Padayon sa Pagpakigsuod sa mga Igsoon

1. Asa ta makakitag tinuod nga mga higala?

“DILI sayon nga mag-inusara niining panahon. Si Jehova nahibalo, higala hinungdanon.” Maka-relate ba ka ani nga lyrics gikan sa atong original song nga “Tinuod nga Higala”? Panalangin gyod kaayo nga naa tay tinuod nga mga higala sa organisasyon ni Jehova! (Sal. 119:63) Apil ta sa iyang pamilya nga nagkahiusa tungod sa gugma.

2. Unsa nga klase sa panaghigalaay ang gipaningkamotan natong maugmad uban sa mga igsoon?

² Dili nato gusto nga igo lang tang nakaila sa mga igsoon. Hinuon, naningkamot ta nga masuod nila. Ang atong gugma kang Jehova ug kang Jesus mao ang naghiusa nato uban sa mga igsoon, nga sama bag pamilya na nato sila. (Juan 13:35) Pero awtomatik ba dayon tang masuod sa usag usa? Dili. Nagkinahanglan nig paningkamot. Ug kay kitang tanan dili man hingpit, naa gyoy mga kahimtang nga posibleng makaapektar sa atong panaghigalaay.

3. Nganong lisod usahay nga magpabiling suod sa mga igsoon?

³ Naa bay igsoon nga mas komportable kang makig-uban? Aw, natural lang na. Tingali magkasinabot mo sa inyong mga hilig o parehas mog kinaiya. Pero sa ubang igsoon, malisdan tingali ka nga padayong makigsuod nila. Tingali dili mo magkasinabot usahay, maong basig anam-anam nga mawala ang inyong kasuod. O kaha lahi kaayo mog kinaiya, maong mobati tingali ka nga way lami ug laay kaayo kon mag-uban mo. O kon ang usa ka igsoon naay grabeng sakit o problema sa emosyon, basig mabug-atan na ka ug kapoyan na kang makig-uban niya. Busa niini nga artikulo, atong hisgotan kon sa unsang paagi ang ehemplo ni Jesus makatabang nato nga magpabiling suod sa mga igsoon bisan pa sa mga problema. Pero sa dili pa, hisgotan una nato ang nindot nga mga hiyas nga makatabang nato.

MGA HIYAS NGA MAKATABANG NATO NGA PADAYONG MASUOD SA MGA IGSOON

4. Unsay atong himoon aron mas masuod ta sa mga igsoon?

⁴ Aron padayon tang masuod sa mga igsoon, kinahanglang magpokus ta sa ilang nindot nga mga hiyas. Ato nang mahimo kon kanunay tang makig-uban nila. Maayo gyod nga ehemplo si apostol Pablo niining bahina, kay gusto kaayo niyang makauban ang mga igsoon. Iyang gisulatan ang mga taga-Tesalonica: “Naningkamot gyod mi nga moanha ninyo kay gusto kaayo namo nga makita mo.” (1 Tes. 2:17) Siyempre, lahi ra gyod kon personal tang makig-uban sa atong mga higala kay mas masuod ta nila. Daghan tag kahigayonan nga mahimo na dihang mosangyaw ta ug motambong sa mga tigom, asembliya, ug kombensiyon. Pero bisan pag pirme tang makig-uban sa mga igsoon, posible gihapong motungha ang mga problema nga makaapektar tingali sa atong relasyon nila.

5. Unsay makatabang nato kon naay mga situwasyon nga posibleng makabungkag sa atong panaghigalaay? Iilustrar. (Colosas 3:12)

⁵ Ang pagpakitag Kristohanong mga hiyas makatabang aron dili mabungkag ang atong panaghigalaay sa mga igsoon. (Basaha ang Colosas 3:12.) Apil ani nga mga hiyas ang pagkamapaubsanon, pailob, pagkamaayo, ug pagkamaluluy-on. Sama nga ang oil sa sakyanan o aseite makatabang aron dili madaot ang makina niini, ang Kristohanong mga hiyas makatabang pod aron mamentinar ang atong maayong relasyon sa uban. Karon atong konsiderahon ang tulo ka situwasyon nga posibleng makaapektar sa atong relasyon sa mga igsoon. Ato pong hisgotan kon sa unsang paagi ang pagsundog sa mga hiyas ni Jesus sama sa pagkamapaubsanon, pailob, pagkamaayo, ug mabinationg pagmahal makatabang nato nga mahimong tinuod nga higala.

