Tahora ang Desisyon sa Uban

1-2. Nganong ang atong personal nga mga desisyon lahi usahay sa ubang Kristohanon?

NAKASULAY ba ka nga gihukman ka sa uban tungod sa desisyon nga imong gihimo? Naa pod bay higayon nga gihukman nimo ang desisyon sa uban? Seguradong daghan nato ang nakasinati o nakahimo ani.

² Dili ta matingala nga usahay ang atong desisyon lahi sa desisyon sa ubang mga igsoon. Ngano? Kay managlahi ta. Kada usa nato naay lainlaing opinyon—depende sa atong naandan nga kultura, gidak-an nga pamilya, ug personal nga mga eksperyensiya. Pero bisag managlahi tag opinyon, dili nato tugotan nga makawala ni sa kalinaw ug panaghiusa diha sa kongregasyon.—Efe. 4:3.

3. Ngano tingaling mahukman nato ang usa ka igsoon sa desisyon nga iyang gihimo?

³ Kon dili ta uyon sa desisyon sa usa ka igsoon, basin mobati ta nga kinahanglan nato siyang kombinsihon nga usbon ang iyang hunahuna o basin ipanulti nato sa uban ang atong opinyon bahin sa iyang desisyon. Tingali maayo ang atong intensiyon. Gimahal nato ang mga igsoon ug gusto lang nato kon unsay maayo para nila. (Prov. 17:17) Maong dili nato gusto nga makahimo silag desisyon nga mahayan nila sa ulahi o nga makadaot sa ilang espirituwalidad.

4-5. Unsay angay natong hinumdoman kon ang desisyon sa usa ka igsoon lahi tingali sa kon unsay atong himoon?

⁴ Angay ba tang makig-estorya sa igsoon kon dili ta mouyon sa iyang desisyon? Aw, depende. Pananglitan, kon ang iyang planong himoon supak sa giingon sa Bibliya, mahigugmaon nato siyang tabangan nga mausab ang iyang panghunahuna. (Prov. 27:​5, 6) Pero komosta kon ang iyang planong himoon dili ra supak sa mga balaod sa Diyos ug lahi lang gyod sa atong himoon kon kitay naa sa iyang kahimtang? Kon mao, makatabang nato ang temang teksto niining artikuloha: “Ayawg hukmi kadtong lahig opinyon.”—Roma 14:1.

⁵ Bisan pa ana, malisdan tingali gihapon tag dawat sa desisyon sa uban. Maong niining artikuloha, atong hisgotan kon nganong angay natong tahoron ang desisyon sa uban ug kon unsaon nato na paghimo. Pero sa dili pa, hisgotan una nato ang pipila ka situwasyon diin posible natong mahukman ang mga igsoon sa ilang personal nga mga desisyon.

MGA SITUWASYON DIIN POSIBLENG MAHUKMAN NATO ANG MGA IGSOON

6-7. Unsa nga mga situwasyon diin posible natong mahukman ang uban sa ilang desisyon? Paghatag ug pananglitan.

⁶ Sama sa atong gihisgotan ganina, maghunahuna tingali ta nga sakto ang atong opinyon bahin sa pipila ka butang tungod sa atong mga naandan o naeksperyensiyahan. Basin magtuo pa gani ta nga ang uban parehas natog hunahuna, pero dili diay to. Konsideraha ang mosunod nga mga situwasyon. Situwasyon 1: Sa wala pa ma-Saksi ang brader, nagdako siya nga ang iyang papa palahubog kaayo. Sa tapoktapok, nakita sa brader ang ubang igsoon nga nag-inom ug makahubog nga ilimnon. Wala gyod siya malipay ug iya silang giingnan nga sayop ang ilang gihimo. Situwasyon 2: Ang usa ka sister naulian sa iyang grabeng sakit. Sa ulahi, nahibaloan niya nga ang iyang amiga nadayagnos sa samang sakit. Kay gusto niyang motabang, iyang gipresyur ang iyang amiga nga sundon kon unsay iyang gihimo—pananglitan, kon unsa nga mga pagkaon ang angayng kaonon o likayan o kon unsa nga paagi sa pagtambal ang makatabang niya. Situwasyon 3: Ang usa ka brader membro kaniadto sa bakak nga relihiyon, ug dili na gyod siya gusto nga mobalik ani. Dihang nahibaloan niya nga ang usa ka igsoon mitambong ug seremonyas sa lubong diha sa simbahan, napandol siya.a

