Wahilila Chipwe Muze Makuhungumiona

1. Yika Yesu ambile, mba mumu liaka muyihasa kutukomwesa?

HA LONGESO lia ha Mulundu, Yesu kambile ngwenyi: “Nwawaha yenu muze atu manwivwila kole.” (Luka 6:22) Maliji wano, kota kakomwesene atu waze apwile ni kumupanjika. Mumu liaka? Mumu niumwe wakuzanga hanga amuvwile kole wakuhi. Mba mumu liaka Yesu ambile maliji wano? Chino chili chihula chipema, mumu ha matangwa jetu, kuli atu anji waze keshi kuzanga tumbaji twa Yesu. Ha mutwe uno, mutumona mumu liaka atu amwe keshi kutuzanga, ni mumu liaka mutuhasa kuwahilila chipwe muze matuvwila kole.

MUMU LIAKA ATU AMWE KESHI KUTUZANGA?

2-3. Mumu liaka Akwa-Kristu amwenemwene akwahungumiona? (Yoano 16:2, 3)

² Amwe keshi kutuzanga mumu twakuwayila Yehova. Hakutwala kuli atu waze akuhungumiona hanji kushiha tumbaji twenyi, Yesu kambile ngwenyi: “Kanyingikine Tata, chipwe yami kangunyingikine.” (Tanga Yoano 16:2, 3.) Iya wakutwala atu, hanga evwile kole atu ja Zambi? Satana. Iye mwe “zambi ya mwakono.” (2 Kori. 4:3, 4) Iye kakukwika atu kulilongesa hakutwala kuli Yehova, ni kwatwala hanga alimike ni waze ananyingika Zambi, ni kumuzanga. (Yoa. 8:42-44) Kunyingika chino, chakukwata ha chize twakumona akwa-kole jetu. Yetu kutushi kwavwila kole, mumu tunanyingika ngwetu, Satana mwe wakwonga atu jacho.

³ Tutalenu chilweza cha Pavel,a yoze watwama mu chifuchi chize mulimo wetu uli wakukanjisa. Mumu lia kununga ni kuwayila Yehova ni ushishiko, yamusa mu zuwo lia ususu, kapwile ni kumulamba chinji, yamuhandununa ni funge akwo, ni kumusa mu chimwe chipatulo cha ukawenyi ha amwe tukweji. Pavel yamba ngwenyi: “Haliapwila hinamona ngwami, Satana ni andemoniu jenyi e akutukwika kuwayila Yehova. Chinasoloka ngwe, atu anji waze akukalakala mu zuwo lia ususu keshi kutuvwila kole, ayo kakulinga wika yize akwatuma.” Umwe ndumbu mu Croácia, yoze amwesene lamba linji kuli yisemi jenyi mumu lia kuwayila Yehova, yamba ngwenyi: “Yami te nakumona ngwami mukwa-kole wami Satana hi yisemi jami ko.”—Efwe. 6:12.

4. Yika mutuhasa kulilongesa ha chilweza cha Yesu ni cha kambaji Eshetevau? (Tala nawa chizulie.)

⁴ Yetu kutushi kuvwila kole waze akulimika ni yetu. Kwamba umwenemwene, mutuhasa kwalembela. (Mateu 5:44) Ha chikuma chino, chilweza cha Yesu ni kambaji kenyi Eshetevau muchihasa kutukwasa. Muze Yesu apwile ha mutondo wa lamba, iye yalemba ngwenyi: “Tata, akonekene.” (Luka 23:34) Yesu kechile kuli Yehova hanga akonekene maswalale waze atumine hanga amushihe. Iye kota kanyongene ha mbunga ya atu waze apwile ni kukololoka hanga amushihe mumu kapwile ni kwasongwela kuli akwa-kole jenyi. Yesu kanyingikine ngwenyi, atu wano kanyingikine yize analingi. Kambaji Eshetevau, neye kechile kuli Zambi hanga akonekene akwa-kole jenyi waze azangile kumushiha. (Yili. 7:58-60) Shina Yehova kakumbulwile yilemba ya Yesu ni ya Eshetevau? Ewa. Ha kupalika cha amwe mashimbu, atu anji waze azangile kushiha Yesu, yalikonyeka ni kulihana hanga aapapachise. (Yili. 2:36-41) Saulu yoze wakwashile atu waze ashihile Eshetevau, kulutwe yapwa Mukwa-Kristu, yalikonyeka ku yuma yize alingile.—1 Timo. 1:13.

