Magpabiling Lig-on sa Espirituwal Samtang Nagkuhag Dugang nga Edukasyon

1-2. (a) Kon modesisyon ka nga mokuhag dugang nga edukasyon, unsay kinahanglang padayon nimong himoon? (b) Unsang tambag ang gihatag sa Filipos 3:​16, ug unsay gipasabot ana?

ANG ubang alagad ni Jehova midesisyon nga mokuhag dugang nga edukasyon gawas pa sa basic nga edukasyon nga gitakda sa gobyerno. Tingali naghunahuna sila nga makatabang ni nila nga makakitag trabaho nga makasuportar sa ilang pag-alagad. Kon nakadesisyon ka nga mokuhag dugang nga edukasyon, unsaon nimo pagseguro nga makapabilin kang suod kang Jehova? (Sant. 4:8a) Dakog tabang kon imong “ipadayon” kon unsa nay imong ginahimo—ang pagpabiling matinumanon kang Jehova bisan pa sa mga pagsulay.—Basaha ang Filipos 3:16.

² Sa orihinal nga Gregong pinulongan, ang pulong nga gihubad dinhi ug “ipadayon” naghatag ug ideya bahin sa mga sundalo nga dungan ug padayong nagmartsa, nga wala gyod moundang o moatras. Sama sa maong mga sundalo, kon modesisyon ka nga mokuhag dugang nga edukasyon, kinahanglan pod kang “mopadayon ug martsa.” Sa ato pa, magpabilin kang dasig sa pag-alagad kang Jehova, nga dili gyod moundang o moatras. Niining artikuloha, atong hisgotan ang upat ka prinsipyo sa Bibliya nga makatabang nimo. Nahibalo na ka daan niini nga mga prinsipyo, gani imo na ning gipadapat sa una. Pero kinahanglang padayon nimo ning ipadapat samtang mokuha kag dugang nga edukasyon ug bisan human sa imong pag-eskuwela.

IPADAYON ANG MAAYONG ESPIRITUWAL NGA RUTINA

3. Kon mopadayon kag eskuwela, unsa kahay posibleng epekto ani sa imong adlaw-adlawng rutina?

³ Kon nganong lisod ning himoon. Kon mokuha kag dugang nga edukasyon, madugangan gyod ang imong mga responsibilidad, ug posibleng makaapekto ni sa imong adlaw-adlawng rutina. Natural lang nga gusto nimong maningkamot sa imong pag-eskuwela, pero angay kang mag-amping kay basig mas unahon na nimo ang imong pag-eskuwela kay sa imong pag-alagad kang Jehova. Basin ganig naay mga panahon nga dili na ka makatambong sa tigom, makasangyaw, makatuon, ug makaampo.—Pin. 2:4.

4. Nganong importante nga magpabilin kang “puliki diha sa buluhaton sa Ginoo”? (1 Corinto 15:58)

⁴ Basaha ang 1 Corinto 15:58. Aron dili ka matumba kon mag-bike, kinahanglang magpadayon kag sikad. Sa samang paagi, aron dili ka matumba sa espirituwal, kinahanglang padayon kang maningkamot sa imong pag-alagad. Mao nay hinungdan kon nganong ang Bibliya nagdasig nato nga magpabiling “puliki diha sa buluhaton sa Ginoo.” Kini nga prinsipyo wala lang magpasabot nga mogahin kag panahon sa espirituwal nga mga kalihokan, kondili himoon gyod nimo ni ingong imong prayoridad. Hinumdomi nga ang imong pag-alagad kang Jehova mao ang pinakaimportante, ug ikaduha lang ang imong pag-eskuwela. (Mat. 22:37) Ang batan-ong sister nga si Samantha miingon, “Nanaad ko sa akong kaugalingon nga kon maapektohan gani ang akong pag-alagad kang Jehova tungod sa akong pag-eskuwela, moundang gyod kog eskuwela.”

