52 MARK
“I ed mwan”
I PARET ki menm konman en zenn garson, Zan Mark ti demontre kouraz. Zezi Kri ti’n fek ganny arete e ganny anmennen par en group zonm arme. Tou bann zapot ti’n sove. Me Labib i koz lo “en serten zonm” ki ti annan ase kouraz pour swiv Zezi. Serten dimoun ti vwar li e zot ti sey tyonbo li. Me zot ti reisi tyonbo zis son lenz linenn e i ti reisi sove “touni,” andotmo dan son lanmores. Vi ki liv Mark i sa sel Levanzil ki koz lo sa levennman, en kantite dimoun i krwar ki sa garson ki ganny mansyonnen la ki nou pa konn son non i li menm li Mark.
Mark ti reste Zerizalenm, posibleman avek son manman ki paret ti ase ris. Apre lanmor Zezi, kongregasyon ti zwenn kot son lakour. I lanmenm la ki zapot Pyer ti vin en zour swar apre ki lanz ti’n ed li pour sove dan prizon. San okenn dout, Mark ti zwenn e konn en kantite zapot ek disip Zezi. Petet Mark ti devlop en kantite kouraz gras a zot legzanp.
Apepre lannen 46, kouzen Mark, Barnabas, ti vin Zerizalenm avek zapot Pol e zot ti demontre en gran lentere dan sa zenn garson. I ti al avek zot ler zot ti retourn Antyos. Apepre enn an pli tar, Pol ek Barnabas ti envit Zan Mark pour al avek zot lo en vwayaz misyonner! Avek kouraz i ti pare pour li al avek sa bann misyonner devoue “pour ed zot,” konman zot asistan.
Sa letan, vwayaze ti vreman difisil e danzere. Pli tar Pol ti dir ki pandan son bann vwayaz, i ti fer fas avek “danze kot bann larivyer, danze akoz voler, . . . dan lavil, dan dezer, lo lanmer.” (2 Kor. 11:26) Mark, ki ti en asistan pour sa de zonm ki ti ganny byen respekte dan kongregasyon, ti bezwen toultan pare pour fer sa ki zot ti demann li. Eski sa travay ti vin en pti pe tro bokou pour li? Labib pa dir. Me i montre ki Mark ti kit Pol ek Barnabas ler zot ti ariv Panfili e i ti retourn kot li Zerizalenm. I bezwen ki ler i ti kit zot, Pol ek Barnabas ti dezapwente me sirtou Pol.
Apre sa gran vwayaz ki zot ti’n fer, Pol ek Barnabas ti konmans fer plan pour en dezyenm vwayaz. Barnabas ti anvi ki Mark i vin avek zot ankor en fwa me Pol pa ti dakor avek sa nide. Petet i ti santi ki zot pa ti pou kapab depan lo Mark. Pol ek Barnabas pa ti tonm dakor ditou e “zot ti pran en gran lakoler.” Barnabas ti anmenn Mark avek li Sip kot zot ti kontinyen zot travay predikasyon. Pol ti rod en lot dimoun e i ti kontinyen son vwayaz.
Sa ti bezwen difisil pour Mark. Vi ki i ti annan en gran respe pour Pol, i ti santi ki i ti’n dezapwent li, i ti’n osi fer de bon zanmi separe. Eski Mark ti les lakoler, rankin ek dezapwentman dekouraz li konpletman? Pa ditou!
Mark ti perdi en gran privilez me i pa ti les sa dekouraz li
Mark ti kontinyen fer son mye pour ed lezot frer ek ser. Apepre lannen 60-61 ler Pol ti en prizonnyen dan en lakaz Ronm, i ti ekri en let kot i ti dir ki Mark ti avek li. Pol ti dir ki Mark ti “en gran sours rekonfor” pour li. En pti pe pli tar ant lannen 62 ek 64, nou tann koz lo Mark ankor e safwasi i ganny mansyonnen dan en let ki zapot Pyer ti ekri. I paret ki Mark ti’n fer en gran vwayaz pour al Babilonn pour ankouraz zapot Pyer ki ti aze. Pyer ti apel Mark “mon garson.” I bezwen ki Mark ti rekonfort Pyer en kantite! Sirman i bezwen ki sa zapot ti rakont Mark en kantite keksoz ki ti pase pandan sa letan ki i ti avek Zezi Kri. Ler Mark ti ekri son Levanzil ki’n ganny enspire par Bondye, petet ler i ti Ronm, i ti azout bann detay ki tre probab Pyer ti’n eksperyanse e ki i ti’n rakont li.
Dernyen fwa ki nou tann koz lo Mark dan Labib i ler Pol ti pe ekri en let pour Timote. Ankor en fwa Pol ti dan prizon e i ti ekri Timote. I ti demann li pour vin vizit li e pour vin avek Mark. Akoz? Pol ti dir: “I ed mwan dan minister.” Sirman, Timote ek Mark ti vreman kontan pour vin vizit Pol e ankouraz li avan i mor. Vi ki Mark ti annan sa kouraz pour persevere malgre bann dezapwentman, i ti kapab kontinyen servi son bann frer e Zeova ti kontan li en kantite.
Lir sa resi dan Labib:
Pour diskit lo la:
Ki mannyer Mark ti demontre kouraz?
Al pli o profon
1. Kwa ki montre ki fanmir Mark ti ris? (w10-E 15/3 6 ¶6–7 ¶1)
2. Petet ki mannyer Mark ti “ed” Barnabas ek Pol? (Akt 13:5; w10-E 15/3 7 ¶5)
3. Ki serten landrwa kot Mark ti ale? (w10-E 15/3 8 ¶6-8) A
Portre A: Serten landrwa kot petet Mark ti ale
4. Donn en legzanp pour montre ki Mark ti ekri serten keksoz dan son Levanzil ki tre probab Pyer ki ti dir li. (w08-E 1/2 26 ¶1)
Reflesir lo sa bann leson
Mark pa’n zanmen ganny apele zapot oubyen profet. Pourtan i ti servi lezot avek limilite. Ki mannyer nou kapab servi lezot ozordi?
Menm si Mark ti perdi son privilez pour travay avek Pol pour en serten letan, i ti kontinyen reste fidel. Ki nou kapab aprann avek Mark si nou perdi en responsabilite? B
Portre B
Ki mannyer ou kapab imit kouraz Mark dan ou lavi?
Reflesir lo Zeova ek son plan
Ki sa resi i ansenny mwan lo Zeova?
Ki mannyer sa resi i relye avek plan Zeova?
Akoz ou rekonesan ki Mark in ganny swazir pour dirize avek Kris dan lesyel?
Aprann plis
Kwa ki fer Levanzil Mark en liv spesyal?
Servi legzanp Mark pour ansenny ou zanfan byenfe ki ou gannyen ler ou persevere.