5. Yika walilongesa ha chilweza cha César?

⁵ Muze twakulembela atu waze akulimika ni yetu, Yehova kakutupanjika. Tutalenu chilweza cha César, yoze watwama mu Venezuela. Tato kapwile ni kulimika chinji ni umwenemwene. César yamba ngwenyi: “Mama kapwile chisemi nawa pwo mupema. Chipwe ngwe iye te kakusa Wanangana wa Zambi ha chihela chitangu, nihindu iye te keshi kuhichika tata. Yami ni ana-kwetu katulongesele kuli mama tupwe ni kuvumbika tata. Iye katulongesele nawa tupwe ni kumwononokena nyi yuma yize anatulweze kuyalimikine ni upale wa Zambi.” Ha kupalika cha yimwe miaka, tato ya César yaputuka kwalumuna yitanga yenyi. César yamba nawa ngwenyi: “Tangwa limwe, muze nalembele ni mbunge yeswe, nahulile tata nyi te munguhasa kulilongesa nenyi Mbimbiliya. Muze atayijile yami nevwile kuwaha chinji.” Ha kupalika cha mashimbu, tato ya César yamupapachisa. Atu amwe kakuhasa kwalumuna mwono wo mumu lia yitanga yetu yipema ni vumbi lize twakwasolwela. Muze chino chakulingiwa, twakuwahilila chinji. Alioze hi atu eswe ko waze akulimika ni yetu akwalumuna mwono wo. Kashika, tunashimbwila hanga tumone chize Yehova Zambi mukwa-keke, nawa “ngaji wa hashi heswe” makwasa atu hanga alilongese hakutwala kuli iye.—Uputu. 18:25.

6. Kulita ni Marku 13:13, mumu liaka atu amwe akutuvwila kole?

⁶ Amwe kakutuvwila kole mumu twakuvumbika Yesu. Yesu kambile ngwenyi, Akwa-Kristu amwenemwene ‘kumakaevwila kole kuli atu eswe mumu lia jina lienyi.’ (Tanga Marku 13:13.) Yika jina lia Yesu linasolola? Linasolola yitanga yenyi yipema ni ulite uze ali nawo wa kupwa Mwanangana mu Wanangana wa Zambi. Chikwo nawa, kakutuvwila kole kuli atu waze akujikijila manguvula a hano hashi, shimbu ajikijile muli Yesu Kristu, yoze Zambi asakwile. Yesu kaputukile kuyula ngwe Mwanangana wa mu Wanangana wa Zambi chize ha 1914. Kwasala hakehe, Yesu manongesa manguvulu eswe waze akulimika ni chiyulo chenyi.

7-8. Chitela chikwo chika chakutwala atu atuvwile kole? (Yoano 15:18-20) (Tala nawa yizulie.)

⁷ Atu amwe kakutuvwila kole mumu twakulituna kulinga yuma ya mu chifuchi chino cha Satana. Yesu kambile ngwenyi, tumbaji twenyi te maavwila kole mumu hi “akwa-hashi ko.” (Tanga Yoano 15:18-20.) Chizechene ngwe Akwa-Kristu a ku sekulu yitangu, ni yetu twakulituna yitanga yipi ya atu a mu chifuchi chino, ni kwehuka kuhanjika ngwe chize ayo akuhanjika. Mumu lia chino, mandumbu jetu anji kakwahungumiona ku mulimo ni ku shikola. (1 Petu. 4:3, 4) Twakuwahilila chinji muze amwe waze akulimika ni yetu akwalumuna manyonga jo ni kuputuka kutuvumbika.

