Pa les nanryen distrer ou

1-2. Ki mannyer en keksoz enportan i kapab vin en distraksyon?

KI DERNYEN fwa ou ti anpes ou ganny distrer? Petet pandan ki ou ti pe fer en aktivite, en keksoz ti distrer ou dan sa ki ou pe fer e ou ti bezwen deside kwa ki pli enportan. Annou vwar en legzanp. Meton ou telefonn i sonnen pandan ki ou pe dray. Petet sa call i enportan me ou konnen ki i pe anpes ou konsantre dan sa ki ou pe fer. Dan sa moman, i pli enportan pour ou konsantre lo lafason ki ou pe dray.

² I annan en kantite keksoz enportan ki nou bezwen fer. Nou konnen ki sa ki pli enportan i pour fer nou bann aktivite spirityela e pour gard en routin spirityel. (Mat. 6:33) Parey bann drayver ki pridan, pep Bondye i esey idantifye bann keksoz ki kapab anpes zot konsantre lo sa semen ki devan zot, setadir lo sa ki pli enportan.—Prov. 4:25; Mat. 6:22.

3. Ki mannyer sa lartik pou ed nou?

³ Nou pa anvi ganny distrer dan nou bann aktivite spirityel. Me kantmenm sa, i annan en kantite keksoz ki kapab distrer nou. (Lik 21:34-36) Pour ed nou konsantre lo nou servis pour Zeova, annou vwar (1) kwa ki kapab distrer nou, (2) ki Zezi ti fer pour li pa ganny distrer e (3) ki mannyer nou ozordi, nou kapab anpes nou ganny distrer.

KWA KI KAPAB DISTRER NOU?

4-6. Ki serten keksoz ki kapab fasilman distrer nou?

⁴ Nou tou nou annan en kantite keksoz ki nou bezwen fer. Par egzanp, nou kapab annan bann problenm lasante oubyen bann keksoz ki nou bezwen fer pour nou ouswa pour nou fanmir. Byensir, sa bann keksoz i enportan e nou bezwen pran letan pour fer zot. Me eski zot kapab osi vin en distraksyon? Sa i kapab arive si nou toultan pe mazin sa bann keksoz e nou pas tro bokou letan pe fer zot ki nou napa letan oubyen lenerzi pour fer okenn lezot keksoz.

⁵ Osi, en kantite nou i reste dan bann landrwa kot i annan vyolans akoz problenm politik, kot i annan problenm ekonomik, bann lepidemi ek bann problenm ki pa zanmen fini. (2 Tim. 3:1) Ler nou eksperyans bann problenm koumsa, i kapab ki nou vin sitan enkyet ki nou mazin zis sanmenm toultan.

⁶ Petet nou konn dimoun ki’n fer fas avek bann problenm koumsa e zot lavi in sanze akoz sa. Alor nou kapab konpran akoz zot dekouraze e enkyet. Me Zeova pa ti kree imen pour soufer oubyen pour toultan anba stres. Sa i fer ki serten i santi ki zot nepli kapab annan en lavi normal parey zot ti ava kontan. I pour sa rezon ki serten i pas en kantite letan pe relaks e pe anmize pour zot kapab oubliy zot bann problenm. Ki nou kapab fer si nou remarke ki nou annan bann santiman koumsa? Annou vwar sa ki nou kapab aprann avek Zezi, ki pou ed nou pour pa ganny distrer e pour gard Zeova premye dan nou lavi.

KI ZEZI TI FER POUR ANPES LI GANNY DISTRER?

7. Kwa ki ti’n kapab distrer Zezi?

⁷ I ti annan en kantite keksoz ki ti’n kapab distrer Zezi, parey bann problenm sosyal ek politik. Dan son letan, i ti annan en kantite dimoun ki ti pov e malad. (Mat. 14:14; Mark 14:7) Zot ti soufer parski bann Romen ek bann lezot Zwif ti tret zot dan en fason enzis. Ler dimoun ti vwar ki Zezi ti annan sa pouvwar ek abilite pour fer bann mirak, zot ti anvi fer li vin zot lerwa. (Zan 6:14, 15) Osi, Satan ti esey tant Zezi e ofer pour fer li diriz lemonn pli vitman. (Mat. 4:8, 9) En fwa, zapot Pyer, ki ti enn bann bon zanmi Zezi, ti ankouraz Zezi pour fer son lavi pli fasil par dir li: “Ou bezwen bon avek ou lekor Senyer.”—Mat. 16:21, 22.

