11 MOISES
“Adto sa Paraon”
DAKO nag kausaban si Moises. Daghang tuig na sukad nga mibiya siya sa Ehipto. Morag wala na siya maghunahuna nga siya ang magpahigawas sa iyang mga igsoong Israelinhon gikan sa pagkaulipon sa Ehipto. Karon mga 80 anyos na siya, ug duna na siyay asawa ug duha ka anak. Nakakat-on siya nga magmapainubsanon sulod sa 40 ka tuig niyang pagtrabaho para sa iyang ugangan. Nagbantay siya sa kahayopan niini diha sa init ug uga nga nasod nga gipuy-an sa mga Midianhon.
Nakita ni Jehova ang kausaban ni Moises. Usa ka adlaw niana, gipahinabo ni Jehova nga magdilaab ang tunokong tanom nga naa sa tiilan sa Bukid sa Horeb (Sinai), pero wala masunog ang tanom. Pagduol ni Moises, si Jehova nakigsulti kaniya gikan sa kalayo pinaagig gamhanang anghel. Gisugo sa Diyos si Moises nga mobalik sa Ehipto ug manguna sa pagpahigawas sa Iyang katawhan! Aron dasigon si Moises, si Jehova miingon kaniya: “Mahimo Kong Bisan Unsa nga Gusto Nako.” Importanteng bahin ni sa kahulogan sa balaang ngalan ni Jehova. Si Jehova mahimong Manluluwas sa iyang dinaogdaog nga katawhan, ug mahimo niya ang bisan unsang gikinahanglan aron mapahigawas sila ug mahimo silang gamhanang nasod.
Pero si Moises nagduhaduha gihapon. Mibati siyang dili kuwalipikado nga manguna sa katawhan ug makigsulti sa Paraon sa Ehipto. Gitul-id siya ni Jehova ug gipalig-on ang iyang pagtuo pinaagi sa paghimog katingalahang mga butang. Gihatagan ni Jehova si Moises ug gahom sa paghimog mga milagro. Kini ang unang higayon nga mabasa nato sa Bibliya nga ang usa ka tawo gihatagan ni Jehova niini nga gahom. Gihatagan pod niya si Moises ug magtatabang ug tigpamaba, ang iyang igsoong si Aaron. Sa ulahi, gidawat ni Moises ang asaynment. Siya nahimong mesiyas, o Kristo, usa nga gipili ni Jehova sa pagluwas sa Iyang katawhan.—Heb. 11:26.
Si Moises mibalik sa Ehipto kauban si Aaron ug sila miatubang ug nakig-estorya sa Paraon. Pero nasuko pag-ayo ang Paraon sa ilang gisulti. Imbes pagawson ang mga Israelinhon, mas gipabug-at pa hinuon sa Paraon ang trabaho sa mga ulipon! Dayon gipabalik ni Jehova si Moises ngadto sa Paraon aron ipahibalo ang Iyang unang hampak batok sa Ehipto. Gipahinabo ni Jehova nga ang Suba sa Nilo mahimong dugo. Pero wala gihapon palakwa sa Paraon ang mga Israelinhon. Balikbalik nga gipaatubang ni Jehova si Moises ngadto sa Paraon sa matag higayon nga magpahibalo siyag hampak. Si Jehova miingon: “Adto sa Paraon,” ug si Moises maisogong miadto. Pero wala maminaw ang maong garbosong magmamando. Sugod sa ikaupat nga hampak, gipanalipdan ni Jehova ang iyang katawhan samtang nag-antos ang mga Ehiptohanon.
Ang matag hampak nagpakita nga ang mga diyos sa Ehipto, ang ilang salamangkerong mga saserdote, ug ang Paraon mismo walay mahimo ug dili makapugong niini nga mga hampak. Pero padayong gipagahi sa Paraon ang iyang kasingkasing ug wala niya palakwa ang iyang mga ulipon. Sa ikasiyam nga hampak, ang Ehipto nalukop sa grabeng kangitngit, samtang ang mga Israelinhon dunay kahayag sa ilang puy-anan. Sa primero, misugot na ang Paraon nga palakwon ang mga ulipon. Dayon nausab na pod ang iyang hunahuna. Nagpasidaan siya nga kon si Moises magpakita pag-usab kaniya, mamatay si Moises.
