33 JEHOIADA
Iyang Gidepensahan ang Hari nga Gipili ni Jehova
SI Jehoiada tigulang na pero kusgan pa gihapon siya, ug wala moawop ang iyang kadasig sa pag-alagad kang Jehova. Siya ang hataas nga saserdote sa templo sa Jerusalem ug ang nanguna sa katawhan sa Diyos sa pagsimba kang Jehova. Pero dili ni sayon kay daghan ang nagsimbag bakak nga mga diyos ug naghimog daotan.
Grabe ang pagkadaotan sa yuta tungod sa babaye nga ginganlag Atalia. Anak siya ni Haring Ahab sa Israel ug ni Rayna Jezebel, kinsa mga daotan kaayo maong gimando ni Jehova nga laglagon ang tanan nilang kaliwat. Bisag si Atalia naminyo sa hari sa Juda, iyang gidumtan ang putling pagsimba. Pagkamatay sa iyang bana, ang iyang anak ang mipuli ingong hari, pero gipapatay ni Jehova ang iyang anak. Dayon giilog ni Atalia ang trono, bisag mga lalaki lang ug mga kaliwat ni David ang gipili ni Jehova nga mahimong hari. Aron maseguro ang iyang pagmando, midesisyon siya nga patyon si bisan kinsa nga posibleng mahimong hari. Kay ang iyang mga apo nga lalaki manununod man sa trono, silang tanan iyang gipapatay.
Gipameligro sa hataas nga saserdote ug sa iyang asawa ang ilang kinabuhi aron mapanalipdan ang gamayng bata nga gustong patyon sa usa ka daotang rayna
Si Jehoiada naminyo sa usa ka batan-on ug maisogong babaye nga ginganlag Jehoseba (nailhan sab nga Jehosabet), nga anak sa usa sa mga hari sa Juda. Dili mosugot si Jehoiada ug Jehoseba nga mapuo ang tanang lalaki sa kaliwatan ni David. Nahibalo sila sa saad ni Jehova nga usa ka kaliwat ni David ang magmando hangtod sa hangtod! (2 Sam. 7:12, 13) Midesisyon si Jehoseba nga panalipdan ang usa sa maong mga manununod, usa ka batang lalaki nga wala pay usa ka tuig ang edad. Nagmaisogon siya ug gikawat ang bata gikan sa palasyo. Dayon iyang gidala ang bata ug ang yaya niini ngadto sa iyang bana, ang hataas nga saserdote. Mipili si Jehoiada ug kuwarto sa templo diin ilang matago ang bata.
Unom ka tuig nga gitagoan ni Jehoiada sa balay ni Jehova ang maong bata, si Jehoas. Iyang gipanalipdan ang maong bata. Dili gyod to sayon nga panahon kay kon madiskobrehan ni Atalia nga giluwas ug gitago ni Jehoiada ug sa iyang asawa ang bata, pamatyon gyod niya sila. Pero miabot ang panahon nga si Jehoiada kinahanglan na sab nga molihok nga maisogon. Iyang gipatawag ang lima ka maunongong pangulo sa kasundalohan ug gibutyag kanila kini nga sekreto: Buhi pa ang usa ka manununod sa trono ni David! Dayon gisugo sila ni Jehoiada nga magbutang ug 500 ka sundalo nga magguwardiya sa templo ug sa duol niini. Kini nga mga sundalo armadog mga taming ug hinagiban gikan sa templo, ug ilang gipalibotan ang bata samtang gipangunahan ni Jehoiada ang seremonyas sa pagkorona kang Jehoas ingong hari. Ang katawhan nanghugyaw sa kalipay. Pagkadungog ni Atalia niini, nagdalidali siyag dagan paingon sa templo.
Pag-abot ni Atalia sa hawanan sa templo, nasabtan dayon niya kon unsay nagakahitabo. Ug kay desperado siya nga magpabiling rayna, misulay siya nga pugngan si Jehoas nga mahimong hari. Siya misinggit: “Dunay panagkunsabo! Dunay panagkunsabo!”—bisag siya mismo ang nakigkunsabo aron mahimong rayna. Kon naglaom man siya nga tabangan sa mga tawo, nasayop gyod siya. Wala matarog si Jehoiada ug nagmaisogon siya. Iyang gisugo ang mga pangulo nga kuhaon ang daotang rayna ug dad-on pagawas sa templo. Ila siyang gidala sa gawas ug gipatay didto. Daan nang gimando ni Jehova nga “ang tibuok panimalay ni Ahab [laglagon].” (2 Hari 9:8) Posible nga si Atalia ang kataposan sa maong daotang pamilya nga gihukmang patyon.
