Kontinyen satisfer ou bezwen spirityel

1. Zeova in kree nou avek ki bezwen? (Matye 5:3)

ZEOVA in kree imen avek sa bezwen pour serten keksoz. Par egzanp, pour nou kapab kontinyen viv, nou bezwen manze, lenz ek en landrwa an sekirite pour nou reste. Si nou napa enn sa bann keksoz, menm pour en ptigin letan, sa i kapab fer nou lavi difisil. Me apard ki kree nou avek sa bezwen pour keksoz fizik, Zeova in osi kree nou avek en bezwen spirityel, setadir ki nou bezwen son gidans. (Lir Matye 5:3 ek not.) Si nou vreman anvi ere, nou bezwen rekonnet ki nou annan sa bezwen e kontinyen satisfer li.

2. Ki sa lekspresyon “rekonnet ki zot bezwen gidans Bondye” i vedir? Donn en legzanp.

² Ki sa lekspresyon “rekonnet ki zot bezwen gidans Bondye” i vedir? Dan langaz Grek, sa lekspresyon i donn nide en dimoun ki mandyan pour ganny lespri sen. Imazin en mandyan dan en lenz ki’n desir desire e i pe asize dan kwen semen. I fay parski i pa ganny ase manze, dimoun i evit li akoz son laparans e i asize dan gro ker soley e aswar i ganny fre. Sa mandyan i konsyan ki i pou bezwen led si i anvi amelyor son lavi. Dan menm fason, en dimoun ki rekonnet ki i bezwen gidans Bondye, setadir ki mandyan lespri sen, pou bezwen led pour amelyor son sityasyon. Alor i vreman anvi servi sa kantite provizyon ki Zeova i donn bann ki kontan Li.

3. Ki nou pou vwar dan sa lartik?

³ Dan sa lartik, nou pou premyerman vwar ki nou kapab aprann avek en madanm Fenisyen ki ti sipliy Zezi pour ed li. Sa resi i koz lo trwa kalite ki bann ki rekonnet zot bezwen spirityel i bezwen devlope. Apre, nou pou vwar legzanp zapot Pyer, Pol ek Lerwa David, ki ti bann zonm ki ti rod gidans Bondye.

OU BEZWEN ANNAN LIMILITE, PERSISTE E ANNAN LAFWA

4. Ki en madanm Fenisyen ti anvi Zezi i fer pour li?

⁴ En zour, en madanm Fenisyen ti vin kot Zezi. Fiy sa madanm ti pe “soufer en kantite akoz i [ti] posede par en demon.” (Mat. 15:21-28) Sa madanm ti tonm azenou e sipliy Zezi pour ed li. Sa madanm Fenisyen ti demontre bann kalite remarkab ler i ti apros Zezi. Annou vwar zis trwa parmi sa bann kalite.

5. Ki bann kalite sa madanm ti demontre e ki mannyer Zezi ti reazir? (Vwar portre.)

⁵ Sa madanm Fenisyen ti annan limilite. Akoz nou kapab dir sa? Parski i pa ti ofanse ler Zezi ti servi en legzanp kot i ti konpar li avek en pti lisyen. Petet sa ti sa kalite zannimo ki bann dimoun ki pa ti Zwif ti gard dan zot lakour. Ki mannyer ou ti pou’n reakte avek sa ki Zezi ti dir e fer? Eski ou ti pou’n santi ki Zezi ti pe ensilte ou e ou ti pou’n aret rod son led? Sa madanm Fenisyen pa ti fer sa. I pa ti zis demontre limilite me i ti osi persiste. Nou vwar sa par lafason ki i ti kontinyen sipliy Zezi pour ed li. Akoz i ti fer sa? Parski i ti annan lafwa dan Zezi. Anfet, sa lafwa ki sa madanm ti annan ti sitan enpresyonn Zezi ki Zezi ti fer en keksoz remarkab. Menm si Zezi ti’n fek dir li ki i’n ganny anvoye zis kot “bann mouton perdi pep Izrael,” Zezi ti tir demon lo fiy sa madanm.