⁷ Konsideraha ang lain pang mga situwasyon. Situwasyon 4: Sukad sa pagkabata, naandan sa brader nga ang mga lalaki dili magpabungot o ang mga babaye dili mag-slacks kon motambong ug pormal nga mga okasyon. Bisag nahibalo na ang brader sa kausaban sa atong panglantaw bahin ani, pirme gihapon siyang moingon nga ang mga brader dili gyod angayng magpabungot ug ang mga sister kinahanglan gyong magsayal kon makigbahin sa espirituwal nga mga kalihokan. Situwasyon 5: Ang usa ka ansiyano naay nailhang brader nga mikuhag dugang nga edukasyon ug sa ulahi miundang sa pag-alagad. Karon ang usa ka batan-ong brader sa ilang kongregasyon nagplano nga mokuhag dugang nga edukasyon. Nabalaka ang ansiyano maong iyang gisulayag kombinsir ang batan-ong brader ug ang iyang mga ginikanan nga usbon ang ilang desisyon.

8. (a) Unsa kahay hinungdan kon nganong ang usa ka ginikanan mokuwestiyon sa pamaagi sa ubang ginikanan? (b) Kon magsige tag kuwestiyon sa desisyon sa uban, unsa may epekto ana sa kongregasyon?

⁸ Hunahunaa pod ang usa ka situwasyon diin maapektohan tingali ang mga ginikanan. Situwasyon 6: Ingong ginikanan, naningkamot gyod ka nga mapadako ang imong mga anak “pinaagi sa disiplina ug tambag ni Jehova.” (Efe. 6:4) Pero ang ubang Saksi nga mga ginikanan morag luag ra sa ilang mga anak. Pananglitan, gitugotan nila ang ilang mga anak nga magabhian ug uli o magdulag dili bayolente nga mga video game. Gipalitan pod sa ubang ginikanan ug cellphone ang ilang gagmay pa nga mga anak. Tungod ana, basig maghunahuna na hinuon ang imong anak nga estrikto ra kaayo ka. Basig makaingon pa gani siya, “Nganong dili man ka parehas sa ubang mga ginikanan?” Kon mahitabo na, basin makuwestiyon na nimo ang pamaagi sa ubang mga ginikanan. Ang tinuod, puwede gyong moresultag dili pagsinabtanay kon dili ta uyon sa personal nga desisyon sa uban. Pananglitan, basin dili ta kauyon sa ilang paagi sa paggamit sa kuwarta, sa ilang pagsigeg bakasyon, o sa ilang gipili nga kalingawan. Pero dili gyod nato tugotan nga ang atong mga pagbati ug opinyon mahimong mas importante kay sa panaghiusa diha sa kongregasyon.

9. Unsay angay natong hinumdoman? (Tan-awa sab ang hulagway.)

⁹ Kon managlahi ang desisyon sa duha ka Kristohanon, wala ni magpasabot nga sakto na dayon ang usa ug sayop ang lain. (Roma 14:5) Tinuod, gidasig ta nga ‘maghunahuna nga may panag-uyon’ kon bahin sa mga sukdanan ni Jehova, pero wala ni magpasabot nga kinahanglang parehas gyod tag opinyon sa mga butang nga personal ra nga desisyon. (2 Cor. 13:11) Puwede nato nang ipakasama sa pagbiyahe paingon sa usa ka lugar. Sagad naay lainlaing ruta paingon sa usa ka destinasyon, ug siyempre pilion nato kon asa ta komportable ug kon unsay kaya sa atong budget. Sa susama, lainlain tingali tag desisyon bahin sa personal nga mga butang, pero usa ray atong destinasyon: ang paglipay kang Jehova. Busa dili gyod nato hukman ang uban sa ilang personal nga mga desisyon.—Mat. 7:1; 1 Tes. 4:11.

