Manaene—Kasele Mulimo wa Yehova ha Chihela Chitangu ku Mwono Wenyi

Manaene, kapwile hakachi ka mandumbu waze apwile ni kusongwela chikungulwila cha Andiakia, ku sekulu yitangu. Iye ‘kalilongesele hamwe ni nguvulu Heronde.’ (Yili. 13:1) Kashika, Manaene kapwile ni yinyingi hanji ngwetu kapwile wa kufumba kanawa, chikwo nawa, kota kakolelele mu usoko uze wapwile ni upite.

Chipwe ngwe kapwile ni mwono upema, nihindu Manaene yasakula kuhana mwono wenyi hanga alingile Yehova ni kukwasa chikungulwila. Iye kakechele hanga yinyingi yize apwile nayo hanji uhashi wa kunyingika atu a lufuma, yipwe ha chihela chitangu ku mwono wenyi. Shimbu achilinge, iye yasakula kulingila mandumbu jenyi.

Chilweza cha Manaene, chinasolola ngwo, kuwayila Yehova chili chuma chilemu chinji kuhiana kufupa kupwa ni lufuma hanji mbongo. Chizechene ngwe Manaene, ni yetu twatamba kusa mulimo wa Yehova ha chihela chitangu ku mwono wetu, shimbu tufupe kupwa pichi hanji kupwa ni lufuma mu chifuchi chino. (Mateu 6:33) Chikwo nawa, chipwe ngwe twakulemesa fumbo hanji ngwetu kulilongesa, nihindu twatamba ‘kusa shindakenyo ha yuma yahiana ulemu,’ ni kusa nawa shindakenyo ngwetu yuma ya ku musunya, kuyichi kutukwika kulingila Yehova.—Fwili. 1:9, 10.