⁸ Tutalenu chilweza cha Ignacio, yoze watwama ku América Central. Ku shikola kuze te akulilongesela, kwapwile umwe longeshi yoze te wakumuseha mumu lia kukaula shimbi ja Zambi. Alioze, muze te kanda achihwisa kulilongesa, longeshi yamuhula, kuchi iye akuhasa kukaula shimbi ja Zambi chipwe ngwe atu anji kakapwile ni kumuvumbika. Iye kalumbunwine ngwo, kakufuliela ngwenyi, shimbi ja Zambi jakumufunga. Chocho, yasanyika longeshi yenyi hanga aye ha kukunguluka. Muze longeshi yenyi ayile ha kukunguluka, Ignacio kakomokene chinji. Longeshi yenyi yakomoka ha zango lize amwene hakachi ka mandumbu. Kukatuka haze, iye yanunga kukunguluka. Muze longeshi yenyi aputukile kulilongesa Mbimbiliya, ha kupalika cha mashimbu, neye yaputuka kumuhungumiona. Alioze, usepa wenyi ni Yehova wanungine ni kukola, chocho yamupapachisa.

9-10. (a) Mumu liaka Akwa-Kristu alisa ni atu a mu chifuchi chino cha Satana? (b) Yika mutuhasa kulilongesa ha chilweza cha postolo Paulu?

⁹ Yetu twalisa ni atu a mu chifuchi chino cha Satana, mumu kutushi kulinjisa mu yuma ya mafwefwe chipwe mu jita. (Yoa. 18:36) Kulita ni chiyulo chize twakuwana ha mukanda wa A-Roma 13:1, twakusa tachi hanga tukaule shimbi ja mu chifuchi. Alioze ngwe Akwa-Kristu, kutushi kulinga chihanda mu yuma ya mafwefwe, kutushi kusakula akwa-mafwefwe waze matuyula, chipwe kulihana hanga atusakule ngwe akwa-kuyula. Mumu liaka? Mumu chuma chilemu kuli yetu, chili kushishika kuli Yehova ni ku Wanangana wenyi uze anayulu kuli Kristu. Yela ja Yehova anji, kali mu mazuwo a ususu mumu lia ufulielo wo. Chipwe chocho, mandumbu wano kananungu ni kwambujola. Ayo kakwimbulula chilweza cha postolo Paulu, yoze wapwile mu zuwo lia ususu ha miaka yinji. (Yili. 24:27; 28:16, 30) Iye kapwile ni kulianyina sango jipema ni waze eswe apwile ni kumupanjika, kuchingako tufunga a mu mazuwo a ususu, yilolo a mu chota, manguvulu, mianangana hanji kuli yilolo a mwanangana Ka-Roma avuluka ngwo Neru.—Yili. 9:15.

¹⁰ Chizechene nawa, mandumbu jetu waze akusa mu mazuwo a ususu, kakwambujola kuli eswe waze akwapanjika, kuchingako ngaji, yilolo a nguvulu, ni tuselo a mazuwo a ususu. Umwe ndumbu, kamusele mu zuwo lia ususu ha miaka kuhiana yisambano, mumu lia kulituna yuma ya mafwefwe. Muze apwile mu zuwo lia ususu, iye te keshi kumona mashimbu jacho ngwe akumumwesa lamba. Alioze kaamwene ngwe chimwe chiteli chize Yehova amuhele, hanga awane atu a mbunge yipema. Twakuwahilila chinji muze Yehova akutwaha chiwape cha kwambulwile atu wano. (Kolo. 4:3) Tutalenu yikuma yikwo ya mumu liaka twatamba kuwahilila, chipwe muze amwe matuvwila kole mumu lia kuwayila Yehova.

