Servi bann prensip Labib pour antrenn ou konsyans

1-2. (a) Ki kado Zeova ti donn Adan ek Ev? (b) Ki mannyer zot ti’n devret montre zot lapresyasyon pour sa kado?

BANN zannimo i azir dapre zot lensten. En kantite masin i ganny progranmen pour fer serten keksoz. Me bann imen i diferan. Nou’n ganny kree avek en kado spesyal ki presye pour bann vre Kretyen. Sa i sa liberte pour swazir setadir, sa abilite pour fer nou prop desizyon. Labib i dir ki Adan, ki ti sa premye zonm, ti ganny kree dan resanblans Bondye. (Zen. 1:26, 27) Adan ek Ev ti bann kreatir entelizan e Zeova ti kree zot avek sa abilite pour fer zot prop desizyon.

² Zeova pa ti donn Adan ek Ev en kantite lalwa. I ti zis dir zot pran swen avek later, fer zanfan e pour respekte son lotorite pour deside ki zot kapab fer. (Zen. 1:28; 2:16, 17) Ki mannyer Adan ek Ev ti’n devret montre lapresyasyon pour sa Enn ki’n kree zot avek sa liberte pour swazir ki ti en kado? Vi ki Zeova ti’n fer tou sa bann keksoz pour zot, zot ti’n devret anvi obeir sa bann senp lord parski zot kontan li e zot ti anvi fer li plezir.—Prov. 23:15.

3. Ki mannyer Adan ek Ev ti servi zot liberte pour swazir?

³ Parey Labib i montre, Adan ek Ev pa ti servi zot liberte pour swazir dan en bon fason. O kontrer, zot ti deside pour dezobei Zeova. Zot ti fer sa desizyon akoz zot ti egois me pa akoz zot ti kontan Zeova oubyen zot ti apresye sa ki i ti’n fer pour zot. (Zen. 3:1-7) Ozordi nou ankor pe soufer akoz sa move desizyon ki zot ti fer.—Rom. 5:12.

4. (a) Dapre Galat 6:5, ki nou tou nou bezwen fer? (b) Ki en lot kado ki Bondye in donn nou ki nou pou vwar dan sa lartik?

⁴ Ozordi lavi i vreman difisil. Toulezour, nou bezwen fer plizyer desizyon. (Lir Galat 6:5.) Serten desizyon i fasil me lezot i konplike. Ki mannyer nou kapab fer bann desizyon ki pou fer Zeova plezir? Nou bezwen premyerman rekonnet ki nou bezwen led Zeova. (Prov. 16:3; Zer. 10:23) Menm Zezi, ki ti en zonm parfe, ti konnen ki i bezwen led Bondye. (Ebr. 5:7) Konman bann imen enparfe, nou pli bezwen gidans Bondye ki Zezi. Aprezan, annou vwar en lot kado ki Bondye in donn nou ki pou ed nou fer bann bon desizyon. Sa i nou konsyans.

KISISA KONSYANS?

5. (a) Kisisa konsyans? (b) Ki mannyer nou konsyans i ed nou? (Romen 2:14, 15)

⁵ Bondye in kree bann imen avek en konsyans, ki en keksoz dan nou ki ed nou konnen kwa ki byen e kwa ki mal. Menm en dimoun ki pa konn lalwa Bondye i annan en konsyans. (2 Kor. 4:2) Nou konsyans i parey en ziz anndan nou ki kapab swa akiz nou oubyen eskiz nou ler nou mazin oubyen fer en keksoz. (Lir Romen 2:14, 15.) Nou konsyans i kapab averti nou pour pa fer en keksoz ki nou konnen i mal. (1 Sam. 26:8-11) Oubyen i kapab motiv nou pour fer sa ki nou konnen i byen. Menm si Zeova in kree nou avek sa liberte pour swazir, sa pa en garanti ki tou desizyon ki nou fer, pou fer li plezir. Nou konsyans i devret ed nou pour reflesir e konn diferans ant en bon desizyon ek en move desizyon.

