9. Ki Izai 1:18 i dir konsernan lafason ki Zeova i pardonn nou?

⁸ Lir Izai 1:18. Zeova i servi en legzanp pour dekrir lafason ki i pardonn nou pese konpletman. I dir ki menm si nou pese “i rouz,” i pou fer zot vin “blan parey lanez.” Rouz i en kouler fonse e si ou ganny en tas rouz lo ou lenz i pou vreman difisil pour tir sa tas. Me Zeova i asir nou ki ler i pardonn nou, i pou tir sa tas ki sa pese in kite e i pa pou rapel nou pese pour larestan nou lavi.

⁹ Annou vwar legzanp Lerwa David. Menm si i ti koupab pour adilter ek mert, Zeova ti pardonn li e pli tar i ti dir ki David ti en zonm fidel. (2 Sam. 11:3, 4, 14, 15; 12:13; 1 Rwa. 9:4, 5) Ler Zeova ti mazin David, i ti rapel son fidelite me pa bann fot ki i ti’n fer. Dan menm fason, Zeova i pardonn nou ler nou repantir e i ed nou pour kontinyen servi li avek en konsyans kler. Ki lezot fason liv Izai i kapab ed nou ler nou kontinyen santi nou koupab pour bann fot ki nou’n fer?

10. Ki keksoz rekonfortan Zeova i promet pour fer dan Izai 38:17?

¹⁰ Lir Izai 38:17 ek not. Sa lekspresyon “ou’n zet tou mon bann pese deryer ou ledo” i kapab osi ganny tradwir “ou’n tir tou mon bann pese devan ou lizye.” Sa verse i dir ki Zeova i pran bann pese en dimoun ki’n repantir e i zet zot par deryer son ledo kot i nepli vwar e mazin sa bann pese. En liv resers i eksplik sa verse dan sa fason: “Ou’n fer [mon bann pese] vin konmsi zot pa’n zanmen arive.” Alor, ler Zeova i pardonn nou pese, pour li i konmsi zanmen nou’n fer pese. Enn fwa Zeova in pardonn nou pese, i pa pou zanmen koz lo la pour li akiz nou oubyen pini nou ankor. I promet: “Mon pa pou rapel ou bann pese.” (Iza. 43:25) Pa sa i rekonfortan! Si Zeova, sa Ziz Siprenm nepli mazin nou bann pese, pa nou devret oubliye nou osi e nepli santi nou koupab?

11. Nenport ki fot ki nou’n fer dan lepase, kwa ki Zeova i konsantre lo la? (Vwar portre.)

¹¹ Sak fwa ki nou santi nou vreman koupab pour bann fot ki nou’n fer dan lepase, nou bezwen rapel bann promes ki Zeova in fer. Ler i pardonn nou, i pardonn nou konpletman. I pa onte akoz nou’n fer bann fot dan lepase e i pa parey bann imen enparfe ki gard rankin. (Iza. 57:16) Sa ki enportan pour Zeova i pa sa dimoun ki nou ti ete me sa dimoun ki nou ete ozordi e sa dimoun ki nou anvi vini. (Iza. 55:7) Nou pe servi en Bondye ki kontan nou e ki anvi pardonn nou. Alor, annou pa zanmen les bann fot ki nou’n fer dan lepase anpes nou zwaye la konmela oubyen anpes nou ganny bann benediksyon dan lavenir.

LER NOU SAGREN AKOZ EN DIMOUN KI NOU KONTAN IN MOR

12. Ki mannyer nou kapab santi ler en dimoun ki nou kontan i mor?

¹² Ler en dimoun ki nou kontan i mor, sa sagrinasyon i kapab vreman entans e sa douler i kapab dire pour en kantite letan. Parfwa nou kapab demande akoz Zeova in les sa dimoun ki nou kontan mor. Paran en frer ki apel Micheal ti mor dan en dife. I dir: “Mon ti vreman sagren e mon ti ankoler avek Zeova akoz i ti’n les zot mor. Mon konnen pa li ki’n touy zot me i pa’n anpes sa arive.” Petet ou osi ou’n deza santi parey. Dan moman sagrinasyon koumsa, ki rekonfor ek lespwar Zeova i donnen?

13. Ki Zeova in promet nou dan Izai 25:8?

¹³ Lir Izai 25:8. Zeova i promet ki “i pou anval lanmor pour touzour.” Imazin sa letan kot dimoun pou nepli mor. Sa letan, ou pa pou zanmen sagren akoz en dimoun ki ou kontan in mor. (Iza. 35:10) Ou pa pou zanmen eksperyans sa sagrinasyon ki en dimoun i santi ler i vwar latonm en dimoun ki i kontan. O kontrer ou pou annan sa lespwar pour annan bann dimoun ki ou kontan avek ou pour touzour, zot pou vivan e an bonn sante. Sa promes pou vin vre pa akoz nou anvi i vin vre me i pou vin vre akoz Zeova ki’n fer sa promes e i sa sel personnaz ki kapab fer sa arive.—Rev. 21:4, 5.

14. Ki mannyer ou santi ler ou reflesir lo lespwar rezireksyon? (Izai 26:19) (Vwar portre.)

¹⁴ Lir Izai 26:19. Zeova pa pou zis anpes dimoun mor me i pou osi resisit bann dimoun ki nou kontan ki’n mor. I dir sa konsernan zot: “Lekor mon bann dimoun mor pou leve.” Sa i montre ki Zeova i konsider zot konman pour li. I gard zot dan son memwar. Dan sa letan ki i’n swazir, i pou resisit zot. Parey laroze dan bomaten i fer bann plant ki’n sek reviv, Zeova ki Sours lavi pou relev bann dimoun ki nou kontan ki’n mor. Nou pou vreman kontan pour akey zot.—Konpar Mark 5:42.

15. Ki mannyer sa promes konsernan rezireksyon i ed nou ler en dimoun ki nou kontan i mor?

¹⁵ Menm si Bondye in promet ki i pou resisit bann dimoun, sa pa anpes nou sagren ler en dimoun ki nou kontan i mor. Me lefet ki nou konnen ki Zeova pa’n oubliy zot, sa i rekonfort nou. I sanmenm sa lespwar ki ti rekonfort Micheal, ki’n ganny mansyonnen pli boner. Micheal i dir: “Izai 26:19 in ed mwan konpran ki mon paran i vreman presye pour Zeova. I pou gard zot dan son memwar e i pou kontinyen fer sa ziska ki i resisit zot dan lavenir. Sa i rekonfort mwan e donn mwan lafors.” Nou osi, annou konsantre lo sa promes ki en zour nou pou revwar bann dimoun ki nou kontan ki’n mor. Ler nou fer sa, i pou pli fasil pour fer fas avek sa sagrinasyon.

16. Ki verse ki’n rekonfort ou pandan en letan difisil?

¹⁶ Nou’n vwar detrwa verse dan liv Izai ki kapab rekonfort nou ler nou sirkonstans i sanze san ki nou ekspekte, ler nou kontinyen santi nou koupab pour en fot e ler nou sagren akoz en dimoun ki nou kontan i mor. Nou vreman rekonesan ki Zeova i rekonfort nou e soulaz nou atraver son Parol. (Ps. 94:19) Eski i annan en verse ki vreman rekonfort ou ler ou pe fer fas avek en sityasyon ki fatig ou? Si ou kapab, aprann sa verse par ker, ekri li dan en kaye oubyen ekri li lo en papye e met li dan en landrwa kot ou pou vwar li souvan. Ou kapab trouv rekonfor dan bann parol ankourazan sorti kot nou Papa dan lesyel ki kontan nou.