8. Ki Zezi ti fer pour anpes li ganny distrer?

⁸ Ki Zezi ti fer pour anpes li ganny distrer? Annou vwar trwa keksoz. Premyerman, i ti annan menm fason panse avek Zeova. (Zan 8:28; 14:9) Dezyenmman, i ti reste bizi dan bann aktivite spirityel. (Mat. 9:35) Trwazyenmman, i ti konpran byen kwa ki ti vreman enportan. (Zan 4:34) I ti reziste tantasyon Satan e i pa ti les Pyer sanz son nide menm si Pyer ti annan en bon lentansyon. (Mat. 4:10; 16:23) Zezi pa ti les sa ki dimoun i krwar, dir oubyen fer, distrer li e anpes li fer lavolonte Bondye. Menm si sa ki kapab distrer nou ozordi, i diferan avek sa ki ti kapab distrer Zezi, ler nou aprann konsernan sa trwa keksoz ki Zezi ti fer, sa i kapab anpes nou ganny distrer.

KI NOU KAPAB FER POUR ANPES NOU GANNY DISTRER?

9. Ki sa lekspresyon “kontinyen esey konpran kisisa lavolonte Zeova” i vedir? (Efezyen 5:17)

⁹ Aprann pour annan menm fason panse avek Zeova. Ler ou fer sa, sa pou ed ou pour “kontinyen esey konpran kisisa lavolonte Zeova.” (Lir Efezyen 5:17.) Nou kapab aprann kwa ki fer Zeova plezir par lir Son Parol e medit lo la. Nou kapab fer sa menm ler Labib pa koz lo nou sityasyon spesifik. Ki mannyer sa? Par konn fason panse Zeova pli byen e par les Son fason panse gid nou.

10. Ki mannyer nou kapab aprann konn fason panse Zeova?

¹⁰ Nou kapab aprann konsernan fason panse Zeova par etidye Labib e reflesir lo lafason ki i ti tret bann imen. (Zer. 45:5) Anmezir ki nou lir sa bann resi, nou kapab demann nou lekor bann kestyon koumsa: ‘Ki sa i ansenny mwan konsernan Zeova? Ki mannyer mon kapab servi sa lenformasyon pour ed mwan sanz mon fason panse?’ Byensir, son fason panse i pli siperyer ki sa ki pour nou. (Iza. 55:9) Alor i normal ki nou demann li pour ansenny nou ki mannyer pour fer son lavolonte. (Ps. 143:10) Nou osi demann li pour ed nou konpran son fason panse e ed nou pour annan menm fason panse avek li.—1 Zan 5:14.

11. Ki Zeova i anvi pour nou?

¹¹ Anmezir ki nou aprann pour annan menm fason panse avek Zeova, nou osi aprann ki Zeova pa anvi nou ganny distrer parski i anvi ki nou’n pare ler lafen i arive. (Mat. 24:44) I pa anvi ki nou sitan enkyet ki nou dekouraze. (Mat. 6:31, 32) Alor ler nou enkyet konsernan nou lasante, nou travay, nou lakour, nou fanmir oubyen nou sityasyon personnel, Zeova i donn nou bann bon konsey. I demann nou pour depan lo li pour ganny sa lasazes ek lafors ki nou bezwen pour nou fer fas avek nou bann problenm.—Ps. 55:22; Prov. 3:5-7.

