Mga Magtiayon—Pabiling Suod Ingong Managhigala

1. Nganong ang maayong mga higala panalangin gikan kang Jehova?

PANALANGIN gyod para nato ang maayong mga higala. Regalo sila gikan kang Jehova. (Sant. 1:17) Gimahal nila ang Diyos, ug gimahal pod ta nila. Malipay sila kon malipay ta, hupayon ta nila kon maguol ta, ug tambagan ta nila kon gikinahanglan. Maunongon sila, maong makasalig ta nila. Tinuod gyod nga ang maayong mga higala “makapalipay sa kasingkasing!”—Prov. 27:9.

2. Nganong importante nga padayong palig-onon sa mga magtiayon ang ilang kasuod? (Mateo 19:6)

² Importante kaayo nga ang bana ug asawa mahimong suod nga managhigala. Dili nila angayng pasagdan ang ilang relasyon, kay kon ila nang himoon basin mobati na silang nag-inusara, dili malipayon, ug maglagot pa gani sa usag usa. Pero kon padayon nilang palig-onon ang ilang kaminyoon, mahimo nilang pinakasuod nga higala ang ilang kapikas. (Basaha ang Mateo 19:6.) Niining artikuloha, hisgotan nato kon unsay mahimo sa mga magtiayon aron mas magkasuod sila. Pero sa dili pa, konsiderahon una nato kon unsay makatabang sa tagsaanong mga Kristohanon sa pagpilig kapikas nga mahimo nilang pinakasuod nga higala.

KON UNSAON PAGPILIG KAPIKAS NGA MAHIMO NIMONG PINAKASUOD NGA HIGALA

3-4. Unsay makatabang sa usa ka Kristohanon nga makakitag maayong kapikas? (Proverbio 18:22)

³ Sa dili pa ta mohimog dagkong desisyon, kinahanglan una natong hunahunaon kon unsay posibleng resulta ani—pananglitan, kon unsay mga kaayohan ani o kon unsang mga problema ang posibleng motungha. Ang dagkong mga desisyon makaapektar nato sa taastaas nga panahon, maong importante nga hunahunaon nato ni pag-ayo.

⁴ Ang pagpilig kapikas nga mahimo natong pinakasuod nga higala mao ang usa sa pinakaimportanteng desisyon nga puwede natong himoon. Ug kay ang kaminyoon kahikayan man ni Jehova, angay lang nga magpagiya ta niya dihang mangitag kapikas. Gusto niya nga ang lalaki makakitag maayong asawa, ug nga ang babaye makakitag maayong bana. Nahibalo gyod si Jehova kon unsay pinakamaayo para nato. (Basaha ang Proverbio 18:22; Isa. 48:​17, 18) Naghatag siyag mga prinsipyo diha sa Bibliya nga makatabang sa usa ka Kristohanon nga makakitag bana o asawa nga para gyod niya.

5. Nganong importante nga bawtismado ang atong pilion nga kapikas?

⁵ Dihang nabawtismohan ta, nahimo tang mga higala sa Diyos. (Sal. 25:14) Maong kon gusto kang magminyo, kinahanglan nga higala pod ni Jehova ang imong pilion. (1 Cor. 7:39) Pinaagi ana, mapakita nimo nga imong gitahod ang mga sukdanan sa Diyos, ug isipon nimo nga ang imong kapikas panalangin gyod gikan kang Jehova. (Prov. 19:14) Malikayan pod nimo ang mga problema nga komon niadtong mga ‘nagpayugo nga dili timbang sa mga dili magtutuo.’ (2 Cor. 6:14) Busa dili gyod maalamon nga makigtrato kag dili magtutuo ug mangrason nga imo nang gihimo kay wala kaayo kay kapilian nga brader o sister, o kay namasin ka nga ma-Saksi ra siya sa ulahi.

6-7. Unsa nga mga pangutana ang angay nimong konsiderahon bahin sa imong uyab?

⁶ Siyempre, bisag bawtismado na ang usa ka tawo, wala na magpasabot nga mahimo na siyang maayong bana o asawa para nimo. Maong kon naa kay uyab, paningkamoti nga mailhan nimo siya pag-ayo. Pangutan-a ang imong kaugalingon: ‘Giunsa niya pagtratar ang iyang pamilya? Buotan ba siya ug naay pagtahod sa uban? Kinsay iyang mga higala? Unsay iyang reaksiyon kon naay dili pagsinabtanay? Ipamugos ba niya ang iyang gusto, o andam siyang mopaubos kon wala ray prinsipyo sa Bibliya nga nalapas? Unsay iyang panglantaw bahin sa kuwarta?’

⁷ Gawas pa ana, pangutan-a pod ang imong kaugalingon: ‘Unsa ka lawom ang iyang gugma kang Jehova? Gisul-ob ba niya ang “bag-ong personalidad”? Makatabang ba siya nako nga mas masuod kang Jehova? Parehas ba mig espirituwal nga mga tumong? Ma-imagine ba nako siya dili lang ingong akong higala, kondili pinakasuod nga higala?’ (Col. 3:​9, 10) Kon sister ka, nakita ba nimo nga mahimo siyang maayong ulo para nimo? (1 Cor. 11:3) Kon brader ka, ma-imagine ba nimo siya ingong mapinasakopong asawa nga andam motahod ug mosuportar sa imong mga desisyon bisag makahimo kag sayop? Nagkinahanglag panahon aron matubag ni nga mga pangutana. Maong samtang manag-uyab pa mo, paningkamoti nga mailhan nimo siya pag-ayo.