6. Ki nou aprann avek sa resi konsernan sa madanm Fenisyen?

⁶ Pour satisfer nou bezwen spirityel, nou bezwen swiv legzanp sa madanm. Nou bezwen annan limilite, persiste e annan en lafwa for. Zis en dimoun ki annan limilite ki pou persiste e kontinyen sipliy Bondye pour son led. Nou osi bezwen annan en lafwa for dan Zezi Kri e annan konfyans dan sa bann ki i pe servi pour gid son bann disip. (Mat. 24:45-47) Zeova ek son Garson i kontan pour satisfer bezwen spirityel bann ki demontre sa bann kalite. (Konpar Zak 1:5-7.) Aprezan, annou vwar ki mannyer Zeova i donn nou manze, lenz ek proteksyon spirityel. Atraver legzanp zapot Pyer, Pol ek Lerwa David, nou pou vwar ki nou bezwen fer pour ganny sa bann provizyon.

PAREY PYER, KONTINYEN NOURI OU LEKOR SPIRITYELMAN

7. Ki responsabilite Pyer ti ganny donnen me ki i ti osi bezwen fer? Eksplike. (Ebre 5:14–6:1)

⁷ Annou vwar legzanp zapot Pyer. I ti enn parmi bann premye Zwif ki ti rekonnet ki Zezi ti Mesi, sa enn ki Zeova ti pe servi pour nouri Son pep, setadir pour ansenny zot “parol lavi eternel.” (Zan 6:66-68) Apre ki Zezi ti’n resisite e avan ki i ti retourn dan lesyel, i ti donn Pyer sa lord: “Donn manze mon bann pti mouton.” (Zan 21:17) Pyer ti fer sa ki Zezi ti’n demann li e Zeova ti menm servi li pour ekri de let ki’n ganny enkli dan Labib. Me Pyer ti osi bezwen nouri son lekor spirityelman. Par egzanp, i ti etidye bann let ki zapot Pol ti’n ganny enspire pour ekri. Pyer ti rekonnet ki i ti annan serten keksoz ki Pol ti’n ekri, ki ti “difisil pour konpran.” (2 Pyer 3:15, 16) Me i kler ki Pyer ti persiste. I ti annan lafwa ki Zeova ti pou ed li dizer sa “manze solid,” setadir ed li pour konpran e aplik sa ki Pol ti’n ganny enspire pour ekri dan son bann let.—Lir Ebre 5:14–6:1.

8. Ki mannyer Pyer ti reazir ler i ti ganny en nouvo konprenezon atraver en lanz?

⁸ Pyer ti montre ki i ti annan lafwa dan Zeova par obeir lenstriksyon ki i ti’n gannyen. Par egzanp, ler i ti dan lavil Zope, Pyer ti ganny en vizyon kot en lanz Bondye ti dir li touy e manz bann zannimo ki dapre Lalwa Moiz ti enpir. Pour bann Zwif, sa lenstriksyon ti pou’n paret sokan. O konmansman, Pyer ti dir: “Pa ditou Senyer parski mon pa’n zanmen manz okenn keksoz sal e enpir.” Me i ti ganny dir: “Pa bezwen konsider sal sa ki Bondye in pirifye.” (Akt 10:9-15) Pyer ti konpran sa ki Bondye ti pe esey ansenny li. Ki mannyer nou konn sa? Pa bokou letan apre ki Pyer ti’n ganny sa vizyon, trwa zonm sorti kot Korney, en zonm ki pa ti Zwif, ti vin kot Pyer e zot ti envit li pour vin koz avek zot met. Normalman Pyer pa ti pou’n zanmen dakor pour antre dan lakaz en dimoun ki pa Zwif parski bann Zwif ti konsider bann dimoun ki pa Zwif konman enpir. (Akt 10:28, 29) Me deswit Pyer ti aksepte sa nouvo konprenezon ki Zeova ti’n donn li. (Prov. 4:18) I ti anons sa bon nouvel avek Korney ek bann dimoun dan son lakour e i ti byen kontan pour vwar zot aksepte laverite, ganny lespri sen e batize.—Akt 10:44-48.

