Yehova Kangufumba Chize ku Ukweze Wami

Manenu ngunulumbunwine lusango wami chize ku uputukilo. Nasemukine ha mashimbu a Jita Yinene yamuchaali ya Hashi Heswe mu Calgary, Canadá. Ha miaka 1940, umwe mukweze pionelu avuluka ngwo Donald Fraser, yangongwela ku chikolo chetu, chocho mama yatayiza kulilongesa Mbimbiliya. Mama kazangile chinji umwenemwene wa mu Mbimbiliya. Alioze, mumu lia musongo uze apwile nawo, te keshi kuhasa kuya ha kukunguluka ha mashimbu eswe. Chipwe chocho, iye yamupapachisa ha mwaka 1950. Chaluyinda, iye kafwile muze kwasalile hakehe hanga akumbanyise miaka yaali mu umwenemwene. Tata te hi Chela cha Yehova ko. Alioze, yatayiza hanga mama amulingile pande ja ufwe.

Hakupalika cha matangwa akehe, hanyima lia kufunda mama, umwe kashinakaji yoze wapwile Mukwa-Kristu wa kuwayisa avuluka ngwo Alice, yangusanyika hanga nguye ha kukunguluka. Kangusanyikine mumu napwile kuya ni mama ha kukunguluka, muze te chakupwa chashi kuli mama kuchilinga. Yinguhula tata nyi munguhasa kuya. Iye yatayiza hanga tuye “kamuwika,” hanga tukasakwilile ndumbu yoze wahanjikile pande muze mama afwile. Kukunguluka chacho chapemene chinji. Chapwile kukunguluka chitangu chize tata ayile. Amu alilongesele ku shikola chize mahasa kuhanjika kanawa ha mbunga, iye yakomoka ni yize evile ha kukunguluka. Chocho yakwata chiyulo cha kuya ni kukunguluka ha poso jeswe. Hakehe hakehe, iye yanunga lume ni kukunguluka.

Ha mashimbu jacho, ndumbu yoze wapwile ni kusongwela Shikola ya Milimo ya Zambi, kapwile ni kusanyika majina ja mandumbu waze apwile ni yihanda, mba ayo makumbulula ngwo, “ewa hinguli.” Ha ufuku umwe, nechile hanga atange jina liami ha kukunguluka chize te muchihataho. Chocho ndumbu yanguchichimieka, alioze kakanguhulile nyi te ngunanyingika yize chinalumbunuka kusanyika jina liami ha kukunguluka.

Yami te chanyingikine ngwami, nyi masanyika jina liami ha kukunguluka, chinalumbunuka ngwo munguputuka kuhanjika pande ha Shikola ya Milimo ya Zambi. Yami te ngunazange wika avuluke jina liami. Ha poso yahachileho, yasanyika jina liami, yingukumbulula ngwami, “yami uno.” Hanyima lia kukunguluka, mandumbu yanguchichimieka. Ha kupalika cha jimwe poso, yingutambula chiteli cha kuhanjika pande jize nanulwezanga ku uputukilo wa lusango yono.

Yami nevile woma. Ha mashimbu jacho, pande jize te akulinga kuli alongi a shikola, te jakumbata minutu yisambano hanji nake. Kwakapwile chihanda cha kutanga wika Mbimbiliya. Tata kangukwashile kululieka pande jacho ni kujifunyina ha yisuho 20 shimbu te kanda nguchijihanjika. Hanyima, kalayi wa Shikola ya Milimo ya Zambi, yangukwasa ha kungwaha chiyulo. Ha miaka yinji, Yehova kangufumba kupalikila muli tata, mandumbu a malunga ni a mapwo waze ajama, ni ululikiso wenyi.

