14-20 SETEMBRO, 2026
MWASO 41 Ivwa Kama Kulemba Chami
Wana Utakamiso mu Mukanda wa Izaia
“Yehova kanambe ngwenyi: . . . ‘Ngwe mwana wa kuwumbikiza kuli naye, chocho mungukanuwumbikiza.’”—IZA. 66:12, 13.
YIZE MUTULILONGESA
Mutumona chize mukanda wa Izaia muutukwasa kuliva kanawa muze tunanenganyana.
1-2. Kuchi Yehova akutukwasa muze tunanenganyana?
TUNYONGENU hali umwe mwana yoze unanenganyana ni kulila chinji. Mwana wacho mahasa kunenganyana mumu asoko jenyi kalukila ku chihela cheka, mba iye katamba kuhichika masepa jenyi hanji nawa kalinga umwe kapalia. Ha shimbu liacho, yika chisemi wa zango mahasa kulinga? Iye makangayika mwanenyi, mamupanjika ni kumwiwulula ngwo kakumuzanga.
2 Yehova kakulitesa ni umwe mama wa zango yoze wakulihulumba ni kukwasa mwanenyi. Iye kanambe ngwenyi: “Ngwe mwana wa kuwumbikiza kuli naye, chocho mungukanuwumbikiza.” (Iza. 66:13) Yehova kakutuzanga chinji kuhiana yisemi jetu. (Iza. 49:15) Kupalikila mu Mbimbiliya, Yehova kakutwaha utakamiso ni tachi jize twakufupa hanga tulihumikize muze tunanenganyana hanji tunasakalala.—Roma 15:4.
3. Yika mutumona ha mutwe uno?
3 Kupalikila mu mukanda wa Izaia, Yehova kakutulweza yuma yinji yize muyihasa kututakamisa. (Iza. 40:1) Tata yetu wa zango katumine Izaia kusoneka mukanda uno hanga atakamise atu jenyi waze apwile mu Yunda, muze ayo te anapalika mu yipikalo yinji. Ni yetu tuli ha “mashimbu akalu chinji,” kashika tunafupu utakamiso. (2 Timo. 3:1) Tutalenu jimwe versu ja mukanda wa Izaia jize mujihasa kututakamisa, (1) muze yuma muyalumuka susumuku ku mwono wetu, (2) muze mutununga ni kulihisa mumu lia shili yize twalingile kunyima, ni (3) muze mutunenganyana mumu lia kufwisa mutu yoze twazanga.
MUZE YUMA MUYALUMUKA SUSUMUKU KU MWONO WETU
4. Kuchi yuma yize yakulingiwa susumuku muyihasa kukwata ku mwono wetu?
4 Mwono wetu muuhasa kwalumuka susumuku. (Chilu. 9:11; 1 Kori. 7:31) Mutuhasa kuyiza, kupwa ni kapinda wa mbongo, kumona lamba mumu lia mbwaja yize muyihasa kulingiwa mu chifuchi, hanji muze malumuna chiteli chize tukwete mu ululikiso wa Yehova. Kwalumuka chino, muchihasa kututwala hanga tusakalale, tuyambashane ni kulihula ngwetu, ‘Haliapwila yika mungulinga?’ Ndumbu Joseph, yoze atumine mu munda muze te hakalakala miaka 17 ku Mbetele, yamba ngwenyi: “Nevile ngwe natoka. Chapwile chikalu kuputuka mwono waha, mumu te hinakalakala miaka yinji ku Mbetele. Chakanyingikine haze munguputukila.” Kupalikila mu mukanda wa Izaia, shindakenyo yika Yehova anatwehe nyi ngwe mwono wetu muwalumuka susumuku?
