Magmalipayon Gihapon Ta Bisag Gidumtan

1. Unsay giingon ni Jesus sa iyang Wali sa Bukid nga nakapatingala sa mga tawo?

SA IYANG Wali sa Bukid, si Jesus miingon: “Malipayon mo dihang dumtan mo sa mga tawo.” (Luc. 6:22) Natingala gyod seguro ang mga nakadungog sa giingon ni Jesus, kay siyempre walay ganahan nga dumtan sila sa uban. Nganong nakasulti man si Jesus adto? Importante nga mahibalo ta sa tubag, kay ang mga sumusunod ni Jesus karon gidumtan sa daghang tawo. Busa atong hisgotan kon nganong gidumtan ta ug kon nganong mahimo gihapon tang malipayon bisan pa niana.

KON NGANONG GIDUMTAN TA

2-3. Unsa ang usa ka rason kon nganong gidumtan ang tinuod nga mga Kristohanon, ug nganong ang pagkahibalo ani makapausab sa atong panglantaw sa mga nagalutos nato? (Juan 16:​2, 3)

² Gidumtan ta kay nagsimba ta kang Jehova. Si Jesus miingon bahin niadtong mga naglutos o nagpatay pa gani sa iyang mga sumusunod: “Wala . . . sila makaila sa Amahan o kanako.” (Basaha ang Juan 16:​2, 3.) Kinsa man gyoy hinungdan kon nganong gilutos ang katawhan sa Diyos? Si Satanas—“ang diyos niini nga sistema sa mga butang.” (2 Cor. 4:​3, 4) Iyang gibutaan ang mga tawo aron dili sila mahibalo sa kamatuoran bahin kang Jehova. Giimpluwensiyahan pod niya sila nga lutoson kadtong mga nakaila o nahigugma sa Diyos. (Juan 8:​42-44) Nganong maayo nga mahibalo ta ani? Ang pagkahibalo ani makatabang nato nga dili dumtan ang mga naglutos nato, kay nasayod ta nga gilimbongan ra sila ni Satanas.

³ Konsideraha ang pananglitan ni Pavel,a nga nagpuyo sa nasod diin gidili ang atong buluhaton. Kay matinumanon siyang nagsimba kang Jehova, siya gidakop, gikulata pag-ayo, ug gibartolina sulod sa daghang bulan. Siya miingon: “Klaro kaayo nga si Satanas ug ang mga demonyo ang naningkamot nga pahunongon ta sa pagsimba kang Jehova. Nakita man god nako nga kadaghanan sa mga nagtrabaho sa prisohan wala ra magdumot nato. Igo ra nilang gihimo ang ilang trabaho.” Diha poy brader nga taga-Croatia nga nakaeksperyensiyag grabeng paglutos gikan sa iyang dili Saksing mga ginikanan. Siya miingon: “Nakita nako nga si Satanas ang akong tinuod nga kaaway, dili ang akong mga ginikanan.”—Efe. 6:12.

4. Unsay atong makat-onan sa ehemplo ni Jesus ug sa tinun-ang si Esteban? (Tan-awa sab ang hulagway.)

⁴ Wala ta magdumot niadtong mga nagasupak nato. Hinuon, mapalihok pa gani ta nga iampo sila. (Mat. 5:44) Hunahunaa ang ehemplo ni Jesus ug sa tinun-ang si Esteban. Dihang gilansang si Jesus sa Romanong mga sundalo diha sa estaka, siya miampo: “Amahan, pasayloa sila.” (Luc. 23:34) Gihangyo ni Jesus si Jehova nga pasayloon ang mga sundalo nga gisugo sa pagpatay kaniya. Naghunahuna pod tingali siya sa mga tawo nga nadala ug naimpluwensiyahan sa relihiyosong mga lider nga nangusog nga patyon siya. Nakasabot si Jesus nga wala gyod sila mahibalo sa ilang gihimo. Sa susama, giampo ni Esteban kadtong mga gustong mopatay niya. Iyang gihangyo ang Diyos nga pasayloon sila. (Buh. 7:​58-60) Gitubag ba ni Jehova ang pag-ampo ni Jesus ug ni Esteban? Oo. Daghan niadtong mga nagpapatay kang Jesus ang sa ngadtongadto naghinulsol, nagpakitag pagtuo kaniya, ug nagpabawtismo. (Buh. 2:​36-41) Ug kon bahin sa mga miuyon sa pagpatay kang Esteban, ang Bibliya naghisgot kang Saulo nga taga-Tarso, kinsa nahimong Kristohanon ug nagbasol pag-ayo sa iyang gihimo kaniadto tungod sa iyang kawalay-alamag.—1 Tim. 1:13.