YEHOVA KANUNGINE NI KUNGUFUMBA

Alice, yoze natongolanga ku uputukilo, kangufumbile muze naputukile mulimo wa kwambujola. Ha mashimbu jacho, kapwile ni kutukolweza tupwe ni kutangila mwenya zuwo yisoneko yitatu, hanyima mba mutumwaha mukanda. Muze apwile ni kuheta mashimbu jami a kuhanjika, Alice mwe wapwile ni kuputuka lusango, mba mangulweza hanga ngutange chisoneko ni kununga lusango. Hanyima mungutanga chisoneko chamuchaali ni chamuchitatu ni kuhana mukanda. Hachino, yingulilongesa chize munguhasa kuputuka lusango ukawami. Muze tata amupapachishile ha 1954, iye yanunga ni kungufumba ha chize munguhasa kwambujola. Chipwe ngwe tata kapwile ni kungulela ukawenyi, nihindu kasele tachi hanga angukwase kuzanga Yehova. Kukunguluka ni kwambujola, yapwile yikuma yilemu chinji kuli tata. Mashimbu eswe nanyingikine ngwami, mutupwa ha kukunguluka cheswe ni kwambujola ku songo lia poso.

Ha miaka 12 yize napwile ku shikola, nalilongesele yuma yinji yize yinachingukwasa ndo musono. Ngwe chilweza, nalilongesele matemática ni kuhanjika kanawa Inglês. Kulilongesa kuhanjika ni kusoneka kanawa Inglês, chakungukwasa ndo musono, mu mulimo uze nakulinga mu Komite ya Redação.

Kanji-kanji, atu kakunguhula mumu liaka nakuzanga miaso. Muze napwile ni miaka shimbiali, nalilongesele kwimbisa piano. Alioze, longeshi wami te keshi kuwahilila, mumu te kakunyonga ngwenyi chishi kwimbisa kanawa. Kashika, iye yalweza tata hanga ngweche kulilongesayo. Yami chakevwile uli, mumu ha mashimbu jacho te chazangile kulilongesayo.

Hanyima lia tukweji akehe, tata yawana longeshi mukwo. Ha mashimbu jacho, nalilongesele kanawa chize munguhasa kwimbisa piano ni kulilongesa kwimba miaso. Yami napwile ni liji lipema. Kashika, muze napwile ni kwimba ni akwetu, kanji-kanji napwile ni kwakumba. Nyonga liami liapwile kupwa longeshi wa miaso ni kupwa ni mbongo jinakumbana, jize mujingukwasa kupwa pionelu. Muze kwasalile hakehe hanga ngupwe longeshi, yingumona ngwami, te natamba kupalikisa mashimbu anji a kulilongesa hakutwala ku miaso ni kulilulieka hanga ngupalike yeseko ya kwimba miaso. Alioze, nechele kulilongesa, hanga nguputuke mulimo wa upionelu ha mwaka 1963.

MULIMO WA UPIONELU WAKUNEHA CHISEKE

Ha kupalika cha mwaka umuwika chize muze naputukile mulimo wa upionelu, yangutuma ngwe pionelu walipwila ku Kapuskasing, Ontário. Ndumbu yoze napwile ni kukalakala nenyi, Daniel Skinner, kapwile mukulwana chinji kuhiana yami. Iye kangulongesele yuma yinji hakutwala ku chize yuma yakwenda mu chikungulwila. Muze napwile ni miaka 20, kangutongwele hanga ngukalakale mu Komite ya Serviço. Kashika napwile ni yuma yinji ya kulilongesa. Ngunawahilila mumu haliapwila ululikiso unashindakenya cheka ha chikuma cha kufumba akweze. Nyi ayo masa tachi, malingila chinji Yehova chipwe ngwe achili akweze.

Ha mashimbu amwe, chapwile chikalu kutwama ku Kapuskasing. Ha mashimbu a chishika, te kwakukekema chinji ni kuheta ha 44 graus. Ha mashimbu amwe, chivukuminya chapwile ni kuheta ha 33 graus. Yami ni Dan, te twakuya kweswe kuze te akututuma. Chiwape chimwe chize napwile nacho, chapwile kunyingika umwe ndumbu wa pwo yoze te avuluka ngwo Linda Cole. Kulutwe, iye yaputuka kumuvuluka ngwo, Linda Splane.

