12 CALEB
Maunongon Niyang Gisuportahan ang Iyang Diyos
SA PANAHON nga mibiya si Moises sa Ehipto, natawo didto ang usa ka bata nga ginganlag Caleb. Anak siya sa Israelinhong mga ulipon. Ang bata nagdako ingong ulipon, pero sa ngadtongadto nakabaton siyag kagawasan. Dihang si Caleb mga 40 anyos na, mibalik si Moises sa Ehipto kay gisugo siya ni Jehova nga mobalik aron ipahigawas ang Iyang katawhan, ang Israel. Seguradong nahingangha si Caleb nga nakita ang gahom ni Jehova dihang Iyang gipahinabo ang Napulo ka Hampak, ang pagpikas sa Pulang Dagat, ug ang pagpahigawas sa Iyang katawhan.
Wala gyod malimti ni Caleb ang maong makapalig-on sa pagtuo nga mga hitabo. Siya padayong nagmaunongon bisag daghang Israelinhon ang nawad-ag pagtuo kang Jehova ug mirebelde pipila lang ka bulan sa ulahi sa Bukid sa Sinai. Wala madugay human niana, gihatagan si Caleb ug importanteng asaynment sa pagpangespiya sa Yutang Saad kauban si Josue ug ang 10 pa ka Israelinhong pangulo.
Ang 12 ka lalaki maisogong miadto sa Canaan, 40 ka adlaw silang nangespiya sa mga siyudad, sa mga tawo, ug sa abot sa yuta. Namalik sila nga nagdalag mga prutas, apil niana ang usa ka dakong pungpong sa ubas nga kinahanglang yayongan sa duha ka tawo. Dayon ilang gibalita sa mga Israelinhon ang ilang nakita. Seguradong nadismayar si Caleb dihang nadungog niya ang giingon sa 10 niya ka kauban. Atong mabasa: “Nagsige silag sultig dili maayo.” Miingon sila nga ang mga Canaanhon kusgan kaayo, lisod pildihon, ug grabe ka dagko. Miingon pa gani sila nga ang maong mga Canaanhon kaliwat sa mga Nepilim. Pero hinobra ra ang ilang gisulti kay ang mga Nepilim dugay rang nalaglag panahon sa Lunop. Tungod sa ilang giingon, naluya ang tanang katawhan. Gani ang uban miingon nga magtudlo silag bag-ong pangulo nga magdala nilag balik sa Ehipto.
Si Caleb ug Josue wala mawad-ig pagtuo kang Jehova. Gisulayan nilag dasig ang katawhan. Sila miingon: “Si Jehova kauban nato. Ayaw silag kahadloki.” Pero nakapasuko lang to sa maong walay pagtuo nga mga Israelinhon. Nagsabot pa gani sila nga ilang batoon si Caleb ug Josue hangtod mamatay!
Nasakitan pag-ayo si Jehova. Bisan pa sa tanan niyang gihimo para sa iyang katawhan aron mahigawas sila sa gamhanang nasod sa Ehipto, ang mga Israelinhon nawad-an dayog pagtuo kaniya. Pero nakita sa Diyos ang kaisog ug pagtuo ni Caleb ug Josue. Si Jehova miingon: “Ang akong alagad nga si Caleb lahi [ug] panghunahuna ug padayong nagsunod kanako nga kinasingkasing.” Midesisyon si Jehova nga kadtong tanang Israelinhon nga wala magpakitag pagtuo mangamatay sa kamingawan.a Pero si Caleb ug Josue apil sa pipila nga tugotan ni Jehova nga mabuhi ug makasulod sa Yutang Saad.
Si Caleb nagmaunongon kang Jehova bisan pag gusto siyang patyon sa walay pagtuo nga mga Israelinhon
Sa 40 ka tuig nga ang Israel naglatagaw sa kamingawan, si Caleb padayong nagpakitag pagtuo ug kaisog. Maunongon niyang gisuportahan si Moises. Human mamatay si Moises, maunongon sab niyang gisuportahan si Josue kinsa gitudlo ni Jehova nga manguna sa katawhan sa Diyos sa pagtabok sa Suba sa Jordan ug sa pagsulod sa Yutang Saad. Ug sa dihang tigulang na si Caleb, maisogon siyang nakiggubat sa mga kaaway sa Diyos didto sa Canaan.
