Panalangin Gyod ang mga Grupo sa Pagsangyaw

1-2. Unsay gibati sa daghang igsoon bahin sa kahikayan sa grupo-grupo nga pagsangyaw?

NAHINUMDOM ba ka adtong naaprobahan ka ingong magmamantala? Seguradong lipay kaayo ka kay kauban na nimo ang dakong grupo sa mga magsisimba ni Jehova nga nagdayeg sa iyang ngalan. (Sal. 148:​1, 2, 12, 13) Pero nianang adlawa, tingali nahimo pod kang bahin sa mas gamay nga grupo—ang inyong grupo sa pagsangyaw. Ang mga grupo sa pagsangyaw dakog tabang aron matuman nato ang sugo nga isangyaw ang maayong balita sa Gingharian “sa tibuok yuta.”—Mat. 24:14.

² Unsay imong gibati bahin niini nga kahikayan? Ang sister nga si Wendya miingon: “Dako kaayo nig tabang sa akong ministeryo. Nakakat-on ko ug lainlaing paagi sa pagsangyaw ug pagpanudlo gikan sa akong mga kagrupo. Ila pod kong gidasig nga mangab-ot ug espirituwal nga mga tumong, ug nasuod kaayo ko nila. Mahigugmaon gyod ni nga kahikayan.” Si Rich, nga nag-alagad ingong tigdumala sa grupo, miingon: “Malipay gyod ta kon naa tay matabangan nga mabawtismohan. Pero lahi pod ang kalipay sa tigdumala sa grupo, kay naa siyay espesyal nga kahigayonan nga matabangan ang iyang mga kagrupo nga padayong mouswag ug mohamtong sa espirituwal.” Ang sister nga si Dinah miingon: “Nindot gyod kaayo ni nga kahikayan! Mora na nakog pamilya ang akong mga kagrupo.”

3. Unsay atong hisgotan niining artikuloha?

³ Niining artikuloha, atong hisgotan ang responsibilidad sa tigdumala sa grupo ug sa iyang assistant, ug kon unsay ilang ginahimo aron maatiman ang mga igsoon sa ilang grupo. Dayon atong hisgotan kon unsay atong mahimo aron makasuportar sa atong grupo sa pagsangyaw. Konsiderahon pod nato kon sa unsang paagi ta makabenepisyo niining mahigugmaon nga kahikayan.

ANG TIGDUMALA SA GRUPO UG ANG IYANG ASSISTANT

4. (a) Unsay pangunang responsibilidad sa tigdumala sa grupo? (b) Unsaon pag-atiman sa tigdumala ang mga igsoon sa iyang grupo? (Tan-awa ang kahong “Mga Sugyot Para sa Tigdumala sa Grupo.”)

⁴ Ang tigdumala sa grupo maoy usa ka ansiyanob nga giasayn sa lawas sa mga ansiyano sa pagtabang sa iyang mga kagrupo nga mouswag sa espirituwal. Unsaon na niya paghimo? Una, magpakita siyag personal nga interes sa matag usa diha sa iyang grupo. (Prov. 27:23) Ingong mahigugmaong tigdumala, abtik siyang magmatikod sa iyang mga kagrupo ug regular siyang mangomosta nila. Pinaagi ana, makahatag siyag pagdasig, paghupay, ug praktikal nga tabang. (Prov. 12:25; Isa. 32:2; Sant. 2:​15-17) Ikaduha, tabangan niya ang iyang mga kagrupo nga mahimong dasig sa pagsangyaw. Maningkamot siya nga manguna sa ministeryo, ilabina inigka-weekend. Regular pod siyang makigpartner sa lainlaing igsoon diha sa iyang grupo aron dasigon ug bansayon sila. Pero kon naa gyoy mga panahon nga dili siya makasangyaw, seguroon niya nga naay manguna sa grupo, tingali ang iyang assistant o laing kuwalipikado nga igsoon. Ikatulo, iyang tabangan ang bawtismadong mga brader nga mahimong kuwalipikado para sa dugang responsibilidad sa kongregasyon. (1 Tim. 3:1) Iya silang komendahan, tambagan, ug bansayon aron sa ngadtongadto mokuwalipikar sila ingong ministeryal nga mga alagad o ansiyano. Kay importante man kaayo ang responsibilidad sa tigdumala sa grupo, ang lawas sa mga ansiyano magpili sa pinakakuwalipikado nga mga ansiyano para ani nga asaynment.