KON DILI MO MAGKASINABOT SA INYONG OPINYON

6. Unsay posibleng mahitabo kon naay dili pagsinabtanay?

⁶ Unsay posibleng mahitabo? Kon naay mga dili pagsinabtanay, tingali tungod sa magkalahing opinyon, maghunahuna tingali ang usa nga sakto siya ug sayop ang lain. Pananglitan, imadyina nga naay duha ka brader nga wala magkasinabot kon unsaon nila pagkobre ang teritoryo sa ilang grupo. Ang kada usa nila kombinsido nga ang iya gyong opinyon ang sakto. Kon walay usa nila nga magpaubos, unsay posibleng mahitabo? Posibleng modako ang isyu, ug kon dili ni nila estoryahan ug tarong, basig maglagot na hinuon sila sa usag usa. Paglabay sa panahon, basin ganig dili na sila magtingganay, hangtod nga dili na gyod sila amigo—kining tanan tungod lang sa usa ka gamay kaayo nga butang.

7. Giunsa pagtudlo ni Jesus sa iyang mga tinun-an kon unsa ka importante ang pagkamapainubsanon?

⁷ Sundoga ang pagkamapainubsanon ni Jesus. Gitudloan ni Jesus ang iyang mga tinun-an nga ang pagkamapainubsanon importante aron masulbad ang dili pagsinabtanay. Ang iyang mga tinun-an taudtaod nang nagsigeg lalis kon kinsa gyoy labaw nila. Aron matabangan sila nga matangtang ang ilang nakagamot na pag-ayo nga kinaiya, giingnan sila ni Jesus nga kinahanglan nilang isipon ang uban nga labaw kay kanila. (Mat. 20:​25-28) Oo, gitudloan niya sila nga mahimong mapainubsanon. Bisan sa gabii una mamatay si Jesus, siya ‘naghatag ug sumbanan’ para nila pinaagi sa paghimo sa buluhaton sa usa ka ulipon—ang paghugas sa ilang mga tiil. (Juan 13:​3-5, 12-16) Gusto ni Jesus nga isipon nila ang uban nga labaw kay kanila aron mahimong mas sayon nga magpaubos kon ugaling naay dili pagsinabtanay. Ingong resulta, magpabilin silang suod nga managhigala bisag lahi sila usahay ug mga opinyon.

8. Sa unsang paagi ang pagkamapainubsanon makatabang dihang naay mga dili pagsinabtanay? (Colosas 3:13) (Tan-awa sab ang mga hulagway.)

⁸ Unsay imong himoon aron dili madaot ang inyong panaghigalaay? Ang pagkamapainubsanon makatabang nimo nga palabyon na lang ang ginagmay nga mga dili pagsinabtanay ug kinasingkasing nga magpasaylo. (Basaha ang Colosas 3:13.) Imbes masuko, mas pilion nimo nga dili na lang mo-react aron nga dili madaot ang inyong relasyon. (Sal. 4:4) Kon ang igsoon naay nasulti nga nakapasakit nimo, hinumdomi nga ikaw pod usahay makasultig dili maayo ngadto sa uban. (Eccl. 7:​21, 22) Puwede nimong pangutan-on ang imong kaugalingon, ‘Unsa man gyoy mas importante para nako—ang pagpamatuod nga akoy sakto, o ang among panaghigala? Ang opinyon ba nga akong gibarogan, o ang dugay na namo nga panag-uban?’ Basin mas maayo kon magpahiuyon na lang ka sa iyang opinyon. Makabaton kag kalinaw sa hunahuna kon kalimtan na lang nimo ang nahitabo ug dili na ni balikan ug hisgot.

9. Sa unsang paagi ang pagkamapainubsanon makatabang kon wala gihapon mo magkauliay sa usa ka igsoon? (Proverbio 17:9)

⁹ Ang pagkamapainubsanon makatabang pod kon dili gihapon mo maayog buot sa usag usa. Imbes makiglalis aron lang pamatud-an nga ikaw gyoy sakto, mas maayong maningkamot ka nga magkauliay mo. (Basaha ang Proverbio 17:9; 1 Cor. 6:7) Daghan ang miingon nga dihang giduol nila ang ilang higala ug kalmadong nakig-estorya, nasulbad ra ang problema. Mahimo pod na nimo. (Sal. 34:14) Puwede kang moingon: ‘Di ba taudtaod na man tang amigo? Puwede kaha natong estoryahan ang nahitabo?’ Mapainubsanong dawata nga naa pod kay naamot sa problema, ug pangayog pasaylo kay napasakitan nimo siya. Ug kon mangayo pod siyag pasaylo, dawata dayon ni. (Luc. 17:​3, 4) Ayaw na pagsigeg hunahuna kon kinsay sakto o sayop. Hinumdomi ang imong tumong—nga magkauliay mong duha ug magpabilin mong suod ingong managhigala.—Prov. 18:24.