5. Unsay atong makat-onan sa eksperyensiya ni César?

⁵ Dihang iampo pod nato karon kadtong mga nagasupak sa atong pagsimba, makasalig ta nga paminawon ug tubagon ni Jehova ang atong mga pag-ampo. Konsideraha ang eksperyensiya ni César nga taga-Venezuela. Ang iyang papa supak kaayo sa kamatuoran. Si César miingon: “Si Mama buotan kaayo. Bisag busy kaayo siya sa pag-alagad, wala niya pasagdi si Papa. Gitudloan mi niya sa akong mga igsoon nga tahoron si Papa. Iya pod ming giingnan nga himoon ang ipabuhat ni Papa basta dili lang ni supak sa Bibliya.” Paglabay sa daghang tuig, anam-anam nga nausab ang amahan ni César. Si César miingon: “Diha toy higayon nga kinasingkasing kong nag-ampo bahin kang Papa. Human adto, ako siyang gipangutana kon gusto ba niyang magtuon sa Bibliya. Wala gyod ko magdahom nga mosugot siya. Lipay kaayo ko.” Sa ngadtongadto, nabawtismohan ang amahan ni César. Tinuod, dili tanang supak sa atong pag-alagad ang ma-Saksi gyod, sama sa nahitabo sa amahan ni César. Pero ang uban nila makaapresyar sa atong maayong sinultihan ug binuhatan, ug anam-anam nga mausab ang ilang hunahuna bahin nato. Malipay gyod ta ana. Pero mas malipay pa gyod ta dihang si Jehova, ang maluluy-ong “Maghuhukom sa tibuok yuta,” magkabig nila sa kamatuoran.—Gen. 18:25.

6. Base sa Marcos 13:​13, unsa pay laing rason kon nganong gidumtan ta?

⁶ Gidumtan ta kay gisuportahan nato ang pagmando ni Jesus. Si Jesus miingon nga ang tinuod nga mga Kristohanon dumtan sa tanang tawo “tungod sa [iyang] ngalan.” (Basaha ang Marcos 13:13.) Unsay girepresentahan sa “ngalan” ni Jesus? Kini nagtumong sa iyang reputasyon ug sa iyang awtoridad ingong Hari sa Gingharian sa Diyos. Busa gidumtan ta sa mga tawo nga misalig sa tawhanong mga magmamando imbes sa gipili ni Jehova nga maoy magmando sa tibuok uniberso—si Jesu-Kristo. Si Jesus nagsugod nag mando ingong Hari sa Gingharian sukad niadtong 1914. Sa dili madugay, iya nang wagtangon ang tanang gobyerno nga wala moila sa iyang awtoridad.

7-8. Nganong ang ubang alagad ni Jehova nakaeksperyensiyag pagsupak ug pagbugalbugal? (Juan 15:​18-20) (Tan-awa sab ang mga hulagway.)

