Kon Unsaon nga mas Makapokus Ka sa Pagpaminaw

1-2. (a) Giunsa pagtagana ni Jehova ang espirituwal nga panginahanglan sa iyang katawhan karon? (Salmo 23:​1, 2, 5) (b) Unsay atong hisgotan niining artikuloha?

KARON, gitagan-an ta ni Jehova ug daghan kaayong espirituwal nga pagkaon. Uyon gyod ta sa giingon ni David diha sa iyang awit: “Si Jehova ang akong Magbalantay. Walay makulang kanako.”—Basaha ang Salmo 23:​1, 2, 5.

² Ang mga tigom maoy usa sa mga paagi ni Jehova sa pagtagana natog espirituwal nga pagkaon. Sa atong mga tigom, sagad makadungog tag mga topiko nga pamilyar na ta daan. Nahibalo ta nga bisan pag “lig-on na [ta] sa kamatuoran,” gikinahanglan gihapon nato ni nga mga pahinumdom. (2 Ped. 1:12) Pero naa bay mga panahon nga kapoyan o laayan na kang maminaw sa mga topiko nga balikbalik nang gihisgotan? Kon mao, kini nga artikulo makatabang nimo. Atong hisgotan kon nganong importante nga maminaw ta pag-ayo sa mga tigom. Ato pong konsiderahon kon sa unsang paagi mapauswag sa mga brader ang ilang paagi sa pagpanudlo aron ganahang maminaw ang mga igsoon. Ug hisgotan nato kon unsay makatabang nato nga mas makapaminaw. Pero sa dili pa, ato unang sayron kon kinsa gyoy nakig-estorya nato panahon sa espirituwal nga mga programa.

ATONG HINUMDOMAN NGA SI JEHOVA ANG NAKIG-ESTORYA NATO

3. Sa unsang paagi nakig-estorya si Jehova nato, ug giunsa paggamit sa iyang mga alagad ang iyang Pulong?

³ Si Jehova nakig-estorya nato pinaagi sa iyang Pulong, ang Bibliya. (2 Tim. 3:​16, 17) Nahibalo si Jesus niini, maong iyang gigamit ang Pulong sa Diyos dihang nanudlo siya sa mga tawo. Gani kadtong mga naminaw niya nahingangha sa iyang paagi sa paggamit sa Kasulatan ug nakapangutana: “Diin kuhaa niining tawhana ang iyang kahibalo sa Balaang Kasulatan nga wala man unta siya makaeskuyla?” (Juan 7:15) Ang sinserog kasingkasing nga mga tawo nalipay kaayo dihang gipatin-aw ni Jesus kanila ang Pulong sa Diyos. Ang unang siglong mga Kristohanon pod, sama kang apostol Pablo ug Apolos, kanunayng naggamit sa Kasulatan dihang nanudlo sila sa kamatuoran. (Buh. 17:​2, 3; 18:​24, 28) Karon pod, kita nga mga Saksi ni Jehova nahibalo nga ang tanan natong ginatudlo diha sa atong mga artikulo, pakigpulong, ug video gibase gyod sa Bibliya. Dihang naay mga bisita nga motambong sa atong mga tigom, makadayeg kaayo sila sa mga Saksi. Makita nila nga ang Bibliya gyoy atong gibasehan sa atong mga ginatudlo, kay wala lang nato ni basta basaha kondili gipatin-aw pod nato kon unsaon ni pagpadapat.—Luc. 24:32.

4. Sa Bibliya, unsay gipasabot sa mga pulong nga “maminaw” ug “mamati”?

⁴ Sa Bibliya, ang mga pulong nga “maminaw” ug “mamati” sagad nagkahulogang “mosunod.” Busa dihang makig-estorya si Jehova nato diha sa atong mga tigom ug mas masabtan nato ang iyang kabubut-on, mas sayon para nato ang pagsunod kaniya. Makasalig ta nga malipay gyod si Jehova kon maminaw ta niya ug ipadapat nato ang atong nakat-onan.—Prov. 27:11.

NGANONG ANGAY TANG MAMINAW PAG-AYO PANAHON SA TIGOM?

5. Unsay atong buhaton tungod sa atong gugma kang Jehova? (Juan 4:​23, 24; 1 Juan 5:3)

⁵ Maminaw ta panahon sa tigom kay gimahal nato si Jehova. (Mat. 22:37) Kon mas mailhan nato si Jehova, mas molalom ang atong gugma para niya. Kini nga gugma maoy magpalihok nato nga maminaw niya, mosunod niya, ug mosimba kaniya sa paagi nga iyang gusto.—Basaha ang Juan 4:​23, 24; 1 Juan 5:3.

