“Oh Jehova, Palihog Bukha ang Iyang mga Mata”

DIHA sa bungtod sa usa ka walog sa Israel nahimutang ang pinarilang siyudad sa Dotan. Dihay tig-alagad nga mibangon sayo sa buntag ug migawas, ug puwerte niyang kurata sa iyang nakita! Ang siyudad gipalibotan sa gamhanang kasundalohan sa Sirya ug sa mga kabayo ug karong panggubat nga nangabot panahon sa kagabhion. Usa ra ang ilang tuyo; gusto nilang dakpon ang propeta nga si Eliseo. Nalisang ang tig-alagad, ug nagdalidali siyag adto kang Eliseo nga iyang agalon aron sultihan siya nga nameligro ang kinabuhi sa propeta.

Dili kini ang unang higayon nga nameligro ang kinabuhi ni Eliseo. Mga katuigan una pa niana, gipadala ni Jehova si propetang Elias sa pagdihog kang Eliseo ingong iyang manununod ug sa pagbansay kaniya. Busa si Eliseo nagsilbing tig-alagad ni Elias panahon ni Haring Ahab, Rayna Jezebel, ug sa ilang anak nga si Ahazias, kinsa mga tawong nagdumot ug gustong mopatay sa mga propeta ni Jehova. Pero dihay nahitabo pipila ka tuig ang milabay. Samtang naglakaw si Elias ug Eliseo, kalit nga dihay nagkalayong karo ug nagkalayong mga kabayo nga mitungha sa kalangitan ug nagbulag kanilang duha. Si Elias gidala ngadto sa kalangitan pinaagig alimpulos. Wala na tingali makita pag-usab ni Eliseo ang iyang higala, pero padayon niyang gihimo ang buluhaton nga gipangunahan ni Elias. Si Eliseo ang nanguna sa mga propeta ni Jehova sa pagwagtang sa pagsimba kang Baal didto sa Israel.—2 Hari 2:15.

Gihatagan ni Jehova ug gahom si Eliseo sa paghimo ug daghang milagro. Sa usa niini nga mga milagro, giayo ni Eliseo si Naaman, ang banggiitang pangulo sa kasundalohan ni Ben-hadad nga hari sa Sirya. Bisan pa niana, ang maong hari walay utang kabubut-on. Gisigehan na nuon niyag atake ang Israel. Pero padayong gipakyas ni Jehova ang mga plano ni Ben-hadad. Iyang gisulti kang Eliseo kon asa sunod nga moatake si Ben-hadad. Nasuko pag-ayo ang hari sa Sirya ug iyang gipangutana ang iyang mga alagad kon kinsa nila ang nagtug-an sa iyang mga plano ngadto sa kaaway. Usa sa iyang mga alagad miingon: “Si Eliseo nga propeta sa Israel ang nagsulti sa hari sa Israel bahin sa mga butang nga imong gisulti didto sa imong kuwarto.” Pagkahibalo ni Ben-hadad nga si Eliseo tua sa Dotan, dihadiha niyang gipadala ang iyang mga sundalo aron dakpon ang propeta.

Ang tig-alagad ni Eliseo ang unang nakakita sa kasundalohan sa Sirya. Nagdalidali siyag adto sa propeta ug miingon: “Agalon ko! Unsay atong buhaton?” Nakita ni Eliseo ang grabeng kahadlok diha sa mga mata sa tig-alagad maong iya siyang gipasaligan: “Ayawg kahadlok!” Dayon si Eliseo miingon niining mga pulonga nga makapalig-on gihapon nato hangtod karon: “Kay mas daghan ang atong kauban kay sa ilang kauban.” Tingali nakurat ang tig-alagad sa giingon sa propeta. Sa unsang paagi nga ang duha ka tawo mas daghan na hinuon kay sa usa ka dakong kasundalohan? Busa si Eliseo miampo: “Oh Jehova, palihog bukha ang iyang mga mata aron siya makakita.”

