Kanda Ushimbula Kutambula Upapachiso

1. Yiwape yika muzuka nyi mulihana kuli Yehova ni kukupapachisa?

SHINA wakuzanga Yehova yoze wakuhele yuma yeswe yipema hamwe ni mwono? Wakuzanga kusolola zango lie hali iye? Jila yimwe ya kuchilingila, yili kuhana mwono we kuli iye ni kukupapachisa. Nyi wachilinga, muupwa mu usoko wenyi. Hachino, muupwa wambala wa Yehova; iye mapwa Tatenu kanda Sepa lie, nawa makusongwela ni kukufunga. (Samu 73:24; Iza. 43:1, 2) Muupwa ni kutalatala cha mwono wa mutolo.—1 Petu. 3:21.

2. Yika mutumona ha mutwe uno?

² Shina kuli yimwe yize yinakukwika kukupapachisa? Nyi chenacho, kuushi ukawe. Atu anji katambile kwalumuna mutapu wo wa kunyonga ni wa kulingilamo yuma hanga apwe ni yitanga yize muyaatwala ndo ku upapachiso. Haliapwila, o kakuwayila Yehova ni zango ni chiseke. Yino nawa ye yalingiwile kuli amwe waze apapachishile ha mashimbu ja apostolo. Mutumona yipikalo yize o apalikile, chize ayikumbile ni yize mutuhasa kulilongesa ha chilweza cho.

A-SAMARIA KALIHANYINE KULI YEHOVA NI KWAPAPACHISA

3. Yikwiko yika A-Samaria amwe atambile kukumba mba aapapachise?

³ Ha mashimbu ja Yesu, A-Samaria kapwile chimwe chizavu cha akwa-kufuliela, waze te atwama ku norte ya Yundeya, hakamwihi ni mbonge ya Shekeme ni Samaria. Shimbu te kanda achaapapachisa, ayo katambile kupwa ni chinyingi chamwenemwene cha Liji lia Zambi. A-Samaria te kakutayiza ngwo, mikanda yitangu yitano, kukatuka ku Uputukilo ndo ha Shimbi Yamuchiali, ye wika ahwimine kuli Zambi, kota kuchingako ni mukanda wa Yoshua. A-Samaria kapwile ni kushimbwila kwiza cha Mesaya, kulita ni chilakenyo chili ha Shimbi Yamuchiali 18:18, 19. (Yoa. 4:25) Nihindu mba aapapachise, o te katamba kutayiza ngwo, Yesu kapwile Mesaya yoze alakenyene. Yino ye “A-Samaria anji” alingile. (Yoa. 4:39) Alioze, amu Akwa-Kristu anji ku sekulu yitangu apwile A-Yunda, A-Samaria amwe katambile kukumba katonde yoze wapwile hakachi ko.—Luka 9:52-54.

4. Kuchi A-Samaria amwe atambwile sango jize Fwilipe aambulwilile? (Yilinga 8:5, 6, 14)

⁴ Yika yakwashile A-Samaria mba aapapachise? Muze Fwilipe ‘ambujolwele hakutwala kuli Kristu,’ A-Samaria amwe ‘yatayiza liji lia Zambi.’ (Tanga Yilinga 8:5, 6, 14.) Fwilipe kapwile Ka-Yunda, alioze ayo kakalipikalile ni chikuma chino. O kota keulukile yihanda yimwe ya Pentateuku yize yambile ngwo, Zambi keshi katonde. (Shimbi 10:17-19) Chipwe ngwe kanyongene yeswayo, nihindu ayo “yapanjika longeso lia Fwilipe” hakutwala kuli Kristu ni kupwa ni shindakenyo ngwo, Fwilipe kamutumine kuli Zambi. Iye nawa kalingile yikomokeso yinji, kuchingako ya kuuka ni kutuhwisa andemoniu.—Yili. 8:7.

