Montre Lentere dan “bann Garson ki napa Papa”
1 Zeova i “en papa pour bann garson ki napa papa.” (Ps. 68:5) Son konsern pour zot byennet i ganny reflekte dan sa komannman ki i ti donn ansyen nasyon Izrael: “Zot pa devret fer soufer okenn vev oubyen garson ki napa papa. Si zot fer li soufer, alor si i kriy mwan, mon pou san fot antann son lapel.” (Egz. 22:22, 23) Lalwa Bondye ti osi enkli provizyon pour ed bann tel dimoun avek zot bezwen materyel. (Det. 24:19-21) Dan laranzman Kretyen, bann vre adorater i ganny ankouraze pour “pran swen bann orflen ek bann vev dan zot soufrans.” (Zak 1:27) Ki mannyer nou kapab imit lentere ranpli avek lanmour ki Zeova i annan pour sa bann ki pe grandi dan bann fanmiy ki annan zis en paran oubyen fanmiy kot paran napa menm krwayans?
2 Formasyon spirityel: Si ou en paran tousel oubyen ou msye ouswa ou madanm pa temwen, i kapab difisil pour fer en letid Labib regilye avek ou zanfan. Me pour bann zanfan vin bann adilt mir e ekilibre, en letid fanmiy regilye e adapte avek zot bezwen i esansyel. (Prov. 22:6) I osi enportan pour koz avek zot toulezour lo bann keksoz spirityel. (Det. 6:6-9) Parler, ou kapab santi ou dekouraze, me pa arete. Tourn ver Zeova pour lafors ek gidans anmezir ki ou kontinyen “elve [ou zanfan] dan en ledikasyon ek lenstriksyon Senyer.”—Efe. 6:4.
3 Si ou bezwen serten led pour desarz ou bann responsabilite ki Zeova in donn ou, les bann ansyen konn ou bezwen. Zot kapab ofer serten sizesyon pratik oubyen asiste ou pour etablir en bon progranm spirityel pour ou lakour.
4 Ki mannyer lezot i kapab ede: Dan premye syek, Timote ti vin en serviter Zeova devoue kantmenm i ti grandi dan en lakour kot son paran pa ti partaz menm krwayans relizye. Bann zefor serye son manman ek son gran manman pour ansenny li parol Bondye dan son zenntan ti sirman zwe en rol enportan. (Akt 16:1, 2; 2 Tim. 1:5; 3:15) Me i ti osi benefisye par frekant lezot Kretyen, enkli zapot Pol, ki ti refer avek Timote konman son “garson byenneme e fidel dan Senyer.”—1 Kor. 4:17.
5 Pareyman ozordi, bann zanfan ki napa papa dan kongregasyon i benefisye en kantite ler bann frer ek ser matir i pran en lentere dan zot. Eski ou konn sakenn par zot non? Eski ou koz avek zot dan bann renyon Kretyen e dan lezot lokazyon? Envit zot pour pres avek ou. Petet ou kapab parler enkli zot, ansanm avek zot paran ki Temwen oubyen ki tousel dan ou letid fanmiy oubyen dan bann bon moman detann. Ler sa bann ki pli zenn i konsider ou konman zot zanmi, i tre probab ki zot pou imit ou legzanp e aksepte ou lankourazman.—Fili. 2:4.
6 Zeova i vreman enterese avek bann garson ek fiy ki napa papa, e i pe beni nou zefor ek lanmour ki nou demontre pour ed zot pran laverite aker. Bokou ki’n viv dan bann lakour divize oubyen kot ti annan zis en paran in resevwar bann tel lankourazman e aprezan zot pe servi fidelman konman pionye, asistan ministeryel, ansyen, sirveyan, misyonner, oubyen manm lafanmiy Betel. Alor annou rod tou fason pour “ouver nou leker byen gran” dan nou lafeksyon pour bann ki napa papa, koumsa nou pou imit nou Papa seles.—2 Kor. 6:11-13.