5. Nganong dili lalim ang responsibilidad sa tigdumala sa grupo?

⁵ Dili lalim ang responsibilidad sa mga tigdumala sa grupo. Konsideraha pananglitan si Jörg nga taga-Germany. Sama sa daghang ansiyano, ubay-ubay pod ang iyang mga responsibilidad sa kongregasyon. Siya miingon: “Usahay malisdan kog balanse sa kadaghan sa akong himoonon. Gusto unta nakong komostahon ang tanan nakong kagrupo, pero usahay dili gyod madala tungod sa ka-busy.” Si Abel, 70 anyos nga ansiyano sa Uganda, miingon: “Kay gamay ra mag ansiyano ug ministeryal nga alagad sa among kongregasyon, pipila ra pod ang maporma nga mga grupo. Maong tungod sa kadaghan sa akong mga kagrupo, dili kaayo nako pirmeng ma-shepherding ang kada usa nila bisag gusto unta nako.” Ug si Obed, ansiyano nga taga-Suriname, miingon: “Ganahan kaayo kong magbansay sa uban. Pero nagkinahanglan nig dakong panahon ug paningkamot, ug usahay dili pa gyod dayon nimo makita ang mga resulta. Maong naay mga panahon nga mas unahon na lang nako ang ubang responsibilidad kay sa pagbansay sa uban.” Unsay makatabang sa mga ansiyano niini nga mga kahimtang?

6. Nganong mas maayo kon gamay rag igsoon sa kada grupo?

⁶ Kon posible, kinahanglang ginagmay ra ang matag grupo aron mas maatiman sila sa ilang tigdumala ug mas matabangan sila sa espirituwal. Pero komosta kon gamay ra gyog ansiyano sa kongregasyon? Imbes nga pipila ra ka grupo ang pormahon ug daghang igsoon ang ibutang sa matag grupo, ang lawas sa mga ansiyano puwedeng temporaryong mag-asayn ug ministeryal nga alagad aron moatiman sa usa ka grupo. Kon ginagmay ra ang mga grupo, ang mga tigdumala mas makahimo sa ilang pinakaimportanteng asaynment—ang pag-atiman sa mga igsoon.

7. Sa mga kongregasyon nga gamay rag ansiyano, unsay mahimo sa mga tigdumala aron maseguro nila nga maatiman ang tanang igsoon sa ilang grupo? (1 Pedro 5:2) (Tan-awa sab ang hulagway.)

⁷ Kon gamay rag ansiyano sa inyong kongregasyon ug nag-alagad ka ingong tigdumala sa grupo, paningkamoti nga mabansay nimo ang imong assistant sa pag-atiman sa mga igsoon. (Basaha ang 1 Pedro 5:2.) Asayni siyag mga buluhaton. Pananglitan, puwede nimo siyang hangyoon usahay nga manguna sa pagsangyaw. Importante pod nga hisgotan nimo uban sa imong assistant kon unsaon ninyo pagtabang ang inyong mga kagrupo nga mahimong dasig sa pagsangyaw, mouswag sa ilang paagi sa pagpanudlo, ug magpabiling suod kang Jehova. Kuyoga pirme ang imong assistant dihang mag-shepherding, ug hatagi siyag mga tip sa dili pa ug human sa inyong pagbisita. Makatabang ni aron nga sa ngadtongadto, ang imong assistant mahimong kuwalipikado nga mag-alagad ingong tigdumala sa grupo. (2 Tim. 2:2) Puwede pod nimong hangyoon ang ubang hamtong nga mga igsoon nga motabang sa pagbansay. Pananglitan, ang mga payunir ug ubang eksperyensiyadong mga igsoon puwedeng motabang sa mga bag-ohan ug sa dili pa kaayo hanas nga mga magmamantala. Ug ang mga igsoon nga hamtong sa espirituwal makabansay niadtong nanginahanglag tabang sa pagsugod ug panag-estorya, pagbalikduaw, o pagdumalag pagtuon sa Bibliya. Karon atong hisgotan ang tulo ka paagi nga ang matag usa nato makasuportar sa atong grupo sa pagsangyaw.