Linda kapwile ni kuwahilila ha kulianyina yuma ni akwo. Kapwile chimbovu, mukwa-zango, chikwo nawa te kakuzanga kupwa hamuwika ni akwo. Naye Goldie, kapwile umwe ndumbu mukwa-ushishiko. Tato Allen, kapwile ni kulimika ni umwenemwene. Chipwe ngwe Allen kapwile ni kulimika ni umwenemwene, Goldie mashimbu eswe kapwile ni kutwala Linda ni mandumbu jenyi John ni Gordon ku Zuwo lia Wanangana ni kwafumba mu mulimo wa kwambujola. Kwapwile shimbu limwe ayo eswe te akukalakala ngwe mapionelu. Ha kupalika cha yimwe miaka, Allen yatayiza umwenemwene ni kulihana chinji mu milimo ya mu chikungulwila.

Ha 1965, kangusanyikine hanga nguye ku Shikola ya Mulimo wa Wanangana, ku Mbetele ya Canadá hanga angufumbe. Muze te nguli ku shikola yacho, yangusanyika nawa hanga ngusoneke yimwe petisau ya kuya ku shikola ya Ngiliate. Yami te kanda nguchinyonga kama kukalakala ngwe mishionaliu. Chikwo nawa, nanyongene ngwe chichi kuhasa kuchilinga. Alioze, yingusoneka petisau yacho. Kangutayijile hanga ngupwe mu kalasa 42. Ha yisuho yinji, ku Ngiliate te kakutulweza chize tunayi ni kujama. Muze te nguli ku shikola, sango jitangu jize angulwezele, jangutakamishine hanga ngulilongese yuma yinji ya mu ululikiso wa Yehova. Napwile ni miaka 21, kashika chino chapwile chiyulo chipema chize natambwile.

Mulimo umwe twalilongesele ku Ngiliate wapwile chize mutuhasa kuhanjika ku rádio, ku TV ni chize mutusoneka mikanda. Nazangile chinji kulilongesa milimo yacho. Yami chakanyingikine chize yino te muyihasa kungukwasa kulutwe lia matangwa. Manenu ngunulweze.

KANGUTUMINE KU SENEGAL

Ha kupalika cha matangwa akehe muze twahwishile kulilongesa, yami ni Michael Höhle, ndumbu yoze napwile ni kukalakala nenyi mu mulimo wa umishionaliu, te tunayi ku África mu Senegal, kuze atutumine. Ha matangwa jacho, mu chifuchi chacho mwapwile akwa-kwambujola 100.

Hanyima lia kukalakala yimwe miaka mu chiteli chami, yangusanyika hanga ngukalakalile ku mutango kamuwika ha poso. “Mutango” wapwile chimwe chipatulo wika mu zuwo lia mamishionaliu. Chipwe ngwe, mulimo uze napwile ni kulingako kuwakapwile unene chinji, nihindu Emmanuel Paterakis kapwile ni kungwiwulula ngwenyi, chatambile kuvulama ngwo mutango, wakumanyinako ululikiso wa Yehova mu chifuchi chacho. Tangwa limwe, ndumbu Paterakis yangulweza ngwenyi, muchipema kusoneka umwe mukanda wa kutakamisa mamishionaliu. Ha mashimbu jacho, kutwakapwile ni makina a kulinga nawo mikanda, kashika yeswe twapwile kuyisoneka ni moko. Kwapwile milimo yinji ya kulinga mumu twatambile kupwa ni shindakenyo ngwetu, kutwalingile kapalia niumwe.

Muze te ngunalilulieka hanga ngufune ku zuwo lia mamishionaliu kuze te natwama, ha ufuku wacho, ndumbu Paterakis yangwaha umwe mukanda. Iye yangulweza ngwenyi, “David, mandumbu a ku Sociedade, kakusonekena.” Muze nawazulwile hinguwana amwe maliji a mukanda uze nasonekene. Yize yalingiwileko yangulongesele ngwo, natamba kuvumbika ululikiso wa Yehova, chipwe ngwe mulimo uze mutulinga muupwa unene hanji ukehe.

Ha sambata jimwe ufuku, kanji-kanji napwile ni kupalikisa mashimbu anji ku mazuwo ja mandumbu. Mumu lia kulinga chino, yingupwa ni masepa anji mu chikungulwila. Aze kapwile mashimbu apema, kangukwachile chinji ku mbunge. Ndo musono, mutuchinunga ni kuhanjika. Muze nakuya ni kumeneka mitango ya hashi heswe, nakuhanjika Francês yize nalilongesele.