6. Ki problenm i annan avek nou konsyans?

⁶ Malerezman i annan en problenm avek nou konsyans. Nou enparfe e alor nou konsyans osi i enparfe. Lafason ki nou’n grandi, nou kiltir ek nou bann move dezir i kapab annan en move lenfliyans lo nou konsyans. Labib i dir ki nou konsyans i kapab vin “feb,” “sal,” “nepli sansib” oubyen “move.” (1 Kor. 8:12; Tit 1:15; 1 Tim. 4:2; Ebr. 10:22) En konsyans koumsa i nepli en bon gid. I parey en balans ki pa egzakt ki bezwen ganny aziste. Alor nou bezwen travay dir pour nou kapab kontinyen annan en bon konsyans. (1 Pyer 3:16) Ki mannyer nou kapab fer sa?

KI MANNYER NOU KAPAB ANTRENN NOU KONSYANS?

7-8. (a) Kwa ki pou ed nou antrenn nou konsyans? (b) Ki mannyer bann prensip Labib i gid nou? Eksplike. (Vwar portre.)

⁷ Ki mannyer nou kapab antrenn nou konsyans? Nou bezwen lir Labib regilyerman pour nou aprann kwa ki byen e kwa ki mal, dapre pwennvi Zeova. Ler nou etidye bann lalwa Bondye, sa pou ed nou konpran son fason panse. Parey in ganny mansyonnen dan sa lartik avan, bann lalwa i kapab aplikab dan zis serten sityasyon. I pour sa rezon ki nou bezwen rod bann prensip, vi ki zot ed nou pour konpran pli byen fason panse ek santiman Zeova.—Iza. 55:9.

⁸ Nou lavi i kapab ganny konpare avek en dimoun ki pe marse dan en lafore kot napa bann bon semen oubyen bann lansenny. Pozisyon soley ek zetwal i kapab montre nou apepre ki direksyon ki nou devret ale pour ariv dan nou destinasyon. Me i ti pou pli byen si nou servi en map ki montre bann keksoz ki nou pou vwar lo semen ki pou ed nou konn direksyon pour ale. Sa map pou ed nou konnen ler nou pe al dan sa bon direksyon e ler nou’n mal pran semen. Nou destinasyon setadir nou lobzektif dan lavi i pour fer Zeova plezir. Labib i parey en map ki donn nou bann direksyon spesifik lo ki mannyer pour ariv kot nou destinasyon. Bann prensip Labib i parey bann keksoz lo larout ki kapab ed nou pour al dan sa bon direksyon. Si nou aplik sa bann prensip, nou kapab asire ki nou pour ariv kot nou destinasyon.

9. Dapre Romen 9:1, kwa ankor ki kapab ed nou antrenn nou konsyans?

⁹ Pour nou kapab byen antrenn nou konsyans, nou bezwen led lespri sen Bondye. (Lir Romen 9:1.) Lespri sen pou ed nou konpran pwennvi Bondye konsernan bann keksoz. I osi kapab motiv nou e donn nou lafors pour fer keksoz dapre lavolonte Zeova. (Fili. 2:13) Me ki mannyer nou kapab ganny led lespri sen Zeova?

10. Ki mannyer nou kapab ganny led lespri sen? (Lik 11:10, 13)

¹⁰ Priye pour ganny lespri sen. (Lir Lik 11:10, 13.) Nou kapab asire ki Zeova i zenere e i pare pour donn nou son lespri sen. (Zan 3:34) I toultan zenere anver bann ki swiv son gidans. (Prov. 1:23; Zak 1:5) Me kwa ankor ki pou ed nou antrenn nou konsyans?

11. (a) Kwa ki devret nou lobzektif prensipal? (b) Akoz nou bezwen fer sir ki nou konsyans i byen antrennen e i pe mars byen?

¹¹ Toultan esey fer Zeova plezir. (Prov. 8:34, 35) Sa i devret nou lobzektif prensipal. Si dan tou sityasyon nou gard antet sa lobzektif, sa i kapab ed nou antrenn nou konsyans. Pour nou kapab annan en konsyans ki’n byen ganny antrennen, nou bezwen mazin parey Zeova i mazinen e enterese avek lafason ki i santi. Ozordi lavi i vreman difisil. Alor i vreman enportan ki nou annan en konsyans ki’n byen ganny antrennen. Souvan nou fer fas avek bann sityasyon ki Labib pa koz lo la spesifikman. Sa bann sityasyon i kapab annan pour fer avek divertisman, travay, ledikasyon oubyen relasyon avek lezot. Alor, ki mannyer nou kapab asire ki bann desizyon ki nou fer dan bann sityasyon koumsa i fer Zeova plezir?—2 Kor. 1:12.