KON DILI MO PAREHAS UG KINAIYA

10. Nganong lisod tingali usahay nga makigsuod sa uban?

¹⁰ Unsay posibleng mahitabo? Tingali malisdan ta usahay nga makigsuod sa mga igsoon nga dili nato parehas ug kinaiya. Ang uban naa tingali mga batasan nga makairita nato. Pananglitan, naay mga igsoon nga medyo hilomon o dili kaayo hinagad, tingali tungod sa ilang mga naeksperyensiyahan sa una o sa ilang gidak-an nga kultura. Maong kon estoryador ta nga pagkatawo, dili tingali kaayo ta ganahan nga makig-uban nila. Pero kon hilomon pod ta, basin dili pod ta ganahang makig-uban niadtong mga tawo nga estoryador kaayo.

11. Unsang hiyas ang nakatabang kang Jesus nga magpabiling suod sa iyang mga higala nga lahi niyag kinaiya?

¹¹ Sundoga ang pailob ni Jesus. Suod gihapon si Jesus bisan sa iyang mga higala nga dili niya parehas ug kinaiya. Pananglitan, dihay higayon nga si Santiago ug Juan nagmapahitas-on kay nangayo silag prominenteng posisyon sa Gingharian. (Mar. 10:​35-37) Lahi ra gyod kaayo sila kang Jesus, kinsa mapainubsanong mibiya sa iyang taas nga posisyon didto sa langit aron moanhi sa yuta. (Filip. 2:​5-8) Pero bisan pa ana, nagpailob si Jesus kang Santiago, Juan, ug sa uban niyang tinun-an.

12. Unsay nakatabang kang Jesus sa pagpailob sa iyang mga higala?

¹² Nakasabot si Jesus sa kahimtang sa iyang mga higala. Nahibalo siya nga ang gipakitang kinaiya ni Santiago ug Juan mao poy kahuyangan sa uban pa niyang tinun-an. (Mar. 9:34) Sa ilang kultura, ang relihiyosong mga lider nag-impluwensiya sa mga tawo nga magtinguhag tag-as nga mga posisyon. Ug kay mao man pod to ang kultura nga gidak-an ni Jesus, nakasabot siya kon nganong ingon adto ang iyang mga tinun-an. Tungod ana, nagpailob si Jesus kanila ug wala niya sila pugsa nga wad-on dayon sa ilang kasingkasing ang nakagamot na pag-ayo nga garbo ug pagkamapahitas-on.—Mar. 10:​42-45.

13. Unsaon nato pagpakitag pailob aron makapabilin tang suod sa mga igsoon? (Efeso 4:2)

¹³ Unsay imong himoon aron dili madaot ang inyong panaghigalaay? Padayong ipakita ang pailob bisag naa silay mga kinaiya nga makalagot nimo. (Prov. 14:29) Hinumdomi nga bisag naa silay mga batasan nga dili ka ganahan, wala na magpasabot nga dili na gyod sila maayog kinaiya. Lainlain lang gyod tag personalidad. Maong pailoban nato sila, sama nga gusto nato nga pailoban pod ta nila. (Basaha ang Efeso 4:2.) Dili ta maghunahuna nga kinahanglan silang magbag-o para nato. Hinuon, mahimo tang balanse. Pananglitan, hunahunaa ang hilomon nga igsoon nga naningkamot gihapon nga makig-estorya sa uban bisag maulawon siya. Dili gyod na lalim, maong atong iapresyar ang iyang paningkamot. Sa laing bahin, kon ang usa estoryador ug garaon, ato pod siyang pailoban. Siyempre, dili ta makadahom nga masuod gyod ta sa tanan. Pero angay natong hinumdoman nga puwede natong mahimong suod nga higala bisan ang mga igsoon nga lahi kaayo natog kinaiya.

14. Kon naa tay pailob, sa unsa ta mas magpokus?

¹⁴ Kon naa tay pailob, mas magpokus ta sa maayong mga hiyas sa atong mga igsoon. Makatabang ni aron dili ta maghunahuna nga imposible na gyod tang masuod niadtong dili parehas natog kinaiya. Pananglitan, bisag si Santiago ug Juan mapahitas-ong nangayog taas nga posisyon, ang ilang gihimo nagpakita nga tinuod gyod para nila ang Gingharian. Nakita ug naapresyar ni Jesus ang ilang dakong pagtuo. Sa samang paagi, kon maningkamot ta nga magpokus sa maayong mga hiyas sa atong mga higala, atong gisundog si Jesus ug ang iyang Amahan, si Jehova.

