Padayon Kong Gibansay ni Jehova nga Mahimong mas Maayong Kristohanon

Mibilib kaayo ko sa akong mga nakita, pero mas mibilib ko sa batan-ong mga igsoon nga nagtrabaho didto. Nakadayeg gyod ko nila kay bisag balikbalik ang ilang trabaho ug morag dili makita sa uban ang ilang paghago, malipayon gihapon sila ug kontento. Ang ilang ehemplo nagtudlo nako kon unsa ka importante ang pagkamapainubsanon sa atong pag-alagad sa Diyos.

Sa daghang tuig, padayon kong gitabangan ni Jehova nga mahimong mas maayong Kristohanon. Pero ang tinuod, Buddhist gyod ko sa una. Estoryahan ta mo kon sa unsang paagi nako nakaplagan ang kamatuoran.

NANGITA NA SA DIYOS BISAN NIADTONG BATA PA

Natawo ko sa Chicago, Illinois, U.S.A., ug didto na pod ko nagdako. Ako ang kamagulangan sa upat ka magsoon. Taga-Japan gyod mi, pero mibalhin mi sa Chicago kay ganahan silang Mama ug Papa nga mahimong mas hayahay ang among kahimtang. Gusto nila nga makahuman mig taas nga edukasyon ug magmalamposon sa kinabuhi.

Buddhist ang akong mga ginikanan ug debotado kaayo sila. Niadtong bata pa si Mama, ang ilang gipuy-an naay Buddhist temple. Monghe ang iyang papa ug ang iyang duha ka manghod nga lalaki. Maong Budhismo gyod ang akong namat-an nga relihiyon. Kada uli nako sa balay gikan sa eskuwelahan, magdagkot dayon kog insenso ug maghalad ug bugas ug tubig sa among idolo. Ug kada Dominggo, mangadto mi sa Buddhist temple ug maghimog mga rituwal para sa mao ra gihapon nga idolo—pero gold lang ni ug mas dakodako kay sa adtong naa sa among balay.

Mahinumdom ko nga adtong mga siyete anyos ko, dihay panahon nga naghinuktok ko atubangan sa idolo nga naa sa among balay ug nakapangutana ko, ‘Unsa gyod kahay mahitabo nako inigkamatay nako no?’ Akong nakat-onan sa Budhismo nga inigkamatay daw nako, mahimo kong espiritu. Sa ato pa, buhi gihapon ko pero dili na nako ma-enjoy ang kinabuhi ingong tawo kay espiritu na man ko. Maong nakahunahuna ko, ‘Unsa pa may kapuslanan nga mabuhi kon ingon ana ra man diay ang kahimtang?’ Naguol gyod ko ug mibating walay paglaom.

Niadtong nag-edad kog mga 15, mibati ko nga walay pulos ang mga rituwal nga among ginahimo. Morag naa gyoy kulang sa akong kinabuhi. (Mat. 5:3) Para nako, naa gyoy gamhanan kaayo ug buhi nga Diyos, ug gusto kong makaila Niya. Naghunahuna ko nga basig sa Bibliya nako makita ang tubag sa akong mga pangutana, maong mipalit kog ginamit na nga King James Version—didto pa gyod sa pista sa mga Buddhist!

Pag-edad nakog 17, samtang gisuroysuroy nako ang akong iro, giduol ko sa usa ka brader, si Wilson Bashou. Gipangutana ko niya, “Nahibalo ba ka bahin sa mga saad sa Diyos sa umaabot?” Human adto, nakahisgot mig lawom nga mga topiko sa Bibliya. Gibasa ni Wilson ang Pinadayag 17:1 ug nangutana, “Unsa kahay gipasabot aning ‘daghang katubigan’ nga gilingkoran sa pampam?” Wala gyod ko katubag. Iyang gipakita nako ang bersikulo 15 nga nag-ingon nga ang katubigan nagtumong sa katawhan. Nakadayeg ko sa mga Saksi ni Jehova kay gibase gyod nila sa Bibliya ang ilang mga gitudlo. Sa wala pa mobiya si Wilson, gihatagan ko niya ug librong Ang Kamatuoran nga Motultol sa Kinabuhing Dayon. Gamay lang tuod to nga libro, pero dako kaayo tog natabang sa akong kinabuhi.