9. Ki de byenfe nou gannyen ler nou devlop en bon lapeti pour manze solid ki dan Parol Bondye?

⁹ Parey Pyer, nou bezwen regilyerman nouri nou lekor avek dile, setadir bann laverite de baz ki sorti dan Parol Bondye. Nou osi bezwen devlop en lapeti pour manze solid ki dan Parol Bondye, setadir bann laverite ki kapab pli difisil pour konpran. Nou bezwen met letan de kote e pare pour fer zefor pour konpran Parol Bondye pli byen. Me i vo lapenn pour fer sa. Akoz? Nou ganny omwen de byenfe. Premyerman, nou aprann bann keksoz konsernan Zeova ki fer nou kontan li plis e annan plis respe pour li. Dezyenmman, sa ki nou aprann i fer nou pli anvi koz avek lezot konsernan nou Papa ki dan lesyel ki vreman enpresyonan. (Rom. 11:33; Rev. 4:11) Legzanp Pyer i ansenny nou en lot leson. Ler i annan bann azisteman dan lafason ki nou konpran Parol Bondye, nou bezwen vitman aziste nou fason panse ek aksyon. I selman ler nou fer sa, ki nou pou kapab kontinyen nouri nou lekor spirityelman e Zeova pou kapab kontinyen servi nou.

PAREY POL, KONTINYEN GARD OU LENZ SPIRITYEL LO OU

10. Ki nou bezwen fer pour nou kapab met nou lenz spirityel lo nou? (Kolosyen 3:8-10)

¹⁰ Pour nou kapab fer Bondye plezir, nou bezwen servi en lot provizyon ki i donn nou e sa i lenz spirityel. Ki sa i vedir? Zapot Pol ti dir ki nou bezwen “debaras [nou] avek sa vye personnalite” e met oubyen devlop “sa nouvo personnalite.” (Lir Kolosyen 3:8-10.) Me i kapab difisil pour kontinyen fer sa. Annou vwar legzanp Pol. Depi ler i ti ankor zenn, i ti travay dir pour ganny laprouvasyon Bondye. (Gal. 1:14; Fili. 3:4, 5) Me i ti napa konnesans egzakt konsernan lavolonte Bondye e sa ti fer ki i pa ti konnen ki mannyer pour ador Bondye dan sa bon fason. Vi ki i pa ti konn bann lansennyman Kris e i ti orgeye, sa ti fer li en dimoun “arogan” ki ti annan bann move tre.—1 Tim. 1:13.

11. Ki move tre Pol ti bezwen travay dir pour debaras li avek? Eksplike.

¹¹ Avan ki Pol ti vin en Kretyen, i ti en dimoun ki ti ankoler vitman. En resi dan liv Akt i dir ki Pol ti sitan ankoler avek bann disip Zezi, ki i ti “menase pour touy zot.” (Akt 9:1) San dout, apre ki i ti vin en Kretyen, Pol ti travay dir pour debaras li avek sa tre dan son vye personnalite. (Efe. 4:22, 31) Kantmenm sa, ler Pol ek Barnabas ti ganny en dezakor, zot tou le de zot ti “pran en gran lakoler.” (Akt 15:37-39) Dan sa moman, Pol pa ti konport li dan sa fason ki Bondye ti anvi. Me i ti kontinyen travay dir pour li vin sa kalite dimoun ki annan laprouvasyon Bondye.—1 Kor. 9:27.

12. Kwa ki ti ed Pol pour debaras li avek bann move tre?

¹² Pol ti reisi debaras li avek bann move tre e pour devlop sa nouvo personnalite parski i pa ti depan lo son prop lafors. (Fili. 4:13) Parey Pyer, Pol ti depan lo “lafors ki Bondye i donnen.” (1 Pyer 4:11) Me parfwa Pol ti fer bann fot e sa ti fer li dekouraze. Me ler i ti dekouraze, i ti mazin bann bon keksoz ki son Papa ki dan lesyel ti’n fer pour li e sa ti fer li pli determinen pour kontinyen fer zefor pour amelyore.—Rom. 7:21-25.

13. Ki mannyer nou kapab swiv legzanp Pol?

¹³ Nou kapab swiv legzanp Pol par rekonnet ki nenport ki kantite letan ki nou’n servi Zeova, nou bezwen kontinyen fer zefor pour debaras nou avek sa vye personnalite e devlop sa nouvo personnalite, setadir nou bezwen met sa lenz spirityel ki Bondye i donnen. Si nou fer en fot, par egzanp si nou pran lakoler oubyen nou dir en dimoun en keksoz blesan, nou pa devret krwar ki nou pa pou zanmen kapab fer Zeova plezir. O kontrer nou devret kontinyen esey transform nou fason panse ek aksyon. (Rom. 12:1, 2; Efe. 4:24) Me anmezir nou fer sa, nou bezwen rapel en keksoz enportan. Sa lenz spirityel ki Zeova i donnen i diferan avek en lenz normal. Konpare avek en lenz normal ki kapab ganny aziste pour antre lo nou, nou ki bezwen fer bann azisteman avek nou lekor pour nou kapab antre dan sa lenz spirityel ki Zeova i donnen. Alor i rezonnab ki nou ki sanz nou personnalite pour nou fer sa ki Zeova i ekspekte.

