Zanfan ek telefonn​—Premye parti: Eski mon zanfan i bezwen annan enn sa telefonn?

Deplizanpli plis zanfan pe servi smartphonea e bokou zot i tousel dan zot lasanm ler zot lo Enternet. Ki danze i annan pour ou zanfan? Ki byenfe i annan? Ki kantite letan i devret pase lo la?

• Sa ki ou devret konnen

• Sa ki ou devret demande

• Demann ou lekor si ou’n pare

Sa ki ou devret konnen

Bann byenfe

• Proteksyon pour zanfan, lespri anpe pour paran. Bethany i annan de zanfan adolesan. I dir: “Nou pe viv dan en lemonn danzere. I vreman enportan pour bann zanfan kapab kontakte zot paran.

  En lot manman ki apel Catherine i azoute: “Serten ap i permet ou konekte avek telefonn ou zanfan pour vwar kote i ete. Si i pe dray, ou kapab menm konnen ki vites i pe ale.”

• Led avek devwar lekol. En manman ki apel Marie i dir: “Zanfan i ganny bann devwar lekol pour fer kot lakour atraver imel oubyen mesaz e zot osi servi sa bann metod pour kominik avek zot ansenyan.

Bann danze

• Pas tro bokou letan lo telefonn. An zeneral, bann zenn i pas plizyer erdtan par zour lo zot telefonn. Anfet, bann paran osi i pas bokou letan lo zot telefonn dan plas pas letan avek zot zanfan. En konseye i dir ki dan serten lakour i konmsi i annan “bann etranze ki viv ansanm e ki sakenn pe konsantre lo son lekipman.”b

• Pornografi. Dapre en estimasyon, plis ki lanmwatye bann adolesan i al get pornografi tou le mwan. Sa pa drol sirtou ler ou mazinen ki kantite i fasil pour al get sa bann zafer lo telefonn. William, papa de zanfan adolesan i dir: “San realize, en paran i kapab pe ouver laport en laboutik pornografi pour son zanfan ki avek li partou kot i ale, zis par donn li en telefonn ki annan akse avek Enternet.

• Vin depandan. Plizyer dimoun i atase emosyonnelman avek zot telefonn. Si zot pa mazinen kote zot in met li, zot dir zot panik, santi zot dezespere e menm malad. Serten paran i dir ki zot zanfan i azir brit ler zot lo zot telefonn. Carmen i dir: “Parfwa ler mon anvi koz avek mon garson, i devir son lizye avek mwan oubyen fer en komanter malelve akoz i pa oule personn deranz li.”

• Lezot risk. I annan lezot danze avek telefonn, parey ganny bouli atraver telefonn ek sexting e i osi kapab fer ou ganny plizyer problenm lasante akoz mank sonmey oubyen move pozisyon ou lekor ler ou lo telefonn. Serten zenn i servi bann “ghost app,” en ap ki paret oke, parey en calculator, pour kasyet serten keksoz ki zot pa anvi zot paran i vwar.

  Daniel, papa en fiy adolesan i fer sa konklizyon: “Telefonn i ouver laport pour ganny akse avek tou sa ki lo Enternet, ki swa i bon ouswa move.”

Sa ki ou devret demande

• ‘Eski mon zanfan i bezwen en telefonn ki servi Enternet?’

  Labib i dir: “En dimoun pridan i gete kote i met son lipye.” (Proverb 14:15) Avek sa antet, demann ou lekor:

  Si mon zanfan i annan en telefonn ki servi Enternet, eski sa pou protez li e benefisye li dan lezot keksoz? Eski mon’n reflesir byen lo son bann byenfe ek bann danze? Eski i annan en lot keksoz mon kapab fer dan plas donn li en telefonn ki servi Enternet?

  En papa ki apel Todd i dir: “I ankor vann bann telefonn ki pa servi Enternet, ou kapab telefonn ou zanfan oubyen anvoy li en mesaz. I osi kout bokou pli bon marse.”

• ‘Eski mon zanfan i pare pour sa kalite responsabilite?’

  Labib i dir: “En zonm saz i fer sa ki byen.” (Eklezyast 10:2) Avek sa antet, demann ou lekor:

  Kwa ki fer mwan asire ki mon zanfan i diny konfyans? Eski deza i annan labitid dir mwan tou keksoz? Eski mon zanfan i annan problenm avek lonnekte, petet i pa dir mwan lekel son bann zanmi ki i frekante? Eski i deza pe demontre kontrol dan lafason i servi lezot keksoz parey televizyon, tablet oubyen konpiter? En manman ki apel Serena i dir: “En telefonn ki servi Enternet i vreman en bon zouti, me enn ki osi vreman danzere. Mazin sa responsabilite ki ou pe donn ou zanfan ler i ankor byen zenn.”

• ‘Eski mon’n pare pour sa kalite responsabilite?’

  Labib i dir: “Donn en zanfan bann bon labitid depi son zenn az.” (Proverb 22:6) Avek sa antet, demann ou lekor?

  Eski mon konn ase lo sa telefonn pour ed mon zanfan konpran e evit bann danze ki i kapab rankontre? Eski mon konnen ki mannyer pour met serten restriksyon lo la? Ki mannyer mon kapab ed mon zanfan fer bann bon desizyon ler i servi sa telefonn? Daniel, en papa ki’n koze pli boner, i dir: “Souvandfwa, mon vwar bann paran donn zot zanfan en telefonn e apre pa fatig zot plis ki sa.”

A lafen dizour: Zanfan i bezwen led pour servi en telefonn ki annan akse avek Enternet dan en fason responsab. Liv Indistractable i dir: “I enposib pour ekspekte nou zanfan servi sa bann telefonn dan en fason rezonnab, sirtou ler napa sirveyans paran.