Sa ki nou aprann avek bann dernyen parol ki Zakob ti dir—Premye parti

1-2. Ki Zakob ti fer ler i ti pros pour mor e akoz? (Vwar portre.)

APEPRE 17 an ti’n pase depi ki Zakob, ki ti en serviter Zeova ki ti fidel, ti’n kit Kanaan pour al Lezip avek son fanmir. (Zen. 47:28) Pandan sa 17 an, i ti vreman kontan pour revwar son garson Zozef e pour finalman vwar son fanmir reini ankor. Me Zakob ti konnen ki i ti pros pour mor. Alor i ti demann tou son bann garson pour vin vwar li parski i ti annan en keksoz enportan pour dir zot.—Zen. 49:28.

² Sa letan i ti normal pour en sef fanmir ki ti pe mor pour rasanble son fanmir pour li kapab donn zot bann lenstriksyon avan i mor. (Iza. 38:1) Pandan sa moman ki zot fanmir ti rasanble ansanm, i kapab ki sa sef fanmir ti pou osi dir lekel ki ti pou vin sef fanmir apre ki i ti’n mor.

3. Akoz sa bann parol ki Zakob ti dir dan Zenez 49:1, 2, ti vreman enportan?

³ Lir Zenez 49:1, 2. Sa moman ki fanmir Zakob ti rasanble ansanm ti diferan avek lezot moman. Zakob ti en profet. Alor sa zour Zeova ti enspir son serviter Zakob pour koz lo bann levennman enportan ki ti pou arive avek son desandans dan lavenir. I pour sa rezon ki bann dernyen parol ki Zakob ti dir son bann garson i ganny konsidere konman en profesi.

4. Ki Zakob ti predir e ki nou kapab aprann avek sa ki i ti dir? (Vwar bwat “Fanmir Zakob.”)

⁴ Dan sa lartik, nou pou vwar sa ki Zakob ti dir kat parmi son bann garson. Sa i Ribenn, Simeon, Levi ek Zida. Dan sa lartik ki swiv, nou pou vwar sa ki Zakob ti dir son wit lezot garson. Parey nou pou vwar, Zakob pa ti koz zis konsernan son bann garson me i ti osi koz konsernan zot desandans ki pli tar ti pou vin nasyon Izrael. Ler nou get listwar nasyon Izrael, nou pou vwar lafason ki profesi Zakob ti vin vre. Ler nou etidye sa ki Zakob ti dir, nou aprann bann leson enportan ki kapab ed nou pour fer Zeova, nou Papa ki dan lesyel plezir.

RIBENN

5. Ki privilez Ribenn ti ekspekte gannyen?

⁵ Zakob ti koz avek Ribenn premye e i ti dir: “Ou mon premye ne.” (Zen. 49:3) Vi ki Ribenn ti premye ne i tre probab ki i ti ekspekte ki i ti pou erit bokou plis ki son bann frer. I kapab ki i ti osi ekspekte ki i ti pou vin sef fanmir apre ki son papa ti’n mor e ki pli tar i ti pou pas sa privilez avek enn son desandans.

6. Akoz Ribenn ti perdi son drwa konman premye ne? (Zenez 49:3, 4)

⁶ Ribenn ti perdi son drwa konman premye ne. (1 Kron. 5:1) Akoz sa? Detrwa lannen pli boner, i ti annan relasyon seksyel avek Bila ki ti konkibin Zakob. Bila ti servant Rasel ki ti madanm Zakob e Zakob ti kontan li en kantite me Rasel ti’n mor. (Zen. 35:19, 22) Tandis ki Ribenn ti garson Lea ki ti lot madanm Zakob. Petet Ribenn ti fer sa akoz i ti atrakte avek Bila e i pa ti kontrol son bann dezir seksyel. Oubyen petet i ti fer sa parski i ti anvi ki Zakob i degout Bila e Zakob i kontan son manman plis. Nenport rezon ki i ti annan, sa ki i ti fer pa ti fer Zeova plezir e i pa ti fer plezir son papa.—Lir Zenez 49:3, 4.

7. Ki ti arive avek Ribenn ek son desandans? (Vwar bwat “Bann dernyen parol ki Zakob ti dir.”)

⁷ Zakob ti dir Ribenn: “Ou pa pou vin pli siperyer ki ou bann frer.” Sa bann parol ti vin vre. I napa okenn rikord ki montre ki en desandans Ribenn ti vin lerwa, pret oubyen profet. Me kantmenm sa, Zakob ti donn Ribenn en leritaz e desandans Ribenn ti vin enn bann tribi nasyon Izrael. (Zoz. 12:6) Ribenn ti demontre bann bon kalite dan lezot sityasyon e i paret ki i pa ti zanmen komet imoralite seksyel ankor.—Zen. 37:20-22; 42:37.

