Kon sa Unsang Paagi Nato Masundog ang “Diyos sa Tanang Paghupay”

1. Nganong angay natong hupayon ang uban?

KITANG tanan ‘nag-antos tungod sa lainlaing pagsulay,’ maong usahay nagkinahanglan gyod tag paghupay ug pagdasig. (1 Ped. 1:6) Mogaan gyod ang atong gibati kon makadawat ta ana, maong gusto pod natong dasigon kadtong naa sa lisod nga kahimtang. (Mat. 7:12) Si Jehova, “ang Diyos sa tanang paghupay,” naghatag natog maayong ehemplo aron mahibalo ta kon unsaon ‘paghupay sa uban nga nag-atubang ug bisan unsang matang sa pagsulay.’ Masundog nato siya kon hupayon pod nato ang usag usa. (2 Cor. 1:​3, 4; 1 Tes. 4:18) Himoon nato na dili tungod kay obligado ta, kondili kay gimahal nato ang mga igsoon. Niining artikuloha atong hisgotan (1) kon unsay kahulogan sa paghupay nga gihisgotan sa Bibliya, (2) kon unsaon nato paghupay ang uban, ug (3) kon unsay atong mahimo kon nagkinahanglan tag paghupay.

ANG KAHULOGAN SA PAGHUPAY

2. Sa Bibliya, unsay kahulogan sa pulong nga “paghupay”?

² Sa Bibliya, ang Gregong pulong nga gihubad ug “paghupay” daghan ug kahulogan, depende sa pagkagamit. Puwede ning magpasabot ug “pagdasig” o “pag-awhag.” (Roma 12:8; tan-awa ang study note nga “encourages.”) Sa literal, kini nga pulong nagkahulogang “paghangyo sa usa nga mobarog sa imong kiliran.” Base ani, ma-imagine nato ang usa ka tawo nga nagdalidalig dagan paingon sa iyang higala nga nagkaproblema. Maningkamot siya nga tabangan ug suportahan ang iyang higala sa lainlaing paagi kay gusto niya nga madasig ug mogaan ang gibati sa iyang higala.

3. Nganong maayo nga ehemplo si Bernabe sa paghupay sa uban? (Tan-awa sab ang hulagway.)

³ Ang Bibliya naghisgot sa ehemplo sa usa ka Kristohanon sa unang siglo nga si Jose. Andam kaayo siyang modasig ug mohupay sa uban, maong gianggaan siya sa mga apostoles ug Bernabe, nga nagkahulogang “Anak sa Paghupay.” (Buh. 4:36) Haom kaayo niya ang maong angga, ug gani wala na siya tawga sa Bibliya sa iyang tinuod nga ngalan. Kadaghan gipakita ni Bernabe kon unsa siya ka andam motabang sa mga igsoon nga nanginahanglan. Pananglitan, sa bag-o pang nahimong Kristohanon si Saulo, miadto siya sa Jerusalem aron makigkita sa mga tinun-an. Pero ang mga tinun-an nahadlok niya kay daghan na siyag gilutos nga mga Kristohanon. Bisan pa ana, si Bernabe misalig kang Saulo ug iya siyang gidala ngadto sa mga apostoles.—Buh. 9:​26-28.

KON UNSAON NATO PAGHUPAY ANG UBAN

4. Unsa ang usa sa pinakamaayong paagi nga mahupay nato ang uban? (Roma 1:​11, 12)

⁴ Bisitaha sila kon posible. Gigamit ni Jehova ang iyang mga alagad aron hupayon ang uban. Pananglitan, dihang naguol kaayo si propetang Elias, migamit si Jehova ug anghel aron palig-onon siya. (1 Hari 19:​4-7) Nakita pod ni apostol Pablo nga dako kaayog tabang ang pagbisita sa mga igsoon. (Basaha ang Roma 1:​11, 12.) Busa kon naa kay gustong bisitahon ug dasigon, paggahin ug igong panahon uban niya imbes nga mangomosta lang kadiyot. (1 Cor. 16:7) Pero kon dili ka makabisita niya, dako gihapog tabang kon imo siyang tawagan, i-text, sulatan, o padad-ag card. Gusto kaayo ni Jehova nga gamiton ka sa paghupay sa uban. Andam ba ka nga magpagamit niya?