⁷ Gidumtan ta kay wala ta magpaimpluwensiya sa kalibotan ni Satanas. Si Jesus miingon nga ang iyang mga sumusunod dumtan kay “dili [sila] bahin sa kalibotan.” (Basaha ang Juan 15:​18-20.) Sama sa mga Kristohanon sa unang siglo, wala nato sundoga ang daotang pamatasan, binuhatan, ug sinultihan sa dili diyosnong mga tawo. Tungod ani, daghang igsoon ang gibugalbugalan ug gisaway diha sa trabahoan o eskuwelahan. (1 Ped. 4:​3, 4) Pero makapalipay kay ang uban niadtong dili maayog tinamdan nato nausab sa ulahi ug nakadayeg sa atong baroganan.

⁸ Hunahunaa ang eksperyensiya ni Ignacio nga taga-Central America. Dihang nag-eskuwela pa siya, dihay maestro nga grabeng makabugalbugal niya tungod sa iyang pagsunod sa taas nga mga sukdanan ni Jehova. Pero sa wala pa mo-graduate si Ignacio, gipangutana siya sa iyang maestro kon nganong nakaya niya nga mosunod gihapon sa mga prinsipyo sa Bibliya bisan pag dili maayog pagtratar niya ang mga tawo. Si Ignacio miingon nga giisip niya ingong proteksiyon ang mga sugo sa Diyos. Dayon giimbitar niya sa tigom ang maestro. Nakurat si Ignacio kay mitambong gyod siya! Nakadayeg kaayo ang maestro sa gugma nga gipakita sa mga igsoon, maong padayon siyang mitambong sa mga tigom ug nagpa-Bible study. Wala madugay, siya na pod ang nakaeksperyensiyag pagsupak. Pero padayon siyang miuswag sa espirituwal ug sa ngadtongadto nabawtismohan.

9-10. (a) Unsa pay laing rason kon nganong lahi kaayo ta sa mga tawo sa kalibotan? (b) Unsay atong makat-onan sa ehemplo ni apostol Pablo?

⁹ Lahi kaayo ta kon itandi sa kalibotan ni Satanas kay wala ta mag-apil-apil sa politika ug giyera. (Juan 18:36) Bisag gipadapat nato ang prinsipyo sa Roma 13:1 nga mosunod sa mga balaod sa gobyerno, neyutral ta sa politika. Tungod ana, dili ta modagan sa pagkakandidato o mobotar. Nganong mao nay atong baroganan? Kay maunongon ta kang Jehova ug sa iyang Gingharian nga gimandoan ni Jesu-Kristo. Daghang Saksi ni Jehova ang napriso tungod sa ilang pagtuo. Pero padayon gihapon silang nagsangyaw. Ilang gisundog si apostol Pablo kinsa padayong nagsangyaw bisag daghang tuig siyang gipriso. (Buh. 24:27; 28:​16, 30) Iyang gisangyawan ang tanan nga maminaw, apil na ang mga guwardiya, tag-as nga opisyal, gobernador, hari, ug bisan gani ang mga opisyales sa Romanong Emperador nga si Nero.—Buh. 9:15.

¹⁰ Sa samang paagi, ang atong mga igsoon nga napriso nagsangyaw sa tanan nga maminaw, apil na sa mga huwes, opisyales sa gobyerno, ug mga polis. Pananglitan, dihay brader nga kapig unom ka tuig nga napriso tungod sa iyang pagkaneyutral sa politika. Pero iyang giisip ang iyang pagkapriso dili ingong silot, kondili ingong asaynment gikan kang Jehova aron pangitaon ang mga tawo nga sinserog kasingkasing. Sama niini nga brader, malipay gyod ta kon gamiton ta ni Jehova aron masangyawan kini nga klase sa mga tawo. (Col. 4:3) Karon atong konsiderahon ang mga rason kon nganong magmalipayon gihapon ta bisag gidumtan ta tungod sa atong pag-alagad kang Jehova.