Napulo ka adlaw human adto, mitambong kog tigom sa Kingdom Hall. Di gyod nako malimtan ang pag-abiabi sa mga igsoon. Sukad adto, nagtambongan na ko sa mga tigom. Nag-Bible study na pod mi ni Wilson. Ganahan kaayo ko sa akong mga nakat-onan. Diha pa gani mga panahon nga moabot ug walo ka oras ang among pagtuon! Pagkahibalo sa akong mga ginikanan nga nagtuon ko uban sa mga Saksi, nabalaka sila ug gusto nilang paundangon kog study. Pero wala gyod ko moundang kay kombinsido ko nga mao ni ang kamatuoran. Nagpabawtismo ko niadtong 1983.

MIUNDANG UG ESKUWELA ARON MAGPAYUNIR

Nianang mga tuiga nga nabawtismohan ko, nag-eskuwela ko sa sikat nga unibersidad, ug medicine ang akong gikuha. Puwede ra man unta kong mopadayog eskuwela kay grabe baya ang paningkamot nilang Mama ug Papa aron makakuha ko ani nga klase sa edukasyon. Pero gusto nakong ihatag kang Jehova ang akong pinakamaayo ug mag-alagad niya sa bug-os panahon.

Giingnan ko ni Papa, “Kon moundang gani kag eskuwela, ayaw na pagdahom nga makauli pa ka!” Naguol kaayo ko ug naglibog kon unsay buhaton. Gimahal kaayo nako si Mama ug Papa, ug di ko gusto nga mapaguol sila. Maong nangayo kog tabang kang Jehova. Sagad human sa klase, mag-ampo ko diha sa campus bisag gabii na kaayo, “Jehova, palihog tabangi ko ani nga desisyon.” Dihang miundang na kog eskuwela, gipalayas gyod ko ni Papa. Gitawgan dayon nako si Wilson ug gisultihan sa nahitabo. Buotan kaayo siya kay iya kong giingnan nga puwede ra kong mopuyo uban niya sa iyang apartment. Maong mihawa ko sa among balay dala ang tanan nakong gamit nga naigo ra sa usa ka bag. Pero imbes nga mabalaka kon unsay mahitabo nako, natingala ko kay mibati hinuon kog kalinaw. Nahibalo ko nga sakto ang desisyon nga akong gihimo.

Lipay kaayo ko kay mora kog langgam nga nakagawas sa hawla ug makalupadlupad na bisag asa! Wala na gyoy makapugong nako sa pag-alagad kang Jehova sa bug-os. Pagka-1984, nagpayunir ko.

Sa daghang tuig nga nagregular payunir ko, gitabangan ko ni Jehova nga makaugmad ug nindot nga mga hiyas, sama sa paglahutay. Diha toy panahon nga naguol ko kay walay igsoon nga makauban nako sa ministeryo, maong masabtan ra unta kon dili ko makasangyaw. Bisan pa ana, misangyaw gihapon ko. Paglabayg mga duha ka oras, nakahunahuna ko nga human nakog adto sa sunod nga apartment, mouli na ko. Pero kay gikapoy na man kaayo ko ug morag kaulanon pa gyod, nakahunahuna ko nga dili na lang mopadayon. Pero samtang nagpadulong ko sa third floor, nakakita kog Pilipino nga batan-on. Abi nakog dili siya makig-estorya, pero interesado diay kaayo siya! Nagpa-Bible study siya, ug sa ngadtongadto nag-alagad na pod siya kang Jehova.

NABANSAY SA BROOKLYN BETHEL

Niadtong 1985, human sa duha ka tuig nga nag-uban mig puyo ni Wilson, gitawag ko sa Brooklyn Bethel. Sa ako nang giestorya ganina, naasayn ko sa Bindery. Usa ka adlaw, samtang naggamit mig machine nga pang-emboss sa mga cover sa libro, naa koy nahimong sayop. Wala to nako tuyoa, pero tungod sa akong sipyat, daghan kaayong cover sa libro ang kinahanglan nang ilabay kay dili na ni mapuslan. Giingnan ko sa akong mga kauban sa Bindery nga mas maayong sultihan nako ang among overseer. Maong giestorya nako ang tanang detalye kon nganong nahitabo to, pero naa koy wala masulti nga importante kaayo. Sa buotan nga paagi, gipahinumdoman ko sa akong overseer, “Ayaw gyog kalimot sa pagpangayog pasaylo.” Naleksiyon gyod ko adto. Nakat-onan nako kon unsa ka importante nga angkonon nako ang akong sayop ug mangayog pasaylo.