6. Sa mga tigom, unsay atong makat-onan nga makatabang sa uban?

⁶ Maminaw ta panahon sa tigom kay gimahal nato ang mga tawo. (Mat. 22:39) Sa atong mga tigom, ginatudloan ta ni Jehova kon unsaon nato pagtabang ang atong mga igsoon ug kadtong wala pa makaila niya. Ang usa sa iyang mga tagana mao ang brosyur nga Higugmaa ang mga Tawo—Paghimog Tinun-an, nga nagtudlo nato kon unsaon pag-ugmad ug mga hiyas nga makatabang nato sa ministeryo. Pananglitan, dihang magsangyaw ka, malisdan ba kag sugod ug inamigo o natural lang nga panag-estorya? Kon mao, paminaw pag-ayo sa mga bahin sa atong mga igsoon panahon sa midweek nga tigom ug matikdi kon giunsa nila pagsugod ug panag-estorya.

7. Nganong importante nga padayon tang maminaw kang Jehova?

⁷ Maminaw ta panahon sa tigom kay gusto natong mabuhi hangtod sa hangtod. Sama sa giingon ni Jehova sa iyang mga alagad kaniadto, ang pagsunod sa iyang Pulong makaluwas sa atong kinabuhi. (Deut. 32:​44-47) Kon maminaw ta sa atong mga tigom, makadawat tag pagdasig nga atong gikinahanglan aron makalahutay ta ug padayong makapaabot sa gisaad nga bag-ong kalibotan. (Roma 8:25) Ilabinang importante nga maminaw ta kang Jehova karon kay naa na ta sa kataposang mga adlaw ug kinahanglang alerto ta kanunay sa espirituwal.—Mat. 24:​42-44; Pin. 1:3.

KON UNSAON PAGTABANG ANG UBAN SA PAGPAMINAW PANAHON SA TIGOM

8. Nganong ang mga brader kinahanglang maningkamot nga padayong mouswag sa ilang paagi sa pagpanudlo?

⁸ Ang mga brader nga naay mga bahin, ilabina kadtong mga nagahatag ug pakigpulong publiko, kinahanglang maningkamot nga padayong mouswag sa ilang paagi sa pagpanudlo. Kon ang ilang bahin maayong pagkaandam ug gibase sa Bibliya, dako nig tabang aron mainteres ang mga tawo sa kamatuoran ug matabangan ang mga igsoon nga magpabiling lig-on sa espirituwal. Maong kon naa kay mga bahin sa tigom, pabilhi ni nga pribilehiyo kay dako kag mahimo sa pagtabang sa uban. Hunahunaa pod kon unsaon nimo pagpadapat ang mga sugyot nga hisgotan niini nga artikulo. Bisag kini nga mga sugyot maoy para gyod niadtong mga brader nga nagahatag ug pakigpulong publiko, mapadapat pod ni sa bisan unsang mga bahin nga atong madawat diha sa tigom.—2 Tim. 4:2; Tito 1:9.

9. Nganong importante nga daling sundan ang pakigpulong?

⁹ Paningkamoti nga han-ay ug daling masabtan ang imong pakigpulong. Gusto nimo nga dali rang masundan sa mga mamiminaw ang mga ideya nga imong ipasiugda. Maong ayaw ni himoang komplikado kaayo nga dili na hinuon sila ganahang maminaw. Unsay makatabang aron mahan-ay pag-ayo ang imong pakigpulong? Niay pipila ka sugyot: (1) Sa primero pa lang, kinahanglang mahibaloan na sa imong mga mamiminaw kon unsay pangunang mga punto sa imong pakigpulong. (2) Tagsatagsaa paghisgot kini nga mga punto. Makatabang kon inigkahuman nimo sa usa ka punto, mohunong una ka kadiyot ug dayon klarong ipaila nga hisgotan na nimo ang sunod nga punto. (3) I-review ang mga punto sa imong konklusyon.