ANG MATAG USA NATO MAKASUPORTAR SA ATONG GRUPO SA PAGSANGYAW

8. Sa unsang paagi ta makasuportar sa atong grupo? (Roma 1:12)

⁸ Sangyaw uban sa imong grupo. Imong madasig ang mga igsoon kon mosangyaw ka uban nila. (Basaha ang Roma 1:12.) Kon naa kay kauban, mas mobati kang luwas ug dili kaayo ka kulbaan nga mosangyaw. Pero komosta kon dili kaayo ka makauban sa inyong grupo tungod sa imong trabaho? Basin puwede nimong hangyoon ang imong amo nga usbon ang imong eskedyul sa trabaho; basin diayg mosugot ra siya. (Neh. 2:​4-6) O kon malisdan kang mosangyaw uban sa grupo tungod sa problema sa panglawas o sa katigulangon, puwede nimong sultihan ang inyong tigdumala. Basin makahimo siyag paagi nga makauban gihapon ka sa grupo pinaagig video call o makaapil sa letter writing o phone witnessing. Kon batan-on pa ka ug maayo rag panglawas pero malisdan gihapon kang mosangyaw nga regular, basin puwede kang makig-uban sa imong mga kagrupo kada semana dihang magbalikduaw o mag-Bible study sila. Kinahanglan tingali nimong susihon ang imong mga prayoridad o kon giunsa nimo paggamit ang imong panahon. (Roma 12:11; Col. 4:5) Makasalig ka nga dili gyod masayang ang imong mga paningkamot sa paghimog mga kausaban. Ampo kang Jehova. Tabangan ka niya pinaagi sa “pagpalig-on sa [imong] tinguha sa pagbuhat sa mga butang nga gusto niya.”—Filip. 2:13.

9. Unsay makatabang aron masuod ta sa atong mga kagrupo? (Roma 12:13)

⁹ Magmaabiabihon. Mas masuod ta sa atong mga kagrupo kon atong ‘batasanon ang pagkamaabiabihon.’ (Basaha ang Roma 12:13.) Pananglitan, basin puwede nga sa atong balay himoon ang tigom para sa pagsangyaw. O kaha basin puwede natong maabiabi ang bisita nga mamumulong. Sa ubang kongregasyon, ang mga grupo magturnohay kon kinsay magpakaon sa bisita nga mamumulong. Ug bisan tingalig dili makaapil ang bisita, magtapoktapok gihapon sila para sa kaonkaon ug pagdinasigay. Ang espesyal payunir nga si Sarah miingon: “Mabalaka baya ko kon mangimbitar ko sa uban, kay basig dili unya sila lamian sa pagkaon. Maong aron gamay ra kog hunahunaon, simple ra pod ang akong andamon. Mas gusto nakong magpokus sa pag-abiabi sa mga igsoon kay sa mabalaka kon unsay akong idalit.” Oo, kon mogahin tag panahon sa pagpakig-uban sa atong mga kagrupo, nga samag pamilya na nato sila, mas masuod ta kang Jehova ug sa usag usa.—Neh. 8:10; Buh. 20:35.

10. Unsay atong himoon aron mas mouswag ta sa atong pagministeryo? (Proverbio 1:5; 27:17) (Tan-awa sab ang hulagway.)

¹⁰ Pauswaga ang imong kahanas sa pagsangyaw ug pagpanudlo. Kon mas mouswag ta sa atong kahanas sa pagministeryo, mas ma-enjoy nato ang pagsangyaw kauban sa atong grupo. Naa ba kay gustong pauswagon sa imong pagministeryo? Unsa kaha kon mangayo kag tabang sa uban diha sa inyong grupo? (Basaha ang Proverbio 1:5; 27:17.) Basin puwede nimong sultihan ang inyong tigdumala bahin sa imong tumong aron matabangan ka niya. Puwede pod kang makig-uban sa mga payunir o sa hanas nga mga magmamantala. Mao nay gihimo sa usa ka maulawong sister nga si Heather. Siya miingon: “Nagpatabang ko sa usa ka payunir sa among grupo kon unsaon paghimog mga balikduaw. Buotan kaayo siya ug pirme ko niyang ubanan. Gitabangan pa gani ko niya nga makasugod ug Bible study sa usa sa akong mga balikduaw. Karon, ma-enjoy na kaayo ko sa ministeryo. Maayo na lang gyod kay nangayo kog tabang niya.” Oo, daghan gyod tag mahimo aron makasuportar sa atong grupo sa pagsangyaw.

KON UNSAY MGA BENEPISYO NIINI NGA KAHIKAYAN

11-12. Sa unsang paagi ang mga grupo sa pagsangyaw makatabang nato sa espirituwal? Pag-asoy ug eksperyensiya.