12. Kwa ki kapab ed nou pour pa tro enkyet konsernan sa ki pe arive dan lemonn? (Matye 5:3)

¹² Reste bizi dan bann aktivite spirityel. Nou tou nou enkyet konsernan bann keksoz ki pe arive dan lemonn. Me nou pa kapab fer nanryen pour anpes zot arive. Alor pour nou pa ganny distrer par sa ki nou pa kapab kontrole, nou bezwen konsantre dan nou bann aktivite spirityel. Ler nou fer zefor pour satisfer nou bezwen spirityel, nou pou zwaye parski sanmenm sa ki Zeova in kree nou pour fer. (Lir Matye 5:3.) Nou fer sa par etidye Labib e par fer tou sa ki nou kapab dan servis Zeova. Ler nou fer sa, nou pou fer Zeova plezir parski nou pou pe servi byen nou letan.—Prov. 23:15.

13. Ki mannyer nou kapab “servi byen [nou] letan”?

¹³ Konman bann Kretyen, nou determinen pour “servi byen [nou] letan.” (Efe. 5:15, 16; vwar not letid “making the best use of your time” dan nwtsty-E an Angle.) Nou realize ki Labib pa pe zis refer avek lafason ki nou servi nou letan dan nou bann aktivite toulezour. O kontrer, i pe ankouraz nou pour reflesir lo lafason ki nou servi nou letan avan ki Zeova i met en lafen avek sa move lemonn. Ki mannyer nou servi byen nou letan? Si nou pas en kantite letan pe get nouvel konsernan bann move keksoz ki pe arive, sa i kapab distrer nou, dekouraz nou e fer nou nepli devoue dan nou servis pour Zeova. I ti pou byen ki nou met bann limit konsernan lakantite nouvel ki nou gete oubyen lir. Sa pou fer ki nou pa pou enkyet e nou pou kapab reste bizi dan bann aktivite spirityel ki ankourazan. I ti pou byen ki nou osi reflesir lo lafason ki nou kapab fer plis dan predikasyon par egzanp, par esey fer plis retourn vizit. Nou konpran ki i enportan pour sezi tou loportinite pour ed dimoun “ganny sove e ganny konnesans egzakt lo laverite.”—1 Tim. 2:4.

14. Ki mannyer ler nou reste bizi dan bann aktivite spirityel, sa i kapab ed nou? (Vwar portre.)

¹⁴ Ler nou reste bizi dan bann aktivite spirityel, sa i ed nou pour gard antet sa letan ki nou pe viv ladan. Ler nou vwar vyolans akoz bann problenm politik, problenm ekonomik ek bann maladi ki pe propaze, nou pa per parski sa i laprev ki sa ki Labib ti’n predir pe ganny akonplir. Olye les lafreyer distrer nou, nou asire ki Zeova pou akonplir son lavolonte konsernan lavenir. Me nou konnen ki antretan Zeova pou ed nou andire e sa i ed nou pour reste kalm.—Ps. 16:8; 112:1, 6-8.

15. Ler nou annan “bon zizman,” ki sa pou ed nou pour fer? (1 Pyer 4:7)

¹⁵ Gard antet sa ki vreman enportan. Laplipar dimoun ozordi i pli enterese avek lanmizman ki avek lefet ki lafen sa lemonn i pros. I pa mal pour detann nou lekor. Me nou bezwen annan “bon zizman” pour nou pa ganny enfliyanse par pwennvi bann dimoun dan sa lemonn. (Lir 1 Pyer 4:7.) Sa pou ed nou pour pa pas tro bokou letan ek lenerzi dan divertisman me pour fer bann desizyon saz. Bann desizyon koumsa pou montre ki nou annan menm fason panse avek Zeova e ki nou’n konpran kwa ki vreman enportan.—2 Tim. 1:7.

16. Ki Zezi ti konsantre lo la zis avan i ti mor?

¹⁶ Zezi ti toultan gard antet sa ki pli enportan. Pandan sa letan difisil avan i mor, i ti konnen ki sa keksoz pli enportan i pour li reste fidel avek Bondye e fer Son lavolonte. I pour sa rezon ki i ti priy en kantite. Me son bann disip pa ti reste alert parey li. O kontrer, zot ti tonm dormi. Zot ti “epwize akoz latristes.”—Lik 22:39-46; Zan 19:30.

