Naningkamot ba Ka nga mas Mailhan pa si Jehova?

1. Unsay atong bation dihang mamalandong ta sa kahibalo, kaalam, ug sa mga nalampos ni Jehova?

NAKAHUNAHUNA na ba ka kon unsa ka lawom ang kahibalo ni Jehova, kon unsa ka dako ang iyang kaalam, ug kon unsa ka daghan ang iyang mga nalampos? Mobilib gyod kaayo ta kang Jehova kon maghunahuna ta bahin ana. Makaingon pod tingali ta sama kang apostol Pablo: “Pagkadaghan sa bahandi sa Diyos ug pagkalawom sa iyang kaalam ug kahibalo! Dili gayod matugkad ang iyang mga desisyon ug mga paagi!”—Roma 11:​33, 34.

2. Unsay nagpakita nga puwede gyod natong mailhan si Jehova?

² Bisag dili nato mahibaloan ang tanan bahin kang Jehova, posible gihapon nato siyang mailhan. Giingnan ni Haring David ang iyang anak nga si Solomon: “Ilha ang Diyos sa imong amahan ug alagara siya sa bug-os nga kasingkasing . . . Kon imo siyang pangitaon, iyang itugot nga makaplagan nimo siya.” (1 Cron. 28:9) Daghang tuig sa ulahi, gipahinumdoman ni apostol Juan ang mga Kristohanon nga gihatagan tag “lawom nga pagsabot aron kita makabatog kahibalo sa usa nga matuod.” (1 Juan 5:20) Ug si Jesus mismo miingon nga kadtong “buot tudloan sa Anak bahin sa Amahan” puwede gyong makaila kang Jehova.—Mat. 11:27.

3. Unsay atong hisgotan niining artikuloha?

³ Kitang tanan nga nag-alagad kang Jehova daghan na gyog nakat-onan bahin niya. Pero padayon gihapon tang naningkamot nga “makaila” kang Jehova. (Juan 17:3; tan-awa ang study note.) Daghan pa tag puwedeng mahibaloan bahin niya, sama sa kon unsaon nga mas mapalipay nato siya ug mas mapalig-on ang atong pagsalig niya. Busa hisgotan nato karon ang tulo ka pangutana nga angayng konsiderahon natong tanan bisag unsa na ta ka dugay nga nag-alagad: (1) Unsay kahulogan sa pagkaila kang Jehova? (2) Nganong angay tang maningkamot nga mas mailhan pa siya? Ug (3) unsay atong himoon aron padayon pa nato siyang mailhan?

UNSAY KAHULOGAN SA PAGKAILA KANG JEHOVA?

4. Unsa gyoy gipasabot sa pagkaila kang Jehova?

⁴ Mas masabtan nato kon unsa gyoy kahulogan sa pagkaila kang Jehova kon konsiderahon nato ang iyang giingon bahin sa mga Hudiyo nga mamalik sa Jerusalem gikan sa pagkabihag. Si Jehova nagsaad: “Hatagan nako silag kasingkasing nga andam moila kanako, nga ako mao si Jehova.” (Jer. 24:7) Siyempre, ang maong mga Hudiyo nakaila na kang Jehova ug naa nay nahibaloan bahin niya. Pero dili pa to igo. Kinahanglan silang maningkamot nga mas masuod pa gyod kang Jehova ug susihon ang ilang mga pagbati ug motibo. Bahin ani, ang usa ka reperensiya nag-ingon: “Naay kalainan ang pagkahibalo lang bahin sa Diyos ug ang pagkaila gyod sa Diyos. Ikatandi nato ni sa kalainan anang nakabasa lang bahin sa gugma ug nianang nahigugma gyod.” Sa susama, dili igo nga nahibalo lang ta nga si Jehova ang Diyos. Kinahanglang makaila pod ta kon unsa siyang klaseha sa Diyos.

5. Unsay atong makat-onan kang Haring Josias bahin sa kon unsa gyoy kahulogan sa pagkaila kang Jehova?

⁵ Kon mas mailhan na nato si Jehova, mas mahibalo na pod ta kon unsay makapalipay ug makapaguol niya. Konsideraha ang pananglitan ni Haring Josias. Ang Bibliya nag-ingon: “Sa ika-8 nga tuig sa iyang pagmando, samtang siya batan-on pa, siya misugod sa pagpangita sa Diyos ni David nga iyang katigulangan.” (2 Cron. 34:3) Pero igo ra bang nagkat-on si Josias bahin kang Jehova? Wala. Gipadapat pod niya ang iyang mga nakat-onan. Pinaagi kang propetang Jeremias, si Jehova miingon nga gipahamtang ni Josias ang hustisya ug pagkamatarong ug gidepensahan ang mga gidaogdaog ug ang mga kabos. Dayon si Jehova midugang: “Dili ba iya kanang gihimo kay nakaila siya kanako?”—Jer. 22:​15, 16.