5. Yika muhasa kulilongesa ha chilweza cha A-Samaria?

⁵ Katonde ni kuhona chinyingi cha yisoneko, kachi yakwikile A-Samaria ahone kujama ku ufulielo. Alioze ayo kakechele hanga chino chilingiwe. Muze anyingikine ngwo, yize Fwilipe alongesele yapwile yamwenemwene, o kakashimbwilile ni kulihana hanga aapapachise. Mbimbiliya yakwamba ngwo: ‘O yafuliela ha sango jipema jize Fwilipe apwile ni kwambujola hakutwala ku Wanangana wa Zambi, ni hakutwala ku jina lia Yesu. Chocho malunga ni mapwo yaapapachisa.’ (Yili. 8:12) Mba yika mutwamba hali yena? Shina uli ni shindakenyo ngwe Liji lia Zambi lili liamwenemwene? Shina wakutayiza ngwe Yela ja Yehova kakukumba katonde ni kusa tachi hanga asolole zango lingunu lize liakusolola Akwa-Kristu amwenemwene? (Yoa. 13:35) Kashika, kanda wivwa woma wa kulihana kuli Yehova ni kukupapachisa. Nyi wachilinga, muhasa kupwa ni shindakenyo ngwe iye makuwahisa.

6. Kuchi chilweza cha Ruben muchihasa kukukwasa?

⁶ Ruben, yoze watwama mu Alemanha, kamulelele kuli yisemi Yela ja Yehova. Alioze muze apwile mukweze, te kakukakajana nyi Zambi katwamako nyi ka. Yika alingile mba akumbe kukakajana chenyi? Iye kanyingikine ngwenyi, te katamba kulilongesa chinji hakutwala ku chikuma chacho. Yamba ngwenyi: “Longeso liami lia wika, liangukwashile kukumba kukakajana chami. Nalilongesele chinji hakutwala ku chikuma cha kwamba ngwo, yuma yalitangile yene.” Iye katangile mukanda, Shina kuli umwe sakatanga yoze wakulihulumba hali yena? (Existe um Criador Que Se Importa com Você?) Mukanda uno, wakwashile Ruben kukolesa ufulielo wenyi muli Zambi. Chocho yanyingika ngwenyi: ‘Kuma, Yehova kwatwama lume!’ Ruben nawa kayile ni kumeneka chishina chinene cha Yela ja Yehova, chocho yanyingika ngwenyi, kulinunga cha mandumbu hashi heswe chili chikomokeso. Hanyima liakufuna mu Alemanha, Ruben yamupapachisa muze te ali ni miaka 17. Nyi wakukakajana hakutwala kuli Zambi, ha Mbimbiliya hanji ha chikuma chikwo, hengwola mu mikanda yetu hanga upwe ni “chinyingi cha umwenemwene” chize muchikukwasa kukumba kukakajana che. (Efwe. 4:13, 14) Ha kupalika cha mashimbu, muwivwa yilweza yinji hakutwala ku zango ni kulinunga cha mandumbu hashi heswe, ni kumona yilweza yacho mu chikungulwila chenu. Chino muchikukwasa kuzanga chinji mandumbu jetu a hashi heswe.

SAULU KALIHANYINE KULI YEHOVA NI KUMUPAPACHISA

7. Manyonga aka Saulu atambile kwalumuna?

⁷ Tutalenu chilweza cha Saulu wa ku Tarsu. Iye kajamine mu uwayilo wa A-Yunda ni kusenya chinji kulutwe mu uwayilo wacho. (Ngala. 1:13, 14; Fwili. 3:5) Ha mashimbu jacho, A-Yunda anji te kakumona Akwa-Kristu ngwe yitanganyanyi. Hachino, ni ufwatulo weswe, Saulu yahungumiona Akwa-Kristu mumu kapwile ni kunyonga ngwenyi, kanalingi upale wa Zambi. (Yili. 8:3; 9:1, 2; 26:9-11) Nyi te Saulu mazanga kusolola ufulielo wenyi muli Yesu ni kumupapachisa ngwe Mukwa-Kristu, iye te katamba kutayiza kupalika mu yihungumiona.

8. (a) Yika yakwashile Saulu mba amupapachise? (b) Kulita ni Yilinga 22:12-16, kuchi Ananiya akwashile Saulu? (Tala nawa chizulie.)