17. Akoz en kantite dimoun i servi rezo sosyal me ki mannyer sa i kapab vin en distraksyon? (Vwar portre.)

¹⁷ Parey bann disip Zezi, parfwa nou kapab santi nou fatige, sagren e dekouraze. Bann keksoz ki pe arive ki montre ki nou pe viv dan letan lafen, i kapab fer nou enkyet. En kantite dimoun ozordi i esey oubliy zot problenm par pas bokou letan lo rezo sosyal. Zot servi rezo sosyal pour rakont zot bann fanmir ek zanmi partou dan lemonn sa ki pe arive dan zot lavi e pour partaz bann portre ek lezot keksoz ankor. Zot osi servi rezo sosyal pour get bann film e pour zwe bann zwe video. Me sa bann dimoun i kapab pe sitan konsantre dan sa bann keksoz, ki zot pas en kantite letan ek lenerzi pe lir oubyen get bann dernyen lenformasyon. Pour nou pa fer parey zot, petet nou kapab demann nou lekor, ‘Eski lafason ki mon pe servi rezo sosyal i fer mwan dibyen oubyen eski i pe distrer mwan avek sa ki vreman enportan?’

18. Akoz nou bezwen annan bon zizman ler nou pe swazir nou divertisman?

¹⁸ Nou osi bezwen annan bon zizman si nou servi Enternet pour get bann pti video, zwe bann zwe video, get bann film oubyen bann seri. Sa bann keksoz i kapab gou e ed nou pour relaks. Me nou osi bezwen annan bon zizman ler nou pe swazir ki kalite divertisman nou pou fer e lakantite letan ki nou pou pase dan sa bann divertisman. Sa bann sit Enternet i toultan donn bann lezot video ki ou kapab gete e dan sa bann video i kapab annan vyolans oubyen imoralite seksyel. Sanmenm sa ki ti arive avek enn nou frer ki reste Lazi. I ti konmans get ekstre bann film lo en sit Enternet. Apre i ti konmans get bann ekstre ki sa sit ti sizere e pli tar i ti konmans get bann ekstre ki ti annan bann senn imoral ladan. Avek letan, i ti konmans get pornografi. Erezman, sa frer ti ganny led avek bann ansyen ek sipor avek son bann zanmi pros. I ti tir sa bann app ki i ti servi pour get film lo son telefonn e i ti met en limit lo lakantite letan ki i pou pase lo son telefonn. Sa leksperyans i montre akoz nou bezwen annan bon zizman ler nou pe swazir nou divertisman.

19. Ki i kapab arive si nou pas tro bokou letan pe detann?

¹⁹ Nou osi bezwen annan bon zizman ler nou pe fer bann desizyon konsernan vakans ek lafason ki nou detann. Tanzantan, nou tou nou bezwen relaks e repoze. Sa i bon pour nou e i ed nou pour reste an bonn sante. Me si nou konsantre tro bokou lo detant, nou pa pou rezonnab e nou kapab pas mwens letan dan bann keksoz ki pli enportan. (Fili. 1:10) Nou tou nou bezwen deside pour nou menm ki nou pou fer e ki kantite letan nou pou pase pe fer sa keksoz. Ler ou pe fer bann desizyon koumsa, demann ou lekor: ‘Eski sa kantite letan ki mon pase pe detann e pe al vakans i montre ki mon annan bon zizman? Eski bann desizyon ki mon pe fer i montre ki mon pe verifye sa ki pli enportan e pe prepar mwan pour “lafen tou keksoz”?’

20. Ki byenfe nou gannyen ler nou anpes nou ganny distrer?

²⁰ Nou ganny bann byenfe ler nou pa les nou ganny distrer dan nou bann aktivite spirityel e nou gard nou routin spirityel. (Iza. 48:17) Avek led Zeova, nou pou pli byen kapab fer fas avek nou bann problenm. Nou pa pou tro enkyet akoz bann keksoz ki pe arive dan lemonn e nou pa pou pas tro bokou letan pe detann. Alor annou kontinyen determinen pour annan menm fason panse avek Zeova, pour reste bizi dan bann aktivite spirityel e pour gard antet sa ki vreman enportan. Ler nou fer sa, nou pa pou zis anpes nou ganny distrer me nou pou osi kapab “met tou [nou] konfyans dan sa lespwar pour ganny sa vre lavi.”—1 Tim. 6:19.