Ha 1968 yingutenda Linda. Ha tukweji anji waze akawileho, nafupile umwe mulimo wa shimbu likehe, uze te muutukwasa kununga kupwa mapionelu mu Senegal. Alioze atu a mu chifuchi chacho, te kakuhana wika milimo kuli enya chifuchi hi kuli tunjize ko. Muze twafunyine mu Canadá te hitunalimbata kulu. Chocho, muze twaheteleko yatwaha chiteli cha kuya ni kukalakala ngwe mapionelu alipwila mu Edmundston, New Brunswick, mu yimwe njiza yikehe mu mbonge ya Quebec.

KUKALAKALA NGWE MAPIONELU MU NEW BRUNSWICK NI QUEBEC

Mu mbonge yacho, kumwakapwile akwa-kwambujola chipwe alongi a Mbimbiliya. Yingeleja ya Katolika te yakusongwela atu ha yuma yinji yize yinatale ku mwono wo. Mazuwo anji kapwile ni chilayi chize te chakwamba ngwo, kutushi kutayiza Yela ja Yehova. Ha mashimbu jacho, nyonga lia kuvumbika chilayi chacho, kuliakapwile ni kukola woma ngwe musono. Kashika yetu te twakuya ni kwambujola ku zuwo ni zuwo chipwe ngwe kuli yilayi hanji ka. Ha poso jeswe, atu amwe a mu yingeleja ya Katolika kapwile ni kusa ha jornal maliji wano ngwo: “Tuyenu tukalimike ni Yela ja Yehova.” Amu kwapwile Yela ja Yehova awana wika mu Edmundston twanyingikine ngwetu, yetu lume anambila.

Chichi keza kavulama kumeneka chitangu cha kalayi wa mbonge. Hanyima lia kupalikisa jimwe poso ni yetu, iye yamba ngwenyi: “Chuma chize munuhasa kulinga muze nuli kuno, chili kukwasa atu hanga alumune yize akunyonga hakutwala kuli Yela ja Yehova.” Yetu yitukaula chiyulo chino. Hakehe-hakehe, atu yaputuka kumona ngwo, Yela ja Yehova kali akwa-kulikehesa kuhiana miata a mu yingeleja ya Katolika. Haliapwila, mu mbonge yacho muli chikungulwila chimuwika.

Hanyima lia kupalikisa mwaka umuwika mu chiteli chacho, yatusanyika hanga tuye ni kukwasa chimwe chikungulwila chize chapwile mu mbonge ya Quebec. Twapalikishile tukweji asambano ni mandumbu jetu a malunga ni a mapwo waze atutambwile kanawa, shimbu te kanda tuchiputuka mulimo wetu wa kumeneka yikungulwila.

Twalingile miaka 14 mu mulimo wa kumeneka yikungulwila mu Quebec. Mashimbu jacho, kapwile apema chinji. Mulimo wa kwambujola mu Quebec wapwile upema chinji. Mu yikungulwila yize twapwile ni kumeneka, te twakumona chize asoko apwile ni kulilongesa Mbimbiliya, kujama ni kuhana mwono wo hanga aapapachise.

TWAKWIWULUKA MANDUMBU JETU ASHISHIKA

Chapwile chashi kuzanga mandumbu jetu a mu Canadá. Ayo kakuhanjika umwenemwene, kakusehejela ni kuwahilila. Ha yisuho yimwe, kuchakapwile chashi kuli ayo kutayiza umwenemwene, mumu asoko jo kapwile ni kulimika no. Yisemi amwe, kapwile ni kulweza ana jo waze apwile Yela ja Yehova ngwo: “Echenu kulilongesa Mbimbiliya, nyi ka mutunuhuma ku zuwo.” Alioze, ayo kapwile ni kushishika kuli Yehova, chipwe ngwe kapwile ni kulimika no. Yehova kakuwahilila ha yuma yize ayo alingile.

Chikwo nawa, ngunazange kuhanjika hali mapionelu alipwila ni a shimbu lieswe ashishika, waze apwile ni kukalakala mu Quebec. Anji a kuli ayo, kakatukile mu Canadá. Ayo kakalilongesele wika limi lia Francês, alioze kalilongesele nawa hakutwala ku mianda ya mu chifuchi ni mutapu wa kunyonga cha atu waze apwile ni kukaula yize akwa-katolika apwile ni kulinga.

