Akoz bann prensip Labib i enportan?

1-2. (a) Kan ki Labib ti ganny ekrir? (b) Akoz Labib i ankor itil ozordi?

LABIB i en liv ki’n ganny ekrir depi byen lontan pase. I ti konmans ganny ekrir apepre 3,500 an pase e i ti fini ganny ekrir apepre 2,000 an pase. Kantmenm sa, “parol Bondye” ki trouve dan sa liv i vivan e pwisan ozordi. (Ebr. 4:12; 2 Tim. 3:16, 17) Plizyer bilyon dimoun i dir ki Labib in ed zot fer fas avek bann problenm ki zot rankontre dan sa lemonn ozordi.

² Ki mannyer en liv ki’n ganny ekrir bokou letan pase i kapab ankor itil ozordi? I annan de rezon prensipal. Premyerman, sa mesaz ki dan Labib i sorti kot sa “Bondye vivan,” ki nou Kreater ki saz. (1 Tim. 4:10; Rom. 16:26, 27) Dezyenmman, dan Labib, i annan bann prensip ki toultan itil e ki pa sanze menm si letan i pase. Sa bann prensip i kapab ed bann dimoun ozordi, zis parey i ti ed dimoun dan lepase pour fer fas avek zot problenm.

3. Ki bann kestyon nou pou reponn dan sa lartik?

³ Kisisa bann prensip Labib? Akoz zot sitan enportan pour nou ozordi? Ki mannyer nou kapab idantifye bann prensip ler nou lir Labib? Dan sa lartik, nou pou vwar larepons sa bann kestyon. Nou pou osi vwar ki mannyer bann lansennyman Zezi i montre ki bann prensip i enportan.

KISISA BANN PRENSIP LABIB?

4. Kisisa bann prensip Labib?

⁴ Bann prensip i bann laverite de baz ki ed nou konpran pwennvi ek santiman Bondye e bann lalwa Bondye i baze lo sa bann prensip. Parfwa en prensip i kapab ganny ekrir konman en lalwa. (Mat. 22:37) Me bann prensip i pli siperyer ki bann lalwa spesifik. Bann lalwa spesifik i kapab aplikab pour en serten letan oubyen serten sityasyon. Me bann prensip Labib i montre fason panse Zeova ek sa ki enportan pour li. Alor nou kapab dir ki bann prensip i rezon akoz Zeova i met bann lalwa. I annan en bon rezon par deryer tou lalwa Zeova. Bann prensip ki bann lalwa i baze lo la, i aplikab pour diferan sityasyon e zot pa sanze avek letan. (Ps. 119:111) I kapab ki bann lalwa i sanze me bann prensip i touzour aplikab.—Iza. 40:8.

5. Donn en legzanp ki montre sa diferans ki i annan ant bann lalwa ek bann prensip. (Vwar portre.)

⁵ Annou vwar en legzanp ki pou ed nou konpran pli byen sa diferans ki i annan ant bann lalwa ek bann prensip. En manman i kapab dir avek son pti garson, ‘Pa tous sa stov.’ Sa i en lord. Me sa prensip oubyen sa rezon par deryer sa lord i: Pa tous en keksoz so si non ou pou ganny dimal. Sa prensip pa aplik zis pour en stov. I kapab aplikab pour en karo, en kastrol so oubyen okenn lezot keksoz ki so, ki kapab fer li dimal. Sa prensip pa zis aplik pour zot lakour me pour tou lezot landrwa osi. Byensir, anmezir ki sa zanfan i grandi, i tre probab ki i pou servi en stov. Me i pou ankor bezwen fer atansyon pour ki i pa tous sa stov dan en fason ki i pou ganny dimal. Alor sa lalwa in sanze me sa prensip par deryer sa lalwa i ankor aplikab.

AKOZ BANN PRENSIP LABIB I ENPORTAN?

6. (a) Ki Zeova i donn nou dan son Parol? (b) Ki mannyer Zeova i onor nou?

