Pwako Mukwa-Hamu ni Kushishika Ngwe Benaia

Benaia kapwile swalele wa hamu yoze wapwile ni kukalakalila Mwanangana Ndawichi, hanyima yakalakalila nawa Mwanangana Solomone. Chipwe ngwe Benaia kapwile mwana wa sasendote, nawa ana ja asasendote te keshi kwasa jita, nihindu Benaia yasolola hamu ha kuchilinga. Ngwe chilweza, iye kashihile ndumba mu limwe shima lia meya, yashiha nawa umwe swalale chitakame. Ndawichi te kakujikijila chinji Benaia, kashika amusele ngwe mwata hakachi ka tufunga eswe a ku zuwo lienyi.—2 Samue. 23:20-23.

Benaia kanungine ni kushishika kuli Ndawichi chipwe muze ana jenyi aali Absalome ni Adonija, alimikine nenyi. (2 Samue. 8:18; 15:18; 1 Mia. 1:8) Muze Ndawichi apwile kashinakaji, Benaia nihindu yanunga ni kukwasa Mwanangana mwaha Solomone. (1 Mia. 1:32-40) Pundu lume, Benaia te kakushishika kuli Yehova ni kuli mianangana waze Yehova te akusakula hanga ayule atu jenyi chipwe ngwe akwo te keshi kusolola ushishiko.

Ni yetu twatamba kupwa ni hamu hanga tuhase kwasa jita ni mukwa-kole wetu wa ndundo Satana, ni waze eswe akumukwasa. Twatamba nawa kununga ni kutwama kulita ni shimbi ja Yehova. (Efwe. 6:11; 1 Petu. 5:8, 9) Chipwe ngwe amwe kakusakula kuhichika Yehova, nihindu yetu twakununga ni kushishika kuli iye ni kujikijila ngwetu iye matuwahisa.—2 Samue. 22:26.