5. Sa unsang mga situwasyon nga posibleng malisdan ta sa paghupay sa uban?

⁵ Samtang magkaduol ta sa kataposan, makadahom ta nga mas mosamot ang kahimtang ug mahimong mas lisod para nato ang paghupay sa mga igsoon. Tagda ang ehemplo ni Onesiforo nga taga-Efeso. Dihang napriso si Pablo sa Roma, gusto niyang hupayon si Pablo, pero delikado to kay posible siyang mapriso o patyon pa gani. Bisan pa ana, nagpakita gihapog kaisog si Onesiforo ug iyang gipangita si Pablo. (2 Tim. 1:​16-18) Mao pod nay gihimo sa mga Saksi didto sa Russia dihang ang mga igsoon gipanglutos tungod sa ilang pagtuo. Andam silang moadto sa korte aron suportahan ang mga igsoon nga gihusay, bisag dakog posibilidad nga dakpon pod sila. Unsaon nimo pagsundog ang kaisog nga ilang gipakita? Puwede kang mangandam daan karon pinaagi sa pagtuon kon sa unsang paagi nagtinabangay ang katawhan ni Jehova kaniadto ug karon, ug kon nganong nakapabilin silang malipayon bisan pa sa mga paglutos.

6. Unsaon nato pagsundog si Jehova dihang mohupay ta sa uban? (Tan-awa sab ang hulagway.)

⁶ Paminawa sila. Dihang si propetang Elias nahadlok tungod sa mga tawo nga gustong mopatay niya, iyang gisulti kang Jehova ang tanan niyang gibati. Mahigugmaon kaayo si Jehova kay naminaw gyod siya kang Elias bisag nahibalo na siya daan kon unsay nakapabalaka sa iyang propeta. Naminaw pa gani siya pag-ayo bisag balikbalik na ang gisulti ni Elias! (1 Hari 19:​9, 10, 14) Sa susama, gitugotan ni Jehova si propetang Habacuc nga mosulti sa iyang mga kabalaka ug mga pagduhaduha, bisag morag gikuwestiyon na ni Habacuc ang Iyang awtoridad. (Hab. 1:​2, 3) Karon pod, mamati si Jehova sa atong mga pag-ampo bisag nahibalo na siya daan kon unsay atong gikinahanglan. Masundog nato si Jehova kon maminaw pod ta pag-ayo sa uban ug pakitaan nato silag pagtahod dihang mosulti sila. Kinahanglang “abtik [ta] sa pagpaminaw” ug dili ta mosagbat o masuko nila, bisan dihang makasulti silag sakit o balikbalik na lang ang ilang ipanulti.—Sant. 1:19; Eccl. 7:9.

7. Unsaon nato pagkahibalo kon unsa gyoy gikinahanglan sa igsoon?

⁷ Hunahunaa kon unsa gyoy ilang gikinahanglan. Dili ta parehas kang Jehova nga makabasag kasingkasing, maong mahibaloan lang nato kon unsa gyoy gikinahanglan sa usa ka tawo kon maminaw ta pag-ayo niya. Ayaw paghunahuna nga ang imong gikinahanglan kon ikaw ang naa sa iyang situwasyon mao poy iyang gikinahanglan. Hinumdomi nga lahilahi ta, busa paggahin ug panahon sa pagpaminaw ug pangutan-a siya aron mahibaloan nimo kon unsa gyoy iyang gibati.—Prov. 20:5.

8. Giunsa paghupay ni Jesus si Marta ug Maria dihang namatay si Lazaro? (Tan-awa sab ang mga hulagway.)

⁸ Hunahunaa kon giunsa paghupay ni Jesus si Marta ug Maria human mamatay ang ilang igsoong si Lazaro. Parehas silang naguol, pero lainlain ang paagi ni Jesus sa paghupay nila. Human moestorya si Marta, gisultian siya ni Jesus bahin sa pagkabanhaw ug gitabangan siya nga mapalig-on ang iyang pagtuo niining nindot kaayo nga paglaom. Pero dihang si Maria na ang miduol niya ug naghilak, wala hisgoti ni Jesus ang pagkabanhaw. Hinuon, mihilak pod siya ug nangutana kon asa nila gipahiluna ang patayng lawas ni Lazaro. (Juan 11:​20-35) Unsay atong makat-onan? Dihang hupayon nato kadtong mga nag-antos, dili ta maghunahuna nga kon epektibo ang atong pamaagi sa paghupay sa usa, mao pod nay mogana sa uban. Hinuon, angay natong hunahunaon kon unsa gyoy gikinahanglan sa matag usa.