5. Unsay makatabang nimo nga magpabiling dasig sa pag-alagad kang Jehova?

⁵ Kon unsay imong mahimo sa dili pa mokuhag dugang nga edukasyon. Importante kaayo nga nahibalo ka kon unsa gyoy imong mga prayoridad. Pangutan-a ang imong kaugalingon, ‘Unsa may akong himoon aron dili gyod nako mapasagdan ang akong pagtambong sa tigom, pagsangyaw, ug pagtuon sa Bibliya?’ (Jos. 1:8; Mat. 28:​19, 20; Heb. 10:25) Hunahunaa pod ang miaging mga tuig nga nag-eskuwela ka. Pangutan-a ang imong kaugalingon, ‘Unsa may akong gihimo adtong panahona aron makapokus ko sa espirituwal nga mga kalihokan?’ Kon gibati nimo nga naa pa unta kay angayng gihimo aron mas makapokus, unsa mang mga kausaban ang imong himoon karon? Hinumdomi nga bisag maningkamot ka sa imong pag-eskuwela, angay kang mas maningkamot nga magpabiling busy sa espirituwal. Ayaw gyod isakripisyo ang imong pag-alagad kang Jehova.a—Mat. 6:24.

6. Unsay angay nimong ipangutana sa imong kaugalingon aron masusi kon lig-on pa ba ang imong espirituwalidad? (Tan-awa sab ang hulagway.)

⁶ Samtang mag-eskuwela ka, importante nga regular nimong susihon ang imong kaugalingon, tingali matag bulan. Pangutan-a ang imong kaugalingon, ‘Prayoridad pa ba gihapon nako ang akong pag-alagad?’ Kinahanglang abtik kang magmatikod sa mga ilhanan nga posibleng nagkaluya na ka sa espirituwal. Puwede nimong konsiderahon ni nga mga pangutana: ‘Pirme na ba kong ma-late o di na gyod katambong sa mga tigom? Magsige ba kog hunahuna sa akong mga homework bisag panahon sa tigom? Mas ganahan na lang ba kong motambong online imbes sa Kingdom Hall? Panagsa na lang ba kong moampo ug mobasag Bibliya? Mosangyaw na lang ba ko kon kinahanglan ug magsige rag hunahuna nga unta mahuman na ni?’ Kon oo ang imong tubag sa bisan usa niini nga mga pangutana, ayaw nig balewalaa. Ayawg tugoti nga mahimo nang mas importante para nimo ang pag-eskuwela ug dili na nimo mahatagag prayoridad ang imong pag-alagad kang Jehova.

‘BANTAYI ANG IMONG KATAKOS SA PANGHUNAHUNA’

7. Sa unsang paagi ang pagkuhag dugang nga edukasyon posibleng makaapektar sa imong panghunahuna?

⁷ Kon nganong lisod ning himoon. Naay mga kurso nga posibleng magtudlo nimog mga “pilosopiya ug sayop nga mga pangatarongan,” sama sa pagtulon-an nga walay Diyos ug sa teoriya sa ebolusyon. (Col. 2:8) Naa poy mga teacher nga magtudlo nimo nga mosalig pag-ayo sa imong kaugalingon. Usa ka batan-ong brader miingon: “Dili lang skill ang ilang gitudlo namo; gitudloan pod mig paagi sa panghunahuna nga wala mahiuyon sa panghunahuna ni Jehova. Pananglitan, gitudloan mi nga ang among kalamposan nagdepende lang gyod sa among kaugalingong katakos. Tungod ani, nagsugod na kog hunahuna nga wala ko magkinahanglan kang Jehova, ug nalisdan gyod ko nga mosalig niya.”

8. Nganong kinahanglan nimong ‘bantayan ang imong katakos sa panghunahuna’? (Proverbio 5:​1, 2)

⁸ Basaha ang Proverbio 5:​1, 2. Ang Bibliya nagpasidaan nimo nga ‘bantayan ang imong katakos sa panghunahuna.’ Ngano? Hunahunaa ni. Bantayan gyod nimo ang usa ka butang kon nahibalo ka nga naay mosulay ug kuha o daot ani. Ingon ana pod kon bahin sa imong katakos sa panghunahuna, nga kanunayng gipaningkamotang atakehon ni Satanas ug sa iyang daotang kalibotan. (1 Ped. 5:8) Maningkamot sila nga pahuyangon ang imong pagtuo aron magduhaduha na ka kon husto ba gyod ang moral nga mga sukdanan ni Jehova, kon unsa gyoy sinugdanan sa kinabuhi, o kon naa ba gyoy Diyos. Basig moingon pa gani sila nga ang ilang ideya maoy gituohan sa edukadong mga tawo. Pero ang tinuod, kini maoy walay pulos nga panghunahuna ug “kabuangan para sa Diyos.”—1 Cor. 3:​18-20.