¹¹ Mas mouswag ta espirituwal. Ang mga grupo sa pagsangyaw makatabang nato sa espirituwal nga paagi. Pananglitan, regular nga ma-shepherding ug makadawat ug pagdasig ang mga igsoon nga ilabinang gimahal ni Jehova—sama sa mga tigulang, mga biyudo o biyuda, ug kadtong wala nay mga ginikanan. (1 Tes. 2:8; Sant. 1:27) Makadawat pod tag mga pagbansay aron mouswag ta sa pagsangyaw ug pagpanudlo. Ang bawtismadong mga brader nga maayong ehemplo matabangan nga mahimong kuwalipikado para sa dugang responsibilidad sa kongregasyon.—1 Tim. 3:10.

¹² Si Wendy, nga gihisgotan ganina, nakabenepisyo gyod niini nga kahikayan. Siya miingon: “Kay opposer man si Papa, kasagaran dili makakuyog ug sangyaw si Mama uban sa iyang grupo inigka-weekend. Pero maayo na lang kay gitugtan ra ko ni Papa nga mosangyaw. Dihay payunir nga sister nga nagpakitag personal nga interes nako, ug iya kong gitabangan nga makaugmad ug maayong mga hiyas ug skill nga nakatabang nako sa ministeryo ug sa kongregasyon. Kadaghan pod kong nakadawat ug mahigugmaong tambag gikan sa among tigdumala nga nakatabang nako hangtod karon.”

13. Unsa pay laing kaayohan sa atong grupo sa pagsangyaw? (Tan-awa sab ang hulagway.)

¹³ Masuod ta sa mga igsoon. Masuod ta pag-ayo sa mga igsoon sa atong grupo samtang nagtinabangay ta sa paghimo sa buluhatong pagsangyaw. (Filip. 1:27) Kay gamay ra man ta sa grupo, kadtong mga hilomon o maulawon dali rang makakitag suod nga mga higala. (2 Cor. 6:13) Makasalig gyod ta niini nga mga higala dihang makaatubang tag lisod nga mga kahimtang, sama anang masakit ta, ma-depress, o mamatyag minahal. (1 Tes. 5:14) Ug samtang mas magkalisod ang panahon, mas kinahanglan pa gyod nato sila. (Mat. 24:21) Dili tuod mawala ang atong mga problema, pero mas makaya nato ni kay nahibalo ta nga naa tay mga igsoon nga nagmahal nato ug naa kanunay para nato.—Prov. 17:17.

14. Sa unsang paagi ang atong grupo sa pagsangyaw makatabang nato panahon sa trahedya o kalamidad?

¹⁴ Matabangan ta sa praktikal nga paagi. Ang atong grupo sa pagsangyaw makatabang dayon nato ilabina dihang naay mokaylap nga sakit o dihang naay kalamidad, medikal nga emerhensiya, paglutos, ug kalisod sa pinansiyal. Dihang mahitabo ni, kontakon sa mga tigdumala ang matag pamilya diha sa ilang grupo ug susihon kon unsay ilang gikinahanglan, sama sa medikal nga tabang, pagkaon, tubig, puy-anan, ug sinina. Pinaagi ani, maatiman dayon ang matag usa sa ilang grupo. Ang Service Committee sa kongregasyon ug ang mga tigdumala sa grupo magplano pod kon unsaon pagtabang ang mga igsoon nga ilabinang nanginahanglan. Oo, mapasalamaton kaayo ta sa praktikal nga tabang ug mahigugmaong pag-atiman gikan sa atong grupo!

15. Sa unsang buluhaton nagkahiusa ang tanang magsisimba ni Jehova?

¹⁵ Sa ato nang nahisgotan, dako kaayo ang organisasyon ni Jehova. Sa langit pa lang daan, milyonmilyon—o tingali binilyon—ang iyang mga magsisimba. Ug dinhi sa yuta, kapig siyam ka milyon na ang iyang mga alagad ug nagkadaghan ni kada adlaw. (Zac. 8:23; Pin. 5:11) Ang tanang alagad ni Jehova sa langit ug sa yuta gusto gyod nga masangyaw ang maayong balita sa Gingharian sa Diyos! (Pin. 14:​6, 7) Busa hinaot nga maningkamot ta nga suportahan ang kahikayan sa grupo-grupo nga pagsangyaw—kahikayan nga makatabang nato sa pagdayeg kang Jehova sa tibuok natong kasingkasing.—Sal. 111:1.