5. Kulita ni Izaia 42:16, yika Yehova anatulakenya? (Tala nawa chizulie.)
5 Tanga Izaia 42:16. Yehova kanalakenya kukwasa atu waze ali ngwe tupuputa mu majila waze ayo kanyingikine, ni kwalumuna milima yipwe pangu. Maliji “tupuputa,” “majila waze kanyingikine,” “milima,” ni “yihela ya yingulinga-yingulinga,” kakwatesa ni chize twakumona kutalatala chetu muze yuma ku mwono wetu yakwalumuka susumuku. Mutuhasa nawa kuliva ngwe tunende mu umwe mushitu ulaa pwi, chakuhona kunyingika jila yize twatamba kuya. Chipwe chocho, Yehova kakutwaha shindakenyo ngwenyi, chipwe ngwe mutupalika mu yipikalo yeswayo, iye matwaha usongwelo uze mutufupa. Chikwo nawa, kechi katuhichika nilimwe tangwa. Iye kakukwata kwoko lietu, kakutusongwela muze kuli milima, kakupangwisa jila yetu ni kuchiza yingulinga-yingulinga hanga chipwe chashi kwendela mu jila yacho. Kuchi Yehova akuchilinga? Yehova kakuchilinga ha kutwaha yiyulo ya mana kupalikila mu Mbimbiliya ni mu ululikiso wenyi. (Samu 119:105; Iza. 30:21) Iye kakutukwasa kupalikila muli mandumbu jetu a malunga ni a mapwo ni atu akwo nawa. Chipwe ngwe kutwanyingikine yize muyilingiwa kuli yetu, nihindu mutuhasa kufuliela ngwetu Yehova matukwasa mumu kakutuzanga, chikwo nawa, kananyingika yize twakupalika.—Iza. 41:10; 1 Petu. 5:6, 7.
Chipwe ngwe yuma muyalumuka susumuku, nihindu Yehova kechi kakuhichika nilimwe tangwa (Tala paragrafu 5)b
6. Nyi ngwe yuma ku mwono wetu muyalumuka susumuku, shindakenyo yika twatamba kupwa nayo?
6 Joseph, yoze twatongola kanalumbununa chize iye ni mukwo-pwo, amwene ukwaso wa Yehova muze akatukile ku Mbetele. Iye yamba ngwenyi: “Twamwene ukwaso wa Yehova muze twalukile. Iye katukwashile kupalikila muli mandumbu jetu a zango. Kakutufunga ku manyonga ni ku musunya ha shimbu lialita, nawa manunga ni kuchilinga.” Nyi ngwe yuma muyalumuka susumuku ku mwono we, pwako ni shindakenyo ngwe, Yehova manunga ni kukwaha tachi ni usongwelo uze mufupa, chipwe ngwe kapinda wacho mapwa mukalu chinji. (Iza. 54:10; 58:11) Joseph yamba nawa ngwenyi: “Umwe mwaso wetu wakwamba ngwo, ‘Yuma yize muyilingiwa hamene chayinyingikine, alioze nguli ni shindakenyo ngwami, kuchishi ukawami.’a Ewa, chipwe ngwe yuma kuyendele kulita ni chize twayitesele, nihindu tuli ni shindakenyo ngwetu, Yehova manunga ni kutukwasa mu majila jetu eswe.”
MUZE MUTUNUNGA NI KULIHISA MUMU LIA SHILI YIZE TWALINGILE
7. Kuchi amwe mahasa kuliva mumu lia shili yize alingile kunyima?
7 Nyi twambulula shili yetu kuli makulwana, ayo matukwasa ni zango. Kukatuka haze, twatamba kusa tachi hanga tuhone kufunyina shili yacho. (Yishi. 28:13; Tia. 5:14-16; 1 Yoa. 1:9) Chipwe muze mutunyingika ngwetu Yehova katukonekena, hanji mutuhasa kununga kulihisa ni kulihula ngwetu, ‘Shina Yehova kangukonekena lume?’ (2 Kori. 2:7) Kulinga chino hi chipi ko. Tunanyingika ngwetu, muchihasa kupwa chikalu kuvulama shili yize twalingile kunyima. Mumu lia chino, mutuhasa kuhonga ha mashimbu anji. Mwanangana Ndawichi che apwile ni kuliva, kashika asonekene ngwenyi: “Yifwaha yami yeswe yinapeleta mumu lia shili yami.” (Samu 38:3, 8) Nyi ngwe che wakuliva ha mashimbu amwe mumu lia shili yize walingile kunyima, mukanda wa Izaia muuhasa kukutakamisa.
8-9. Kulita ni Izaia 1:18 yika Yehova akulinga muze akutukonekena?
8 Tanga Izaia 1:18. Yehova katongwele chimwe chilweza chize chakusolola chize akutukonekena liakulu. Iye kambile ngwenyi, chipwe ngwe shili yetu ‘muyichila nge,’ iye mayipwisa “yitoma ngwe neve.” Ulombo uze anatongola hano, uli ulombo uchila chinji, uze wakupwa chikalu kuukosa nyi ngwe wasotokela ha chimwe chikuto. Alioze Yehova kanatwehe shindakenyo ngwenyi, nyi ngwe matukonekena iye kechi kewuluka shili yetu nilimwe tangwa.