⁶ Vi ki Zeova i kontan nou, i gid nou par donn nou bann lalwa spesifik pour nou kapab evit bann danze. (Zak 2:11) Osi, i ed nou konpran bann prensip oubyen rezon par deryer sa bann lalwa. Atraver son Parol, i gid nou dan diferan laspe nou lavi, kot petet napa en lalwa spesifik. Bann prensip Labib i ed nou pour fer bann bon desizyon e pour fer sa ki byen. Par donn nou sa bann prensip, Zeova i onor nou e i donn nou sa liberte pour fer bann desizyon ki montre ki nou kontan li ek son bann standar.—Gal. 5:13.

7. Donn en legzanp ki montre lafason ki bann prensip Labib i kapab ed nou. (Vwar portre.)

⁷ Annou vwar en legzanp ki pou ed nou konpran ki mannyer bann prensip Labib i ed nou. Mazin bann lansenny ki i annan lo bann highway dan serten pei. En kantite parmi sa bann lansenny i dir nou bann lalwa ek sa lanmann ki nou pou bezwen peye si nou pa obeir sa bann lalwa. Sa bann lansenny i kapab montre maksimonm vites ki en drayver i kapab dray oubyen kan ki i bezwen aret son transpor. Me i annan lezot lansenny ki kapab montre bann danze ki i annan lo semen. Par egzanp, sa bann lansenny i kapab montre ki semen i glise oubyen ki i annan bann zannimo ki pe travers semen. En drayver eksperyanse i servi bon zizman e i fer byen atansyon ler i vwar bann lansenny ki averti li konsernan bann danze. Par egzanp, si lapli oubyen lanez pe tonbe, sa drayver pou aziste lafason ki i pe dray dan sa bann kondisyon danzere. Dan menm fason, Labib i dir ki i annan serten kondwit ki Zeova pa kontan e nou bezwen pa fer sa bann keksoz. Me Labib i osi dir nou bann prensip ki ed nou pour evite mazin oubyen fer bann keksoz ki kapab fer nou kas lalwa Bondye. Pour nou fer sa, nou bezwen annan bon zizman.

8. Dapre Romen 12:1, 2, ler nou rod bann prensip Labib, ki nou aprann fer?

⁸ I annan lezot byenfe ki nou kapab gannyen ler nou rod bann prensip Labib e nou aplik zot. Par egzanp, nou aprann pour konpran fason panse Zeova lo bann keksoz. Ler nou lir Labib, nou aprann pour rod e reflesir lo bann leson. Nou demann nou lekor akoz Zeova in enkli sa bann leson dan son Parol e ki byenfe nou kapab gannyen ler nou aplik zot. Ler nou fer sa, nou aprann pour servi nou “abilite pour reflesir” pour servi Zeova. Nou fer sir pour nou menm “ki sa i lavolonte Bondye, ki bon, akseptab e parfe.”—Lir Romen 12:1, 2.a

9. Ki bann lezot byenfe nou gannyen ler nou aplik bann prensip Labib? (Ebre 5:13, 14)

⁹ Ler nou aprann viv dapre bann prensip Labib, sa i ed nou pour vin bann Kretyen matir. Vi ki nou konpran pli byen sa ki Zeova i kontan e pa kontan, nou lanmitye avek Zeova i vin pli for. (Lir Ebre 5:13, 14.) Bann zanfan i bezwen en kantite lalwa oubyen lareg pour zot konnen ki pour fer dan diferan sityasyon. I kapab ki zot obeir zis akoz zot per ki zot ganny pini. Me Zeova i tret nou konman bann adilt ki matir me pa konman bann pti zanfan. I annan konfyans ki nou pou fer bann desizyon ki an armoni avek son lavolonte e ler nou fer sa, nou fer li kontan.—Ps. 147:11; Prov. 23:15, 26; 27:11.

KI MANNYER NOU KAPAB IDANTIFYE BANN PRENSIP LABIB?

