Frer ek ser aze, ou en gran led pour kongregasyon

Petet ou osi ou pa kapab fer parey ou ti fer ler ou ti pli zenn. Menm si ou’n servi Zeova fidelman pour plizyer lannen, i kapab ki ou dekouraze akoz bann keksoz ki ou pa kapab fer. Par egzanp, i kapab ki ou tant pour konpar sa ki ou pe fer la konmela avek sa ki ou ti fer dan lepase. Si ou dan sa sityasyon, kwa ki kapab ed ou?

KI ZEOVA I ANVI OU FER?

Demann ou lekor, ‘Ki Zeova i anvi mon fer?’ Ou kapab trouv rekonfor dan Deterononm 6:5, ki dir: “Ou devret kontan Zeova ou Bondye avek tou ou leker, avek tou ou nanm e avek tou ou lafors.”

Dapre sa verse, Zeova i anvi ki ou servi li avek tou ou leker, nanm ek lafors. Ler ou konn sa, sa i kapab ed ou pour evite konpar ou lekor avek lezot oubyen konpar sa ki ou kapab fer la konmela avek sa ki ou ti kapab fer dan lepase.

Reflesir lo sa: Ler ou ti pli zenn, ki ou ti pe donn Zeova? I tre probab ki ler ou ti pli zenn, ou ti donn Zeova ou meyer dapre sirkonstans ki ou ti ladan sa letan. Ki ou kapab donn Zeova aprezan? I tre probab ki ou pe donn Zeova ou meyer dapre sirkonstans ki ou ladan ozordi. Si ou mazin koumsa, ou pou realize ki ou pe donn Zeova parey ou ti donn li dan lepase. Ou ti donn li ou meyer dan lepase e ozordi osi ou pe donn li ou meyer.

OU KAPAB ED LEZOT EN KANTITE

I annan en lot fason ki ou kapab vwar ou sirkonstans: Olye mazin bann keksoz ki ou nepli kapab fer akoz ou laz, vwar ou sirkonstans konman en loportinite. Anfet, konman en Kretyen ki aze, i annan serten keksoz ki ou kapab fer la konmela ki ou pa ti kapab fer ler ou ti pli zenn. Par egzanp, ou kapab fer sa bann keksoz swivan:

Ou kapab partaz ou leksperyans avek lezot. Annou vwar serten keksoz ki’n ganny rikorde dan Labib:

Lerwa David: “Mon ti zenn e aprezan mon’n vin vye, me mon pa’n zanmen vwar okenn dimoun ki fer sa ki byen ganny abandonnen, ni son zanfan pe rod dipen.”—Ps. 37:25.

Zozye: “Aprezan, gete! Mon pros pour mor e zot konn tre byen avek tou zot leker ek tou zot nanm ki napa en parol dan tou sa bann bon promes ki Zeova zot Bondye in fer avek zot ki pa’n vin vre. Tou sa ki i’n dir, in vin vre pour zot. I napa en parol ki pa’n vin vre.”—Zoz. 23:14.

David ek Zozye ti’n servi Zeova pour plizyer lannen e zot ti’n eksperyans en kantite keksoz. Alor, zot ti konnen ki zot ti pe koz lo la. Petet dan lepase ou’n deza dir bann keksoz en pe parey. Me aprezan ou bann parol i baze lo bann leksperyans ki ou’n annan tou dilon bann lannen e sa i fer ou bann parol annan plis lefe.

Par egzanp, ou kapab koz lo bann benediksyon ki ou’n gannyen ler ou’n servi Zeova. Eski ou annan en zoli souvenir en moman kot ou’n vwar lafason ki Zeova in beni son pep? Si wi, koz lo la avek lezot. Sa i kapab annan en lefe lo lezot zis parey in annan lo ou. Dan menm fason, ler lezot i tann konsernan ou prop leksperyans dan servis Zeova, sa i kapab ankouraz zot.—Rom. 1:11, 12.