⁸ Yika yakwashile Saulu mba amupapachise? Muze Yesu ahanjikile nenyi, limwe pangu yilipupuchisa meso jenyi. (Yili. 9:3-9) Ha matangwa atatu, Saulu kakanwine chipwe kulia nichimwe. Iye kota kapwile ni kupukuna ha yize yalingiwileko. Kanyingikine ngwenyi, Yesu kapwile Mesaya nawa ngwo, uwayilo wa Akwa-Kristu wapwile wamwenemwene. Saulu kalemene ku mbunge mumu lia kukwasa kushiha Eshetevau. (Yili. 22:20) Ha kupalika cha matangwa atatu, ni umbovu weswe, kambaji Ananiya yaya ni kuhanjika ni Saulu; yamuuka ni kumukolweza hanga amupapachise. (Tanga Yilinga 22:12-16.) Saulu yalikehesa ni kutayiza ukwaso uze Ananiya amuhele, chocho yaputuka mwono waha ni kulihana kuli Yehova hanga amupapachise.—Yili. 9:17, 18.

9. Yika mutuhasa kulilongesa ha chilweza cha Saulu?

⁹ Yika mutuhasa kulilongesa ha chilweza cha Saulu? Kuzo ni kwivwila atu woma, te muchihasa kumukwika kulihana kuli Yehova ni kumupapachisa. Saulu yalikehesa ni kwalumuna yitanga yenyi hanga apwe kambaji wa Kristu. (Yili. 26:14, 19) Iye kanyingikine ngwenyi mamuhungumiona, chipwe chocho yatayiza kupwa kambaji wa Kristu. (Yili. 9:15, 16; 20:22, 23) Muze amupapachishile, Saulu yanunga ni kujikijila ha ukwaso wa Yehova ha kupalika mu yihungumiona. (2 Kori. 4:7-10) Mumu lia kupwa Chela cha Yehova, hanji ni yena mupalika mu yipikalo ni mu yuma yize muyeseka ufulielo we. Chipwe chocho, muhasa kupwa ni shindakenyo ngwe, Yehova ni Yesu makukwasa hanga ununge ni kushishika.—Fwili. 4:13.

10. Kuchi chilweza cha Anna muchihasa kukukwasa?

¹⁰ Anna kakolelele mu umwe usoko ku Europa Oriental. Muze naye amupapachishile, tato yatayiza hanga Anna aputuke kulilongesa Mbimbiliya muze apwile ni miaka 9. Hachino, asoko waze apwile ku zuwo lio yaputuka kumuhungumiona, mumu kakazangile hanga Anna alilongese Mbimbiliya. Ayo kapwile ni kunyonga ngwo, kukatuka mu yingeleja yize akolelele te muchineha sonyi mu usoko wo. Muze apwile ni miaka 12, Anna yalweza tato ngwenyi, kanazange hanga amupapachise. Tato yazanga kunyingika nyi chino chapwile chiyulo cha Anna nyi hanji umwe wapwile ni kumushinjila. Anna yakumbulula ngwenyi: “Yami nakuzanga Yehova.” Chocho, tato yatayiza hanga amupapachise. Kukatuka haze, Anna yanunga ni kumukekuna ni kumumwesa lamba kuli asoko jacho. Umwe wa kuli asoko jenyi yamwamba ngwenyi: “Shinaho kulinga upangala ni kunwa makanya, kuhiana kupwa Chela cha Yehova.” Yika Anna alingile ha chikuma chino? Iye yamba ngwenyi: “Yehova kangukwashile kutakama. Chikwo nawa, yisemi jami kangukwashile chinji.” Anna kakusoneka yikuma ya chize amwene kwoko lia Yehova ku mwono wenyi ha amwe mashimbu. Ha shimbu ni shimbu, iye kakutala yikuma yacho hanga ahone kuvulama chize Yehova amukwashile. Nyi wakwivwa woma wa kupalika mu yihungumiona, iwuluka ngwe ni yena Yehova makukwasa.—Hepre. 13:6.

KONELIU KALIHANYINE KULI YEHOVA NI KUMUPAPACHISA

11. Yika kachi yatwalile Koneliu kushimbula hanga amupapachise?

¹¹ Mbimbiliya yakuhanjika nawa ha chilweza cha Koneliu, umwe “kapitau” hanji ngwetu, mwata yoze wapwile ni kutumina chimwe chizavu cha maswalale 100 a A-Roma. (Yili. 10:1) Hachino, iye kota kapwile mutu wa lufuma mu chihunda ni mu chilombo cha maswalale. Iye kapwile ni kuhana “yawana yinji kuli atu.” (Yili. 10:2) Yehova katumine postolo Petulu hanga ambujole sango jipema kuli Koneliu. Shina kunakapalika mashimbu mba alihane kuli Yehova ni kumupapachisa mumu lia lufuma yoze apwile nenyi?