KON NGANONG ANGAY NATONG TAHORON ANG PERSONAL NGA DESISYON SA UBAN

10. Sumala sa Santiago 4:​12, unsay dili nato angayng himoon, ug ngano?

¹⁰ Ang Bibliya naghatag ug pipila ka rason kon nganong angay natong tahoron ang personal nga desisyon sa uban. Konsideraha ang usa ka rason. Wala tay awtoridad nga manghukom sa uban bahin sa personal nga mga butang. (Basaha ang Santiago 4:12.) Si Jehova ang Tighatag ug Balaod ug ang Maghuhukom. Siya lang ang may bug-os nga katungod sa pagtakdag mga sukdanan ug balaod para nato. Busa ang mga igsoon manubag kang Jehova, dili kanato. (Roma 14:10) Wala gyod tay katungod nga hukman o sawayon ang desisyon sa uban base lang sa atong kaugalingong sukdanan o mga opinyon.b

11. Sa unsang paagi makatabang ta nga padayong magkahiusa ang kongregasyon? (Tan-awa sab ang hulagway.)

¹¹ Gusto ni Jehova nga magkahiusa ang iyang mga alagad. Pero wala ni magpasabot nga kinahanglang magkaparehas ta sa tanang butang. Gani, ganahan si Jehova nga lainlain ang iyang makita, maong ang iyang gipanglalang dili eksaktong magkaparehas. Pananglitan, bisag ang mga dahon sa usa ka kahoy parehas ra tan-awon, ang tinuod magkalahi sila. Hunahunaa pod ang mga tawo. Sa kapig walo ka bilyong tawo sa kalibotan, wala gyoy magkaparehas ug hitsura ug kinaiya. Gilalang ta ni Jehova nga lahi sa usag usa. Dili niya gusto nga mora ra tag carbon copy sa uban. Pero gusto niya nga magkahiusa ta. Maong imbes nga magkabahinbahin, naningkamot ta nga magpabilin ang kalinaw. Mas importante para nato ang panaghiusa sa kongregasyon kay sa atong gusto ug mga opinyon.—Roma 14:19.

KON UNSAON NATO PAGPAKITAG PAGTAHOD SA DESISYON SA UBAN

12-13. Kon sa imong hunahuna nakahimog “sayop nga lakang” ang usa ka igsoon, unsay angay nimong hinumdoman? (Galacia 6:1; tan-awa sab ang kahong “Kon Gibati Nimo nga Sayop ang Desisyon sa Uban.”)

¹² Dihang mohimog personal nga desisyon ang uban. Pangutan-a ang imong kaugalingon, ‘Nakahimo ba siyag “sayop nga lakang”?’ Kon sayop gyod ang iyang nahimo, sa ato pa supak sa giingon sa Bibliya, pangutan-a ang imong kaugalingon, ‘Kinahanglan ba nga ako gyoy motul-id niya, o naay laing mas haom nga motabang niya?’ Kon kuwalipikado kang motabang, paningkamoti nga matul-id nimo siya sa malumong paagi. (Basaha ang Galacia 6:1.) Pero sagad makita tingali nimo nga dili ra gyod sayop ang iyang nahimo—lahilahi lang gyod mog hunahuna. Kon mao nay kahimtang, ayawg kuwestiyona o sawaya ang iyang desisyon. Hinuon, tugoti siyang modesisyon para sa iyang kaugalingon, ug ayaw siyag hukmi.—Roma 14:​2-4.

¹³ Hunahunaa ni: Kon mangaon mo sa imong higala diha sa restawran, pugson ba nimo siya nga kinahanglang parehas gyod mog orderon? Aw, dili. Tahoron nimo ang iyang katungod nga mopili, total siya bitaw ang mokaon. Sa imong bahin, dili pod tingali ka malipay kon but-an ka niya sa gusto nimong kaonon. Sa susama, makapakita tag pagtahod sa uban kon tugotan nato sila sa paghimog personal nga mga desisyon ug dili nato ipamugos ang atong mga opinyon.