6. Sumala sa Salmo 9:​10, unsay resulta kon mas mailhan nato si Jehova?

⁶ Basaha ang Salmo 9:10. Kon mas mailhan nato si Jehova, mas modako ang atong pagsalig niya. Tinuod na sa kahimtang ni apostol Pablo. Sa iyang kataposang pagkapriso ug sa hapit na siyang mamatay, siya misulat: “Wala ko maulaw. Kay nakaila ko sa Diyos nga akong gituohan.” (2 Tim. 1:12) Ang mga nakat-onan ug naeksperyensiyahan ni Pablo nakatabang niya nga mosalig gyod sa Diyos. Sumala sa giingon sa study note niining bersikuloha: “Masaligon [si Pablo] nga hinumdoman ni Jehova ang iyang pagkamatinumanon hangtod ‘sa adlaw’ nga banhawon na siya.”

NGANONG MANINGKAMOT TA NGA PADAYONG MAILHAN SI JEHOVA?

7. Unsay posibleng mahitabo kon taudtaod na tang nag-alagad kang Jehova?

⁷ Niadtong bag-o pa tang nagkat-on bahin kang Jehova, seguradong eksayted kaayo ta nga mas mailhan pa siya. Pero komosta kon taudtaod na tang nag-alagad? Posible kaha nga nakuhaan na gamay ang atong kadasig nga mokat-on bahin niya? Pananglitan, dihang magbasa ta sa Bibliya para sa atong personal nga pagtuon o para sa mga tigom, basig mas magpokus na lang ta sa pagpangitag praktikal nga mga leksiyon nga mapadapat nato sa atong kaugalingon o magamit sa pagtabang sa uban. Siyempre, gidasig ta sa Bibliya nga himoon na. (2 Tim. 3:​16, 17) Pero angay natong hinumdoman nga daghan pod nig gitudlo nato bahin kang Jehova. (Sal. 25:​8-10) Maong maningkamot gyod ta nga dili lang kay basta mangita tag praktikal nga mga leksiyon para nato o sa uban, kondili pangutan-on nato pirme ang atong kaugalingon, ‘Unsay akong makat-onan niini bahin kang Jehova nga Diyos?’a

8. Kon mas mailhan nato si Jehova, unsay epekto niini sa atong relasyon kaniya? (Salmo 73:​24-28)

⁸ Samtang mas mailhan nato si Jehova, mas masuod ta niya. Pananglitan, unsay imong bation bahin kang Jehova human sa imong pagbasa sa Bibliya, pagtan-aw ug broadcasting, o pagtambong sa asembliya o kombensiyon? Sagad mobati tang mas suod sa atong langitnong Amahan. Ngano? Kay nadugangan ang atong mga nahibaloan bahin niya. Tungod ana, mapalihok ta nga dayegon ug pasalamatan siya. Sama sa salmista nga namalandong kon giunsa siya pag-atiman ni Jehova, makaingon pod ta: “Ang Diyos mao ang bato sa akong kasingkasing ug ang akong bahin hangtod sa hangtod.” (Basaha ang Salmo 73:​24-28.) Pribilehiyo gyod nga gitugotan ta ni Jehova nga masuod niya! Busa kon maningkamot ta nga mas mailhan pa gyod si Jehova, mas molawom ang atong apresasyon niini nga pribilehiyo.

9. Unsay kaayohan kon atong ‘konsiderahon’ si Jehova? Iilustrar.

⁹ Dihang atong ‘konsiderahon’ si Jehova—sa ato pa, kon atong hunahunaon ang atong mga nakat-onan bahin niya ug kon unsay iyang bation sa atong mga ginahimo—mas makahimo tag maayong mga desisyon. (Prov. 3:​5, 6) Ngano? Hunahunaa ang usa ka brader nga nagbutang ug picture sa iyang asawa diha sa iyang lamesa, pitaka, o cellphone. Iya nang gihimo aron pirme niyang mahinumdoman ang iyang asawa, makahimo siyag mga desisyon nga makapalipay niya, ug malikayan ang paghimog bisan unsa nga makapasakit sa iyang asawa. Sa samang paagi, kon pirme natong konsiderahon o hunahunaon si Jehova, mas makahimo tag mga desisyon nga makapalipay niya.—Sal. 19:​13, 14.

