Akoz ou kapab ere ler dimoun i ay ou?

1. Ki Zezi ti dir e akoz sa i sirprann nou?

DAN son Sermon lo Montanny, Zezi ti dir: “Ere kan dimoun i ay zot.” (Lik 6:22) I bezwen ki sa bann parol ti sirprann bann dimoun ki ti pe ekout li. Apre tou, personn pa kontan ler lezot i ay zot. Me akoz Zezi ti dir sa parol? Sa i en bon kestyon pour reflesir lo la parski en kantite dimoun ozordi i ay bann disip Zezi. Dan sa lartik, nou pou vwar akoz dimoun i ay nou e akoz nou kapab ere ler zot ay nou.

AKOZ DIMOUN I AY NOU?

2-3. Ki en rezon akoz bann vre Kretyen i ganny persekite e ki lefe sa i kapab annan lo lafason ki nou vwar bann dimoun ki opoz nou? (Zan 16:2, 3)

² Dimoun i ay nou parski nou ador Zeova. Zezi ti dir sa konsernan bann ki ti pou persekit e menm touy serten son bann disip: “Zot pa’n konn ni mon Papa, ni mwan.” (Lir Zan 16:2, 3.) Lekel ki vreman responsab pour bann persekisyon ki pep Bondye i gannyen? Satan e i “bondye sa lemonn.” (2 Kor. 4:3, 4) I anpes dimoun konn laverite konsernan Zeova e i enfliyans zot pour opoz bann ki konn e kontan Bondye. (Zan 8:42-44) Ki mannyer ler nou konn sa, sa i kapab annan en lefe lo lafason ki nou vwar bann ki opoz nou? Ler nou realize ki zot in ganny anbete, sa pou ed nou pour pa ay zot nou osi.

³ Annou vwar leksperyans Pavel,a ki reste dan en pei kot nou travay predikasyon in ganny enterdi. Pavel ti ganny arete, ganny bate e ganny met dan en kaso li tousel pour plizyer mwan parski i ti kontinyen ador Zeova fidelman. Aprezan Pavel i dir: “Pour mwan, i kler ki nou ganny persekite akoz Satan ek son bann demon pe esey anpes nou ador Zeova. I paret ki laplipar dimoun ki travay dan prizon pa ay nou. Zot pe zis fer zot louvraz.” En frer ki reste Lakroasi ki ti ganny persekite avek son paran ki pa Temwen Zeova, i dir: “Aprezan mon’n konpran ki Satan ki mon lennmi, pa mon paran.”—Efe. 6:12.

4. Ki nou kapab aprann avek legzanp Zezi ek disip Etyenn? (Vwar portre.)

⁴ Nou pa ay bann dimoun ki opoz nou. Anfet, i kapab ki nou menm anvi priy pour zot. (Mat. 5:44) Nou kapab aprann konsernan sa avek legzanp Zezi ek disip Etyenn. Ler bann solda Romen ti klout Zezi lo poto, Zezi ti priye: “Papa, pardonn zot.” (Lik 23:34) Zezi ti pe demann Zeova pour pardonn sa bann solda ki ti’n ganny lord pour touy li. I kapab ki i ti pe osi mazin serten dimoun dan lafoul ki ti’n demande pour touy li akoz zot ti’n ganny enfliyanse par son bann lennmi. Zezi ti realize ki sa bann dimoun pa ti konnen ki zot ti pe fer. Etyenn osi, ti demann Bondye pour pardonn bann dimoun ki ti pe al touy li. (Akt 7:58-60) Eski Zeova ti reponn lapriyer Zezi ek Etyenn? Wi. En kantite dimoun ki ti enplike dan zizman ek egzekisyon Zezi ti pli tar repantir, demontre lafwa dan Zezi e batize. (Akt 2:36-41) Sol sorti Tars, ki ti enn bann dimoun ki ti dakor pour Etyenn ganny touye, ti pli tar vin en Kretyen e i ti regrete pour bann move keksoz ki i ti’n fer.—1 Tim. 1:13.