Mitubag dayon si Jehova. Iyang gitabangan ang tig-alagad nga makita ang iyang kasundalohan sa mga anghel nga nagpalibot kanila. Kini nga kasundalohan mas daghan ug mas kusgan kay sa bisan unsang kasundalohan sa tawo. Ang Bibliya nag-ingon: “Ang kabukiran napunog nagkalayong mga kabayo ug mga karong panggubat nga naglibot kang Eliseo”!

Ang kasundalohan sa Sirya wala makakita sa kasundalohan sa mga anghel ni Jehova. Misulong sila sa siyudad aron dakpon si Eliseo, maong miampo ang propeta kang Jehova nga butaan sila. Imbes literal nga butaan sila ni Jehova, iyang gipahinabo nga dili sila makasabot sa ilang makita. Dayon giingnan sila ni Eliseo nga iya silang dad-on ngadto sa siyudad ug sa tawo nga ilang gipangita. Iya silang gidala sa Samaria, nga may gilay-ong mga 16 kilometros (10 ka milya). Unya iyang gihangyo si Jehova nga buksan ang ilang mga mata. Dihang gihimo na ni Jehova, naamgohan nila nga naa na diay sila sa kaulohang siyudad sa Israel! Gusto silang patyon sa hari sa Israel. Pero si Eliseo naluoy ug iyang giingnan ang hari nga pakaonon ug papaulion ang maong mga sundalo. Dayon ang Bibliya nag-ingon: “Ang tigsulong nga mga Siryanhon wala na gyod mobalik sa yuta sa Israel.”

Nahibalo ang propeta nga naa ang kasundalohan sa mga anghel. Daw iya ning nakita tungod sa pagtuo. Sulod sa daghang tuig niyang pag-alagad kang Jehova, iyang nakat-onan nga dili layo si Jehova ug ang mga anghel, ug sila kanunayng andam sa pagtabang sa matinumanong mga alagad sa Diyos. Ang pagkahibalo niana seguradong nakahatag ug kaisog kang Eliseo. Kini makahatag sab natog kaisog karon.

Basaha ang asoy sa Bibliya:

• 2 Hari 6:8-23

Pakighisgot:

Sa unsang mga paagi nga si Eliseo nagpakitag kaisog?

1. 2. Nganong nangayo si Eliseo ug “duha ka bahin” sa espiritu ni Elias? (2 Hari 2:9; w03 11/1 31)

   Imong tubag

2. 3. Nganong makataronganon ang pag-ingon nga dili literal nga pagkabuta ang gipahinabo ni Jehova sa mga Siryanhon? (it “Pagkabuta” ¶6)

   Imong tubag

3. 4. Unsay mga nalampos ni Eliseo ingong propeta? (it “Eliseo” ¶27-28)

   Imong tubag

Hunahunaa ang mga Leksiyon

• Sa unsang mga kahimtang nga mapalig-on ta sa pagkahibalo nga ang mga anghel dili layo ug kanunayng andam sa pagtabang nato? B

  Imong tubag

  

• Sa unsang paagi masundog sa mga ansiyano ug natong tanan ang paagi ni Eliseo sa pagdasig sa iyang tig-alagad?

  Imong tubag

• Sa unsang mga paagi masundog nimo ang kaisog ni Eliseo?

  Imong tubag

Pamalandonga Kini

• Unsay akong nakat-onan bahin kang Jehova niini nga asoy?

  Imong tubag

• Sa unsang paagi kini nga asoy konektado sa mga katuyoan ni Jehova?

  Imong tubag

• Unsay akong ipangutana kang Eliseo dihang banhawon na siya?

  Imong tubag

Pagkat-og Dugang

Unsang ehemplo ang gipakita ni Eliseo nga makatabang sa mga brader nga nakadawat ug bag-ong asaynment?

Tahora ang Eksperyensiyadong mga Brader (4:48)

Sayra ang uban pang mga leksiyon sa kinabuhi ni Eliseo.

“Si Eliseo Nakakitag Nagkalayong mga Karo—Ikaw ba Usab?” (w13 8/15 28-30)