12. Kwa ki pou ed nou konnen si nou konsyans pe gid nou dan sa bon direksyon? (Efezyen 5:10)

¹² Medit lo sa ki ou lir dan Parol Bondye. (Ps. 49:3) Ler ou lir Labib, rod bann prensip ki pou ed ou konpran fason panse Zeova. (Lir Efezyen 5:10.) Anmezir ki nou fer fas avek bann problenm, nou bezwen rod bann prensip Labib ki pou ed nou konnen si nou konsyans pe ed nou fer bann bon desizyon. (Prov. 2:4-9, 11-13) Sa bann prensip i kapab ed nou pour aziste e koriz nou konsyans ler i neseser, pour fer sir ki nou reste lo sa bon semen.—Ebr. 5:14.

13. Ki nou pa devret fer? Donn en legzanp.

¹³ Pa bezwen fer en desizyon e apre rod bann prensip Labib pour siport sa desizyon. Nou pa anvi fer parey bann Izraelit ki ti reste dan lavil Zida apre ki Zerizalenm ti ganny detrir an 607 avan Kris. Zot ti dir Zeremi: “Ki Zeova ou Bondye i dir nou ki semen nou devret pran e ki nou devret fer.” (Zer. 42:3-6) Me zot ti’n fini deside ki zot ti pou fer. Ler zot pa ti dakor avek lenstriksyon Zeova, zot ti fer sa ki zot ti’n deside. Sa ti anmenn maler pour zot. (Zer. 42:19-22; 43:1, 2, 4) Alor, avan nou fer en desizyon, nou bezwen rod bann prensip Labib ki montre fason panse Zeova e apre azir an armoni avek sa bann prensip.

14. Akoz nou bezwen aplik bann prensip Labib ler nou pe fer bann desizyon?

¹⁴ Fer bann desizyon dapre bann prensip Labib. (Mat. 7:24-29; Zak 1:23-25) Ler nou fer bann desizyon dapre bann prensip Labib, nou les lespri sen gid nou. Sa i fer ki Zeova i kontinyen donn nou son lespri sen. (Akt 5:32) Me si nou inyor gidans lespri sen Zeova, nou kapab “sagrin” oubyen travay kont lespri sen. (Efe. 4:30; Iza. 63:10; Akt 7:51) Zeova i menm kapab pa donn nou son lespri sen. (Ps. 51:11; 1 Tesa. 5:19) Sa ti pou vreman terib parski nou bezwen sa pwisans ek lafors ki lespri sen i donnen.—Efe. 3:16.

KOTE NOU KAPAB VWAR BANN PRENSIP LABIB KI KAPAB ED NOU?

15-16. (a) Ki mannyer nou kapab trouv bann prensip ki kapab ed nou? (b) Ki bann prensip Labib ki kapab ed en etidyan Labib pour ganny lafors pour aret fimen?

¹⁵ Servi bann zouti resers. Avan ki nou kapab aplik bann prensip Labib, nou bezwen konnen ki mannyer pour rod bann prensip dan Labib. Par egzanp, ki ou pou fer si ou etidyan Labib pa konpran akoz i mal pour fimen? Petet i kapab mazinen: ‘Labib pa mansyonn nanryen konsernan fimen. Alor, ki mannyer nou konnen i mal?’ Ki mannyer ou kapab ed li pour trouv bann prensip Labib e pour rezonn lo sa bann prensip? En zouti enportan i Liv resers pour Temwen Zeova. Ou kapab montre ou etidyan sa soutit “Fimen ek taba.” Anba sa soutit, i pou vwar sa lartik “Ki pwennvi Bondye lo fimen?” (Vwar Latour Veyer le 1 Zilyet 2014.) Ki bann verse ek prensip i pou vwar dan sa lartik?

¹⁶ Annou vwar senk prensip ki ganny mansyonnen dan sa lartik. (1) Nou pa devret vin lesklav en keksoz ki kapab touy nou. (Rom. 6:16) (2) Nou devret evit okenn keksoz ki pou fer ditor nou lekor. (2 Kor. 7:1) (3) Zeova i oule nou servi li avek tou nou nanm. (Mat. 22:37) (4) Nou pa devret fer okenn keksoz ki pou fer ditor lezot. (Mat. 22:39; 1 Kor. 10:24) (5) Zeova i kapab donn nou lafors pour fer sa ki byen. (Fili. 4:13) Alor, menm si fimen pa ganny mansyonnen dan Labib, bann prensip ki ganny trouve dan Labib i kapab ed ou etidyan konpran fason panse Zeova.