Unom ka tuig human makatabok ang katawhan sa Diyos sa Suba sa Jordan, nasakop na nila ang dakong bahin sa Yutang Saad. Adtong panahona, makapili na si Caleb kon asa siya gustong magpuyo. Iyang gipili ang Hebron, ang dapit nga giingon sa walay pagtuo nga mga espiya nga imposibleng masakop kay nagpuyo didto ang higanteng mga manggugubat. Bisag 85 anyos na si Caleb, bug-os ang iyang pagtuo kang Jehova. Siya miingon: “Si Jehova magauban kanako, ug abogon nako sila, sumala sa gisaad ni Jehova.” Ug mao gyod nay nahitabo. Nakuha ni Caleb ang siyudad, ug mipuyo siya didto. Dayon, atong mabasa: “Ug ang yuta nakapahulay sa gubat.”
Daghang katuigan kanhi, si Moises miingon kang Caleb: “Bug-os kasingkasing nimong gisunod si Jehova nga akong Diyos.” Seguradong padayon nang gihimo ni Caleb hangtod sa iyang kamatayon. Ug kana sab ang iyang himoon dihang banhawon na siya!
Basaha ang asoy sa Bibliya:
Pakighisgot:
Sa unsang mga paagi nga si Caleb nagpakitag kaisog?
Tun-ig Dugang
1. Nganong makaingon ta nga ang Numeros 13:23 wala manghinobra sa paghisgot bahin sa mga ubas sa Yutang Saad? (w06 6/15 16 ¶1-2)
2. Tinuod ba nga ang Yutang Saad “abunda sa gatas ug dugos” sama sa giingon ni Caleb ug Josue? (Num. 14:8; w11 3/1 15) A
Institute of Archaeology/Hebrew University © Tel Rehov Excavations
Hulagway A: Artipisyal nga mga balay sa putyokan didto sa Israel nga gama sa kulonon; gihimo ni mga 3,000 ka tuig kanhi.
3. Dihang gipadala ni Moises ang 12 ka espiya gikan sa Kades, unsa na ka duol ang mga Israelinhon sa Yutang Saad? (w04 10/15 17 ¶11-12) B
Hulagway B
4. Sa unsang paagi gigantihan ni Jehova ang pagtuo ug kaisog ni Caleb? (w06 10/1 18 ¶11)
Hunahunaa ang mga Leksiyon
Si Caleb nagpakitag pagtuo, pero apil gihapon siya sa mga Israelinhon nga naglatagaw sa kamingawan. Bisan pa niana, nagmapainubsanon siya ug padayong misalig kang Jehova. Sa unsang mga kahimtang nga masundog nato ang ehemplo ni Caleb?
Sa unsang paagi ang ehemplo ni Caleb makatabang nato nga masuklan ang presyur nga ‘sundon ang kadaghanan’? (Ex. 23:2) C
Hulagway C
Sa unsa pang mga paagi masundog nimo ang kaisog ni Caleb?
Pamalandonga Kini
Unsay akong nakat-onan bahin kang Jehova niini nga asoy?
Sa unsang paagi kini nga asoy konektado sa mga katuyoan ni Jehova?
Unsay akong ipangutana kang Caleb dihang banhawon na siya?
Pagkat-og Dugang
Susiha kon sa unsang paagi ang pagtuo ni Caleb konektado sa iyang kaisog.
“Maisogon Tungod sa Pagtuo ug Diyosnong Kahadlok” (w06 10/1 16-19 ¶1-12)
Nganong ang 85 anyos nga si Caleb nakaingon: “Bug-os kasingkasing kong misunod kang Jehova nga akong Diyos”? (Jos. 14:8)
a Ang desisyon ni Jehova wala maglakip sa mga Levihanon o sa mga Israelinhon nga wala pay 20 anyos adtong panahona.—Num. 14:29.