Maayo pod nga ehemplo ang matinumanong mga igsoon nga dugaydugay nang nag-alagad sa Bethel. Tungod nila, nakakat-on ko nga mas maningkamot pa nga alagaran ang uban. Pananglitan, diha toy higayon nga nakauban namo sa lamesa panahon sa paniudto si Brader Milton Henschel, membro sa Nagamandong Lawas. Adtong adlawa, wala magdahom ang mga igsoon nga naasayn sa pag-serve ug pagkaon nga daghan kaayog tawo, maong nagkarakara intawon sila. Kaming mga batan-on hilom nga nangreklamo kay dugay kaayong na-serve ang paniudto. Pero si Brader Henschel wala gyod moreklamo bisag gamay. Hinuon, gitabangan niya ang mga igsoon sa pag-serve ug tinapay, mantekilya, ug tubig. Mapainubsanon gyod niyang gialagaran ang uban, sama sa gihimo ni Jesus sa iyang mga apostoles. (Juan 13:​3-5) Di gyod to nako malimtan.

“PAGTUON UG JAPANESE!”

Pagka-1987, mibakasyon ko sa Japan. Nakadayeg ko sa mga igsoon didto kay dasig ug mapainubsanon kaayo sila. Gusto unta nako nga mosangyaw pod sa mga Japanese, ang nakaapan lang kay di ko kamaong mag-Hinapon. Pero dihay gisulti nako ang usa ka sister sa Bethel nga si Michiko Oda. Siya miingon, “Pagtuon ug Japanese!” Ug mao gyod toy akong gihimo. Wala gyod ko magdahom nga mao toy makapabag-o sa akong kinabuhi.

Paglabayg pipila ka bulan, mibalhin ko sa Japanese nga kongregasyon sa New York. Wala gyod ko magmahay nga mikat-on kog Japanese kay mas napalapad nako ang akong pag-alagad kang Jehova. Pagka-1989, dihay Japanese nga kombensiyon sa Los Angeles, California. Kadto ang pinakaunang Japanese nga kombensiyon nga akong natambongan. Ug didto, nailaila nako si Miwako Onami, payunir nga sister nga apil sa drama. Ganahan kaayo ko niya.

Nagminyo mi ni Miwako pagka-1992, ug makapalipay kay nakapribilehiyo mi nga mag-alagad ingong magtiayon sa Brooklyn Bethel. Buotan kaayo si Miwako. Mahunahunaon ug matinabangon pod kaayo siya sa uban. Ang iyang nindot nga mga hiyas nakatabang nako nga mahimong mas buotan sa akong pagpakiglabot sa mga igsoon. Lipay kaayo ko kon mag-uban mi, ug naa siya pirme aron hupayon ko. Regalo gyod siya gikan kang Jehova.

SA SANGANG BUHATAN SA JAPAN UG DAYON SA FIELD

Paglabay sa panahon, grabeng nagsakit ang mga ginikanan ni Miwako nga naa sa Japan. Gusto kaayo namo nga atimanon sila, maong mapasalamaton mi kay gitugotan ming mobalhin sa sangang buhatan sa Japan aron mas duol mi nila. Mibalhin mi pagka-1999.

Dali ra ming naka-adjust pagbalhin namo sa Japan kay gipabati sa mga igsoon sa Bethel nga bahin mi sa ilang pamilya. Mahinatagon ug maabiabihon kaayo ang Japanese nga mga igsoon, ug mas nakakat-on ko nga sundogon ang ilang nindot nga mga hiyas. Kugihan sila, pokus sa trabaho, ug magtinabangay sa usag usa. Ingon ana sila, kay sa ilang kultura, mas importante nga magkahiusa ug magtinabangay gyod aron makabenepisyo ang tanan imbes nga mag-iyahay lag paningkamot. Ang ilang maayong ehemplo nakadasig nako nga mapainubsanong mokooperar sa akong mga kauban sa trabaho. Nagpahinumdom pod ni nako nga bisag unsa pa ka gamay ang akong natabang, nakaamot gihapon ni aron molampos ang katuyoan ni Jehova.

