54 ZAPOT ZAN
I ti demontre kouraz dan bann moman difisil
ZAPOT Zan ti ekri, “la i sa dernyen erdtan.” Dan son vye zour, zapot Zan ti konnen ki letan bann zapot ti pros pour fini. Plizyer dizenn lannen pli boner, Zezi ek zapot Pol ti’n averti ki i ti pou annan bann aposta. Bann zapot ti anpes bann aposta azir, me apre ki zot ti’n mor, bann fo ansenyan ti sali kongregasyon. (Mat. 7:15; Akt 20:29, 30; 2 Tesa. 2:6, 7) I paret ki Zan ti sa dernyen zapot ki ti anpes bann aposta azir dan kongregasyon. Zis mazinen ki mannyer i ti santi dan sa bann moman difisil ler bann aposta ti konmans propaz zot bann fo lansennyman dan en kongregasyon enn apre lot. Me Zan pa ti zanmen per ni dezespere.
Ki mannyer zapot Zan ki ti aze ti reisi fer fas avek persekisyon, legzil ek bann fo ansenyan ki ti pe kontinyelman ogmante?
Ler i ti dan son bann lannen 90 an, Zan ti ankor devoue pe “koz lo Bondye e rann temwannyaz konsernan Zezi.” Akoz sa, i ti ganny anvoye konman prizonnyen lo zil Patmos, en zil izole ki ti annan bokou ros, dan Lanmer Eze. Ki mannyer Zan ti ganny sa kouraz pour reste pozitif? Sirman, i ti rapel sa promes ki Zezi ti fer avek son bann disip ler i ti dir: “Mazinen! Mon avek zot tou le zour ziska lafen sa lemonn.”—Mat. 28:20.
Prezan plis ki 60 lannen ti’n pase depi ki Zezi ti’n fer sa promes e sirman Zan ti vreman kontan pour vwar e tann Zezi ankor dan en fason ekstraordiner. Dan en vizyon, Zan ti ganny en revelasyon sorti kot Zezi, ki Bondye ti donn li. Dan sa vizyon, Zan ti vwar sa ki ti pou arive pandan “zour Senyer” ler bann kongregasyon Kretyen ti pou ganny retablir e vin en sel. Kris ti pou alor ed son bann disip pour fer fas avek bann problenm.
Sa vizyon ti ganny revele atraver bann “siny.” Sirman i ti annan en kantite keksoz ki Zan ti vwar dan sa vizyon ki i pa ti kapab konpran. Me omwen i ti kapab konpran sa: Zeova ek Zezi ti pou fer sir ki sa bann ki ti propaz bann fo lansennyman dan kongregasyon pa ti pou reisi. Pandan zour Senyer, pep Bondye ti pou ogmante e zot ti pou ganny en kantite zoli benediksyon. Dan en lager ki ti pou arive dan lesyel, Satan ti pou ganny defet e ganny zete lo later e finalman, Satan ti pou ganny detrir pour touzour. I bezwen ki sa vizyon ti ankouraz Zan plis ankor e i ti fidelman ekri “tou keksoz ki i ti vwar.”
Menm si lavi pa ti fasil lo zil Patmos konman en prizonnyen, Zan pa ti perdi son lazwa ni son devouman. Aparaman apre lanmor Domitian en Lanperer Romen ki ti en gran lennmi bann Kretyen, Zan ti ganny large. Avek letan, Zan ti kit zil Patmos e posibleman i ti retourn Efez. Ler i ti pros 100 an, i ti ganny en nouvo travay pour fer ki pa ti fasil.
Zan ti ganny enspire pour ekri sa katriyenm e dernyen Levanzil. I ti konnen ki sa ki i ti pou ekri ti pou propaz vitman dan bann kongregasyon e sa ti pou ed en kantite Kretyen pour devlop lafwa ek kouraz. Bann lennmi bann vre Kretyen ti pou ay li plis ankor akoz sa, me sa pa ti anpes Zan fer sa travay.