PAREY DAVID, RESTE ANBA SA PROTEKSYON SPRIRITYEL

14-15. Dan ki fason Zeova i donn son pep proteksyon spirityel? (Psonm 27:5) (Vwar portre.)

¹⁴ Pour nou vreman ere, nou bezwen plis ki manze ek lenz spirityel. Nou osi bezwen proteksyon spirityel. Kisisa sa proteksyon spirityel e ki mannyer nou kapab fer sir ki nou reste anba sa proteksyon?

¹⁵ Lerwa David ti koz konsernan sa proteksyon spirityel ki Zeova i donnen. (Lir Psonm 27:5.) Zeova i protez son pep kont okenn dimoun ek okenn keksoz ki kapab fer zot perdi zot lafwa dan li. Ki mannyer Zeova i protez son bann serviter kont sa bann keksoz? I promet ki i pou napa okenn zarm ki’n ganny fer kont zot ki pou reisi. (Ps. 34:7; Iza. 54:17) Menm si Satan ek bann ki siport li i pwisan, zot pa pou kapab fer nou ditor pour touzour. Menm si zot touy nou, Zeova pou resisit nou. (1 Kor. 15:55-57; Rev. 21:3, 4) Zeova i osi kapab ed nou fer fas avek bann lenkyetid ki kapab fer nou aret servi li. (Prov. 12:25; Mat. 6:27-29) Nou Papa ki kontan nou i donn nou en fanmir spirityel ki siport nou ek bann ansyen ki pran swen avek nou. (Iza. 32:1, 2) Ler nou rasanble ansanm, nou ganny bann rapel konsernan bann fason ki nou les Zeova protez nou.—Ebr. 10:24, 25.

16. Dan ki fason Zeova ti protez David?

¹⁶ Ler David ti obei Zeova, Zeova ti protez li kont bann konsekans ki ariv avek bann ki fer pese volonterman. (Konpar Proverb 5:1, 2.) De lot kote, ler David ti inyor standar Bondye, Zeova pa ti protez li kont bann konsekans son bann aksyon. (2 Sam. 12:9, 10) Me ki nou pou dir konsernan bann moman ler David ti soufer menm si i pa ti fer nanryen mal? David ti devid son leker avek Zeova e Zeova ti rekonfort li par asir li ki i kontan li en kantite e ki i ti pou pran swen avek li.—Ps. 23:1-6.

17. Ki mannyer nou kapab swiv legzanp David?

¹⁷ Nou kapab swiv legzanp David par rod konsey avek Zeova ler nou annan bann desizyon pour fer. Nou osi rekonnet ki parfwa nou soufer pa akoz Zeova pa’n protez nou me akoz nou’n fer bann move desizyon. (Gal. 6:7, 8) Ler nou soufer menm ler nou pa’n fer nanryen mal, nou devid nou leker avek Zeova e nou annan konfyans ki i pou rekonfort nou e ed nou santi ki i kontan nou.—Fili. 4:6, 7.

KONTINYEN SATISFER OU BEZWEN SPIRITYEL

18. Ki problenm nou fer fas avek e ki mannyer nou kapab kontinyen satisfer nou bezwen spirityel? (Vwar portre.)

¹⁸ Nou teks pour lannen 2026 i dir: “Ere bann ki rekonnet ki zot bezwen gidans Bondye.” Ozordi i sirtou enportan ki nou fer sa ki Zezi in dir nou fer. Akoz? Parski nou antoure avek bann dimoun ki pa ere, ki dir zot pa bezwen gidans Bondye oubyen ki esey satisfer sa bezwen dan zot prop fason atraver fo larelizyon oubyen bann filozofi imen. Nou bezwen fer sir ki nou pa les zot latitid enfliyans nou. Ki mannyer nou kapab fer sa? Par nouri nou lekor avek sa manze spirityel ki Zeova i donnen, par met oubyen devlop sa nouvo personnalite e par rod sa proteksyon spirityel ki Zeova i donnen.