10. Nganong importante nga maapresyar sa mamumulong ang topiko nga iyang hisgotan?

¹⁰ Importante nga maapresyar nimo ang mga punto nga imong hisgotan. Kon ganahan ka sa topiko, mas ganahan kang moestorya bahin ani. (Prov. 2:​4, 5; Buh. 4:20) Maong aron maapresyar gyod nimo ni, pamalandonga ang mga teksto ug ang mga punto nga gihisgotan sa materyal. Ang usa ka brader nga taga-United States, nga 70 kapin na ang edad karon, mahinumdom pa gihapon sa pakigpulong nga iyang nadungog niadtong batan-on pa siya: “Dili gyod ko malimot kon giunsa mi pagdasig sa mamumulong nga mamalandong pag-ayo dihang magbasag Bibliya. Klaro kaayo ni niyang gipatin-aw ug naa gyoy kinabuhi ang iyang paghatag sa iyang bahin. Natandog kaayo ko adto nga pakigpulong. Dako kaayo tog epekto nako kay tungod adto, nadasig ko nga maningkamot sa akong pagbasag Bibliya ug mas makigsuod kang Jehova.”

11. Nganong mas maayo nga mohatag ug praktikal ug espesipikong mga sugyot? (1 Timoteo 4:​13-16)

¹¹ Hunahunaa pag-ayo ang gikinahanglan sa imong mamiminaw ug paghatag ug praktikal nga mga sugyot. Imbes nga mohatag ug general ra kaayo nga impormasyon, mas maayo nga mohatag kag espesipikong pagdasig ug mga sugyot gikan sa Bibliya. Pananglitan, gihatagan ni apostol Pablo si Timoteo ug espesipikong mga tambag aron makapabilin siyang lig-on sa espirituwal ug molampos sa iyang asaynment didto sa Efeso. (Basaha ang 1 Timoteo 4:​13-16.) Sa susama, hunahunaa pag-ayo kon unsa gyoy gikinahanglan sa imong mga mamiminaw, ug tabangi sila kon unsaon nila pagpadapat sa praktikal nga paagi ang ilang mga nakat-onan.

12. Nganong nindot kon natural paminawon ang pakigpulong?

¹² Praktisag kusog ang imong pakigpulong aron natural ning paminawon. Imbes nga isulat ang tanan nimong isulti ug igo ra ning basahon, mas maayo nga mosulti ka sa natural nga paagi aron mas ganahang maminaw ang mga igsoon ug mas dali ni nilang masabtan. Ang brosyur nga Mahimong Hanas sa Pagbasa ug Pagpanudlo nag-ingon: “Sulti sa natural ug sinserong paagi nga magpakita kon unsay imong gibati bahin sa topiko ug sa imong mamiminaw.” Kon kinasingkasing ang imong pagkahatag sa imong pakigpulong, mas mainteres, ma-enjoy, ug madasig ang mga igsoon.

13. Unsay kaayohan sa pagpangayog tambag gikan sa maayong mga mamumulong? (Tan-awa sab ang hulagway.)

¹³ Pangayog tambag sa maayong mamumulong. Unsaon nimo ni paghimo? Puwede nimong ipakita niya ang imong nahimo nga bahin, ug dayon pangutan-a siya kon unsa pay iyang ikasugyot aron mas monindot ni. Puwede pod nimo siyang hangyoon nga maminaw nimo samtang magpraktis ka aron makahatag siyag praktikal nga mga tip. (Prov. 1:5) Dako nig tabang, kay usahay dili ta makabantay kon klaro ba gyod ang atong mga punto ug dali ba ning masabtan. Pero kon maningkamot ta nga mouswag sa atong paagi sa pagpanudlo, masabtan pag-ayo sa mga mamiminaw ang nindot nga mga kamatuoran nga naa sa Pulong sa Diyos.a

KON UNSAON NGA MAHIMONG MAS MAAYONG MAMIMINAW

14. Unsay angay natong pagbati bahin sa mga pahinumdom sa Diyos? (Salmo 119:​24, 111, 167)

¹⁴ Mahimo tang mas maayong mamiminaw kon apresyahon nato pag-ayo ang mga pahinumdom ni Jehova. Gikinahanglan nato ni nga mga pahinumdom kay nagpuyo na ta sa “kuyaw nga mga panahong lisod sagubangon.” (2 Tim. 3:1) Maong kon usahay morag balikbalik na ang mga impormasyon nga atong madungog, maayong pamalandongon nato ang panglantaw sa magsusulat sa Salmo 119 bahin sa mga pahinumdom sa Diyos.—Basaha ang Salmo 119:​24, 111, 167.

15. Unsay atong himoon aron dili mawala ang atong apresasyon sa espirituwal nga pagkaon nga atong madawat panahon sa mga tigom?