9. Unsay imong mahimo aron mabantayan ang imong katakos sa panghunahuna?

⁹ Kon unsay imong mahimo sa dili pa mokuhag dugang nga edukasyon. Seguroa daan nga lig-on ang imong pagtuo sa mga pagtulon-an sa Bibliya sa dili pa mopadayog eskuwela. Nianang paagiha, maprotektahan nimo ang imong panghunahuna. Pangutan-a ang imong kaugalingon: ‘Nganong nagtuo man ko sa Diyos? Giunsa nako pagkahibalo nga Pulong gyod sa Diyos ang Bibliya? Nganong kombinsido ko nga mas maayo ang pagsunod sa moral nga mga sukdanan sa Bibliya kay sa pagsunod sa ginaingon sa mga tawo?’ Hunahunaa pod ang miaging mga tuig nga nag-eskuwela ka. Seguradong niadtong panahona, naa poy sayop nga mga panghunahuna nga gitudlo sa eskuwelahan. Pangutan-a ang imong kaugalingon: ‘Mihuyang ba ang akong pagtuo nga naa gyoy Diyos dihang nakita nako nga kombinsido kaayo ang uban sa ebolusyon? Dali ra ba kong naimpluwensiyahan sa sayop nga binuhatan sa akong mga schoolmate?’ Kon gibati nimo nga naa pa unta kay angayng gihimo aron mas makabarog sa imong pagtuo, unsa mang mga kausaban ang imong himoon karon? Paningkamoti nga dili maimpluwensiyahan ang imong panghunahuna samtang nagkuha kag dugang nga edukasyon.—2 Tim. 2:​16-18.b

10. Unsa pay imong himoon aron maprotektahan ang imong panghunahuna?

¹⁰ Samtang nagpadayon kag eskuwela, regular nga susiha ug pangutan-a ang imong kaugalingon: ‘Nagsugod na ba kog hunahuna nga dili ra kaayo daotan ang ginahimo sa uban bisag nahibalo ko nga sayop ni? Makamatikod ba ko kon ang ideya nga ginatudlo wala mahiuyon sa panghunahuna ni Jehova? Kombinsido ba gyod ko nga Gingharian sa Diyos lang ang makasulbad sa problema sa mga tawo?’ Aron maprotektahan nimo ang imong katakos sa panghunahuna, kinahanglan nga magkugi ka sa pagtuon sa Pulong sa Diyos. Ang pagtuon sa Bibliya ug pagpamalandong makatabang aron mahimo kang mas kombinsido nga tinuod ang imong gituohan.—1 Tim. 4:15.

GAMITA ANG IMONG PANAHON SA MAALAMONG PAAGI

11. Samtang nagpadayon kag eskuwela, nganong lisod usahay ang pagbalanse sa imong panahon?

¹¹ Kon nganong lisod ning himoon. Ang pagkuhag dugang nga edukasyon posibleng dakog makaon sa imong panahon, ilabina dihang magtuon ka para sa eksam o dihang naa kay apason nga deadline sa project. Kon dili organisado ang imong eskedyul, basig ma-stress ra hinuon ka ug mabug-atan pag-ayo. Ug posibleng maapektahan ang imong panglawas ug emosyon kon dili ka balanse sa paggamit sa imong panahon.

12. Samtang naningkamot ka nga ‘gamiton ang imong panahon sa kinamaayohang paagi,’ unsang mga kalihokan ang kinahanglan nimong iapil? (Efeso 5:​15, 16)

¹² Basaha ang Efeso 5:​15, 16. Sa kadaghan sa mga butang nga kinahanglan nimong himoon, dili sayon ang paggamit sa imong panahon sa “kinamaayohang paagi.” Pananglitan, gawas pa sa imong pag-eskuwela, kinahanglan kang mogahin ug panahon sa pagpakig-uban sa mga igsoon ug sa imong pamilya. (Sal. 133:1; Prov. 18:1) Angay pod nimong unahon ang imong espirituwalidad. (Mat. 6:33) Basin naa pod kay mga responsibilidad sa pamilya o trabaho nga angayng atimanon. Gawas pa ana, nagkinahanglan kag saktong pahulay ug exercise aron maatiman nimo ang imong panglawas. (Eccl. 4:6; 1 Tim. 4:8) Kining tanan mahimo lang kon kamao kang mo-budget sa imong panahon.