KON NGANONG MALIPAY GIHAPON TA BISAG GIDUMTAN

11. Sa unsang paagi ang paglutos makapalig-on sa atong pagtuo? Paghatag ug pananglitan.

¹¹ Nahibalo ta nga ang pagdumot sa mga tawo kanato maoy katumanan sa tagna sa Bibliya. Sa pinakaunang tagna nga narekord sa Bibliya, si Jehova miingon nga si Satanas ug ang iyang kaliwat—kadtong mga nailalom sa iyang impluwensiya—magdumot niadtong nahigugma ug nag-alagad kang Jehova. (Gen. 3:15) Tinuod gyod ni nga tagna. Gani kanunayng gipasiugda ni Jesus nga dumtan ta sa mga tawo, base sa atong mabasa sa upat ka Ebanghelyo. (Mat. 10:22; Mar. 13:​9-12; Luc. 6:​22, 23; Juan 15:20) Ang ubang magsusulat sa Bibliya naghisgot pod bahin ani. (2 Tim. 3:12; Sant. 1:2; 1 Ped. 4:​12-14; Jud. 3, 17-19) Maong dili ta matingala kon supakon ta. Hinuon, malipay ta kay natuman ang tagna sa Bibliya. Nagpakita lang ni nga nag-alagad gyod ta sa matuod nga Diyos. Ang sister nga nagpuyo sa nasod diin gidili ang atong buluhaton miingon: “Dihang midesisyon ko nga moalagad kang Jehova, nahibalo na ko daan nga makaatubang kog mga pagsupak. Maong dihang nahitabo ni, wala ra ko matingala o maguol pag-ayo.” Ang iyang bana maoy usa sa daghang misupak niya. Gimaltratar siya ug gisunog pa gani ang iyang Bibliya ug ang ubang publikasyon. Pero imbes nga mahadlok, mas milig-on hinuon ang iyang pagtuo. (Heb. 10:39) Siya miingon: “Kay gitagna na man daan ang paglutos, nahibalo ko nga dili gyod ni mapugngan; mahitabo gyod ni. Pero tungod ani, mas kombinsido ko nga naa ko sa tinuod nga relihiyon.”

12. Unsay nakatabang sa usa ka brader nga malahutay ang mga paglutos?

¹² Bisag nahibalo na ta daan nga lutoson ta, dili tingali gihapon sayon ang paglahutay. Konsideraha ang gisulat sa usa ka brader bahin sa iyang kahimtang didto sa prisohan: “Usahay, maguol kaayo ko ug mabalaka, maong mohilak na lang ko.” Unsay nakatabang sa maong brader? “Nakatabang gyod nako ang pag-ampo. Moampo ko inigmata nako kada buntag ug dihang naay lisod nga mga situwasyon anang adlawa. Ug kon maglagot ko tungod sa mga inhustisya nga akong nasinatian, manirado ko sa kasilyas ug mag-ampo.” Unsa pay laing nakatabang niya? Iyang gipamalandong ang maayong ehemplo sa matinumanong mga alagad ni Jehova kaniadto ug sa modernong panahon. Tungod adto, nalahutay niya ang paglutos ug nabatonan ang kalinaw nga gisaad ni Jesus sa iyang mga sumusunod.—Juan 14:27; 16:33.

13. Unsay makatabang nato nga makalahutay bisan pag gidumtan ta sa kalibotan?

¹³ Ang atong gugma lig-on kaayo bisag gidumtan ta sa kalibotan. Gihigugma ni Jesus ang iyang Amahan sa tibuok niyang kasingkasing, bisan hangtod sa iyang kamatayon. Iya pong gimahal ang iyang mga higala. (Juan 13:1; 15:13) Kon ingon ana pod ka lig-on ang atong gugma para kang Jehova ug sa mga igsoon, makaya nato ang mga paglutos. Sa unsang paagi? Atong konsiderahon ang pananglitan ni apostol Pablo.