Mapionelu kanji-kanji kapwile ni kwatuma ku yihela kuze kukwakapwile akwa-kwambujola. Amu atu jacho kakapwile ni kuzanga Yela ja Yehova, chapwile chikalu kuwana chihela cha kutwama ni mulimo wa shimbu likehe. Chipwe Akwa-Kristu waze alimbata, kapwile ni kutwama mu yizavu ya mandumbu akwo. Amwe kapwile ni kutwama asambano hanji nake, hanga ahase kufweta lukeza. Ayo te keshi kuhasa kufweta lukeza ukawo. Mapionelu jacho kapwile yikilikita. Muze apwile ni kusongwela longeso lia Mbimbiliya, ayo kapwile ni kulinga yeswe yize mahasa hanga akwase alongi. Ha mashimbu wano, ku Quebec kafupile nawa ukwaso wa akwa-kwambujola. Anji a kuli mapionelu jacho alipwila, hanayi ku yihela yikwo kuze anafupu ukwaso unji.

Muze twaputukile mulimo wa kumeneka yikungulwila, kanji-kanji twapwile ni kukalakala ni akweze ha Sambata chimene. Chino chatukwashile kunyingika kapinda yoze ayo te anapalika. Akweze anji waze twapwile ni kukalakala no, musono kali mamishionaliu, akwo kali ni yiteli yikwo mu ululikiso wa Yehova.

Ha mashimbu amwe, mu yikungulwila yimwe te keshi kutwaha mbongo ja kulinga najo wenyi. Kashika, ha yisuho yimwe te kutushi kupwa ni mbongo ku songo lia kakweji. Ha mashimbu jacho, twapwile wika ni kujikijila muli Yehova ni mbunge yeswe, mumu iye mwe wanyingikine yuma yize te tunapalika. Iye te kakutukwasa mashimbu eswe. Chipwe ngwe kuchakapwile chashi, nihindu te twakukatuka mu chikungulwila chimwe ni kuya ni kumeneka chikwo.

YIZE NALILONGESELE KULI MANDUMBU ASHISHIKA

Ngwe chize nalumbununanga, nayukile chinji ha fumbo lize natambwile ku Ngiliate. Ha mashimbu waze twapwile ku Quebec, twapwile ni uhashi wa kuhana uchela ku rádio, ku TV ni kusoneka mikanda. Ha yisuho yinji, napwile ni kukalakala hamuwika ni Léonce Crépeault yoze neye wapwile kalayi wa mbonge. Iye kapwile ni utotombo wa kuhanjika ni akwa-televizau. Muze apwile ni kuhanjika ni mukulwana wa akwa-televizau, iye te keshi kulisolola ngwo kananyingika kanawa mulimo wacho. Kapwile wika ni kwamba ngwenyi: “Yami ni mukwetu tuli wika akwa-kwambujola. Twanyingikine yuma yinji ya chize mutuhasa kuhanjika ku televizau hanji ku rádio. Alioze, katutuma tulweze atu hanga anyingike hakutwala ku kukunguluka chinene cha mambonge cha Yela ja Yehova, chize mutupwa nacho. Mutusakwilila chinji ha ukwaso weswawo munutwaha.” Mumu lia kulikehesa chenyi, atu anji waze akalakala ku televizau yazanga kutukwasa.

Hanyima, mutango yiungwaha chiteli cha kukalakala ni ndumbu Glen How, umwe wa kuli ngaji jetu, yoze te akwa-televizau mazanga kunyingika. Nayukile chinji ha fumbo lize natambwile ku Ngiliate ni yize nalilongesele ha kukalakala hamuwika ni Léonce. Chapwile kuyuka chinene kukalakala ni ndumbu How. Iye kapwile ni kulinga kanawa mulimo wenyi chakuhona kwiva woma. Alioze, kapwile nawa mutu wa Zambi. Kapwile ni kuzanga chinji Yehova.