8. Ki nou kapab aprann avek sa ki ti arive avek Ribenn?

⁸ Ki nou kapab aprann? Nou bezwen lalit avek nou bann move dezir e determinen pour pa komet imoralite seksyel. Si nou ganny tante pour fer pese, nou devret reflesir lo ki mannyer nou aksyon pou bles Zeova, nou fanmir ek lezot. Nou devret osi gard antet ki “sa ki en dimoun pe senmen, sanmenm ki i pou rekolte osi.” (Gal. 6:7) De lot kote, sa ki ti arive avek Ribenn i fer nou rapel ki Zeova i pran pitye. Menm si Zeova pa anpes nou ganny konsekans nou bann fot, si nou repantir e nou fer zefor pour fer sa ki byen, Zeova pou pardonn nou e beni nou.

SIMEON EK LEVI

9. Ki Simeon ek Levi ti’n fer ki ti fer Zakob pa kontan? (Zenez 49:5-7)

⁹ Lir Zenez 49:5-7. Apre Zakob i koz avek Simeon ek Levi. Me sa ki Zakob i dir i montre ki zot in fer keksoz ki i pa kontan. Plizyer lannen oparavan, en zonm Kananeen ki ti apel Sekenm ti vyol Dina, fiy Zakob. I normal ki tou bann garson Zakob ti vreman ankoler akoz sa ki ti’n arive avek zot ser me Simeon ek Levi pa ti kontrol zot lakoler. Zot ti koz manti avek Sekenm ek son pep e zot ti dir ki si bann zonm i sirkonsi, i ti pou annan lape ant bann zonm Sekenm ek fanmir Zakob. Sa bann zonm ti dakor pour sirkonsi. Ler zot ti ankor dan douler apre ki zot ti’n sirkonsi, Simeon ek Levi “ti pran zot lepe, al dan lavil e touy tou bann zonm san ki zot ti ekspekte.”—Zen. 34:25-29.

10. Ki mannyer profesi Zakob konsernan Simeon ek Levi ti vin vre? (Vwar bwat “Bann dernyen parol ki Zakob ti dir.”)

¹⁰ Zakob ti vreman ankoler ki son de garson ti’n touy en kantite dimoun. I ti predir ki zot ti pou ganny disperse e ganny eparpiye partou dan Izrael. Sa profesi ti vin vre plis ki 200 an pli tar ler nasyon Izrael ti antre dan Later Promiz. Bann lavil ki tribi Simeon ti gannyen konman leritaz ti eparpiye dan tribi Zida. (Zoz. 19:1) Tandis ki tribi Levi ti erit 48 lavil ki ti eparpiye partou dan Izrael.—Zoz. 21:41.

11. Ki bann bon keksoz ki tribi Simeon ek Levi ti fer?

¹¹ Bann desandans Simeon ek Levi pa ti fer menm fot ki zot zanset ti fer. En kantite dimoun dan tribi Levi ti ador Zeova fidelman. Ler Moiz ti al lo Montanny Sinai pour ganny Lalwa avek Zeova, en kantite Izraelit ti ador en pti bef me bann Levit ti siport Moiz e zot ti ed li detrir bann ki ti’n ador sa pti bef. (Egz. 32:26-29) Zeova ti swazir tribi Levi pour vin pour li e i ti donn zot sa privilez pour servi konman pret. (Egz. 40:12-15; Nom. 3:11, 12) Pli tar ler bann Izraelit ti pe lager pour konkerir Later Promiz, tribi Simeon ti ed tribi Zida pour ganny zot teritwar parey Zeova ti anvi zot fer.—Ziz 1:3, 17.

12. Ki nou kapab aprann avek sa ki ti arive avek Simeon ek Levi?

¹² Ki nou kapab aprann? Pa zanmen les lakoler kontrol ou. I normal pour ankoler si ou oubyen ou fanmir pa ganny trete byen. (Ps. 4:4) Me nou bezwen gard antet ki Zeova pa kontan ler nou dir oubyen fer en keksoz ki bles santiman bann ki pa’n tret nou byen. (Zak 1:20) Ler en dimoun pa tret nou byen, ki swa sa dimoun i servi Zeova oubyen non, nou reazir dan en fason ki fer Zeova plezir. Sa pou fer ki nou pa pou dir ouswa fer okenn keksoz ki fer ditor lezot. (Rom. 12:17, 19; 1 Pyer 3:9) Menm si ou paran pe fer bann keksoz ki pa fer Zeova plezir, rapel ki ou pa oblize fer sa ki ou paran pe fer. Pa bezwen krwar ki ou pa pou zanmen kapab fer Zeova plezir. Zeova pou toultan ed ou fer sa ki byen e i pou rekonpans ou.

ZIDA

13. Petet akoz Zida ti enkyet ler i ti’n ariv son tour pour son papa koz avek li?

¹³ Apre ki Zakob ti’n koz avek Simeon ek Levi, i ti koz avek Zida. Apre ki Zida ti’n tann sa ki Zakob ti’n dir son bann gran frer, i kapab ki Zida ti enkyet parski li osi i ti’n fer bann fot grav. I tre probab ki apre ki Simeon ek Levi ti’n touy sa bann zonm Sekenm, Zida osi ti donn lanmen depouy sa lavil ansanm avek son bann frer. (Zen. 34:27) I ti osi donn lanmen vann Zozef konman en lesklav e pour koz manti avek zot papa konsernan sa ki ti’n arive. (Zen. 37:31-33) Pli tar apre ki son garson ti’n mor, Zida ti annan relasyon seksyel avek Tamar, madanm son garson parski i ti krwar ki Tamar ti en prostitye.—Zen. 38:15-18.