Balikbalik nga miatubang si Moises sa labing gamhanang magmamando sa yuta bisan pag ang iyang mensahe nakapasuko niini
Dayon nahitabo ang kataposang hampak. Ang tanang panganay sa mga Ehiptohanon ug ang panganay sa ilang mga hayop nangamatay. Namatay sab ang anak sa Paraon. Naulawan ang Paraon ug iyang gipatawag si Moises. Busa gipaadto ni Jehova si Moises ngadto sa Paraon sa kataposang higayon, ug miadto si Moises. Gipahigawas sa Paraon ang mga Israelinhon ug mihangyo kang Moises nga panalanginan siya. Napahigawas na gyod ang mga Israelinhon, eksaktong 430 ka tuig human makasulod si Abraham sa Yutang Saad! Ang kanhing mga ulipon mibiya kauban “ang dakong panon sa nagkasagol nga mga tawo,” nga ang daghan kanila lagmit mga Ehiptohanon. Dayon nausab na pod ang hunahuna sa Paraon. Gitigom niya ang iyang dakong panon sa kasundalohan ug gigukod ang mga Israelinhon!
Si Moises ug ang iyang katawhan nakaabot sa baybayon sa Pulang Dagat ug mora silag natanggong didto. Tungod niana, nahadlok ang mga Israelinhon. Nangayog tabang si Moises kang Jehova, ug gitubag siya ni Jehova. Gipahinabo Niya ang usa sa labing kahibulongang mga milagro. Iyang gipikas ang Pulang Dagat mao nga ang mga Israelinhon nakatabok sa uga nga yuta sa tunga sa dagat. Pagkakita sa Paraon nga nanabok ang mga Israelinhon, siya ug ang iyang tibuok kasundalohan migukod kanila. Pero dihang luwas na nga nakatabok ang mga Israelinhon, gipahinabo ni Jehova nga mobalik sa normal ang Pulang Dagat ug nangalumos ang mga Ehiptohanon. Nahanaw na ang labing banggiitang kasundalohan sa kalibotan!
Wala gyod malimti ni Moises ang maong makapahinganghang mga hitabo. Mas milig-on pa ang iyang pagtuo. Ug sa misunod nga 40 ka tuig, hangtod namatay siya sa edad nga 120, siya nagpakitag talagsaong pagtuo, gugma, ug kaisog samtang nanguna ug nag-atiman sa katawhan sa Diyos.
Basaha ang asoy sa Bibliya:
Pakighisgot:
Sa unsang mga paagi nga si Moises nagpakitag kaisog niining bahina sa iyang kinabuhi?
Tun-ig Dugang
1. Wala ta mahibalo sa ngalan sa Paraon nga nagmando adtong panahona, ug walay nakaplagang rekord sa Ehipto nga naghisgot sa pagbiya sa mga Israelinhon. Pero, nganong makatuo ta niini nga asoy sa Bibliya? (g04 4/8 7 ¶4–8 ¶3)
2. Nganong gikahadlokan sa mga tawo ang Paraon? (w14 4/15 8 ¶1) A
PRISMA ARCHIVO/Alamy Stock Photo
Hulagway A: Karaang kinulit diha sa paril nga naghulagway sa usa ka Paraon
3. Sa unsang paagi ang Napulo ka Hampak nagpakaulaw sa mga diyos sa Ehipto? (it “Diyos ug mga Diyosa, Mga” ¶24-26)
4. Unsay nagpakita nga lapad ang agianan nga gibuksan ni Jehova sa Pulang Dagat, ug unsa tingali ka daghan ang mga Israelinhon nga nanabok? (it “Pagpanggula” ¶46-51) B
Hulagway B: Usa ka bahin sa Pulang Dagat, nga makita gikan sa Sinai, diin posibleng mitabok ang mga Israelinhon
Hunahunaa ang mga Leksiyon
Sa unsang paagi ang ehemplo ni Moises makadasig nato dihang mobati ta nga dili kuwalipikado sa paghimo sa asaynment nga gihatag ni Jehova? (Ex. 4:10; 7:6, 7)
Sama nga gitabangan ni Aaron si Moises nga maisogong matuman ang iyang asaynment, sa unsang paagi nato matabangan ang atong mga igsoon? (Ex. 4:14-16) C
Hulagway C
Unsaon nimo pagsundog ang kaisog ni Moises niini nga asoy?
Pamalandonga Kini
Unsay akong nakat-onan bahin kang Jehova niini nga asoy?
Sa unsang paagi kini nga asoy konektado sa mga katuyoan ni Jehova?
Dihang banhawon na si Moises, unsay akong ipangutana niya bahin sa iyang kinabuhi nga gihisgotan niini nga asoy?
Pagkat-og Dugang
Sayra kon sa unsang paagi ang kahulogan sa ngalan ni Jehova makatabang sa mga bata nga magmaisogon.
Tungod sa mga kasinatian ni Moises, unsay iyang nakat-onan bahin sa mga hiyas ni Jehova?