5. Ki ou aprann avek leksperyans César?

⁵ Dan nou letan, Zeova i ankor reponn lapriyer ki nou fer pour bann ki opoz nou. Annou vwar leksperyans César ki reste Venezwela. Son papa ti vreman opoz laverite. César i dir: “Mon manman ti en bon madanm e en bon manman. Menm si i ti toultan met Rwayonm Bondye premye, i pa ti zanmen negliz mon papa. I ti ansenny mwan ek mon bann frer ek ser pour annan respe pour nou papa. I ti osi ansenny nou pour obei nou papa eksepte ler i demann nou pour fer en keksoz ki pa an armoni avek lavolonte Bondye.” Pandan bann lannen ki’n pase, latitid papa César ti sanze. César i dir: “En zour apre ki mon ti’n devid mon leker avek Zeova dan lapriyer, mon ti demann mon papa si i ti pou kontan etidye Labib. Mon pa kapab dekrir sa lazwa ki mon ti santi ler i ti dir wi.” Pli tar, papa César ti batize. Pa tou bann ki opoz nou ki sanze me serten i sanz zot latitid apre ki zot in obzerv nou bon kondwit e lafason ki nou koz avek respe. Nou vreman kontan ler zot fer sa bann sanzman. Nou vreman anvi vwar lafason ki Zeova sa “Ziz lo later antye” pou pran pitye e atir bann dimoun koumsa ver li.—Zen. 18:25.

6. Dapre Mark 13:13, ki en lot rezon akoz dimoun i ay nou?

⁶ Dimoun i ay nou parski nou annan respe pour Zezi. Zezi ti dir ki tou dimoun ti pou ay bann vre Kretyen “akoz zot port [son] non.” (Lir Mark 13:13.) Ki “non” Zezi i enplike? I enplik son repitasyon ek son lotorite konman Lerwa dan Rwayonm Bondye. Me bann dimoun ki ay nou i met zot konfyans dan bann dirizan sa lemonn e pa dan Zezi Kri, sa enn ki Zeova in swazir pour diriz liniver. Zezi pe dirize konman Lerwa dan Rwayonm Bondye depi 1914. Byento, i pou tir tou gouvernman ki rezet son lotorite.

7-8. Akoz serten parmi pep Zeova i ganny boufonnen? (Zan 15:18-20) (Vwar portre.)

⁷ Dimoun i ay nou parski nou refize fer parey bann dimoun ki dan lemonn Satan. Zezi ti eksplike ki dimoun ti pou ay son bann disip parski zot “pa form parti sa lemonn.” (Lir Zan 15:18-20.) Parey bann Kretyen dan premye syek, nou rezet bann move kondwit, latitid ek fason koze ki dan sa lemonn. Sa i fer ki en kantite frer ek ser in ganny trete dan en move fason kot zot travay oubyen dan lekol. (1 Pyer 4:3, 4) Me nou kontan ki serten dimoun ki opoz nou i sanz zot latitid e avek letan, zot konmans annan respe pour nou.

⁸ Annou vwar leksperyans Ignacio ki reste Lanmerik Santral. Dan sa lekol kot i ti ale, en ansenyan ti boufonn li pour plizyer lannen parski i ti viv dapre bann standar Bondye. Me avan ki Ignacio ti fini lekol, sa ansenyan ti demann li ki mannyer in kapab kontinyen viv dapre bann prensip Labib menm si sa ti fer ki bann dimoun otour li pa ti demontre respe anver li. Ignacio ti eksplike ki i konsider bann lalwa Bondye konman en proteksyon. Apre sa, i ti envit sa ansenyan pour vin en renyon. Ignacio ti sirprann ler sa ansenyan ti vini. Sa ansenyan ti sitan enpresyonnen avek lanmour ki bann frer ek ser dan kongregasyon ti demontre, ki i ti kontinyen asiste renyon. Pli tar, sa ansenyan osi ti ganny opoze parski i ti pe etidye Labib. Me i ti kontinyen fer progre spirityel e pli tar i ti batize.

9-10. (a) Kwa ankor ki fer bann Kretyen diferan avek dimoun dan lemonn Satan? (b) Ki nou kapab aprann avek legzanp zapot Pol?

⁹ Nou osi diferan avek lemonn Satan parski nou pa pran kote dan bann zafer politik ek lager. (Zan 18:36) An armoni avek sa konsey ki dan Romen 13:1, nou obei bann lalwa gouvernman. Kantmenm sa, konman bann Kretyen, nou pa pran kote dan bann zafer politik alor nou pa debout konman en kandida dan en eleksyon oubyen vot pour en kandida politik. Akoz? Parski nou fidel avek Zeova e avek son Rwayonm ki pe ganny dirize par Kris. En kantite Temwen Zeova in ganny met dan prizon akoz zot krwayans. Kantmenm sa, sa bann frer ek ser ki dan prizon i kontinyen anons sa bon nouvel. Zot swiv legzanp zapot Pol ki ti pas plizyer lannen konman en prizonnyen dan son lakour e dan prizon. (Akt 24:27; 28:16, 30) I ti kontinyen anons sa bon nouvel avek tou bann ki ti ekoute enkli bann gard prizonnyen, o zofisye, gouverner, lerwa e petet menm bann zofisye Lanperer Romen Nero.—Akt 9:15.