17. Ki mannyer en koup Temwen Zeova ki pe plàn en maryaz i kapab trouv bann prensip Labib ki kapab ed zot?

¹⁷ Ki mannyer en koup Temwen Zeova ki pe plàn en maryaz i kapab trouv bann prensip Labib ki pou ed zot fer bann bon desizyon? Ankor enn fwa, sa Liv resers i kapab ede. Anba sa soutit “Maryaz ek resepsyon,” i annan plizyer lartik ki enkli bann prensip Labib. Annou vwar sis prensip ki en koup i kapab reflesir lo la. (1) Tou sa ki pou arive dan sa maryaz i devret onor Zeova. (1 Kor. 10:31, 32) (2) Nou lenz i devret apropriye, modes e pa ekstrenm. (1 Tim. 2:9; 1 Pyer 3:3, 4) (3) Nou pa devret demonstre konsernan bann keksoz ki nou annan oubyen konsernan bann keksoz ki nou kapab fer parey bann dimoun dan lemonn i fer. (Zan 17:14; Zak 1:27; 1 Zan 2:15, 16) (4) Bann keksoz i devret deroul annord e avek dinyite. (1 Kor. 14:40) (5) Sa resepsyon pa devret vin en parti san kontrol kot dimoun i bwar pour sou. (Gal. 5:21) (6) Sa koup i devret donn en dimoun sa responsabilite pour ansarz sa resepsyon.—Zan 2:8, 9.

18-19. (a) Ki lezot zouti ki kapab ed nou? (b) Ki mannyer ou kapab servi sa zouti pour trouv bann prensip ki pou ed ou fer bann desizyon konsernan bann lafet? (Vwar bwat “Eski ou kapab vwar bann prensip Labib?”)

¹⁸ En lot zouti ki’n ed en kantite dimoun i sa liv Bann verse Labib pour nou lavi Kretyen. Sa piblikasyon i donn en lalis verse anba diferan topik. Ler ou’n swazir en topik, ou pou vwar en lalis kestyon ek verse ki kapab ed ou vwar bann prensip Labib. Par egzanp, en Kretyen i kapab mazinen si i devret asiste en lafet. Si i get anba tit “Lafet,” i pou vwar soutit “Lafet ki bann Kretyen pa devret selebre.”

¹⁹ Annou vwar serten lenformasyon ki ganny diskite anba sa seksyon: “Akoz i mal pour partisip dan bann lafet ki annan pour fer avek fo larelizyon? (1Ko 10:21; 2Ko 6:14-18; Efe 5:10, 11).” Anba sa soutit, i annan serten legzanp bann lafet ki en Kretyen pa devret partisip ladan. Anba sa soutit “Bann lafet nasyonal,” i annan bann prensip ki en Kretyen i kapab reflesir lo la ler i pe deside si i devret partisip dan bann lafet pour selebre listwar politik en pei, partisip dan bann seremoni pour komemor bann lager oubyen dan bann seremoni kot dimoun enportan i ganny adore. Nou vreman rekonesan ki lorganizasyon Zeova i donn nou bann zouti koumsa pour antrenn nou konsyans.

MONTRE KI OU KONSYANS IN GANNY BYEN ANTRENNEN

20. Ki mannyer nou kapab montre ki nou’n byen antrenn nou konsyans?

²⁰ Nou vreman rekonesan ki Zeova in donn nou sa abilite pour swazir, ki en kado. Pour nou kapab byen servi nou liberte pour swazir, nou realize ki nou bezwen antrenn nou konsyans. En konsyans ki’n ganny byen antrennen pou ed nou pour fer bann desizyon ki anmenn loner pour Zeova e ki an armoni avek son lavolonte. Pour nou kapab fer sa, nou bezwen led lespri sen Zeova. Alor, nou bezwen kontinyen demann Zeova son lespri sen e apre les lespri sen gid nou. Bann prensip Labib pou osi ed nou antrenn nou konsyans. Annou kontinyen servi sa bann kado byen koumsa nou pou vwar lafason ki Parol Bondye i kapab ed nou.—2 Tim. 3:16, 17; Ebr. 4:12.