9 Tutalenu chilweza cha Mwanangana Ndawichi. Iye kalingile utanji, chikwo nawa katumine kushiha mutu. Chipwe chocho, Yehova yamukonekena, kulutwe yamuvuluka ngwo lunga mungunu. (2 Samue. 11:3, 4, 14, 15; 12:13; 1 Mia. 9:4, 5) Muze Yehova apwile ni kunyonga hali Ndawichi, iye kapwile ni kwiwuluka ushishiko wenyi hi tupalia twenyi ko. Chizechene nawa, Yehova kakutukonekena muze twakulikonyeka ni mbunge yeswe. Iye kakutukwasa hanga tununge kumuwayila ni mbunge yitoma. Nyi ngwe mutununga ni kulihisa mumu lia shili yize twalingile, shindakenyo yikwo yika tunawane ha mukanda wa Izaia?
10. Utakamiso uka tunawane ha Izaia 38:17?
10 Tanga Izaia 38:17. Maliji “hiwambila milonga yami kunyima ye,” mahasa nawa kulumbunuka ngwo, “yena hiwachiza shili yami yeswe ku meso je.” Ha versu yino, Yehova kanamusolola ngwe kanakwate shili ya mutu yoze walikonyeka ni kuyimbila kunyima hanga ahone kuyimona chipwe kuyinyonga. Mu Mbimbiliya yimwe, maliji wano kanaalumbununa ngwo: “Yena wapwisa shili yami ngwe kuyakapwileko.” Kashika, muze Yehova akukonekena shili yetu, chakupwa ngwe kutwakalingile shili niyimwe. Chikwo nawa, muze akutukonekena iye keshi kwiwuluka nawa shili yacho, chipwe kutumwesa lamba mumu lia shili yize twalingile. Iye kakujimuna shili yetu liakulu ni kutulakenya ngwenyi: “Chichi kewuluka nawa milonga yenu.” (Iza. 43:25) Chino chili kuyuka chinene. Nyi Yehova Chitunda nawa Sopi munene hanatukonekena shili yize twalingile, chikwo nawa keshi kutumwesa lamba mumu lia shili yacho, ni yetu kutwatambile kulihisa.
Kanda wecha hanga uhenge uze walingile kunyima upihise uwahililo we
11. Chipwe ngwe twalingile shili yeswayo, ha yika twatamba kulihulikila? (Tala nawa chizulie.)
11 Mashimbu eswe mutulihisa mumu lia shili yize twalingile kunyima, twatamba kwiwuluka maliji a zango a Yehova. Muze iye akutukonekena, kakuchilinga ni mbunge yeswe. Yehova keshi kutuvila sonyi mumu lia uhenge uze twalingile kunyima. Chikwo nawa, iye keshi ngwe atu yihenge waze akututulikila toto. (Iza. 57:16) Uhenge uze twalingile kunyima, kuushi ni ulemu kumeso ja Yehova. Alioze, yuma yize tunalingi haliapwila ni yize mutukalinga kulutwe, ye yilemu chinji kuli iye. (Iza. 55:7) Yetu twakuwayila Zambi wa zango, chikwo nawa iye kakutukonekena. Kashika, kanda twecha shili yize twalingile kunyima yipihise uwahililo wetu ni kutuchiza uhashi wa kupwa ni yiwape ya kulutwe lia matangwa.
Yehova keshi kutumwesa lamba mumu lia shili yize twalingile kunyima (Tala paragrafu 11)c
MUZE TWAKUFWISA ATU WAZE TWAZANGA
12. Kuchi mutuhasa kwiva nyi twafwisa mutu yoze twazanga?
12 Kufwisa mutu yoze twazanga chakuneha yikola yinji ku mbunge. Chikwo nawa, chakumbata mashimbu anji mba mutu alive kanawa. Ha mashimbu amwe mutuhasa kulihula ngwetu, ‘Mumu liaka Yehova atayiza hanga mutu yoze nazanga afwe?’ Umwe ndumbu avuluka ngwo Michael, yisemi jenyi kafwile ni kahia. Iye yamba ngwenyi: “Nevile yikola yinji ku mbunge ni kuvila Yehova uli mumu kechele yisemi jami afwe. Ngunanyingika ngwami, hi Yehova ko washihile yisemi jami. Chipwe chocho, iye kakalingile nichimwe hanga aakwase.” Hanji ni yena hiunalivu chocho. Utakamiso uka Yehova akutwaha muze twakunenganyana?