12. Yika yakwashile Koneliu mba amupapachise?

¹² Yika yakwashile Koneliu mba amupapachise? Mbimbiliya yakwamba ngwo: “Iye ni akwa-zuwo lienyi eswe kapwile atu waze te akuvwila Zambi woma.” Iye nawa kapwile ni kuliumba kuli Zambi matangwa eswe. (Yili. 10:2) Muze Petulu alwezele Koneliu sango jipema, iye ni usoko wenyi, yaputuka kufuliela muli Yesu, hazehene yalihana hanga aapapachise. (Yili. 10:47, 48) Pundu lume, Koneliu kazangile kulinga yeswayo mahasa hanga alumune mwono wenyi ni kuputuka kuwayila Yehova hamwe ni usoko wenyi.—Yoshu. 24:15; Yili. 10:24, 33.

13. Yika muhasa kulilongesa ha chilweza cha Koneliu?

¹³ Chizechene ngwe Saulu, kupwa ni lufuma te muchihasa kukwika Koneliu kupwa Mukwa-Kristu. Alioze, iye kakechele hanga chino chilingiwe. Shina kuli yimwe yize watamba kwalumuna ku mwono we mba akupapachise? Nyi chenacho, Yehova makukwasa. Iye mawahisa tachi jize muusa hanga ukaule shimbi ja mu Mbimbiliya ni kumulingila.

14. Kuchi chilweza cha Tsuyoshi muchihasa kukukwasa?

¹⁴ Tsuyoshi wa ku Japão, mba amupapachise katambile kwalumuna yimwe hakutwala ku mulimo wenyi. Iye kapwile ni kukalakala ngwe chikwashi wa umwe longeshi ku Ikenobo, yimwe shikola ya lufuma yize yakulongesa atu kululieka yitemo yakulinga nayo mianda ya Budista muze anayi ni kufunda mufu. Muze longeshi wacho te keshi kuhasa kusoloka hanga alinge mianda yacho, kanji-kanji Tsuyoshi mwe te wakumusalakana. Alioze muze alilongesele umwenemwene hakutwala ku kufwa, mulimo wacho yiumukwika kulihana hanga amupapachise. Kashika, yakwata chiyulo cha kwecha kulinga mianda yacho. (2 Kori. 6:15, 16) Iye yahanjika ni longeshi wa shikola yacho hakutwala ku chikuma chino. Mba yika yalingiwileko? Tsuyoshi yanunga ku mulimo wacho chakuhona kulinjisa mu mianda ya Budista. Ha kupalika cha mwaka umuwika yamupapachisa.a Nyi walumuna yimwe ku mulimo we hanga uvwise Zambi kuwaha, muhasa kupwa ni shindakenyo ngwe, iye makukwasa ha yize yena ni usoko we munufupa.—Samu 127:2; Mateu 6:33.

A-KORINDU KALIHANYINE KULI YEHOVA NI KWAPAPACHISA

15. Yuma yika A-Korindu atambile kwecha mba aapapachise?

¹⁵ Atu anji mu mbonge ya Korindu, kapwile ni kumbata mwono mu mutapu uze Zambi keshi kutayiza. Ayo te kakuzanga yikumba, nawa kapwile ni kulinga yuma yinji ya upangala. Amu atu anji apwile ni kumbata mwono wacho, te muchihasa kupwa chikalu kuli ayo kuputuka kuwayila Yehova. Chipwe chocho, muze postolo Paulu ayile ku Korindu ni kwambujola hakutwala kuli Kristu, “A-Korindu anji waze evwile lie liji yafuliela ni kwapapachisa.” (Yili. 18:7-11) Chocho, Mwene Yesu yasoloka kuli Paulu mu usolwelo ni kwamba ngwenyi: “Atu anji nguli no mu mbonge yino.” Kashika, Paulu yanunga ni kwambujola mu mbonge yacho ha mwaka umuwika ni chipinji.

