35 MANASE
I ti annan kouraz pour repantir
MANASE ti ne akoz en mirak ki Zeova ti fer. Bondye ti fer en mirak pour ki Lerwa Ezekya i viv pli lontan e apre sa, sa bon lerwa ti ganny en garson ki ti apel Manase. Me malerezman Ezekya ti mor ler Manase ti annan zis 12 an. Sa zenn garson ti vin lerwa me i pa ti swiv bon legzanp son papa ditou.
Manase ti fer en kantite move keksoz. Pandan sa bann lannen ki i ti dirize, i ti ador bann fo bondye ek zidol, i ti pratik grigri e i ti menm touy son bann garson. Ler i ti pe dirize, i ti annan en kantite vyolans. I ti fer lavil Bondye, setadir Zerizalenm, koupab akoz li menm i ti vyolan e i ti osi ankouraz lezot pour vin vyolan. Zeova ti anvoy bann profet pour averti li me i pa ti oule ekoute. Alor, i kapab ki ou pe mazinen me ki mannyer Manase ti en bon legzanp. Annou vwar.
En zour, lavi Manase ti sanze en sel kou. Vi ki sa lerwa pa ti oule ekout lavertisman bann profet Zeova, Zeova ti fer bann sef larme lerwa Asiri atak Zida. Labib i dir: “Zot ti servi bann krose pour tyonbo Manase, anmar li avek bann lasenn an kwiv e anmenn li Babilonn.” I difisil pour nou imazinen ki mannyer sa lerwa orgeye ti santi ler i ti ganny imilye oubyen douler ek difikilte ki i ti rankontre lo sa gran vwayaz.
Manase ti vreman move me Zeova ti donn li en loportinite pour sanze
Konman en prizonnyen Babilonn, Manase ti annan ase letan pour reflesir lo son lavi. I posib ki i pa ti’n zanmen santi li sitan tousel, pa kapab fer nanryen e san okenn pouvwar. Kote tou sa bann fo bondye ki i ti adore e ki i ti’n menm sakrifye son bann garson avek ti ete? I ti realize ki i ti bezwen sanze. Premye keksoz ki i ti fer, i ti priy avek Zeova e i pa ti fer sa avek lorgey. I ti plito “kontinyen abes son lekor en kantite devan Bondye son bann zanset.” Zeova ti vwar ki i ti’n sanze e i ti azir. Sirman, anmezir ki Manase ti devlop plis limilite, Zeova ti vin pli pros avek li. (Ps. 138:6) Manase ti priy “Zeova son Bondye” e sipliy li. Anfet, ‘i ti kontinyen priye’ dan sa fason.
Ki mannyer Zeova ti santi konsernan sa bann lapriyer? Labib i dir: “Bondye ti ganny touse par son siplikasyon e i ti ekout son lapriyer.” Sa vre Bondye ti pran pitye pour li e i ti fer en keksoz remarkab pour Manase. “I ti fer li revin lerwa Zerizalenm.” Alor, Manase ti annan en loportinite pour demontre ki kantite i ti’n sanze e vreman repantir.
Ler i ti retourn Zerizalenm, lafwa Manase ti ganny teste dan en fason remarkab. Sa pei ti ranpli avek en kantite move dimoun ki li menm li i ti’n enfliyanse pour fer bann move keksoz pandan plizyer lannen. Ki mannyer zot ti pou reazir ler zot ti pou vwar ki i’n sanze? Si sa ti pe trakas li, Manase pa ti konsantre lo la me deswit i ti esey koriz son bann fot. Apre ki i ti’n konstri en miray pour protez Zerizalenm kont lezot latak, i ti pas dan lavil e i ti detrir tou bann bondye etranze ek zidol, enkli sa bann ki ti dan tanp Zeova. I ti repar lotel Zeova e i ti ofer bann sakrifis lo la. Petet keksoz pli difisil ki i ti bezwen fer i koz avek lepep. Manase ti demann pep Zida “pour ador Zeova Bondye Izrael” olye ador bann fo bondye. Manase ki ti en move lerwa ti’n vreman sanze. Zeova ti ganny glorifye akoz ankor en fwa I ti montre ki i vreman “bon e pare pour pardonnen.”—Ps. 86:5.
Malerezman, Manase pa ti kapab repar tou bann problenm ki i ti responsab. Zeova ti pardonn lerwa me I pa ti kapab inyor tou bann vyolans ek krim ki ti pe afekte son pep ler Manase ti pe dirize konman lerwa. Zot pa ti pare pour repantir e sanz zot fason viv parey zot lerwa ti’n fer. Menm Amonn, garson Manase, pa ti aprann avek bon legzanp son papa e repantir. Me Manase ti fer son mye pour esey annan en bon lenfliyans lo son pti zanfan Zosya. San dout Zosya ti rapel ki son granpapa ti bezwen demontre kouraz pour imilye son lekor e repantir. Apre plizyer lannen ki i ti’n fer bann move keksoz, Manase ti’n vreman sanze e pour larestan son lavi i ti konnen ki son Papa ki kontan li ti’n pardonn li.
Lir sa resi dan Labib:
Pour diskit lo la:
Ki mannyer Manase ti demontre kouraz?
Al pli o profon
1. Bann Amorit ti reste Kanaan avan bann Izraelit. Lefet ki Manase ti “fer bann keksoz ki pli move ki tou sa ki bann Amorit avan li [ti’n] fer,” ki sa i montre lo li? (2 Rwa. 21:11; w00-E 15/10 16 ¶5-6; gl-E 10 ¶5, not.)
2. Ki levidans bann arkeolog in dekouver ki montre ki Manase ti vreman egziste e bann Asiriyen ti sa pouvwar pli for ler i ti pe dirize? (it-E “Manasseh” No. 4 ¶2) A
© The Trustees of the British Museum. Licensed under CC BY-NC-SA 4.0. Source
Portre A: Sa non “Manase, lerwa Zida,” i lo en dokiman ki apel Esarhaddon Prism
3. Kwa ki montre ki bann Asiriyen ti vreman servi bann krose pour tyonbo zot prizonnyen? (2 Kron. 33:11; it-E “Hook” ¶4) B
Portre B: Desen en skilptir Asiriyen ki date apepre wityenm syek avan Kris
4. Ki mannyer Zeova ti servi en “nivo” ek en “lakord” pour mezir Zerizalenm? (2 Rwa. 21:13; it-E “Leveling Instrument” ¶2)
Reflesir lo sa bann leson
Ki nou aprann konsernan repantans dan sa resi?
Ler nou get legzanp Manase, akoz nou kapab dir ki menm si Zeova i pardonn dimoun ki repantir, kantmenm sa zot bezwen viv avek konsekans zot pese? (Zer. 15:3-5) C
Portre C
Dan ki lezot fason ou kapab imit kouraz Manase?
Reflesir lo Zeova ek son plan
Ki sa resi i ansenny mwan lo Zeova?
Ki mannyer sa resi i relye avek plan Zeova?
Ki mon ti pou kontan demann Manase ler i resisite?
Aprann plis
Gete ki mannyer legzanp Manase ti ed en frer pour retourn kot Zeova.
Si ou’n deza santi ki ou pa vo nanryen akoz ou bann pese dan lepase, ki mannyer sa resi i kapab ankouraz ou?