Pa bezwen vin egois parey bann dimoun dan sa lemonn

ESKI ou’n deza remarke ki en kantite dimoun dan lemonn i krwar ki zot devret ganny trete dan en fason spesyal e ki zot devret annan serten privilez oubyen drwa? Menm si zot ganny trete dan en fason spesyal, zot kontinyen krwar ki zot merite ganny plis privilez. Bann dimoun ki mazin koumsa i egois e pa rekonesan. Labib i dir ki dan bann dernyen zour dimoun ti pou koumsa.—2 Tim. 3:2.

Byensir, i’n toultan annan dimoun ki egois. Par egzanp, Adan ek Ev ti deside pour swazir pour zot menm kwa ki byen e kwa ki mal e nou tou nou soufer akoz sa desizyon. Plizyer santenn lannen pli tar, Lerwa Ouzya ki ti lerwa Zida ti krwar ki i annan drwa pour bril lansan kot tanp me sa ti en keksoz vreman mal. (2 Kron. 26:18, 19) Osi, bann Farizyen ek Sadiseen ti krwar ki Bondye i devret tret zot dan en fason spesyal zis akoz zot ti bann desandans Abraam.—Mat. 3:9.

Nou pe viv parmi bann dimoun egois ki krwar ki zot pli enportan ki lezot e zot latitid i kapab enfliyans nou. (Gal. 5:26) Nou kapab konmans krwar ki nou merite ganny serten privilez oubyen ki nou merite ganny trete dan en fason spesyal. Ki mannyer nou kapab evite annan sa fason panse? Premyerman, nou bezwen konn pwennvi Zeova lo sa size. I annan de prensip Labib ki pou ed nou.

Zeova ki deside ki nou devret gannyen. Annou vwar serten legzanp.

• Dan en fanmir, en msye i bezwen santi ki son madanm i annan respe pour li e en madanm i bezwen santi ki son msye i kontan li. (Efe. 5:33) En msye ek en madanm ki’n marye i devret demontre lanmour romantik zis avek kanmarad. (1 Kor. 7:3) Bann paran i annan drwa ekspekte ki zot zanfan i obeir zot e bann zanfan i devret santi ki zot paran i kontan zot e ki zot paran pe pran swen avek zot.—2 Kor. 12:14; Efe. 6:2.

• Bann ansyen dan kongregasyon i travay dir e zot merite ki nou demontre respe anver zot. (1 Tesa. 5:12) Me zot napa drwa domin lo zot bann frer ek ser.—1 Pyer 5:2, 3.

• Bondye in donn bann gouvernman sa drwa pour demann zot sitwayen pour pey taks e pour zot sitwayen donn zot loner.—Rom. 13:1, 6, 7.

Zeova i kontan pour donn nou plis ki nou merite. Vi ki nou fer pese, nou merit lanmor. (Rom. 6:23) Me akoz son lanmour fidel, Zeova i donn nou en kantite benediksyon. (Ps. 103:10, 11) Sak benediksyon ek privilez ki Zeova i donn nou i akoz son labonte ekstraordiner, pa akoz nou merite.—Rom. 12:6-8; Efe. 2:8.

KWA KI KAPAB ED NOU POUR PA VIN EGOIS?

Fer atansyon ki nou pa konmans mazin parey dimoun dan lemonn. San realize, nou kapab konmans krwar ki nou merite ganny plis ki lezot. Zezi ti montre ki mannyer i fasil pour nou devlop sa kalite fason panse ler i ti koz lo sa legzanp konsernan bann travayer ki ti ganny peye en denye. Serten travayer ti konmans travay depi gran maten e zot ti travay dan gro ker soley pandan lazournen antye. Tandis ki lezot ti travay zis pour enn erdtan. Sa bann ki ti travay lazournen antye ti krwar ki zot merit ganny plis larzan pour sa travay ki zot in fer. (Mat. 20:1-16) Ler Zezi ti pe eksplike ki sa legzanp i vedir, i ti montre ki son bann disip ti devret kontant zot avek sa ki Zeova i kontan pour donn zot.

Nou bezwen rekonesan e pa ekspekte ki lezot i fer keksoz pour nou. (1 Tesa. 5:18) Nou kapab swiv legzanp zapot Pol, ki pa ti demann bann frer ek ser dan lavil Korent pour donn li bann keksoz materyel menm si i ti annan drwa demann zot pour fer sa pour li. (1 Kor. 9:11-14) Nou devret apresye bann benediksyon ki nou gannyen e pa ekspekte ki lezot i donn nou keksoz.

Devlop limilite. Ler en dimoun i krwar ki i pli enportan ki lezot, i kapab konmans krwar ki i devret ganny plis keksoz ki lezot. Sa kalite fason panse i danzere. Me si nou devlop limilite, sa pou ed nou pour pa zanmen annan sa kalite fason panse.

Profet Danyel ti en dimoun ki ti annan limilite e i en bon legzanp pour nou. Danyel ti sorti dan en fanmir enportan, i ti en zoli garson, i ti malen e i ti annan en kantite abilite. Sa ti’n kapab fer li santi ki i ti ganny sa bann privilez e ki i ti ganny trete dan en fason spesyal parski i merite. (Dan. 1:3, 4, 19, 20) Me Danyel ti kontinyen demontre limilite e sa ti fer li presye pour Zeova.—Dan. 2:30; 10:11, 12.

Bokou dimoun dan sa lemonn ozordi i egois e zot krwar ki zot pli enportan ki lezot. Annou pa vin parey zot. O kontrer, annou kontinyen apresye sak benediksyon ki Zeova i donn nou akoz son labonte ekstraordiner.