8-9. Unsay makatabang sa mga naay trato sa paghimog maalamong desisyon? (Tan-awa sab ang hulagway.)

⁸ Mas makahimo kag maalamong desisyon kon mailhan nimo pag-ayo ang imong trato. Maong maayo nga mangutana ka sa uban kon unsay ilang ikaingon bahin niya. Makatabang na aron mahibaloan nimo kon unsay iyang reputasyon ug mga kinaiya. Pananglitan, nailhan ba siya nga mapainubsanon, buotan, ug andam mo-adjust? Si Sarah, sister nga taga-French Guiana nga naminyo sa brader nga si Daniel, miingon: “Sa wala pa mi magminyo ni Daniel, nangutana ko sa brader nga roommate niya ug kauban sa pagpayunir. Nangutana pod ko sa usa ka ansiyano ug sa mga sister sa ilang kongregasyon, apil na sa mga igsoon nga nakaila namong duha.” Puwede pod nimong pangutan-on ang imong trato sa matinahorong paagi kon naa ba kay kinahanglang mahibaloan bahin sa iyang presenteng kahimtang o sa iyang mga kaagi nga posibleng makaapektar sa inyong relasyon kon ugaling magminyo mo.

⁹ Kon naa kay seryosong mga pagduhaduha, o kaha naay namatikdan ang imong hamtong nga mga higala bahin sa imong trato, ayaw nig balewalaa. Hunahunaa ni pag-ayo aron makahimo kag maayong desisyon kon ipadayon pa ba ninyo ang inyong panagtrato o hunongon na.a Karon, ato nang hisgotan ang bahin sa mga magtiayon.

PAGGAHIN UG PANAHON NGA MAGKAUBAN ARON MAS MAGKASUOD MO

10. Nganong maayo nga mogahin gyod ug panahon ang bana ug asawa para sa usag usa?

¹⁰ Mas magkasuod ang magtiayon ug mas molig-on ang ilang kaminyoon kon mogahin silag panahon para sa usag usa, bisag unsa pa sila ka-busy. Makahatag ni nilag kahigayonan nga magkaestoryahanay bahin sa mga nahitabo nila nianang adlawa, ma-share kon unsa gyoy ilang gihunahuna ug gibati, makapakitag pagmahal, ug mag-enjoy sa bisan unsa nga mahunahunaan nilang himoon.

11. Unsay posibleng makadaot sa suod nga relasyon sa bana ug asawa?

¹¹ Ang suod nga magtiayon mas ganahang mag-uban kay sa maglagyo. Siyempre, dili sa tanang panahon nga pirme na lang gyod silang magkuyog. Pero kon dugay pod silang dili mag-uban, naa pod ni dili maayong epekto. Pananglitan, ang uban nanarbaho sa laing nasod ug nalayo sa ilang pamilya sa taastaas nga panahon. Aw dako tingali nig tabang sa ilang pinansiyal nga kahimtang, pero kon ang magtiayon dugay nga dili mag-uban, posibleng masakripisyo ang ilang kaminyoon.

12-13. (a) Unsay gihimo sa ubang Saksi nga mga magtiayon aron makagahin ug panahon sa usag usa? (Tan-awa sab ang hulagway.) (b) Unsa ka importante ang imong relasyon sa imong kapikas? (Tan-awa ang kahong “Ikapila sa Imong Kinabuhi ang Imong Kapikas?”)

¹² Matikdi kon unsay gihimo sa ubang magtiayon aron maseguro nila nga naa silay panahon nga magkauban. Si Leah, nga taga-Guam, miingon: “Ganahan kaayo mi sa akong bana nga mag-uban pirme. Panagsa ra kaayo nang dili mi magkuyog sa mga laag o tapoktapok.” Si Roxanne, nga taga-United States, miingon: “Busy kaayo mi sa akong bana. Maong sama nga ieskedyul namo ang ubang importanteng mga kalihokan, giseguro pod namo nga iapil sa among eskedyul ang panahon nga magkauban ming duha.” (Itandi ang Amos 3:3.) Ang brader nga si Damien, nga taga-France, miingon pod: “Naningkamot ko nga makakat-on ug malingaw sa mga gikahiligan sa akong asawa, ug mao pod nay iyang gihimo para nako.” (Mat. 7:12) Ug si Katie, nga taga-United States, miingon: “Usahay, dili mi mag-cellphone aron nga walay makabalda namo.”