15. Kinsay makatabang nato aron magpabilin ang atong maayong relasyon sa mga igsoon nga lahi natog kinaiya?

¹⁵ Aron magpabilin ang atong maayong relasyon sa mga igsoon nga lahi natog kinaiya, importante kaayo nga mangayo tag tabang kang Jehova pinaagi sa pag-ampo. Hunahunaa ang mga situwasyon nga posibleng malisdan ka sa pagpakitag pailob, ug pag-ampo daan nga makapabilin kang kalmado. Hinumdomi nga si Jehova, ang atong Maglalalang, nakasabot nga lahilahi ang matag indibiduwal. Busa dihang mag-ampo ka, makasalig ka nga nahibalo siya kon unsa gyoy imong gikinahanglan aron padayon kang makapailob. Ug dihang mobati ka nga morag maupos na ang imong pailob, pangayo sa balaang espiritu ni Jehova aron makontrol nimo ang imong reaksiyon.—Luc. 11:13; Gal. 5:​22, 23.

KON ANG ATONG MGA IGSOON NAAY GIATUBANG NGA PROBLEMA

16. Nganong maapektohan pod ta kon ang igsoon naay giatubang nga problema?

¹⁶ Unsay posibleng mahitabo? Posibleng maapektohan ang atong maayong relasyon sa mga igsoon kon nag-antos sila sa grabeng sakit, daghan silag problema, o naguol kaayo sila. Ngano? Kay basig dili na sila ganahang makig-estorya nato, dali ra silang sapoton, o dili nato masabtan kon unsa gyoy ilang gibati. Tingali naa silay masulti o mabuhat nga makapasakit nato. (Job 6:​2, 3) Kon wala ta mahibalo nga naa diay silay giatubang nga mga problema, basig matingala ta ug dili ta katuo nga ila tong nahimo.

17. Unsay imong nakat-onan sa kon giunsa pagtratar ni Jesus ang tawong buta nga si Bartimeo?

¹⁷ Sundoga ang kaayo ug pagkamaluluy-on ni Jesus. Siya buotan ug nagpakitag kaluoy niadtong mga nag-antos, bisan sa mga tawo nga wala niya mailhi. Pananglitan, konsideraha kon giunsa niya pagtratar ang tawong buta nga si Bartimeo. Dihang nadunggan ni Bartimeo nga naa si Jesus, nagsige siyag singgit aron mamatikdan siya ni Jesus. Gibadlong siya sa mga tawo didto ug gipahilom. Pero kay gusto man kaayo niya nga ayohon siya ni Jesus, misinggit pa hinuon siyag kusog. Gisamokan gyod tingali ang mga tawo kang Bartimeo, pero si Jesus “naluoy” kaayo niya. (Mat. 20:34; Mar. 10:​46-52) Buotang nakig-estorya si Jesus kang Bartimeo ug gikomendahan niya ang iyang pagtuo. Dayon milagroso niyang gibalik ang panan-aw ni Bartimeo.

18. Unsay imong himoon kon ang imong higala naay grabeng sakit o problema? (1 Tesalonica 5:14)

¹⁸ Unsay imong himoon aron dili madaot ang inyong panaghigalaay? Ipakita ang kaayo ug kaluoy. Makatabang ni nimo sa ‘paghupay’ niadtong mga nag-antos sa pisikal ug emosyonal. (Basaha ang 1 Tesalonica 5:14.) Hinumdomi nga ang tinuod nga higala kanunayng andam motabang, ilabina “panahon sa kalisdanan.” (Prov. 17:17) Ang ingon ana nga higala dili lang basta maluoy, kondili maningkamot pod sa paghupay, pagdasig, ug pagtabang sa praktikal nga paagi.

19. Unsaon nato pagpakitag kaayo ug kaluoy? (Tan-awa sab ang mga hulagway.)

¹⁹ Unsay puwede nimong himoon aron makapakita kag kaayo ug kaluoy sa igsoon nga nag-antos? Siyempre, dili nimo kayang wad-on ang kasakit nga iyang gibati. Pero kaya nimong magpakitag empatiya. (Mat. 7:12; 1 Ped. 3:8) Paminawa siya samtang iyang isulti ang iyang gibati. Kon haom sa kahimtang, paningkamoti nga mahupay nimo siya pinaagi sa imong mga pulong. (Prov. 12:25) Ayaw paghunahuna nga nahibalo na gyod ka sa tanan niyang giatubang. (Prov. 18:13) Pailobi siya ug mahimong balanse sa imong gidahom bahin niya.—Efe. 4:32.

20. Ingong higala, unsay paningkamotan natong himoon?

²⁰ Gipabilhan gyod nato ang atong tinuod nga panaghigalaay uban sa mga igsoon. Pero angay natong hinumdoman nga kitang tanan dili hingpit, maong usahay naa tay mahimo nga wala nato tuyoa. Daghan nato ang naapektohan sa dili maayong mga eksperyensiya. Maong maapresyar gyod nato ang atong mga higala nga mapainubsanon, mapailobon, buotan, ug maluluy-on. Sa atong bahin, hinaot maningkamot ta nga mahimong ingon ana pod nga klase sa higala.