14. Ki bann bon keksoz Zida ti’n fer? (Zenez 49:8, 9)

¹⁴ Zakob pa ti dir Zida okenn keksoz mal. Me i ti felisit Zida e i ti promet ki bann bon keksoz pou arive avek li ek son desandans. (Lir Zenez 49:8, 9.) Zida ti montre ki i ti enterese avek byennet son papa ki ti’n vye. I ti’n osi demontre konpasyon pour son pti frer Benzamen.—Zen. 44:18, 30-34.

15. Dan ki fason sa ki Zakob ti dir Zida ti vin vre?

¹⁵ Zakob ti predir ki Zida ti pou diriz son bann frer. Par kont i ti pran en kantite letan pour sa profesi ganny akonplir. Sa premye fwa ki Labib i dir ki Zida ti pe dirize parmi son pep, ti apepre 200 an pli tar. Sa ti apre ki nasyon Izrael ti’n kit Lezip e zot ti pe vwayaz dan en dezer pour al dan Later Promiz. (Nom. 10:14) Plizyer dizenn lannen pli tar, Zeova ti dir ki Zida i devret sa enn ki al premye pour lager avek bann Kananeen pour konkerir Later Promiz. (Ziz 1:1, 2) Osi Lerwa David ki ti en desandans Zida ti premye parmi plizyer lerwa Izrael ki ti sorti dan tribi Zida. Apre li, i ti annan plizyer ki ti sorti dan sa tribi.

16. Ki mannyer sa profesi ki ganny trouve dan Zenez 49:10 ti ganny akonplir? (Vwar bwat “Bann dernyen parol ki Zakob ti dir.”)

¹⁶ Zakob ti dir ki sa lerwa ki ti pou diriz later antye pour touzour ti pou en desandans Zida. (Lir Zenez 49:10 ek not.) Sa lerwa i Zezi Kri, sa enn ki Zakob ti apel Silo. En lanz ti dir konsernan Zezi: “Bondye Zeova pou donn li tronn son papa David.” (Lik 1:32, 33) Zezi i osi ganny apele “sa Lyon ki sorti dan tribi Zida.”—Rev. 5:5.

17. Ki mannyer nou kapab swiv legzanp Zeova dan lafason ki nou vwar lezot?

¹⁷ Ki nou kapab aprann? Zeova ti beni Zida menm si Zida ti fer bann fot grav. Me petet bann frer Zida ti mazinen ki bon kalite ki Zeova in vwar dan Zida. Menm si nou pa konnen ki bann frer Zida ti pe mazinen, nou konnen ki Zeova ti vwar bann bon kalite ki Zida ti annan e i ti beni li. Ki mannyer nou kapab swiv legzanp Zeova? Ler en frer oubyen en ser i ganny en responsabilite, petet o konmansman nou tant pour konsantre lo bann defo sa dimoun. Me i ti pou byen nou gard antet ki Zeova in vwar bann bon kalite sa dimoun e sa i fer Li plezir. Zeova i konsantre lo bann bon kalite ki son bann serviter i annan. Alor annou swiv son legzanp.

18. Akoz nou bezwen annan pasyans?

¹⁸ En lot keksoz nou kapab aprann avek leksperyans Zida, i ki nou bezwen annan pasyans. Zeova i toultan fer sa ki i’n promet. Me i pa toultan fer li dan en fason oubyen dan en moman ki nou pe ekspekte. Desandans Zida pa ti konmans diriz pep Bondye deswit me kantmenm sa zot ti siport bann ki Zeova ti swazir pour diriz sa pep. Par egzanp, zot ti siport Moiz ki ti sorti dan tribi Levi, Zozye ki ti sorti dan tribi Efraim e Lerwa Sail ki ti sorti dan tribi Benzamen. Nou osi nou devret siport bann ki Zeova i swazir pour dirize dan son lorganizasyon.—Ebr. 6: 12.

19. Ki nou’n aprann konsernan Zeova avek sa ki Zakob ti dir avan i mor?

¹⁹ Ki nou’n aprann ziska aprezan avek bann dernyen parol ki Zakob ti dir avan i mor? I kler ki “dimoun pa vwar keksoz dan menm fason ki Bondye i vwar.” (1 Sam. 16:7) Zeova i annan bokou pasyans e i pardonnen. Menm si i pa soutir nou, i osi pa ekspekte ki nou parfe. I kapab osi beni bann dimoun ki’n fer bann fot grav dan lepase si zot senserman repantir e fer sa ki byen. Dan sa lartik ki swiv, nou pou vwar sa ki Zakob ti dir son wit lezot garson.