41 ZEKARYA EK ELIZABET
Zot ti “fer sa ki byen devan Bondye”
ZEKARYA ti annan en gran lazournen devan li. I ti’n ganny en privilez vreman rar, enn ki i pou gannyen petet zis en fwa dan son lavi. I ti enn parmi sa kantite pret ki ti desandans Aaron. Ozordi, i ti tour Zekarya pour antre dan landrwa sen dan tanp pour bril lansan lo sa lotel annor. Sirman, sa zour ti enn vreman spesyal pour Zekarya ek son madanm Elizabet ki i kontan.
Zekarya ek Elizabet ti’n marye pour plizyer lannen e zot ti’n ganny en kantite benediksyon. Me i ti annan en keksoz ki zot ti vreman anvi me ki ti difisil pour zot gannyen. Zot ti anvi ganny zanfan. Sa ti en keksoz vreman enportan pour pep Bondye sa letan. Me la, Zekarya ek Elizabet ti “byen aze.” Labib i dir ki zot ti “fer sa ki byen devan Bondye.” Alor, zot ti kontinyen priy zot Bondye avek konfyans ki i pou ekout zot menm si zot sityasyon ti kapab san lespwar.
I ti annan en kantite dimoun ki ti pe priye deor ler Zekarya ti antre dan landrwa sen. Laba, dan trankilite sa gran lasanm, en sel kou, en keksoz ti aparet devan li, o bor lotel pour lansan. Sa ti lanz Zeova! I ti dir Zekarya ki Bondye in ekout son lapriyer e i ti pou fer Elizabet ganny en garson pour li. Sa garson ti pou ganny apele Zan. Ler i ti pou gran, i ti pou annan “menm devouman ek lafors ki Eliya ti annan.” I ti pou fer en gran travay pour prepar dimoun pour retourn kot Zeova.
Vi ki i ti doute, Zekarya ti demann sa lanz pour donn li en siny ki ti pou montre ki sa parol ti pou vin vre. Sa lanz ti dir li: “Mon apel Gabriyel, mon toultan devan Bondye.” I ti napa okenn rezon pour pa krwar sa ki sa serviter pwisan Zeova ti’n dir. Lanz Gabriyel ti osi dir Zekarya ki i pa ti pou kapab koze ziska ki sa promes Zeova ti’n akonplir. Alor ler Zekarya ti sorti dan landrwa sen, i ti zis fer bann siny pour esey montre sa ki ti’n ariv li.
En koup aze ki ti napa zanfan ti ganny en mesaz sorti dan lesyel ki ti sanz zot lavi
Apre, Zekarya ti rod en fason pour eksplik Elizabet sa ki ti’n arive. “En pe letan pli tar” Elizabet ti tonm ansent. Pandan senk mwan i pa ti kit son lakour. Me pandan sizyenm mwan enn son fanmir, Mari, ti vin vwar li. Mari ti fiy Eli e i ti sorti Nazaret. Dek ki Mari ti antre dan lakaz Zekarya, sa pti baba dan vant Elizabet ti bouze akoz i ti kontan. Vi ki Elizabet ti ranpli avek lespri sen, i ti ganny enspire pour apel Mari “manman mon Senyer.” I ti konnen ki Mari ti ansent e i ti pou ganny en zanfan ki ti pou vin Mesi. Olye zalou, Elizabet ti plito ankouraz sa zenn madanm ki ti’n ganny en gran responsabilite.
Finalman ler Elizabet ti ganny son baba, son fanmir ek vwazen ti esey enfliyans li pour apel sa pti garson non son papa. Me Elizabet ti konnen ki lanz Gabriyel ti’n dir son msye: “Ou devret apel li Zan.” Alor, i pa ti aksepte zot sizesyon. I ti dir zot: “Non! I pou apel Zan.” Zot pa ti dakor, alor zot ti demann Zekarya. Zekarya pa ti ankor kapab koze, alor i ti ekrir lo en plak dibwa: “Son non i Zan.” Deswit i ti rekonmans koze.
Apre sa, Zekarya ti ranpli avek lespri sen e i ti konmans profetize. I ti ganny enspire pour anons en mesaz lespwar, delivrans ek konpasyon Bondye. I ti predir ki son garson, Zan, ti pou “al par devan Zeova pour prepar son semen.” Sanmenm sa ki Zan ti fer. Zan ki batize ti al par devan Mesi pour prepar dimoun pour ki zot aksepte mesaz Zezi lo Rwayonm Bondye.
Ler Mesi ti pou vini, i ti pou annan bann gran sanzman dan lafason ki pep Bondye i azir avek bann dimoun ki pa krwar dan Bondye e ki opoz son bann serviter. Dan lepase, en kantite serviter Zeova ti’n demontre kouraz par servi zarm pour lager kont bann lennmi Zeova lo later. Me aprezan, Zeova ti nepli anvi ki son bann serviter i lager dan sa fason. Me kantmenm sa, zot ti pou bezwen annan kouraz. Bann ki ti aksepte Mesi ti pou bezwen servi zot abilite pour koze, zis parey Zekarya ek Elizabet ti fer, pour glorifye Bondye Zeova e pour anons sa bon nouvel lo Zezi Kri.
Lir sa resi dan Labib:
Pour diskit lo la:
Ki mannyer Zekarya ek Elizabet ti demontre kouraz?
Al pli o profon
1. Menm si Zekarya ek Elizabet ti enparfe, akoz Labib i dir ki zot ti “san repros”? (Lik 1:6; it-E “Blamelessness” ¶2)
2. Ki Labib i dir nou lo lanz Gabriyel? (it-E “Gabriel” ¶2-3) A
Portre A
Portre A
3. Gabriyel ti demann Zekarya pour apel son garson Zan. Ki sa non Zan i vedir? (it-E “John” ¶1)
4. Eski Zekarya ti kozpa e sourd? (w08 1/3 30 ¶6)
Reflesir lo sa bann leson
Bann ansenyan Zwif dan letan Zekarya ti permet en zonm pour divors son madanm si i pa ti kapab ganny zanfan. Ki bann msye i aprann avek Zekarya lo reste fidel avek zot madanm? B
Portre B
Elizabet ti fidelman siport desizyon son msye menm si son bann vwazen ek fanmir ti met presyon lo li. (Lik 1:58-61) Ki bann madanm i kapab aprann atraver son legzanp?
Ki mannyer ou kapab imit kouraz Zekarya ek Elizabet?
Reflesir lo Zeova ek son plan
Ki sa resi i ansenny mwan lo Zeova?
Ki mannyer sa resi i relye avek plan Zeova?
Si Zekarya ek Elizabet i ganny resisite lo later, ki ou ti pou kontan demann zot?a
Aprann plis
Gete ler Zekarya i rekonmans koze e servi sa abilite pour koze pour loue Bondye.
Ki mannyer Zeova ti ankouraz Mari, ler i ti al vizit Elizabet e ki nou aprann atraver sa?
a Si Zekarya ek Elizabet ti mor avan Lapannkot lannen 33, zot pou resisite pour viv lo later.