13. Unsay imong mahimo aron magamit nimo ang imong panahon sa kinamaayohang paagi?

¹³ Kon unsay imong mahimo sa dili pa mokuhag dugang nga edukasyon. Ang Bibliya nag-ingon nga ang pagplano moresultag kalamposan. (Prov. 21:5) Maong importante nga naa kay realistikong plano sa dili pa mopadayog eskuwela. Aron matabangan ka aning bahina, hunahunaa ang miaging mga tuig nga nag-eskuwela ka. Pangutan-a ang imong kaugalingon: ‘Nagamit ba gyod nakog maayo ang akong panahon, o naa koy napasagdan nga importanteng mga butang?’ Kon gibati nimo nga naa kay kinahanglang pauswagon niining bahina, unsa mang mga kausaban ang imong himoon karon? Paneguroa nga naa kay maayong eskedyul aron naa kay panahon para sa tanan nga kinahanglan nimong himoon.c

14. Unsang mga pangutana ang makatabang nimo nga masusi ang imong kaugalingon?

¹⁴ Samtang padayon kang nag-eskuwela, regular nga susiha ang imong kaugalingon. Pananglitan, puwede nimong pangutan-on ang imong kaugalingon: ‘Busy na ba kaayo ko nga wala na koy panahon sa pagpahulay ug pag-exercise? Naa pa ba koy panahon nga makig-uban sa mga igsoon? Kaya ra ba nakong humanon ang akong mga homework? Kon dili, tungod ba kay daghan kaayo kog himoonon, o kay ako ning giunyaunya? Unsa pod kahay ikaingon sa uban, apil na sa akong pamilya, bahin sa akong paggamit sa panahon?’ Bisag unsa may kahimtang—kon kinahanglan ba nimong usbon ang imong eskedyul o kinahanglan lang kag dugang disiplina sa kaugalingon—angay kang molihok dayon. Puwede pa gani kang makig-estorya sa uban nga maayong mo-budget sa ilang panahon.—Prov. 11:14.

PADAYON SA ‘PAGLAKAW UBAN SA MGA MAALAMON’

15. Unsa pay posible nimong maatubang sa eskuwelahan?

¹⁵ Kon nganong lisod ning himoon. Samtang nagpadayon kag eskuwela, ang imong mga classmate makigsuod tingali nimo ug paubanon pa gani ka sa ilang mga laag. Kay sige man mog kuyog sa klase ug parehas pa gyod mog edad ug mga hilig, tingali ganahan pod kang makig-uban nila. Basin ganig mas komportable pa ka nila kay sa ubang mga igsoon. Pero kinahanglan kang mag-amping. Ngano? Kay bisag parehas mog kurso, dili mo parehas ug mga prinsipyo. Ug kon magsige kag uban nila, kadugayan masundog na nimo ang ilang panghunahuna. (1 Cor. 15:33) Tinuod gyod na. Mao nay naeksperyensiyahan ni Michael nga nakahuman ug upat ka tuig nga electrical training. Siya miingon, “Kay kapig 40 ka oras kada semana man nakong kauban ang mga tawo nga bastos, hilas ug sinultihan, dili maayog ginapaminawan nga music, ug way tahod sa mga babaye, anam-anam ko nilang naimpluwensiyahan hangtod nga dili na kaayo ni daotan para nako.”

16. Unsay gipasabot sa ‘paglakaw uban sa mga maalamon?’ (Proverbio 13:20)

¹⁶ Basaha ang Proverbio 13:20. Ang Bibliya nagpasidaan nato nga delikado kaayo kon makig-uban ta sa mga tawo nga dili nato parehas ug mga prinsipyo. Sa laing bahin, kini nag-ingon nga “ang naglakaw uban sa mga maalamon mahimong maalamon.” Klaro kaayo ang leksiyon: Dakog epekto nato kon kinsay pirme natong kauban, maayo man sila o dili. Busa importante kaayo nga makigsuod lang ka niadtong mga tawo nga naghunahuna gyod sa imong kaayohan—kadtong mga tawo nga matinumanong nag-alagad kang Jehova sama nimo.—Sal. 101:​6, 7; 119:63.