MUTUHASA KUWAHILILA CHIPWE MUZE MATUVWILA KOLE

11. Kuchi kupalika mu yihungumiona muchihasa kukolesa ufulielo wetu? Hana chilweza.

¹¹ Tunanyingika ngwetu kutuhungumiona chakumanununa uprofeto wa mu Mbimbiliya. Ha uprofeto utangu wa mu Mbimbiliya, Yehova kambile ngwenyi, Satana ni atu waze ali ku sali lienyi makavwila kole atu waze akuzanga Yehova ni kumuwayila. (Uputu. 3:15) Ha yisuho yinji, Yesu kambile ngwenyi, waze mawayila Yehova makaahungumiona. (Mateu 10:22; Marku 13:9-12; Luka 6:22, 23; Yoa. 15:20) Atu waze asonekene Mbimbiliya no kahanjikile ha chikuma chino. (2 Timo. 3:12; Tia. 1:2; 1 Petu. 4:12-14; Yunda. 3, 17-19) Kashika, kutushi kukomoka muze akutuhungumiona. Shimbu tuchilinge, twakuwahilila ha kumona uprofeto wa mu Mbimbiliya unamanunuka. Chino chakutwaha shindakenyo ngwetu, tunawayila Zambi wamwenemwene. Umwe ndumbu wa pwo yoze watwama mu chifuchi muze mulimo wetu uli wa kukanjisa, yamba ngwenyi: “Muze nalihanyine kuli Yehova, nanyingikine ngwami mungupalika mu yihungumiona. Kashika, chishi kwivwa woma hanji kukomoka muze nakupalika mu yihungumiona.” Mukwo lunga neye kapwile hakachi ka waze te akumuhungumiona. Iye kapwile ni kumulamba, kochele Mbimbiliya yenyi ni mikanda yenyi ya Mbimbiliya. Shimbu evwe woma, ndumbwetu yakolesa ufulielo wenyi. (Hepre. 10:39) Iye yamba nawa ngwenyi: “Yihungumiona kayiprofetezele mu Mbimbiliya, kashika te ngunanyingika ngwami muyilingiwa lume. Kupalika mu yihungumiona changuhele shindakenyo ngwo, au uli uwayilo wamwenemwene.”

12. Yika yakwashile umwe ndumbu kunyongonona mu yihungumiona?

¹² Chipwe ngwe tunashimbwila ngwetu matuhungumiona, nihindu muchihasa kupwa chikalu kunyongonona. Ndumbwetu umwe yoze wapwile mu zuwo lia ususu yamba ngwenyi: “Mashimbu amwe napwile ni kusakalala chinji ni kulila.” Yika yakwashile ndumbu yono kunyongonona? Yamba ngwenyi: “Yami napwile ni kulemba mashimbu eswe. Hita chimene napwile ni kulemba, ni muze te kwakusoloka kapinda. Muze atu amwe apwile ni kungulinga yuma yipi ni kunguvwisa uli, yami napwile ni kuliajilila mu chimwe chipatulo cha kusanyina hanga ngulembe.” Ndumbwetu kanyongene nawa ha yilweza ya atu waze anyongonwene mu yihungumiona ya ku mashimbu a kunyima ni ya musono. Chino chamukwashile kunyongonona mu yihungumiona ni kupwa ni sambukila yize Yesu alakenyene kuli tumbaji twenyi.—Yoa. 14:27; 16:33.

13. Yika muyihasa kutukwasa kukumba kole?

¹³ Kuzanga Yehova ni mandumbu jetu chakutukwasa kunyongonona. Yesu kanungine ni kuzanga Tato ni mbunge yeswe ndo haze afwile. Iye kapwile nawa ni kuzanga masepa jenyi. (Yoa. 13:1; 15:13) Nyi twazanga Yehova ni mandumbu jetu, chino muchitukwasa kukumba kole. Kuchi mutuhasa kuchilinga? Tuwanenu kumbululo ha chilweza cha postolo Paulu.