10. Ki mannyer nou kapab idantifye bann prensip Labib?

¹⁰ Ler nou rod bann leson dan Labib, nou vwar bann prensip ki kapab ed nou konpran pwennvi ek santiman Bondye lo bann keksoz. Nou osi kapab idantifye bann prensip par rod bann rezon akoz Zeova in donn serten lalwa. Pli nou konpran bann rezon akoz Zeova in donn serten lalwa, pli nou pou konpran Zeova. Pour nou kapab konpran fason panse Bondye, nou bezwen demann li pour ed nou e nou bezwen aprann pour byen reflesir lo sa ki nou lir. (Prov. 2:10-12) Nou kapab demann nou lekor bann kestyon parey: ‘Akoz Bondye in donn sa lalwa? Si Zeova in donn nou lord pour pa fer sa, ki mannyer i pou santi konsernan bann kondwit en pe parey? Ki leson mon aprann dan sa resi e ki mannyer mon kapab aplik li dan mon lavi?’ Enn fwa ki nou’n idantifye rezon akoz Zeova in donn serten lalwa e nou’n idantifye bann leson ki nou aprann avek bann resi dan Labib, nou pou kapab fer bann bon desizyon ki an armoni avek lavolonte Zeova.

11. Dan Sermon lo Montanny, ki mannyer Zezi ti montre nou lafason ki nou kapab idantifye bann prensip Labib? (Vwar portre.)

¹¹ Dan Sermon lo Montanny, Zezi ti montre nou ki mannyer nou kapab idantifye bann prensip Labib. Annou vwar trwa legzanp. Dan sak sirkonstans, Zezi ti premyerman donn en lalwa. Apre i ti montre rezon oubyen prensip par deryer sa lalwa. Anmezir ki nou medit lo sa ki Zezi ti dir, nou pou vwar bann leson ki nou kapab aprann e lafason ki nou kapab aplik sa bann prensip dan nou letan ozordi.

12. Ki en prensip ki nou kapab vwar par deryer sa lalwa ki ganny trouve dan Matye 5:21, 22? (Vwar portre.)

¹² Lir Matye 5:21, 22. “Ou pa devret komet mert.” Ki en prensip ki nou kapab vwar par deryer sa lalwa? Zeova pa anvi ki nou ay lezot ki swa an aksyon, an parol oubyen menm dan nou lespri. Zezi ti montre ki menm si en dimoun pa komet mert, i kapab dezobei sa prensip setadir sa rezon par deryer sa lalwa, si i ay son frer. Si en dimoun i “kontinyen ankoler avek son frer” oubyen i dir li bann keksoz ki kriyel, sa dimoun ki ankoler pou bezwen “rann kont.” Anfet i sanmenm sa bann latitid ek aksyon ki fer dimoun komet mert.—1 Zan 3:15.

13. Ki mannyer nou kapab aplik sa prensip ki dan Matye 5:21, 22? (Vwar portre.)

¹³ Ki mannyer nou kapab aplik sa prensip ki dan Matye 5:21, 22? Nou devret evite reste ankoler oubyen gard rankin. (Lev. 19:18; Zob 36:13) Akoz? Parski sa bann santiman i kapab fer nou devlop laenn dan nou leker e sa i kapab fer nou dir oubyen fer bann keksoz kriyel. (Prov. 10:12) Sa i enkli donn nouvel oubyen fann rimer lo en dimoun ki kapab gat son repitasyon. (Prov. 20:19; 25:23) Alor menm avan ki i ti annan bann keksoz parey rezo sosyal, Enternet oubyen bann app pour anvoy mesaz, Zezi ti donn en prensip ki ti pou ed bann Kretyen matir pour fer atansyon konsernan bann danze ki i kapab annan ler zot servi sa bann zouti. Me dan tou sityasyon, nou devret evite dir oubyen ekri bann keksoz kriyel ki kapab gat repitasyon en dimoun e fer lezot perdi respe pour li.

14. Ki sa prensip ki nou kapab vwar par deryer sa lalwa ki ganny trouve dan Matye 5:27, 28? (Vwar portre.)

¹⁴ Lir Matye 5:27, 28. “Ou pa devret komet adilter.” Ki prensip ki nou kapab vwar par deryer sa lalwa? Zeova pa zis ay imoralite seksyel me i osi pa kontan ler en dimoun i mazin bann keksoz imoral parski sa i kapab fer li fer sa ki mal. Zezi ti eksplike ki si en msye ki’n marye i kontinyen get en madanm ki pa son madanm avek dezir, sa msye in fer pese. Alor nou devret fer tou sa ki nou kapab pour evite annan bann panse imoral menm si nou bezwen fer bokou zefor. (Mat. 5:29, 30) Sa prensip i osi aplik pour bann Kretyen selibater.