14. Dihang mohimo kag personal nga mga desisyon, unsay imong buhaton aron padayong magkahiusa ang kongregasyon? (1 Corinto 8:​12, 13)

¹⁴ Dihang mohimo kag personal nga mga desisyon. Makatabang ka nga padayong magkahiusa ang kongregasyon kon maningkamot ka nga dili makapandol sa uban. (Basaha ang 1 Corinto 8:​12, 13.) Kasagaran, nahibalo ra tingali ka nga ang desisyon nga imong himoon “subay sa balaod,” sa ato pa, wala ra ni sayop. Pero kon makapandol ni sa imong igsoon, naa ba ni “kaayohan”?c (1 Cor. 10:​23, 24) Niana nga mga kahimtang, imbes nga barogan ang imong katungod, basin puwede kang mag-adjust para sa uban. (Roma 15:1) Pero dili ba gihisgotan man nato nga kinahanglang tahoron sa uban ang atong personal nga mga desisyon? Aw, oo. Kinahanglan nilang tahoron ang atong mga desisyon, sama nga gitahod nato ang ila. Pero angay pod natong hinumdoman ang tambag sa Roma 12:​18, nga nag-ingon: “Kutob sa mahimo, pakigdait mo sa tanang tawo.” Busa himoon nato ang tanan natong maarangan nga dili matugaw ang kalinaw sa mga igsoon ug malikayan nga makapandol sa uban.

15. Sa unsang paagi ang mga ansiyano makatabang nga padayong magkahiusa ang kongregasyon? (1 Corinto 4:6)

¹⁵ Ang mga ansiyano motahod sa desisyon sa uban. Makatabang sila nga padayong magkahiusa ang kongregasyon kon dili sila mohimog kaugalingon nilang mga balaod bahin sa personal nga mga butang ug kon dili sila ‘mosaylo sa mga butang nga nasulat’ diha sa Bibliya. (Basaha ang 1 Corinto 4:6.) Nagpasabot pod ni nga dili sila molapas sa binase sa Bibliya nga mga tambag diha sa atong mga publikasyon. Dugang pa, kon naay igsoon nga moduol nila aron magpatambag, ang mga ansiyano mag-amping nga dili mosalig sa ilang kaugalingong mga eksperyensiya. Hinuon, ibase nila ang ilang tambag gikan sa Pulong sa Diyos.—Isa. 48:​17, 18.

16. Sa unsang paagi ang usa ka ansiyano makapakitag pagtahod sa nadesisyonan panahon sa ilang miting?

¹⁶ Tahoron pod sa usa ka ansiyano kon unsay nadesisyonan panahon sa miting. Ngano? Kay sa wala pa sila mohimog desisyon, ang mga ansiyano nag-ampo una alang sa giya sa balaang espiritu, ug ilang gisusi pag-ayo ang giingon sa Bibliya. Maong dihang naa nay nadesisyonan, ang matag ansiyano kinahanglang mosuportar niana bisan pag lahi tingali ni sa iyang opinyon. (Efe. 5:17) Dugang pa, ang mga ansiyano maningkamot nga mosunod pag-ayo kon unsa gyoy direksiyon. Busa dili sila magpokus sa usa lang ka sentence sa atong publikasyon aron pamatud-an ang ilang kaugalingong opinyon, nga dili gani magsusi pag-ayo kon unsa gyoy gihisgotan sa tibuok artikulo.

17. Unsay kaayohan kon tahoron nato ang desisyon sa uban?

¹⁷ Sa ato nang nahisgotan, dili ta managsama. Ang kada usa nato lainlaig gusto ug mga opinyon. Ug mao nay nakanindot. Enjoy kaayo tang magkauban kay lahilahi man tag kinaiya, kahimtang sa kinabuhi, o kultura. Busa imbes nga magkabahinbahin ta tungod ani, maningkamot ta nga magpabiling suod sa mga igsoon. Mag-amping ta nga dili makapandol sa uban ug tahoron nato ang ilang personal nga mga desisyon. Kon ato ning himoon, maayo gyod ang resulta. Magmalipayon ug magkahiusa ang tibuok kongregasyon.—Sal. 133:1; Mat. 5:9.