14. Yika yakwashile Paulu kununga ni kushishika kuli Yehova chipwe ngwe kanyingikine ngwenyi mahasa kumushiha?

¹⁴ Ha shimbu likehe muze Paulu te kanda achimushiha, iye yasonekena sepa lienyi Timoteu ngwenyi: “Zambi kakatuhele spiritu ya mwongo, alioze ya ndundo, ya zango.” (2 Timo. 1:7) Yika Paulu azangile kwamba? Iye kazangile kwamba ngwenyi, nyi Mukwa-Kristu mapwa ni zango likolo hali Yehova, iye mahasa kukumba yihungumiona. (2 Timo. 1:8) Chipwe ngwe Paulu kanyingikine ngwenyi mahasa kumushiha mumu lia kuwayila Yehova, nihindu zango lienyi hali Yehova liamukwashile kupwa ni hamu ni kununga ni kushishika kuli iye.—Yili. 20:22-24.

15. Kuchi mandumbu jetu akusolola zango liamwenemwene kuli umwe ni mukwo musono? (Tala nawa chizulie.)

¹⁵ Mandumbu jetu anji kakunyongonona mu yihungumiona, kashika twakwazanga chinji. Amwe kakusa mwono wo mu ponde hanga akwase mandumbu jo, ngwe chize alingile Akwila ni Prisila muze asele mwono wo mu ponde hanga akwase Paulu. (Roma 16:3, 4) Ngwe chilweza, mu Rússia, mandumbu anji kakuya ku chota cha usopelo hanga atakamise mandumbu waze akusa mu zuwo lia ususu. Muze umwe ndumbu yoze asele mu zuwo lia ususu, amwene mandumbu anji a malunga ni a mapwo, kali ku chota cha usopelo, chino yichimukwata chinji ku mbunge. Ha shimbu liacho, iye kakahashile kuhanjika. Zango lize mandumbu amusolwelele liamutakamishine chinji. Ewa, mutuhasa kuwahilila chinji ha kupwa ni zango lize liahiana kole.

16. Mumu liaka postolo Petulu ambile ngwenyi waze akwahungumiona mahasa kuwahilila? (1 Petulu 4:14)

¹⁶ Tunanyingika ngwetu, Zambi kakuwahilila muze twakunyongonona ha mashimbu waze anatuvwila kole. (Tanga 1 Petulu 4:14.) Postolo Petulu kambile ngwenyi, waze akunyongonona mumu lia kuwayila Zambi, kali ni chitela cha kuwahilila. Mumu liaka? Mumu yihungumiona yakusolola ngwo spiritu ya Zambi yili hamwe ni yetu. Petulu kanyingikine chize mutu mahasa kulivwa mumu lia kupwa ni utayizo wa Zambi, ni kunyongonona mu yihungumiona. Hanyima lia Pentekoste 33 M.J, ha kupalika cha mashimbu akehe wika, miata a mu tembele ya A-Yunda katumine kusa Petulu ni apostolo akwo mu zuwo lia ususu mumu lia kwambujola. Alioze Petulu yakalila ufulielo wenyi ni hamu. (Yili. 5:24-29) Chipwe muze Petulu ni apostolo akwo aakolesele sonyi, o kakechele kwambujola. Shimbu achilinge, ayo ‘yawahilila ha kwasaula mumu lia jina lia Yesu.’ Ni yetu mutuhasa kuwahilila muze mutunyongonona mu yipikalo.—Yili. 5:40-42.

17. Yika Yesu alwezele tumbaji twenyi ha ufuku shimbu te kanda achifwa?

¹⁷ Shimbu Yesu te kanda achifwa, ha ufuku iye kalwezele tumbaji twenyi ngwenyi: “Yoze wakunguzanga, makamuzanga kuli Tata, ni yami mungukamuzanga.” (Yoa. 14:21) Muchikapema chinji muze atu kechi katuvwila nawa kole, alioze makatuzanga mumu lia kuwayila Yehova. (2 Tesa. 1:6-8) Ha mashimbu wano, tunungenu ni kwiuluka mumu liaka twatamba kuwahilila muze matuvwila kole.