En lot fason ou kapab ankouraz lezot i par asiste renyon an personn, otan ki ou kapab. Laba, ou kapab ankouraz ou bann frer ek ser e zot osi zot kapab ankouraz ou. Connie, ki’n ganny mansyonnen pli boner, i dir: “Ler mon asiste renyon, sa i anpes mwan dekouraze. Ler mon al kot Lasal Rwayonm, bann frer ek ser i demontre en kantite lanmour anver mwan. Ki mannyer mon kapab dekouraze? Mon esey demontre lapresyasyon anver lezot par donn zot bann pti kado e mon fer sir ki mon kontinyen partisip dan bann aktivite spirityel ansanm avek zot.”

ZEOVA I APRESYE TOU SA KI OU FER

Dan Lekritir, i annan legzanp en kantite dimoun ki zot sirkonstans pa ti permet zot fer bokou me ki kantmenm sa, Zeova ti kontan zot. Mazin legzanp Simeon, ki ti en zonm Izraelit. Simeon ti’n vye ler Zezi ti ne. I tre probab ki ler Simeon ti vizit tanp, i ti vwar bann zenn garson pe fer bann travay enportan kot tanp. Me ki nou pou dir konsernan Simeon? Dapre pwennvi imen, i ti’n kapab mazinen ki i ti napa bokou valer pour Zeova parski i ti’n vye. Me Zeova pa ti vwar keksoz koumsa. I ti vwar Simeon konman en zonm ki “fer sa ki byen e [ki] ti annan respe pour Bondye” e i ti donn li sa privilez pour vwar Zezi ler i ti ankor en pti baba. Zeova ti menm servi Simeon pour anons en profesi konsernan Mesi. (Lik 2:25-35) I kler ki Zeova pa ti konsantre lo lefet ki Simeon ti’n vye me i ti vwar li konman en zonm ki annan en gran lafwa e ki “lespri sen ti [pe] gid li.”

Ou osi ou kapab asire ki Zeova i apresye tou sa ki ou fer menm si ou nepli kapab fer parey ou ti fer oparavan. En sakrifis i “byen devan Bondye akoz i ekspekte ki en dimoun i donn dapre sa ki i annan, pa dapre sa ki i napa.”—2 Kor. 8:12.

Alor konsantre lo sa ki ou kapab fer. Par egzanp, ki form predikasyon ou kapab partisip ladan menm si i zis pour en ptigin letan? Eski petet ou kapab ankouraz lezot par telefonn zot oubyen donn zot en kart? Ler ou fer bann pti keksoz pour demontre lanmour anver lezot, sa i kapab annan en gran lefe lo zot sirtou parski sa keksoz i sorti kot en dimoun ki’n servi Zeova pour en kantite letan.

Petet akoz zot laz serten pa kapab fer bokou keksoz me kantmenm sa, zot donn Zeova zot meyer. Remark leksperyans en ser ki reste Les Lafrik dan sa bwat “En ser ti servi Labib pour ede sov lavi en dimoun.”

Gard antet ki lefet ki ou’n reste fidel avek Zeova tou sa lannen e ki ou’n demontre lafwa dan li, sa i kapab ankouraz lezot. Ou’n andire e sa i en legzanp pour lezot e ou kapab asire ki “Bondye pa enzis pour oubliy sa ki [ou’n] fer e lanmour ki [ou’n] demontre pour son non par servi e kontinyen servi bann sen.”—Ebr. 6:10.

RESTE BIZI ANMEZIR OU ED LEZOT

Bann resers i montre ki bann dimoun aze ki reste bizi pe ed lezot i annan en pli bon lasante, zot kapab reflesir pli byen e zot viv pli lontan.

Byensir ler ou fer bann bon keksoz pour lezot, sa pa vedir ki ou pa pou eksperyans bann problenm ki vin avek lavyeyes. Zis Rwayonm Bondye ki pou fer sa parski i pou tir lakoz lavyeyes ek lanmor, setadir lenperfeksyon.—Rom. 5:12.

Kantmenm sa, ou servis pour Zeova, ki enkli ed lezot pour aprann konn li, i ed ou gard ou lespwar antet e i menm kapab ed ou annan en bon lasante la konmela. Frer ek ser aze, ou kapab asire ki Zeova i apresye sa ki ou fer dan son servis e ou bann frer ek ser dan kongregasyon i apresye sa lafwa ki ou’n demontre.