¹³ Labaw sa tanan, importante nga mag-uban mo sa espirituwal nga mga kalihokan. Si Myriam, nga taga-France, miingon: “Kada buntag, magdungan mig basa ug Bibliya. Dayon mag-estoryahanay mi sa kon unsay among mga naapresyar ug gustong ipadapat sa among kinabuhi. Ganahan kaayo ko ani nga bonding namo.” Siya midugang: “Ganahan pod kaayo ko dihang mag-ampo mi nga magkauban ug madungog nako kon unsa ka lawom ang gugma sa akong bana para kang Jehova.” Si Katie, nga gihisgotan ganina, miingon: “Paborito kaayo namo nang mag-uban mi sa ministeryo. Malipay kaayo mi kay madungog namo ang matag usa nga mosulti bahin kang Jehova, ug makakat-on pod mi sa usag usa.”—Prov. 27:17.

PABILING SUOD BISAG MOTUNGHA ANG MGA PROBLEMA

14-15. Nganong angayng maningkamot ang magtiayon nga sulbaron ang mga problema nga posible nilang maatubang sa ilang kaminyoon? Iilustrar.

¹⁴ Kay dili man hingpit ang mga magtiayon, dili gyod kalikayan nga makaatubang silag mga problema. Ang Bibliya prangkang nag-ingon nga ang mga magtiayon “makaagom ug kasakitan sa ilang unod.” (1 Cor. 7:28) Ang study note niini nga bersikulo nag-ingon nga kini nga ekspresyon “nagtumong sa mga problema ug kalisdanan nga sagad maatubang sa mga magtiayon.” Kon motungha ni nga mga problema, nganong angay silang maningkamot nga mounong sa usag usa ug magtinabangay sa pagsulbad niini?

¹⁵ Konsideraha ni nga ilustrasyon. Kon ang usa ka sikat nga painting o bilding madaot, ang mga tag-iya modesisyon gyod tingali nga ipaayo ni. Andam ni nilang himoon bisag dako kaayo silag magasto ug moabot tingalig daghang tuig ayha ni mahuman. Ngano? Kay importante nila ang maong painting o bilding. Sa samang paagi, ang tanang kaminyoon bililhon kaayo. Siyempre, bisag unsa pa ka suod ang magtiayon, usahay motungha gyod ang mga problema. Pero sama nga kayang ayohon ang nadaot nga painting o bilding, ang problemado nga kaminyoon kaya pang masalbar. Tinuod, dili ni awtomatikong mahitabo, ug nagkinahanglan nig dakong paningkamot. Pero malipay kaayo si Jehova kon himoon sa magtiayon ang tanan nilang maarangan nga palig-onon ang ilang kaminyoon ug mounong sa usag usa. (Mal. 2:16) Kon ila nang himoon, ilang gipakita ang ilang gugma ug pagtahod dili lang para sa usag usa, kondili ngadto pod kang Jehova, nga maoy naghimo sa kahikayan sa kaminyoon.

16. Sumala sa 1 Corinto 13:​4-8a, unsay makatabang sa magtiayon nga naay seryosong problema sa ilang kaminyoon? (Tan-awa sab ang hulagway ug ang kahong “Mga Tabang Aron mas Magkasuod Mo.”)

¹⁶ Kon magkaproblema mo sa inyong kaminyoon, ayaw paghunahuna dayon nga makigbulag. (1 Cor. 7:​10, 11) Hinuon, pangutan-a ang imong kaugalingon, ‘Unsay akong himoon aron mabalik ang among kasuod?’ Tun-i ang giingon sa Bibliya bahin sa gugma, sama pananglitan diha sa 1 Corinto 13:​4-8a. (Basaha.) Dayon pamalandonga kon unsa nga mga kinaiya ang angay nimong pauswagon aron mas makapakita kag gugma. Imbes mangitag rason nga makaikyas sa inyong kaminyoon, himoa ang tanan aron mabalik ang inyong gugma sa usag usa. Ayaw pagsigeg hunahuna nga ang imong bana o asawa ang angayng magbag-o. Hinuon, pagpokus sa kon unsay imong mahimo. Hangyoa si Jehova nga tabangan ug giyahan ka. Tun-i ug ipadapat ang imong nakat-onan gikan sa atong mga publikasyon ug mga video, ug pangayog tambag gikan sa mga ansiyano ug ubang hamtong nga mga Kristohanon. Kon mosalig mo kang Jehova, ang ikatulo ug pinakalig-on nga pisi sa inyong relasyon, ang inyong kaminyoon “dili daling mabugto.”—Eccl. 4:12.

17. Unsay makatabang sa mga nagplanong magminyo ug niadtong mga minyo na nga magmalipayon?

¹⁷ Gusto ni Jehova nga ang tanan niyang alagad magmalipayon, apil na kadtong mga naghunahunang magminyo ug kadtong mga minyo na. Maong kon single ka ug gusto kang magminyo, piliag maayo ang imong minyoan nga mahimo unya nimong pinakasuod nga higala. Ug para sa mga magtiayon, padayong palig-ona ang inyong kasuod. Paningkamoti nga masulbad ang mga problema nga posibleng motungha sa inyong kaminyoon, ug salig sa tabang ni Jehova. Kon inyo ning himoon, magmalipayon gyod mo.—Eccl. 9:9.