Human mamatay si Atalia, diha pay laing importante nga gihimo si Jehoiada. Iyang gitabangan ang katawhan ug ang bata nga hari sa paghimog pakigsaad nga magmatinumanon sila kang Jehova nga Diyos. Dayon iyang gipalumpag ang templo ni Baal ug gipapatay ang saserdote niini. Human ana, naningkamot si Jehoiada sa pagbansay kang Jehoas nga mahimong maayo ug matinumanong hari. Maayo kaayong impluwensiya ang hataas nga saserdote hangtod sa kataposan sa iyang kinabuhi. Namatay siya sa edad nga 130 anyos. Gihatagan siya ug talagsaong kadungganan; gilubong siya uban sa mga hari nga nagmando sa Jerusalem.
Ikasubo, human mamatay ang matinumanong si Jehoiada, si Jehoas wala magpabiling matinumanon sa Diyos. Gisundog niya ang daotang mga prinsipe sa Juda nga nagsimbag bakak nga mga diyos, ug iyang giimpluwensiyahan ang katawhan nga mosimba sab sa maong mga diyos. Gitambagan siya sa mga propeta ni Jehova pero wala siya maminaw nila. Usa sa mga nagtambag niya mao si Zacarias nga anak ni Jehoiada. Iyang gipangutana ang katawhan: “Nganong inyong gilapas ang mga sugo ni Jehova?” Nasuko si Jehoas ug iyang gipapatay si Zacarias! Pero si Zacarias nagmaisogon hangtod sa iyang kamatayon, sama sa iyang amahan. Gatosan ka tuig sa ulahi, si Jesu-Kristo miingon nga si Zacarias matarong nga tawo. Sama sa iyang amahan nga si Jehova, si Jesus dili gyod malimot sa kaisog sa matinumanong mga lalaki ug babaye.
Basaha ang asoy sa Bibliya:
Pakighisgot:
Sa unsang mga paagi nga si Jehoiada nagpakitag kaisog?
Tun-ig Dugang
1. Sumala sa ubang mga eskolar, kang kinsa nagtumong ang “Carianhong mga bantay” nga mitabang kang Jehoiada sa pagpatay kang Atalia? (2 Hari 11:4, 19; it “Carianhong Bantay”)
2. Unsay lagmit gitumong sa “Pamatuod,” ug nganong gibutang kini ni Jehoiada kang Jehoas? (2 Hari 11:12, footnote; w91 2/1 31 ¶5-6) A
Hulagway A
3. Nganong naghatag si Jehoas ug sugo nga ayohon ang balay ni Jehova? (2 Cron. 24:4-7, 11-14; it “Jehoas” Num. 1 ¶5)
4. Si Zacarias anak ni Jehoiada. Busa nganong gitawag man siya ni Jesus ug “anak ni Baraquias”? (w23.06 19 ¶16, footnote)
Hunahunaa ang mga Leksiyon
Posibleng kapig 100 anyos na si Jehoiada dihang iyang gitago si Jehoas. Sa unsang paagi ang iyang ehemplo makadasig sa edarang mga alagad ni Jehova? (Sal. 92:12, 14) B
Hulagway B
Nagmalamposon si Jehoas dihang naminaw siya kang Jehoiada. Unsay makat-onan sa mga batan-on bahin niini?
Sa unsang mga paagi masundog nimo ang kaisog ni Jehoiada?
Pamalandonga Kini
Unsay akong nakat-onan bahin kang Jehova niini nga asoy?
Sa unsang paagi kini nga asoy konektado sa mga katuyoan ni Jehova?
Unsay akong ipangutana kang Jehoiada dihang banhawon na siya?
Pagkat-og Dugang
Unsay makat-onan sa mga bata kang Jehoas bahin sa pagpilig maayong mga higala?
“Si Jehoas Mibiya Kang Jehova Tungod sa Daotang mga Kauban” (w09 4/1 24-25)
Unsay atong makat-onan kang Jehoiada bahin sa paghatag ug donasyon alang sa matuod nga pagsimba?