Ha 1985, yatwaha chiteli cha kumeneka yikungulwila hakamwihi ni kuze kwapwile zuwo lia tata, ku chitokelo cha Canadá, hanga tuhase kumufunga. Alioze iye kafwile ha kupalika cha tukweji atatu. Twanungine mu mulimo wa kumeneka yikungulwila mu Canadá ndo ha 1989, muze susumuku atusanyikine hanga tupwe mu usoko wa Mbetele ya mu Estados Unidos. Chino chalumbunukine ngwo, te mutwecha mulimo wa kumeneka yikungulwila, uze te hitwalinga ha miaka 19. Ha miaka yacho, twatwamine mu mazuwo eka ni eka, twalile kulia cheka ni cheka ni kupwa hamwe ni mandumbu a malunga ni a mapwo waze atutambwile kanawa. Tunasakwila chinji kuli mandumbu waze atutambwile kanawa ku mazuwo jo, ni kulianyina kulia cho hamwe ni yetu.

YITWALUKILA KU ESTADOS UNIDOS

Muze twahetele mu Brooklyn, yangwaha chiteli cha kukalakala mu chipatulo cha Serviço. Nakusakwilila chinji ha fumbo lize anguhele mu chipatulo chacho. Chuma chimwe chize nalilongesele chili ngwo, natamba kwehuka kunyonga ngwami, ngunanyingika chimwe chuma shimbu kanda nguchipwa ni sango jeswe. Ha 1998, yangutongola hanga ngukalakale mu chipatulo cha akwa-kusoneka, kuze munguchinunga ni kulilongesa kanawa. Ha miaka yinji napwile ni chiwape cha kukalakala ni ndumbu John Barr, yoze wapwile kasongo wa Komite ya Redação. Mashimbu eswe, mungulemesa fumbo lize natambwile ni mashimbu waze napwile nenyi. Pundu lume, iye kapwile ni kwimbulula kanawa Yesu Kristu.

Chili chiwape chinene kukalakala ni mandumbu jetu a malunga ni a mapwo alikehesa, waze akukalakala mu chipatulo cha akwa-kusoneka. Ayo mashimbu eswe kakwita ukwaso wa Yehova mu chiteli cho nawa kananyingika ngwo, yuma yeswe akulinga, kakuhasa kuyilinga mumu lia ukwaso wa spiritu ya Yehova hi mumu lia utotombo wo ko.

Chili chiwape chinene kuli yami ni Linda, kumeneka mandumbu ashishika a mu yifuchi 110. Twamwene zango lize atusolwelele kuli mamishionaliu, kuli mandumbu a mu Komite ya Mutango, ni kuli mandumbu akwo ashishika a mu mulimo wa shimbu lieswe. Chikwo nawa, twapwile ni kumona zango ni ushishiko uze akwa-kwambujola a mu yifuchi yacho apwile ni kusolola kuli Yehova, chipwe ngwe kapwile ha mashimbu a jita, kapinda wa mbongo, mu yihungumiona ni yipikalo yikwo nawa. Yehova kakwazanga chinji!

Ha miaka yeswe ayi, Linda kakungukwasa kumanununa kanawa yiteli yami. Iye kakuzanga atu, chikwo nawa mashimbu eswe kakufupa jila ya kwakwashilamo. Chakupwa chashi kuli iye kuhanjika ni atu mu mulimo wa kwambujola. Iye kakwasa atu anji kunyingika Yehova, ni kukwasa nawa atu waze te haneche kuwayila Yehova hanga afune. Iye kali chawana chami cha kuli Yehova. Muze tunayi ni kushinakaja, yami ni Linda twakusakwilila chinji ha ukwaso uze mandumbu jetu a malunga ni a mapwo akutwaha muze tunalingi umwe wenyi ni muze tunafupu yuma yikwo.—Marku 10:29, 30.

Muze nakumona yuma yize nalinga ha miaka makumi nake, nakusakwilila. Nakutayiza maliji a mukwa-kusoneka Samu yoze wambile ngwenyi: “Yena Zambi wangulongesele chize ku wanuke wami; mba kushi nambujolele yitanga ye ya kukomwesa.” (Samu 71:17) Ngunazange kununga ni kulinga chino, ndo haze mwono wami muusulila.