¹⁵ Kinahanglang padayon natong apresyahon ang espirituwal nga pagkaon nga gitagana ni Jehova. Angay nga mao pod unta nay tinamdan sa mga Israelinhon kaniadto dihang gitagan-an sila ni Jehova ug mana didto sa kamingawan. (Ex. 16:​15, 31) Sa primero, seguradong mapasalamaton ang mga Israelinhon sa mana kay gawas nga gikan ni kang Jehova, lami pa gyod ni. Nakatagana pod ni sa ilang pisikal nga panginahanglan aron padayon silang mabuhi. Pero sa ngadtongadto, ang uban napul-an nag kinaon ug mana kada adlaw. (Num. 21:5) Pasidaan para nato ang nahitabo sa mga Israelinhon. Bisan tuod kadaghan na natong madunggan ang ubang ginahisgotan diha sa tigom, dili gyod nato angayng isipon nga makapuol ni o nga dili na ni importante. Hinuon, kinahanglan natong ilhon nga si Jehova ang nagtagana niini. Hinumdoman nato nga gihunahuna ug giandam ni pag-ayo sa matinumanong ulipon. Hinumdoman pod nato nga ang mga impormasyon nga atong madunggan makahatag natog kaalam ug makaluwas sa atong kinabuhi.—Prov. 3:​13, 16-18; Juan 17:3.

16. Unsay nakatabang sa dugay nang mga alagad ni Jehova nga padayon gihapong maminaw sa mga tigom? (Tan-awa sab ang kahong “Mga Tip Aron Makapaminaw Pag-ayo.”)

¹⁶ Mahimo tang mas maayong mamiminaw kon atong ipadapat ang atong mga nakat-onan. Matikdi kon unsay nakatabang sa ubang dugay nang alagad ni Jehova nga padayon gihapong maminaw sa mga tigom. Si Ashley, nga kapig 30 ka tuig nang nag-alagad, miingon: “Lahi ra gyod nang mangandam daan sa tigom. Kon dili man god ko makapangandam, maglisod kog tubag ug maglatagaw ang akong hunahuna.” Si József, nga 52 ka tuig nang nag-alagad, miingon: “Ganahan kong maminaw sa mga topiko nga pamilyar na para nako, kay bisag balikbalik na ni nakong madunggan, naa gihapon koy bag-ong makat-onan.” Siya midugang: “Kon ang usa ka brader dili kaayo nindot mopakigpulong, mas magpokus ko sa iyang gihisgotan nga mensahe gikan sa Bibliya imbes sa iyang paagi sa paghatag sa iyang bahin.”

17. Unsay imong mahimo aron makapaminaw ka pag-ayo sa mga tigom? (Tan-awa sab ang hulagway.)

¹⁷ Unsay imong mahimo aron makapaminaw ka pag-ayo sa mga tigom? Puwede nimong ipadapat ang mosunod nga mga sugyot: (1) Kon mokaon ka sa dili pa ang tigom, ayaw palabig pabusog aron dili ka magduka. (2) Sayog abot ug pangita nag kalingkoran sa dili pa magsugod ang tigom. (3) I-silent ang imong gadyet ug ayaw pabalda ani. (4) Hunahunaa daan kon unsa kahang mga punto ang hisgotan sa pakigpulong. (5) Tan-aw sa mamumulong ug ayawg pabalda sa imong palibot. (6) Isulat o idrowing ang pangunang mga punto. (7) Hunahunaa kon unsay koneksiyon sa mga teksto nga gihisgotan. (8) Pangutan-a ang imong kaugalingon: ‘Unsaon nako ni paggamit aron matabangan ang uban diha sa kongregasyon o sa ministeryo?’ (9) Panahon sa mga asembliya ug kombensiyon, tan-awa daan kon unsay tema nianang adlawa, kon unsay mga hisgotan, ug kon unsay pangunang mga teksto sa matag pakigpulong. (10) Dihang i-play na ang music ug video presentation, lingkod na ug i-enjoy ni aron maandam ang imong kasingkasing para sa programa.

PADAYON SA PAGPAMINAW KANG JEHOVA

18. Nganong importante nga padayon tang maminaw sa mga tigom?

¹⁸ Importante nga padayon tang maminaw sa mga tigom kay pinaagi ani, nagpagiya ta kang Jehova sa “dalan sa pagkamatarong.” (Sal. 23:3; 31:3) Gikinahanglan nato ang iyang tambag aron dili ta mapahilayo kaniya. Dili nato gusto nga maparehas ta sa usa ka bangka nga naanod palayo tungod sa kusog nga hangin. Busa “angay [tang] mamati pag-ayo” ug ipadapat ang atong mga nakat-onan sa tigom. (Luc. 8:18) Kadtong padayong maminaw kang Jehova magmalipayon karon ug makabaton ug kinabuhing walay kataposan sa umaabot.—Sal. 119:​2, 14.