Menm si apepre 70 an ti’n pase depi lanmor Zezi, avek led lespri sen, Zan ti rapel en kantite keksoz ki Zezi ti’n dir e fer. Zan ti ekri en resi lo lavi Zezi ki ti tousan e reel. Apepre 90 poursan sa ki Zan ti ekri dan son Levanzil pa ti ganny rakonte par sa trwa lezot Levanzil ki ti ganny ekrir pli boner. Par egzanp, zis Zan ki dekrir rezireksyon Lazar ek sa konplo ki bann sef relizye ti’n fer pour touy Lazar apre. (Zan 11:1-46; 12:10) Zan ti osi ekri an detay diskour ki Zezi ti fer pour son bann disip e lapriyer ki i ti fer pour zot sa zour swar ki i ti ganny trair. Pa sa i en zoli kado pour partaz avek tou Kretyen!
Apepre sa menm letan, Zan ti ganny enspire pour ekri trwa let pour bann frer ek ser Kretyen. Avek lardyes, i ti koz lo bann fo ansenyan ki ti pe konmans enfliyans kongregasyon e i ti averti bann Kretyen pour pa zanmen asosye avek zot, ni menm dir zot bonzour. Sa trwa let Zan i osi ranpli avek lanmour ek lespwar. Zan ti ansennyen ki “Bondye i lanmour” e sa zapot ti demontre sa menm lanmour dan bann konsey ek lankourazman ki i ti donnen. I ti osi ekri lo sa lazwa ki i ti santi ler i ti vwar bann ki i ti’n ede pour konn laverite pe kontinyen “reste dan laverite.” Petet en kantite zot ti ganny ankouraze pour fer sanmenm.
Bann Kretyen ozordi pa pou zanmen fer fas avek sa ki Zan ti fer fas avek. Menm si bann fo ansenyan i ankor egziste ozordi, i pa pou zanmen parey ler zot ti anvair kongregasyon Kretyen pandan bann syek ki ti swiv apre lanmor Zan. (Iza. 54:17; Akt 3:21) Me parey Zan, nou kapab ganny bann problenm, persekisyon e menm ganny met dan prizon. Alor, annou swiv son legzanp. Annou reste determinen, avek kouraz, pour kontinyen mars avek Bondye malgre nenport kwa ki nou kapab fer fas avek!
Lir sa resi dan Labib:
Pour diskit lo la:
Ki mannyer Zan ti demontre kouraz?
Al pli o profon
1. Kwa ki montre ki Zan ti annan en personnalite for? (bt 33, bwat ¶3-4)
2. Akoz Zan ti ganny konsidere konman en dimoun ki ti “napa bokou ledikasyon” e ki i ti en “zonm ordiner”? (Akt 4:13; w08 1/5 31 ¶1)
3. Dan ki sans Zan ti reste ziska ki Zezi ti vini? (not letid dan Zan 21:22, nwtsty-E)
4. Akoz nou kapab dir ki Zan ti ekri sa Levanzil ki port son non? (it-E “John, Good News According to” ¶2-8) A
Fondation Martin Bodmer, Cologny (Genève)
Portre A: En maniskri date apepre lannen 200 avek tit “Sa bon nouvel dapre Zan”
Reflesir lo sa bann leson
Bann liv ki Zan ti ekri dan Labib i koz lo sakrifis Zezi oubyen bann byenfe ki sa sakrifis i anmennen plis ki 100 fwa. Ki mannyer nou osi nou kapab demontre sa menm lapresyasyon pour sakrifis Zezi?
Zan ti annan plis ki 90 an ler i ganny enspire pour ekri senk liv dan Labib. Ki sa i ansenny nou lo lafason ki Zeova i vwar bann aze? B
Portre B
Ki mannyer ou kapab imit kouraz ki Zan ti demontre dan ou lavi?
Reflesir lo Zeova ek son plan
Ki sa resi i ansenny mwan lo Zeova?
Ki mannyer sa resi i relye avek plan Zeova?
Akoz ou rekonesan ki Zan in ganny swazir pour diriz ansanm avek Kris dan lesyel?
Aprann plis
Eski bann frer ek ser aze ozordi i kapab demontre sa menm kouraz ki Zan ti annan?
Zan ti ekri en kantite lo lanmour. Annou vwar sa ki nou kapab aprann atraver sa ki i’n ekri ek son legzanp.
“Sa ki nou aprann avek ‘sa disip ki Zezi ti kontan’” (w21.01 8-13)