Sundoga ang Kaisog ug Pagkamaunongon ni Benaias

Si Benaias maoy isog nga manggugubat nga nag-alagad kang Haring David ug Solomon. Bisag anak siya sa usa ka saserdote ug dili gyod unta tiggamitan ug mga hinagiban, miapil gihapon siya sa mga gubat para kang Jehova. Maisogon gyod si Benaias. Pananglitan, gipatay niya ang usa ka leyon diha sa gahong sa tubig ug nakapildi pod siyag higanteng Ehiptohanon. Dako kaayog pagsalig si David kang Benaias, ug gani gihimo siya ni David ingong pangulo sa iyang mga bantay.—2 Sam. 23:​20-23.

Si Benaias nagmaunongon gihapon kang David bisan niadtong mirebelde si Absalom ug Adonias. (2 Sam. 8:18; 15:18; 1 Hari 1:8) Ug bisan dihang tigulang na si David, miunong si Benaias kaniya pinaagi sa pagsuportar sa pagkahari ni Solomon. (1 Hari 1:​32-40) Oo, maunongon gyod si Benaias kang Jehova ug sa Iyang gitudlo nga mga hari bisan pag ang uban wala magpabiling maunongon.

Kita pod kinahanglang magpakitag kaisog sa pagpakig-away kang Satanas ug sa iyang mga sakop. Angay pod tang maningkamot nga padayong mosunod sa mga sukdanan ni Jehova. (Efe. 6:11; 1 Ped. 5:​8, 9) Ug bisan pag ang uban mobiya kang Jehova, padayon gyod tang mounong kaniya. Kon ato ning himoon, seguradong panalanginan ta ni Jehova.—2 Sam. 22:26.