¹⁰ Dan menm fason, nou bann frer ek ser ki dan prizon i anons sa bon nouvel avek tou bann ki ekoute, enkli bann ziz, bann zofisye gouvernman ek bann gard. En frer ki’n pas plis ki si-z-an dan prizon akoz i pa’n pran kote dan bann zafer politik, i dir ki i konsider son letan dan prizon, pa konman en pinisyon me konman en lot teritwar ki Zeova in donn li pour trouv bann ki annan leker senser. Si sa i arive avek nou, nou kapab zwaye parski nou konnen ki Zeova pe servi nou pour anons sa bon nouvel avek sa bann dimoun. (Kol. 4:3) Aprezan, nou pou vwar lezot rezon akoz nou kapab zwaye menm ler lezot i ay nou akoz nou servi Zeova.

AKOZ NOU KAPAB ZWAYE MENM LER DIMOUN I AY NOU?

11. Ki mannyer ler nou ganny persekite, sa i kapab fer nou lafwa vin pli for? Donn en legzanp.

¹¹ Nou konnen ki sa laenn ki bann dimoun i demontre i akonplir bann profesi Labib. Dan sa premye profesi ki’n ganny rikorde dan Labib, Zeova ti predir ki Satan ek son desandans, setadir bann ki siport li, pou ay bann dimoun ki kontan e servi Zeova. (Zen. 3:15) Zezi ti souvandfwa dir ki dimoun ti pou ay bann ki servi Zeova zis parey in ganny rikorde par sa kat ekriven Levanzil. (Mat. 10:22; Mark 13:9-12; Lik 6:22, 23; Zan 15:20) Lezot ekriven Labib ti osi ekri konsernan sa. (2 Tim. 3:12; Zak 1:2; 1 Pyer 4:12-14; Zid 3, 17-19) Alor nou pa sirprann ler nou ganny persekite. O kontrer, nou kontan ki profesi Labib pe ganny akonplir. Sa i fer nou asire ki nou pe servi sa vre Bondye. En ser ki reste dan en pei kot sa travay predikasyon i anba restriksyon, i dir: “Ler mon ti dedye mon lavi avek Zeova, mon ti konnen ki to ou tar mon ti pou ganny persekite. Alor mon pa per oubyen sirprann ler mon fer fas avek problenm.” Son msye ti enn parmi bann dimoun ki ti opoz li. I pa ti tret li byen e i ti bril son Labib ek bann piblikasyon baze lo Labib. Olye per e les son lafwa afeblir, lafwa nou ser ti vin pli for. (Ebr. 10:39) I dir: “Labib ti predir ki nou pou ganny persekite, alor mon ti konnen ki sa i bezwen arive. Ler mon ti ganny persekite, sa ti fer mwan asire ki mon ti’n trouv sa vre larelizyon.”

12. Kwa ki ti ed en frer pour fer fas avek persekisyon?

¹² Menm si nou ekspekte ki nou pou ganny persekite, kantmenm sa nou kapab vwar li difisil pour andire. En frer ti dir sa konsernan sa letan ki i ti pase dan prizon: “Parfwa mon ti vreman sagren oubyen enkyet e mon ti zis plere.” Kwa ki ti ed sa frer andire? I ti dir: “Mon ti toultan priye. Mon ti toultan konmans mon lazournen avek en lapriyer. Pandan lazournen, mon ti priye sak fwa mon ti fer fas avek en sityasyon difisil. Ler mon ti ankoler akoz en lenzistis, mon ti tak mon lekor dan kabinen e priye.” Nou frer ti osi medit lo legzanp bann serviter Zeova dan lepase e dan nou letan ki ti andire ler zot ti ganny persekite. Sa ti ed li pour andire e i ti ganny sa lape ki Zezi ti promet i pou donn son bann disip.—Zan 14:27; 16:33.