10. Nganong ang pagkat-on bahin kang Jehova makatabang nato nga mas masundog siya?

¹⁰ Kay gihimo man ta sumala sa larawan ni Jehova, kaya gyod natong ipakita ang iyang mga hiyas. (Gen. 1:26) Ug kon madugangan ang atong kahibalo bahin sa mga hiyas ni Jehova, mas masabtan nato kon unsaon siya pagsundog. Sa panahon ni Jesus, iyang gisaway ang mga eskriba ug Pariseo kay wala nila ipakita ang mga hiyas sa Diyos. Mas nagpokus sila sa ginagmayng mga detalye sa Balaod ug ilang “gibalewala ang mas importanteng mga butang sa Balaod, nga mao ang hustisya, kaluoy, ug pagkamatinumanon.” (Mat. 23:23) Hinaot nga dili nato sundogon ang maong relihiyosong mga lider. Dihang magtuon ta sa mga balaod ug prinsipyo sa Bibliya, susihon gyod nato kon unsay gitudlo niini bahin kang Jehova. Kon mas masabtan nato ang mga hiyas ni Jehova, mas masundog nato siya.—1 Juan 4:​8, 11.

UNSAY HIMOON ARON PADAYON NATONG MAILHAN SI JEHOVA?

11. Kanus-a nimo unang nailhan si Jehova?

¹¹ Kinsay nagtabang nimo nga makakat-on bahin kang Jehova? Tingali ang imong Saksi nga mga ginikanan. Seguro gibasahan ka nilag mga estorya sa Bibliya ug gitudloan bahin sa kalalangan, maong nakakat-on ka bahin sa Diyos ug sa iyang mga hiyas. O kaha nagpa-Bible study ka sa usa sa mga Saksi ni Jehova. Gamit ang usa ka publikasyon, sama sa librong Mabuhi Ka Hangtod sa Hangtod!, gitudloan ka sa nag-study nimo bahin sa nindot nga mga hiyas ni Jehova pinaagi sa mga asoy sa Bibliya ug sa kalalangan.b (Neh. 8:8; Buh. 14:17) Karon, hisgotan nato kon unsa pay atong mahimo aron padayon tang makakat-on bahin kang Jehova.

12-13. Unsay atong makat-onan bahin kang Jehova dihang magbasa ta sa Bibliya? Paghatag ug pananglitan. (Jeremias 39:​15-18) (Tan-awa sab ang hulagway.)

¹² Una, mas mailhan nato si Jehova kon atong basahon ug tun-an ang iyang Pulong. Sa ubang mga teksto, klaro nang gihisgotan ang mga hiyas sa Diyos. (Ex. 34:​6, 7) Pero sa kadaghanang teksto, ang atong mabasa maoy bahin sa mga karakter sa Bibliya, unsay ilang gipanghimo, ug kon unsay nahitabo nila. Dihang basahon nimo ni nga mga asoy, hunahunaa pag-ayo kon unsay gitudlo niini bahin kang Jehova.

¹³ Pananglitan, diha sa Jeremias 38:​6-13, imong mabasa ang bahin sa Etiopianhong si Ebed-melek, kinsa nagluwas kang propetang Jeremias. Dihang imo ning pamalandongon, seguradong mahunahunaan dayon nimo kon unsaon nimo pagsundog ang gipakitang sakripisyo, kaisog, ug gugma ni Ebed-melek para sa iyang isigkamagsisimba. Pero makita ba pod nimo kon unsay gitudlo niini nga asoy bahin sa mga hiyas ni Jehova? (Basaha ang Jeremias 39:​15-18.) Pananglitan, unsang mga bersikuloha ang nagpakita nga gipabilhan ni Jehova ang ginahimo sa uban? Nga patas siya? Nga wala siyay pinalabi? Unsa pang ubang kinaiya ni Jehova ang imong nakita? Dihang magbasa ka sa Pulong sa Diyos, pamalandonga kon unsang mga hiyas ni Jehova ang imong makat-onan. Dayon pasalamati ug dayega siya tungod ana.

14. Unsay atong himoon aron mas makakat-on gyod ta gikan sa kalalangan?

¹⁴ Ikaduha, mas mailhan pa nato si Jehova pinaagi sa pagpamalandong sa kalalangan. (Sal. 145:​9, 10) Siyempre, dili igo nga mobilib lang ta ug mahingangha sa kanindot sa mga gihimo ni Jehova. Naa gani mga tawo nga nagsige rag research bahin sa kalalangan, pero wala nila gamita ang ilang mga nakat-onan aron mailhan ang Diyos ug ang iyang mga hiyas. Ang uban nila dili gani gihapon motuo nga naay Diyos. Si apostol Pablo miingon nga ang “dili makitang mga hiyas [sa Diyos] tin-awng makita sukad sa paghimo sa kalibotan, tungod kay mailhan kini pinaagi sa mga butang nga gihimo.” (Roma 1:20) Ang usa ka hubad niini nga bersikulo nag-ingon nga “ang tawo nga kamaong maghunahuna ug mamalandong makakita sa mga hiyas sa Diyos.” Busa dihang makita nato ang nindot nga mga kalalangan ni Jehova, kinahanglang mamalandong ta aron masabtan nato kon unsay gitudlo niini bahin sa atong Maglalalang.

