Lafason ki divors i afekte zanfan

Serten koup marye ki annan difikilte dan zot maryaz, i krwar ki divors pou sa pli bon solisyon pour zot zanfan, dan plas ki zot zanfan i kontinyen viv avek de paran ki toultan pe dispit. Me ki resers i montre?

• Ki lefe divors i annan lo zanfan?

• Eski mon zanfan pou pli ere si mon divorse?

• Ki mon devret konnen konsernan partaz responsabilite avek sa lot paran apre divors?

• Eski i annan en pli bon solisyon?

Ki lefe divors i annan lo zanfan?

Resers i montre ki lefe ki divors i annan lo zanfan i vreman sokan. I tre probab ki bann zanfan ki zot paran in divorse pour:

• santi zot ankoler, enkyet e ganny depresyon

• devlop problenm konportman

• ganny difikilte aprann e menm aret lekol

• tonm malad fasilman

An plis, bokou zanfan i blanm zot lekor akoz zot paran in divorse. Zot krwar ki zot responsab oubyen ki zot ti’n kapab anpes zot paran divorse.

Difikilte ki sa bann zanfan i gannyen i kapab kontinyen menm apre ki zot in vin adilt. Zot santi ki zot pa vo nanryen oubyen zot pa kapab annan konfyans dan lezot. I pou pli fasil pour zot osi divorse ler zot rankontre problenm dan zot maryaz.

Sa ki enportan konnen: Menm si dimoun ki pe mazin divorse i krwar ki sa pour pli byen pour zot zanfan, dapre resers, sa i pa vre. Eksper dan swen pour zanfan, Penelope Leach, i dir ki “Divors i fer zanfan malere.”a

Prensip Labib: “Pa rod zis zot prop lentere, me lentere lezot osi.”​—Filipyen 2:4.

Eski mon zanfan pou pli ere si mon divorse?

Serten dimoun pou dir wi. Me gard antet ki bezwen en zanfan i diferan avek bezwen en adilt. Sa enn ki pe rod divors i anvi sanz sa lavi ki i pe viv. Me sa zanfan i pa anvi ki son lavi ki i pe viv ansanm avek son de paran i sanze.

Apre ki zot in egzamin plizyer milye divors, bann loter sa liv The Unexpected Legacy of Divorce ti ekri: “En mesaz i kler: zanfan pa zanmen dir ki zot pli ere. O kontrer zot dir: ‘Sa zour ki mon paran ti divorse i sa zour ki mon ti perdi mon lazwa.’ Sa liv i osi azoute ki i paret ki zot pa santi zot an sekirite dan lemonn akoz relasyon ant sa de dimoun ki zot pli pros avek pa stab.”

Sa ki enportan konnen: I vreman rar pour zanfan santi zot ere apre ki zot paran in divorse.

Prensip Labib: “En lespri tris i tir tou lafors en dimoun.”​—Proverb 17:22, NWT.

Ki mon devret konnen konsernan partaz responsabilite avek sa lot paran apre divors?

Serten paran ki’n divorse i esey desarz zot responsabilite zis parey ler zot ti ankor marye. Par kont, i difisil pour partaz responsabilite ant le de paran apre divors. Resers i montre ki paran i souvan:

• pas mwens letan avek zot zanfan

• ansenny en keksoz me lot paran i ansenny sa ki lekontrer

• les zanfan fer sa ki zot oule akoz zot santi zot koupab oubyen zot fatige

En zanfan ki son paran in divorse i kapab osi santi ki i pa bezwen ekout son paran. Apre tou, son paran pa ti fer sa ki byen tel parey gard zot promes pour reste ansanm. I kapab mazinen: ‘Akoz fodre mon ekout zot?’

Sa ki enportan konnen: I souvan difisil pour paran partaz responsabilite antre zot apre divors me pour zanfan, sa i pli difisil ankor.

Prensip Labib: “Pa bezwen fer zot zanfan ankoler pour ki zot pa dekouraze.”​—Kolosyen 3:21, not.

Eski i annan en pli bon solisyon?

I demann en kantite zefor pour konmans en nouvo lavi apre en divors. Parfwa, i ti pou pli byen si sa koup ti fer sa kantite zefor pour sov zot maryaz. En liv ki apel The Case for Marriage i dir: “Zis akoz en maryaz pa pe marse, sa pa vedir ki i pa kapab amelyore. Avek letan, bann koup ki pa ti ere dan zot maryaz me ki ti kontinyen reste ansanm, ti vin pli ere.” An zeneral, zanfan i fer pli byen ler zot paran i reste ansanm.

Sa i pa vedir ki divors pa zanmen en opsyon. Anfet, Labib i permet en dimoun divorse si son konzwen in komet imoralite seksyel. (Matye 19:9) Par kont, Labib i osi dir ki “en dimoun pridan i gete kote i met son lipye.” (Proverb 14:15) En msye ek son madanm, ki annan problenm dan zot maryaz i devret mazin lo tou konsekans ki zot desizyon i kapab anmennen. Sa i enkli lefe ki divors i kapab annan lo zot zanfan.

Byensir, petet ou pou bezwen fer plis ki zis andir sa sityasyon. Labib i donn bann pli bon konsey ki bann msye ek madanm i bezwen pour ed zot devlop bann kalite neseser pour annan en maryaz ere e dirab. Nou pa sirprann akoz Zeova, loter Labib ki ti kree laranzman maryaz.​—Matye 19:4-6.

Prensip Labib: “Mwan [Zeova], ou Bondye, mon ansenny ou pour ou prop dibyen.”​—Izai 48:17.