16. Yika yakwashile A-Korindu mba aapapachise? (2 A-Korindu 10:4, 5)

¹⁶ Yika yakwashile A-Korindu mba aapapachise? (Tanga 2 A-Korindu 10:4, 5.) Liji lia Zambi ni spiritu yisandu, ye yaakwashile kwalumuna mwono wo. (Hepre. 4:12) A-Korindu waze apwile Akwa-Kristu, kahashile kwecha mianda ni yitanga yipi yize apwile ni kulinga, ngwe: Kuzengewa, kwiya ni utumwa.—1 Kori. 6:9-11.b

17. Yika mutuhasa kulilongesa ha chilweza cha A-Korindu?

¹⁷ Ngwe chize twamona, atu amwe mu Korindu katambile kwecha yitanga yipi yize apwile ni kulinga. Chipwe chocho, kakanyongene ngwo, kupwa Akwa-Kristu chapwile chuma chikalu kulinga. Ayo kasele tachi jinji hanga endele mu jila yikehe yize yakutwala ku mwono. (Mateu 7:13, 14) Shina unase tachi walumune yimwe yitanga mba akupapachise? Nyi chenacho, kanda uhonga. Eta kuli Yehova akwehe spiritu yisandu hanga yikukwase kukumba usolo wa kulinga yuma yipi.

18. Kuchi chilweza cha Monika muchihasa kukukwasa?

¹⁸ Monika yoze watwama ku Geórgia mba amupapachise, katambile kusa tachi jinji hanga eche kuhanjika maliji a sonyi, kwivwa ni kutala yuma yize Yehova keshi kuzanga. Yamba ngwenyi: “Muze napwile mukweze, kulemba changukwashile kupwa ni tachi ja kwalumuna yitanga yami. Yehova kanyingikine ngwenyi, nazangile kulinga yuma yize yalita, chocho yangukwasa ni kungusongwela.” Monika kamupapachishile muze apwile ni miaka 16. Yika mutwamba hali yena? Shina watamba kwecha yimwe ndako yipi hanga uwayile Yehova mu jila yalita? Nunga ni kumwita tachi jize unafupu hanga uhase kwalumuna mwono we. Nyi wachilinga, Yehova makwaha spiritu yenyi yisandu.—Yoa. 3:34.

UFULIELO WE MUUHASA KUTUTULULA MILUNDU

19. Yika muyihasa kukukwasa kututulula milundu? (Tala nawa chizulie.)

¹⁹ Chipwe ngwe mupalika mu yuma yize muyisoloka ngwe muchipwa chikalu kukupapachisa, nihindu pwako ni shindakenyo ngwe Yehova kakukuzanga, nawa kanazange hanga upwe mu usoko wenyi. Yesu kalwezele chizavu cha tumbaji twenyi ku sekulu yitangu ngwenyi: “Nyi munupwa ni ufulielo ngwe luchichi wa mosetate, munwamba ku mulundu uno ngwenu: ‘Tutuluka kuno yako akuze’ newo muututuluka, kukushi chuma nichimwe chize muchipwa chikalu kuli yenu.” (Mateu 17:20) Yesu kambile maliji wano kuli atu waze te akumukaula ha miaka yikehe, kashika o katambile kwokesa ufulielo wo. Alioze, iye yaakwasa kupwa ni shindakenyo ngwo, nyi mapwa ni ufulielo ukolo, Yehova maakwasa kukumba yikwiko yize muyisoloka ngwe milundu. Ni yena Yehova makukwasa hanga uchilinge.

20. Kuchi yilweza ya ku mashimbu akunyima ni ya ha matangwa jetu yize twatongola ha mutwe uno yakukwasa?

²⁰ Nyi mumona ngwe, kuli yimwe yinakukwika kulihana kuli Yehova hanga akupapachise, kanda ushimbula kulinga yize muhasa hanga ukumbe yikwiko yacho. Yilweza ya Akwa-Kristu a ku mashimbu akunyima ni a ha matangwa jetu muyihasa kukukwasa ni kukujikijisa. Tunashimbwila hanga yilweza yacho yikukwase kulihana kuli Yehova ni kukupapachisa. Chino muchipwa chiyulo chipema chize mukwata ku mwono we!