Pero kay lahi man ang akong gidak-an nga kultura, naa gihapoy mga panahon nga di ko kasabot sa pamaagi sa mga igsoon didto. Maong kinahanglan kong makakat-on nga mas magpailob ug dili dayon mo-react kon naa koy wala mauyoni. Sa ngadtongadto, naka-adjust ra gyod ko, ug nakita nako nga panalanginan gyod ni Jehova ang bisan unsang desisyon basta sundon lang nato ang direksiyon nga atong madawat gikan sa iyang organisasyon. Di ra gyod ta angayng mabalaka, kay si Jehova ray bahala nga magpalampos sa iyang buluhaton.

Sagad, maghunahuna ko nga ang pagbansay nga akong nadawat gikan sa Bethel parehas sa pagbansay nga nadawat ni Moises. Sama kang Moises, nakadawat pod kog taas nga edukasyon, ug tungod ana nahimo kong garboso ug magsalig lang ko sa akong kaugalingong katakos. Pero sama nga gitabangan ni Jehova si Moises nga mahimong mapainubsanon, gitudloan pod ko ni Jehova nga magpaubos ug mosalig niya. Si Jehova mapailobong nagbansay kang Moises sulod sa 40 ka tuig dihang nahimo siyang magbalantay sa karnero, ug mao pod nay gihimo ni Jehova nako sulod sa daghang tuig nga nag-alagad ko sa Bethel.

Mga 24 ka tuig namong giatiman ang mga ginikanan ni Miwako hangtod sa ilang kamatayon. Di gyod to lalim kay magsige mig kabalaka nila, pirme ming manawag aron seguroon kon okey ra ba ang ilang kahimtang, ug magbalikbalik pod mi sa ospital. Nag-anam ug ka luya ang mama ni Miwako, si Masako. Miabot sa punto nga naglisod na tawon siyag bangon, maong di na sayon para niya ang pagsangyaw ug pagtambong sa mga tigom. Sa ngadtongadto, nag-wheelchair na lang siya. Pero bisag luya na siya, lig-on gihapon kaayo ang iyang gugma kang Jehova. Makita gyod sa iyang nawong nga malipay siya dihang makasangyaw siya sa uban. Ang maayong ehemplo ni Masako sa pag-alagad sa Diyos ug sa pagpabiling positibo ug malipayon bisan sa lisod nga kahimtang nakadasig kaayo nako.

Pagka-2024, dihay dakong kausaban sa among kinabuhi. Human sa kapig 30 ka tuig nga pag-alagad sa Bethel, giasayn mi ngadto sa field. Karon, espesyal payunir mi sa Okinawa, ug talagsaon kaayo ang among teritoryo kay duol ni sa kampo sa mga sundalo. Tungod sa maayong pagbansay nga among nadawat sa Bethel, wala ra kaayo mi maglisod ug adjust. Naningkamot mi nga mabalanse ang among eskedyul aron makagahin mig mas dakong panahon sa ministeryo. Gipanalanginan mi ni Jehova ug mga Bible Study nga nasuod kaayo namo ug mora na namog pamilya. Tungod ani nga asaynment, mas nakakat-on mi kon unsa ka importante nga higugmaon ang mga tawo. Mapasalamaton gyod mi kang Jehova nga gihatagan mi niya aning nindot kaayo nga pribilehiyo.

DETERMINADO NGA PADAYONG MAGPABANSAY KANG JEHOVA

Karon, ang akong pamilya dili na supak sa akong pag-alagad, pero wala pa gihapon sila modawat sa kamatuoran. Bisan pa ana, si Jesus nagsaad nga kadtong mobiya sa ilang pamilya aron mahimong iyang tinun-an makabaton karon ug 100 ka pilo niini—ang espirituwal nga pamilya nga gitagana ni Jehova. (Mar. 10:​29, 30) Nakita gyod nako kon unsa na ka tinuod. Naa koy daghan kaayong pamilya sa tibuok kalibotan nga tinuod gyong nagmahal nako, ug di gyod sila maihap.

Hangtod karon, naa pa gihapon nako ang librong Kamatuoran nga gihatag ni Wilson. Kada kita nako ani nga libro, mapahinumdoman ko kon giunsa ko pagtabang ni Jehova nga mailhan Siya. (1 Cron. 28:9) Determinado ko nga padayong magpabansay kang Jehova ug maningkamot nga matabangan ang uban aron makabaton silag paglaom nga mabuhi sa walay kataposan.