13 JOSUE
Iyang Gisunod ang Talagsaong mga Instruksiyon
SI Josue nagbarog atubangan sa Jerico, ang siyudad nga gisugo sa Diyos kaniya nga atakehon ug laglagon. Iyang nahinumdoman ang giingon ni Jehova kaniya dihang hapit nang mamatay si Moises: “Magmaisogon ka ug magmalig-on.” (Deut. 31:23) Di pa dugay, gisulti ni Jehova kang Josue ang susamang mga pulong: “Magmaisogon ka . . . ug magmalig-on.” (Jos. 1:7) Karon, mas nagkinahanglan si Josue ug dugang kaisog. Ngano?
Ang Jerico dili dako nga siyudad, pero kini lig-on ug giisip nga importanteng bahin sa taktika sa militar. Kini napalibotan ug dagkong paril, ug mao ni ang unang siyudad nga angayng sulongon sa mga Israelinhon aron masakop ang Canaan, ang Yutang Saad. Ang mga tawo niining siyudara daotan kaayo. Gatosan ka tuig una pa niana, giingnan ni Jehova si Abraham bahin sa pagkadaotan sa mga Amorihanon, nga nagtumong sa tanang tawo sa Canaan. Siya miingon nga moabot ang “panahon nga silotan ang mga Amorihanon,” ug ipahamtang ni Jehova ang iyang paghukom kanila. (Gen. 15:16) Ang maong panahon miabot na. Ang mga tawo naghimo ug daotan kaayong mga buhat sama sa idolatriya, prostitusyon sa templo, homoseksuwalidad, pag-unay, pagpakigsekso sa hayop, ug bisan ang paghalad sa ilang mga anak ngadto sa dulumtanang mga diyos. Ang mga Canaanhon daotan kaayo mao nga ang Bibliya nag-ingon: “Ang yuta magsuka kanila.” (Lev. 18:3, 6, 21-27) Sa unsang paagi na mahitabo?
Giingnan ni Jehova si Josue kon unsaon pag-atake ang usa ka pinarilang siyudad, pero sa panglantaw sa militar ang maong taktika dili mosaler
Gamiton sa Diyos si Josue ug ang iyang kasundalohan. Sila andam motuman sa mga instruksiyon ni Jehova. Kini nga gubat mao ang sinugdanan sa pagwagtang ni Jehova sa tanang daotan niining yutaa. Pero ang mga instruksiyon ni Jehova kang Josue talagsaon kaayo! Wala siya ingna ni Jehova nga atakehon dayon ang siyudad o likosan kini. Hinuon giingnan sila ni Jehova nga magmartsa libot sa siyudad kas-a sa usa ka adlaw sulod sa unom ka adlaw. Ang mga saserdote apil pod sa pagmartsa; ang uban nila magpas-an sa kaban sa pakigsaad ug ang uban maghuyop sa mga budyong. Sa ikapitong adlaw, silang tanan magmartsa libot sa siyudad sa pito ka beses ug dayon maninggit ang mga sundalo.
Si Josue nakasulay na sa pagpakiggubat. Sa panglantaw sa militar, kini nga taktika dili mosaler. Unsa kahay mahitabo kon mapildi ang Israel niini nga gubat? Dili kaha maghunahuna ang mga tawo sa ubang Canaanhong mga siyudad nga mas kusgan sila, ug ila hinuong atakehon ang mga Israelinhon?
Pero si Josue nahibalo nga makasalig siya kang Jehova. Dihang nagpadala si Josue ug duha ka espiya sa Jerico, ilang nahibaloan nga ang mga tawo sa Jerico nahadlok pag-ayo sa mga Israelinhon. Dayon gipahunong ni Jehova ang pag-agos sa tubig sa Suba sa Jordan aron makatabok ang mga Israelinhon.
