Ki savedir vin sen?

Ki Labib i dir

Vin sen pe refer avek en leta ki separe avek bann keksoz ki’n ganny sali. Sa mo Ebre ki ganny tradwir “sen” i sorti dan en term ki vedir “separe.” Alor, sa ki sen i ganny separe pour ki i pa ganny servi dan lavi toulezour ouswa i ganny garde konman sakre, espesyalman akoz son lapropte ek lapirte.

Bondye i pli sen ki tou. Labib i dir: “Zis [Zeova] ki sen. Napa personn parey li.”a (1 Samyel 2:2) Alor Bondye ki annan drwa etablir bann standar ki sen.

Sa mo “sen” i kapab ganny aplike avek nenport keksoz ki direkteman annan pour fer avek Bondye, espesyalman bann keksoz ki’n ganny met a par pour ganny servi zis dan ladorasyon. Par egzanp Labib i koz lo:

• Bann landrwa sen: Bondye ti dir Moiz kot sa brousay ki ti pe brile: “Landrwa kot ou pe debout i en later sen.”​—Egzod 3:2-5.

• Bann levennman sen: Pep Izrael dan letan lontan ti ador Zeova dan bann lafet relizye ki ti ganny fer regilyerman, ki ti apel “bann rasanbleman sakre.”​—Levitik 23:37.

• Bann keksoz sen: Bann lobze ki ti ganny servi pour ladorasyon Bondye dan tanp Zerizalenm dan letan lontan ti ganny apele bann “lobze sakre.” (1 Lerwa 8:4) Sa bann lobze ti ganny servi avek respe menm si zot pa ti devret zanmen ganny adore.b

Eski en dimoun enparfe i kapab vin sen?

Wi. Bondye ti donn lord bann Kretyen: “Zot devret sen, parski mwan mon sen.” (1 Pyer 1:16) Byensir, bann imen enparfe pa ti pou zanmen kapab vin sen parey sa Bondye ki son standar lo sentete i parfe. Kantmenm sa, bann imen ki obei lalwa drwat Bondye i kapab ganny konsidere “sen e akseptab pour Bondye.” (Romen 12:1) En dimoun ki fer zefor pour vin sen, pou demontre sa dan son bann parol ek aksyon. Par egzanp, sa dimoun i swiv sa konsey Labib “pour vin sen e rezet imoralite seksyel” e ‘vin sen dan tou son kondwit.’​—1 Tesalonisyen 4:3; 1 Pyer 1:15.

Eski en dimoun i kapab perdi son relasyon sen avek Bondye?

Wi. Si en dimoun i rezet bann standar Bondye konsernan kondwit, Bondye pou nepli konsider li konman sen. Par egzanp, liv Ebre dan Labib ti koz avek “bann frer ki sen,” e kantmenm sa i averti zot ki zot ti pou kapab devlop “en move leker ki mank lafwa par elwanny zot avek sa Bondye vivan.”​—Ebre 3:1, 12.

Bann mal konprenezon konsernan vin sen

Mal konprenezon: Lavi selibater i fer en dimoun vin pli sen.

Larealite: Menm si en Kretyen i kapab swazir pour pa marye, lavi selibater pa neseserman fer sa dimoun annan en relasyon sen avek Bondye. I vre ki en selibater i kapab pli byen konsantre lo son ladorasyon. (1 Korentyen 7:32-34) Par kont, Labib i montre ki bann ki marye zot osi zot kapab vin sen. Anfet, Pyer ki ti enn parmi bann zapot Zezi, ti marye.​—Matye 8:14; 1 Korentyen 9:5.