15. Unsay gihimo ni Patrick aron mas mailhan niya si Jehova, ug unsaon nimo siya pagsundog? (Tan-awa sab ang hulagway.)

¹⁵ Daghan nato ang nagpuyo sa siyudad diin halos mga bilding ray atong makita ug wala kaayoy nindot nga kalalangan. Kon ingon ani ang imong kahimtang, unsay imong mahimo aron makakat-on gihapon ka gikan sa kalalangan? Konsideraha si Patrick nga nagpuyo sa Brazzaville, usa ka dako nga siyudad sa Republic of the Congo. Siya miingon: “Kada adlaw, maningkamot ko nga makapamalandong sa kalalangan. Magtambayan ko sa among balkon ug sagad makakita kog gagmayng insekto o mga langgam nga nangitag pagkaon. Kas-a, nakakita kog mga langgam nga nagsalag. Gigamit nila ang bisan unsa nga ilang makita sa palibot aron makahimog salag para sa ilang mga piso.” Pero dili kay igo lang nagtan-aw si Patrick sa mga langgam. Namalandong pod siya bahin sa Maglalalang. Siya miingon: “Nakat-onan nako nga giatiman gyod ni Jehova ang tanan niyang linalang, bisag kadtong giisip sa uban nga dili ra kaayo importante. Nagpasalig ni nako nga gimahal kaayo ko niya ug nga tagan-an gyod ko niya sa akong mga panginahanglan.”

16. Unsay nakatabang kang Maria, nga inahan ni Jesus, nga mas mailhan pa si Jehova, ug unsaon nato siya pagsundog? (Tan-awa sab ang hulagway.)

¹⁶ Ang ikatulong paagi nga mas mailhan pa nato si Jehova mao ang pagpamalandong sa mga panahon nga iya tang gitabangan. Mao nay gihimo sa inahan ni Jesus nga si Maria. Nakaila na kaayo siya kang Jehova ug siya “giuyonan sa Diyos.” (Luc. 1:30) Dihang gihatagan siyag bug-at kaayong asaynment—nga mahimong inahan sa Anak sa Diyos—gipalig-on ug gipasaligan siya ni Jehova pinaagi sa anghel nga si Gabriel ug sa paryente ni Maria nga si Elisabet. Gipamalandong ni Maria kon unsay iyang mga nakat-onan bahin kang Jehova base sa iyang mga naeksperyensiyahan niadtong panahona. Tungod sa iyang pagpamalandong, mas nakita niya nga si Jehova gamhanan, maluluy-on, walay pinalabi, ug nagpabili bisan niadtong giisip sa uban nga ubos. (Luc. 1:​46-55) Sama kang Maria, mapasalamaton pod ta nga naa pirme si Jehova “dihang manginahanglan tag tabang.” (Heb. 4:16) Busa dihang madawat nimo ang tabang sa Diyos, pangutan-a ang imong kaugalingon: ‘Unsay akong nakat-onan niini bahin kang Jehova? Unsa nga mga hiyas niya ang mas nakita nako tungod niini nga eksperyensiya?’

PAGKAT-ON BAHIN KANG JEHOVA HANGTOD SA HANGTOD

17-18. Nganong makaingon ta nga walay kataposan ang atong pagkat-on bahin kang Jehova?

¹⁷ Hunahunaa kon unsa unya ka daghan ang atong makat-onan bahin kang Jehova sa paraisong yuta. Makadawat tag bag-ong linukot nga mga basahon diin atong mabasa ang mga instruksiyon ug giya ni Jehova. (Pin. 20:12) Mas mag-enjoy na unya ta sa pagkat-on bahin niya gikan sa kalalangan. (Isa. 11:​6-9) Ug mas makaila ug masuod ta sa atong langitnong Amahan tungod sa atong mga maeksperyensiyahan sa bag-ong kalibotan, pananglitan dihang mabanhaw ang atong mga minahal ug dihang makita nato nga mag-anam tag kahingpit kada adlaw.

¹⁸ Wala gyoy kataposan ang atong pagkat-on bahin kang Jehova. Kay dugay na man kaayo siyang naglungtad, “dili matukib ang iyang pagsabot.” (Sal. 90:2; 147:5) Ug bisag mabuhi pa ta hangtod sa hangtod, “dili gayod matugkad sa tawo ang mga buhat sa matuod nga Diyos sukad sa sinugdan hangtod sa kataposan.” (Eccl. 3:11) Busa bisag unsa na ta ka dugay sa pag-alagad, hinaot nga padayon tang maningkamot nga mas mailhan pa ang atong mahigugmaong Amahan, si Jehova.