Seguradong gipamalandongan ni Josue ang maong mga hitabo ug kon nganong makasalig siya sa iyang Diyos. Ang iyang pagtuo nakahatag niyag kaisog sa pagsunod. Busa gipangunahan niya ang iyang kasundalohan sa pagmartsa libot sa Jerico. Gihuypan sa mga saserdote ang ilang mga budyong, pero “gisirhan pag-ayo” ang siyudad ug walay nanggawas sa pag-atake kanila tungod sa kahadlok. Pagkasunod adlaw, nagmartsa na sab sila Josue, ug gihimo na pod nila ang gisugo ni Jehova. Mao nay ilang gihimo sulod sa unom ka adlaw. Dayon miabot ang ikapitong adlaw.
Nianang adlawa, kapito nagmartsa ang kasundalohan ni Josue libot sa Jerico. Human sa ikapitong pagmartsa, diha silay laing gihimo. Si Josue miingon: “Singgit, kay gihatag ni Jehova kaninyo ang siyudad!” Ug dihang ang mga sundalo misinggit ug “singgit sa pakiggubat, ang paril nalumpag.”
Si Josue ug ang iyang mga sundalo misulod deretso sa siyudad ug gilaglag ang tanang naa niini, sumala sa gisugo ni Jehova. Sa tabang ni Jehova, napildi ni Josue ug sa iyang mga sundalo ang daghang siyudad ug nasod. Sa kataposan, nasilotan na gyod ni Jehova ang mga Amorihanon sa ilang pagkadaotan.
Pero naay gamay kaayong bahin sa paril sa Jerico nga wala malumpag. Ngano? Kay niana nga siyudad naay usa ka babaye nga nagpakitag talagsaong pagtuo ug kaisog. Makakat-on tag dugang bahin kaniya sa sunod nga kapitulo.
Basaha ang asoy sa Bibliya:
Pakighisgot:
Sa unsang mga paagi nga si Josue nagpakitag kaisog?
Tun-ig Dugang
1. Unsang mga basahon sa Bibliya ang lagmit nabatonan na ni Josue? (w09 12/1 17 ¶4, footnote) A
Hulagway A
2. Sa wala pa magmartsa ang mga Israelinhon libot sa Jerico, unsay gisugo ni Jehova kang Josue? Nganong ang Iyang mga instruksiyon morag dili maayong taktika? (Jos. 5:2-8; w18.10 23 ¶5-7)
3. Unsay pamatuod nga ang Jerico dali rang nailog? (w15 11/15 13) B
Kennedy, Titus (2023). The Bronze Age Destruction of Jericho, Archaeology, and the Book of Josue. Accessed via researchgate.net. Licensed under CC BY 4.0
Hulagway B: Mga banga nga naay nasunog nga mga lugas nga nadiskobrehan sa lugar nga nahimutangan sa karaang Jerico
4. Sa unsang paagi natuman ang tagna sa Josue 6:26 bahin sa Jerico? (w98 9/15 21 ¶8)
Hunahunaa ang mga Leksiyon
Unsay nakatabang kang Josue nga mosalig sa mga saad ni Jehova? (Jos. 23:14) Sa unsang paagi nato mapakita ang sama niana nga pagsalig?
Sa unsang paagi ang ehemplo ni Josue makatabang nato sa pagsunod sa mga instruksiyon nga atong madawat gikan sa organisasyon sa Diyos? C
Hulagway C
Unsaon nimo pagsundog ang kaisog ni Josue?
Pamalandonga Kini
Unsay akong nakat-onan bahin kang Jehova niini nga asoy?
Sa unsang paagi kini nga asoy konektado sa mga katuyoan ni Jehova?
Unsay akong ipangutana kang Josue dihang banhawon na siya?
Pagkat-og Dugang
Sa unsang paagi ang ehemplo ni Josue makatabang nato nga mokat-on gikan sa mga edaran, mosalig sa mga saad sa Diyos, ug magpabiling matinumanon bisan pag mapasakitan ta sa atong isigka-Kristohanon?
Tabangi ang imong mga anak nga makakat-on sa importanteng mga hitabo sa kinabuhi ni Josue.