17. Unsay imong mahimo aron malikayan ang daotang pagpakig-uban?

¹⁷ Kon unsay imong mahimo sa dili pa mokuhag dugang nga edukasyon. Hunahunaa daan kon asa ra taman ang imong pagpakig-uban sa mga dili magtutuo. Ang igsoon nga si Trenton miingon: “Bisag maayo ang akong tinagdan sa akong mga classmate, dili ko makig-uban nila human sa klase. Classmate ra gyod ang akong tan-aw nila, dili suod nga mga higala.” Sama kang Trenton, unsa poy imong himoon aron malikayan ang wala kinahanglanang pagpakig-uban nila? Aron matubag na, puwede nimong hunahunaon ang miaging mga tuig nga nag-eskuwela pa ka. Pangutan-a ang imong kaugalingon: ‘Unsa may akong gihimo sa una aron dili ko sobrang masuod sa akong mga classmate?’ Kon gibati nimo nga naa pa kay kinahanglang pauswagon niining bahina, unsa mang mga kausaban ang imong himoon? Himoang determinasyon nga padayong ‘maglakaw uban sa mga maalamon’ ug likayan ang pagpakig-uban niadtong mga wala mahigugma kang Jehova.d

18. Unsa nga mga pangutana ang makatabang nimo nga masusi ang imong kaugalingon? (Tan-awa sab ang hulagway.)

¹⁸ Samtang nag-eskuwela ka, regular nga susiha ang imong kaugalingon. Puwede nimong pangutan-on ang imong kaugalingon: ‘Nasuod na ba kaayo ko sa akong mga classmate? Nasundog na ba nako ang ilang binuhatan, sinultihan, ug panghunahuna? Unsa pod kahay tan-aw ni Jehova nako aning bahina?’ (Sal. 1:1) Kon namatikdan nimo nga anam-anam na nimo silang nasundog, ayaw nig balewalaa. Lihok dayon. Seguroa nga ang imong suod nga mga higala kadto lang mga nahigugma kang Jehova. Ayaw pod kahadlok nga mosangyaw sa imong mga classmate, kay mas naa kay kahigayonan nga matudloan sila bahin sa kamatuoran.

PANGANDAM DAAN

19. Sa dili pa ka mokuhag dugang nga edukasyon, unsaon nimo pagpangandam aron makaya nimo ang bisan unsang kalisdanan nga posible nimong maatubang? Iilustrar.

¹⁹ Ang eksperyensiyadong hiker mangandam gyod sa dili pa mosakag bukid. Bisag dili niya matagna ang tanang kalisdanan nga posible niyang maatubang, ang importante kondisyon siya, nagsul-ob siyag saktong sinina ug mga equipment, ug naa siyay tumong—nahibalo siya kon asa siya paingon. Ingon ana pod kon bahin sa atong pagkuhag dugang nga edukasyon. Kinahanglan nga magpabilin tang lig-on sa espirituwal, isul-ob nato ang “kompletong armadura gikan sa Diyos,” ug klaro nato kon unsa gyoy atong tumong sa pag-eskuwela. Tumong nato dili ang pagkahimong dato o sikat niining kalibotana, kondili ang paghimaya kang Jehova sa bisan unsa nga atong himoon.—Efe. 6:​11-13; 1 Cor. 9:​26, 27; 10:31.

20. Sa unsang paagi ‘padayon nimong masulayan kon naa ba ka sa pagtuo’?

²⁰ Ang Bibliya nagdasig nato: “Padayong sulayi kon naa ba mo sa pagtuo; padayong pamatud-i kon unsa mo sa inyong kaugalingon.” (2 Cor. 13:5) Mapadapat nimo ni nga prinsipyo samtang nag-eskuwela ka. Regular nga susiha ang imong kaugalingon. Pananglitan, napadayon pa ba gihapon nimo ang imong maayong espirituwal nga rutina? Naprotektahan pa ba gihapon nimo ang imong panghunahuna gikan sa sayop nga mga ideya ug pilosopiya niining kalibotana? Na-budget ba nimog maayo ang imong panahon? Nakigsuod ba ka sa mga igsoon ug naglikay sa wala kinahanglanang pagpakig-uban sa mga dili magtutuo? Sa tinuod lang, kinahanglan nimong konsiderahon ni nga mga pangutana, nag-eskuwela man ka, nagtrabaho, o bisag unsa pay imong kahimtang. Magmadeterminado nga magpabiling lig-on sa espirituwal sa tanang bahin sa imong kinabuhi. Makasalig gyod ka nga panalanginan ni Jehova ang tanan nimong paningkamot!—Prov. 3:​5, 6.