15. Ki mannyer nou kapab aplik sa prensip ki dan Matye 5:27, 28? (Vwar portre.)

¹⁵ Ki mannyer nou kapab aplik sa prensip ki dan Matye 5:27, 28? Nou pa devret kontinyen mazin bann keksoz imoral. (2 Sam. 11:2-4; Zob 31:1-3) Alor i kler ki en Kretyen matir i evit tou form pornografi. I pa esey zistifye son lekor par krwar ki i pe zis get bann keksoz imoral me i pa pe fer nanryen mal. I pa pou esey rod leskiz e fer parey dimoun dan sa lemonn ki krwar ki i annan serten pornografi ki napa nanryen mal avek. Dan letan Zezi, i ti napa okenn lekipman elektronik, film oubyen portre. Kantmenm sa, Zezi in donn nou en prensip ki ansenny nou lafason ki Zeova i santi konsernan bann keksoz ki kapab ganny pibliye dan nou letan. Sa i ed nou pour konpran ki Zeova pa pou kontan si nou anvoy bann portre ek video imoral oubyen si nou fer bann aktivite imoral lo Enternet ki parey ler nou pe komet imoralite seksyel. Sa prensip i kapab ed en dimoun ki’n marye pour pa trai son konzwen. (Mal. 2:15) I osi ed tou Kretyen ki swa zot in marye oubyen selibater pour evit okenn keksoz ki kapab fer zot komet imoralite seksyel.—Prov. 5:3-14.

16. Ki sa prensip ki nou kapab vwar par deryer sa lalwa ki ganny trouve dan Matye 5:43, 44? (Vwar portre.)

¹⁶ Lir Matye 5:43, 44. “Ou devret kontan ou prosen.” Ki prensip nou kapab vwar par deryer sa lalwa? Zeova i anvi ki nou konsider tou dimoun konman nou prosen e nou demontre lanmour anver zot. Malerezman bann Zwif dan letan Zezi ti mal aplik sa lenstriksyon e krwar ki zot kapab ay zot lennmi. Me Zezi ti konnen ki i pa ti sa rezon akoz Zeova ti’n donn sa lalwa. I ti konnen ki son Papa ki dan lesyel ki kontan bann imen, i anvi ki nou konsider lezot konman nou prosen nenport ki ras oubyen nasyonalite ki zot annan.—Mat. 5:45-48.

17. Ki byenfe nou gannyen ler nou aplik sa prensip ki dan Matye 5:43, 44? (Vwar portre.)

¹⁷ Ki mannyer nou kapab aplik sa prensip ki dan Matye 5:43, 44? Lanmour pour nou prosen pou fer nou refize pran kote dan bann lager ek konfli ki i annan dan sa lemonn. (Iza. 2:4; Mik. 4:3) I pou ed nou tret bann dimoun ki en lot ras, nasyonalite oubyen larelizyon avek labonte. (Akt 10:34, 35) I pou osi ed nou pour pardonn bann ki pa’n tret nou byen oubyen ki pa’n tret bann ki nou kontan byen.—Mat. 18:21, 22; Mark 11:25; Lik 17:3, 4.

ANNOU DETERMINEN POUR VIV DAPRE BANN PRENSIP LABIB

18. (a) Ki nou devret determinen pour fer? (b) Ki nou pou vwar dan sa lartik ki swiv?

¹⁸ Nou vreman rekonesan ki Zeova i pare pour tret nou konman bann adilt e pa konman bann zanfan. I anvi ki nou aplik bann prensip Labib ki pou ed nou avek bann desizyon ki nou bezwen fer regilyerman. (1 Kor. 14:20) Anmezir ki nou fer sa bann desizyon, annou determinen pour “kontinyen esey konpran kisisa lavolonte Zeova.” (Efe. 5:17) Nou pou fer bann desizyon ki an armoni avek lavolonte Zeova akoz nou kontan Zeova me pa akoz nou per ki nou pou ganny pini. Me i annan en lot keksoz ki pou ed nou pour fer bann desizyon ki saz ki fer Zeova plezir. Sa i nou konsyans. Dan sa lartik ki swiv, nou pou koz en pti pe plis konsernan nou konsyans.