13. Kwa ki kapab ed nou andire ler lezot i ay nou?

¹³ Nou lanmour pour Zeova e pour lezot i pli for ki laenn. Zezi pa ti zanmen aret kontan son Papa avek tou son leker. Zezi ti osi kontan son bann zanmi. (Zan 13:1; 15:13) Ler nou annan sa kalite lanmour pour Zeova ek nou bann frer ek ser, nou osi nou pou kapab andire ler lezot i ay nou. Ki mannyer sa? Pour nou vwar larepons, annou vwar legzanp zapot Pol.

14. Kwa ki ti ed Pol pour reste fidel avek Zeova menm ler i ti pe al ganny touye?

¹⁴ Pa bokou letan avan Pol ti ganny touye, i ti ekri son bon zanmi Timote e dir li: “Lespri sen ki Bondye in donn nou i pa fer nou vin en kapon me i fer nou annan pwisans, [ek] lanmour.” (2 Tim. 1:7) Ki Pol ti pe sey dir? Pol ti pe dir ki ler en Kretyen i kontan Zeova en kantite, sa lanmour i kapab ed li pour andire ler i fer fas avek bann sityasyon vreman difisil. (2 Tim. 1:8) San dout sa lanmour ki Pol ti annan pour Zeova ti ed li pour demontre kouraz e reste fidel avek Zeova menm si i ti pe al ganny touye.—Akt 20:22-24.

15. Ki mannyer bann frer ek ser dan nou letan in demontre lanmour pour kanmarad? (Vwar portre.)

¹⁵ Nou vreman kontan nou bann frer ek ser ki reste fidel avek Zeova ler zot ganny persekite. Serten dan nou letan, i pare pour riske zot lavi pour zot bann frer ek ser zis parey Akila ek Prisil ti riske zot lavi pour Pol. (Rom. 16:3, 4) Par egzanp, Larisi en kantite frer ek ser i al ankour pour ankouraz bann ki’n ganny arete par lapolis. Ler en ser ki ti’n ganny arete ti vwar plizyer frer ek ser ankour, i ti sitan ganny ankouraze ki i pa ti kapab koze pour en pe letan. Sa lanmour ki bann frer ek ser ti demontre anver li ti rekonfort li ler i ti vreman bezwen. Nou kapab ere parski nou lanmour pour Zeova e pour lezot i pli for ki laenn.

16. Akoz zapot Pyer ti dir ki bann ki pa ganny trete byen akoz zot pe servi Bondye, i annan rezon pour zwaye? (1 Pyer 4:14)

¹⁶ Nou konnen ki ler nou andire menm si lezot i ay nou, sa i fer Bondye plezir. (Lir 1 Pyer 4:14.) Zapot Pyer ti dir ki bann ki andire menm si lezot pa tret zot byen akoz zot pe servi Zeova, i annan rezon pour zwaye. Akoz nou kapab dir sa? Parski ler nou andire menm si lezot pa tret nou byen, sa i laprev ki “lespri sen Bondye i lo [nou].” Pyer ti zwaye ler i ti konnen ki i ti annan laprouvasyon Bondye e sa ti fer ki i ti kapab andire ler lezot pa ti tret li byen. Par egzanp, pa bokou letan apre Lapannkot lannen 33, bann gard tanp ti ganny anvoye pour aret Pyer ek lezot zapot parski zot ti pe anons sa bon nouvel. Me avek kouraz, Pyer ti defann son lafwa. (Akt 5:24-29) Menm apre ki zot ti’n ganny fwete, li ek bann lezot zapot pa ti aret anons sa bon nouvel. O kontrer, zot ti zwaye akoz zot ti’n ganny “konsidere diny pour ganny maltrete o non Zezi.” Nou osi nou kapab zwaye ler nou andir bann problenm.—Akt 5:40-42.

17. Ki Zezi ti dir son bann disip sa zour swar avan i mor?

¹⁷ Sa zour swar avan Zezi i mor, i ti dir son bann disip: “Sa ki kontan mwan, mon Papa pou kontan li, mon pou kontan li.” (Zan 14:21) Nou vreman anvi vwar sa letan kot dimoun pou nepli ay nou me zot pou kontan nou akoz nou servi Zeova. (2 Tesa. 1:6-8) Me antretan, nou kapab ganny rekonfor ek lafors ler nou gard antet sa kantite rezon ki nou annan pour zwaye menm si lezot i ay nou.