14. Unsay nakatabang kang Pablo nga makapabiling lig-on bisag hapit na siyang patyon?

¹⁴ Sa hapit nang patyon si Pablo, iyang gisulatan ang iyang suod nga higala nga si Timoteo: “Ang espiritu nga gihatag sa Diyos kanato wala maghimo kanato nga talawan, kondili kini naghatag kanatog gahom ug gugma.” (2 Tim. 1:7) Unsay gipasabot ni Pablo? Ang iyang giingon nagpasabot nga kon naa tay lawom nga gugma kang Jehova, andam tang moatubang sa bisan unsang lisod nga mga pagsulay. (2 Tim. 1:8) Ang gugma ni Pablo kang Jehova nakatabang niya nga mahimong maisogon ug maunongon, bisan sa mga situwasyon nga makapameligro sa iyang kinabuhi.—Buh. 20:​22-24.

15. Giunsa pagpakita sa atong mga igsoon karon ang ilang lig-ong gugma para sa usag usa? (Tan-awa sab ang hulagway.)

¹⁵ Gimahal gyod nato ang atong mga isigkamagsisimba nga nagpabiling lig-on bisan pa sa mga paglutos. Ang uban nila andam pa ganing ipameligro ang ilang kinabuhi para sa mga igsoon, sama sa gihimo ni Aquila ug Priscila para kang Pablo. (Roma 16:​3, 4) Pananglitan, sa Russia, daghan ang miadto sa mga korte aron dasigon kadtong mga igsoon nga gidakop. Dihang nakita sa usa ka sister nga daghan kaayong igsoon ang misuportar niya didto sa korte, natandog kaayo siya ug wala gani siya katingog tungod sa kalipay. Ang gugma nga gipakita sa mga igsoon nakapalig-on kaayo niya adtong panahona. Kini nga eksperyensiya nagpakita nga bisag unsa pa ka lisod ang mga pagsulay, makapabilin gihapon tang malipayon kay naa tay lig-on nga gugma.

16. Nganong miingon si apostol Pedro nga makapabilin gihapon tang malipayon bisag gilutos ta? (1 Pedro 4:14)

¹⁶ Nahibalo ta nga kon molahutay ta sa mga paglutos, mapalipay nato ang Diyos. (Basaha ang 1 Pedro 4:14.) Si apostol Pedro miingon nga bisag makasinati tag mga pagsupak o paglutos tungod sa atong pag-alagad sa Diyos, makapabilin gihapon tang malipayon. Ngano? Kay ang atong mga nasinatian nagpamatuod nga ‘ang espiritu sa Diyos naa kanato.’ Nahibalo kaayo si Pedro kon unsay bation kon madawat nato ang pag-uyon sa Diyos ug malahutay ang mga pagsulay. Wala madugay human sa Pentekostes 33 C.E., ang mga guwardiya sa templo sa Jerusalem gisugo sa pagdakop kang Pedro ug sa ubang apostoles tungod sa ilang pagsangyaw. Pero maisogong gidepensahan ni Pedro ang iyang pagtuo. (Buh. 5:​24-29) Ug bisan human sila pangbunali, wala gihapon sila mohunong sa pagsangyaw. Hinuon, nagmalipayon sila kay “giisip sila nga takos pakaulawan tungod sa [ngalan ni Jesus].” Sama nila, makapabilin gihapon tang malipayon bisag nakaatubang tag lisod nga mga pagsulay.—Buh. 5:​40-42.

17. Unsay giingon ni Jesus sa iyang mga tinun-an sa gabii una siya mamatay?

¹⁷ Sa gabii una mamatay si Jesus, iyang giingnan ang iyang mga tinun-an: “Kadtong nahigugma kanako higugmaon sa akong Amahan, ug higugmaon nako siya.” (Juan 14:21) Makapalipay gyong hunahunaon ang panahon diin wala nay magdumot nato tungod sa atong pag-alagad kang Jehova. Hinuon, ang tanan magpakita na kanatog gugma! (2 Tes. 1:​6-8) Pero sa pagkakaron, samtang naghulat ta anang panahona, hinaot mahupay ug mapalig-on ta sa pagkahibalo nga daghan tag rason nga magmalipayon bisag gidumtan.