13. Kulita ni Izaia 25:8, yika Yehova anatulakenya?
13 Tanga Izaia 25:8. Yehova kanalakenya ‘kukumba kufwa ku miaka ya mutolo.’ Tunyongenu ha shimbu lize kufwa kuchichi kapwako nawa. Yena kuuchi kanenganyana nawa mumu ngwo mutu yoze wazanga kafwa. (Iza. 35:10) Kuuchi keva nawa yikola ku mbunge mumu kuuchi kamona fuka haze afunjile mutu yoze wazanga. Alioze, mukatwama ni atu waze wazanga, chikwo nawa munukapwa ni mwono upema. Yilakenyo yino hi yilota ko, yili yamwenemwene. Muyikamanunuka mumu yinakatuka kuli Yehova. Chikwo nawa, iye wika mwe mahasa kumanununa yilakenyo yacho.—Uso. 21:4, 5.
14. Kuchi wakwiva muze wakunyonga ha kutalatala cha uhindukilo? (Izaia 26:19) (Tala nawa chizulie.)
14 Tanga Izaia 26:19. Yehova kechi kakumba wika kufwa, alioze makahindwisa nawa afu. Iye kanambe ngwenyi: “Mijimba yo muyikahinduka.” Chino chinasolola ngwo, Yehova kali ni ndundo hali afu. Iye kakununga ni kwewuluka, chikwo nawa makaahindwisa ha shimbu lialita. Yehova makachilinga ngwe chizechene meya akukwasa mitondo hanga yisokoloke. Yehova, Chishina cha akwa-mwono eswe, makahindwisa asoko jetu eswe waze hanafu. Mutukawahilila chinji ha kwatambula cheka.—Tesa ni Marku 5:42.
Chilakenyo cha uhindukilo chili chamwenemwene (Tala paragrafu 14)
15. Kuchi chilakenyo cha uhindukilo chakutukwasa muze twakufwisa atu waze twazanga?
15 Chipwe ngwe kutalatala chize Yehova akutwaha kuchishi kuhwisa yikola yeswe yize twakwiva mumu lia kufwisa asoko jetu, nihindu Yehova kechi kaavulama. Kutalatala chino, chatakamishine Michael yoze twatongolanga kunyima. Iye yamba ngwenyi: “Mukanda wa Izaia 26:19, wangukwasa kunyingika ngwami, Yehova kakuzanga yisemi jami. Iye kanaafungu mu manyonga jenyi, chikwo nawa manunga ni kuchilinga ndo ha shimbu lize makaahindwisa. Chilakenyo chino chakungutakamisa.” Kashika, nyi twanyonga chinji ha shimbu lize mutukapwa cheka ni asoko jetu, chino muchitutakamisa ni kutepulula yikola yize twakwiva.
16. Yisoneko yika muyihasa kukutakamisa ha mashimbu akalu?
16 Twamona jimwe versu ja mu mukanda wa Izaia jize mujihasa kututakamisa muze yuma muyalumuka susumuku, muze mutununga ni kulihisa mumu lia shili yize twalingile kunyima, ni muze mutufwisa atu waze twazanga. Twakusakwilila chinji ha utakamiso uze Yehova akutwaha kupalikila mu Liji lienyi. (Samu 94:19) Shina kuli yimwe yisoneko yize muyihasa kukutakamisa ha mashimbu waze munenganyana? Nyi muchilita, pachikila yimwe yisoneko hanji kuyisoneka ha chihela haze muchipwa chashi kuyimona mashimbu eswe. Chikwo nawa, wana utakamiso ha maliji a Yehova, Tata yetu wa zango.
MWASO 3 Tachi Jetu, Ufulielo Wetu, Ujikijilo Wetu
a Maliji wano kanakatuka ha mwaso unambe ngwo, “Yehova Kali ni Yami.”
b ULUMBUNWISO WA YIZULIE: Lunga ni pwo waze akatuka ku Mbetele, kanaatambwisa ku chikungulwila chize aatuma.
c ULUMBUNWISO WA CHIZULIE: Umwe ndumbu kecha kulihulikila ha shili yize alingile kunyima, haliapwila kanawahilila muze ali ku Shikola ya Mulimo wa Pionelu.