Ki mannyer pour kit travay “kot travay”

Dan sa lemonn teknolozi, ou anplwayer, koleg travay oubyen bann dimoun ki ou pe donn zot en servis i ekspekte ou la 24-7. Sa i fer li difisil pour annan en bon balans ant ou travay ek lezot keksoz dan ou lavi, enkli ou maryaz.

• Sa ki ou devret konnen

• Nide lo lafason pour balans ou travay ek lavi fanmir

• Sa ki bann koup i dir

• Diskisyon

Sa ki ou devret konnen

• Teknolozi i kapab fer ou pas plis letan pe travay dan plas pas letan avek ou konzwen. Sak koud telefonn, imel oubyen tèks ki ou gannyen ler ou pa pe travay, i kapab parey en dife ki bezwen ganny tennyen vitman.

  “Zis pour vin lakaz apre travay e pas letan avek ou fanmir, i paret enposib aprezan akoz ler ou ganny bann koud telefonn ek imel konsernan travay, sa i fer ki ou konsantre plis lo ou travay ki lo ou konzwen,”​—Jeanette.

• Pour annan en bon balans ant ou lavi fanmir ek ou travay, ou bezwen fer en plan. Si ou pa fer en plan, i tre probab ki ou travay pou pran plas sa letan ki ou devret pase avek ou konzwen.

  “Ou konzwen i normalman sa premye dimoun ki ou neglize akoz ou krwar ki i pou konpran ou, i pou pardonn ou e ki pli tar ou pou kapab pas letan avek li.”​—Holly.

Nide lo lafason pour balans ou travay ek lavi fanmir

• Donn priyorite ou maryaz. Labib i dir: “Sa ki Bondye in ini ansanm, imen pa devret separe.” (Matye 19:6, New American Bible, Revised New Testament) Si ou pa pou les en imen separ ou avek ou konzwen, akoz ou devret les ou travay fer sa?

  “Serten dimoun i santi ki akoz zot pe pey ou, zot sipoze kapab ganny kontakt avek ou nenport ler ki zot bezwen ou. Vi ki mon rekonnet ki mon maryaz i pas avan lezot keksoz, mon dir zot ki zot pa pou ganny mwan dan bann zour ki mon pa travay me ki mon ava kontakte zot pli tar.”​—Mark.

  Demann ou lekor, ‘Eski lafason mon azir i montre ki mon vwar mon maryaz pli enportan ki mon travay?’

• Ler i neseser, pa aksepte pour travay. Labib i dir: “Lasazes i avek sa enn ki annan limilite,” (Proverb 11:2, NWT) Si ou annan limilite, ou pou vwar ki i saz pour ou pa aksepte pour travay ler i pa neseser oubyen pour partaz ou travay avek lezot dimoun.

  “Mon en plonber. Si en dimoun i bezwen mon led dan en ka irzan e mon pa kapab arive dan sa letan ki i anvi, sa dimoun pou strese. Alor mon fer en lot dimoun al kot li.”​—Christopher.

  Demann ou lekor: ‘Eski mon pare pour pa aksepte travay an plis si sa i kapab fer mon konzwen santi ki mon pe negliz li? Eski mon konzwen i krwar ki mon pare pour fer sa?’

• Fer letan pour kanmarad. Labib i dir: “I annan en letan pour tou keksoz.” (Eklezyast 3:1) Ler ou bizi avek travay, i vreman enportan ki ou plàn pour pas letan avek ou konzwen e fer sir ki ou fer li.

  “Ler nou vreman bizi, nou agree lo en ler kot nou kapab annan bann moman trankil ansanm, menm si nou zis pran dinen oubyen al fer enn pti pronmnad lo lans.”​—Deborah.

  Demann ou lekor: ‘Eski mon met letan dekote pour pas avek mon konzwen san ki mon ganny distrer? Ki mannyer mon konzwen pou reponn?’

• Tenny ou lekipman elektronik. Labib i dir: “Verifye sa ki pli enportan.” (Filipyen 1:10) Eski ou kapab tanzantan tenny ou telefonn pour ki ou pa ganny distrer avek bann mesaz oubyen bann dimoun ki telefonnen?

  “Mon’n fer bokou zefor pour met en ler pour mwan aret travay e ler i ariv sa ler, mon tenny notifications lo mon telefonn.”​—Jeremy.

  Demann ou lekor: ‘Eski mon santi mwan oblize pour reste an kontakt zis an ka mon anplwayer oubyen lezot dimoun i bezwen mwan? Ki mannyer mon konzwen pou reponn?’

• Montre ki ou rezonnab. Labib i dir: “Montre zot rezonnab.” (Filipyen 4:5) Parfwa tou le de konzwen i bezwen travay e sa i fer ki zot pa kapab pas letan ansanm. Petet akoz sa kalite travay ki ou konzwen i fer, i kapab ki i bezwen touzour an kontakt avek lezot dimoun e sa i kapab enterfer avek ou maryaz. Pa ekspekte plis avek ou konzwen. Montre ki ou rezonnab.

  “Mon msye i annan en pti biznes e souvandfwa i annan bann ka irzan ki i bezwen okipe. Parfwa sa i fatig mwan me nou touzour pas en kantite letan ansanm. Pour mwan sa i oke.”​—Beverly.

  Demann ou lekor: ‘Eski mon konsyan ki kantite louvraz mon konzwen i annan pour fer e ki mon pa devret demann li pour donn mwan plis letan oubyen latansyon? Ki mannyer mon konzwen pou reponn?’

Diskisyon

Premyerman, sakenn i kapab vwar sa bann kestyon swivan . Apre, diskit zot larepons avek kanmarad.

• Eski ou konzwen in deza konplent ki ou anmenn travay kot lakour? Si wi, eski ou dakor?

• Kote ou krwar ou kapab amelyore an sa ki konsern travay ek lavi fanmir?

• Eski ou’n deza mazinen ki ou konzwen pa kapab kit travay “kot travay”? Si wi, eski ou mazinen kan?

• Si i annan, ki sanzman ou ti a kontan vwar dan ou konzwen an sa ki konsern en bon balans ant travay ek lavi fanmir?