9. Unsaon nato paggamit ang Bibliya sa paghupay sa uban? (Roma 15:​4, 5)

⁹ Gamita ang Bibliya. Dihang isulti nimo sa uban ang makapahupayng mga pulong gikan sa Balaang Kasulatan, matabangan nimo sila nga makabatog paglaom. (Basaha ang Roma 15:​4, 5.) Kana nga paglaom makahupay ug makadasig nila. (Isa. 40:31) Unsay imong himoon aron naa kay ika-share nga teksto para niadtong mga nanginahanglag pagdasig? Ang uban maglista daan ug mga teksto nga puwede nilang magamit, sama nianang naa ubos sa ulohang “Kahupayan” diha sa publikasyon nga Mga Teksto Para sa Kristohanong Pagkinabuhi. Hangyoa si Jehova nga tabangan kang magamit ang iyang Pulong sa pinakamaayong paagi aron dasigon ang uban. Ang iyang balaang espiritu makatabang nimo nga mahinumdoman ang haom nga mga teksto nga imong gikinahanglan.—Juan 14:26.

10. Nganong kinahanglan nga buotan ang atong sinultihan dihang modasig ta sa uban?

¹⁰ Sulti sa buotan nga paagi. Sa orihinal nga pinulongan, ang pulong nga “paghupay” puwede pong hubaron nga “pag-awhag.” Usahay dihang mohupay ta sa usa ka igsoon, kinahanglan tingali nato siyang awhagon nga usbon ang iyang panghunahuna. Kon mao nay kinahanglan nimong himoon, hunahunaa daan kon unsaon nimo na pagsulti aron ang imong mga pulong makapadasig, dili makapasakit. (Prov. 12:18) Konsideraha ang maayong ehemplo ni Jehova dihang nakig-estorya siya kang Elias. Si Elias nagtuo nga wala nay pulos ang iyang mga paningkamot ug nga ang tibuok Israel nagsimba na sa bakak nga diyos. Pero wala siya koreksyoni dayon ni Jehova. Hinuon, mahigugmaon siyang gitabangan ni Jehova nga mausab ang iyang panghunahuna. (1 Hari 19:​15-18) Masundog pod nimo ang kabuotan ug kamahunahunaon ni Jehova. Dihang mohatag kag mga pakigpulong o mokomento panahon sa tigom, paningkamoti nga mosulti sa buotan ug makapadasig nga paagi aron mapalig-on nimo ang mga igsoon.

11. Unsay sagad gikinahanglan niadtong mga naa sa kalisdanan? (1 Juan 3:18)

¹¹ Paghatag ug praktikal nga tabang. Ang makapahupayng mga pulong dakog mahimo aron madasig ang igsoon nga naa sa kalisdanan, pero usahay kinahanglan pa tingali tang mohimog dugang. (Basaha ang 1 Juan 3:18.) Hunahunaa ang maayong ehemplo ni Bernabe. Iyang gibaligya ang uban niyang propidad ug gihatag ang halin ingong donasyon aron suportahan ang mga igsoon nga nanginahanglag tabang. (Buh. 4:​36, 37) Daghang igsoon karon ang nagsundog sa maayong ehemplo ni Bernabe pinaagi sa paghatag ug praktikal nga tabang niadtong mga naa sa kalisdanan. Pananglitan, tagda ang eksperyensiya sa sister nga si Gabriela, nga taga-Poland. Naguol kaayo siya dihang naguba ang iyang balay tungod sa baha. Siya miingon: “Nabalaka kaayo ko, hasta ang akong mga ginikanan nga ipon nakog puyo. Wala mi mahibalo kon unsay among buhaton. Pero dihay nangabot nga mga igsoon gikan sa lainlaing kongregasyon, ug ilang gi-repair ang among balay sulod lang sa usa ka adlaw. Kadto nga eksperyensiya nakapalig-on sa akong pagsalig nga gamiton gyod ni Jehova ang iyang katawhan aron hupayon kadtong naa sa lisod nga kahimtang.”

12. Sa unsang paagi ang imong matinumanong paglahutay makatabang sa mga igsoon?

¹² Lahutay sa imong mga kalisdanan. Giingnan ni Pablo ang mga taga-Tesalonica nga nahupay ug napalig-on siya dihang nabalitaan niya nga padayon silang milahutay ug nagmatinumanon. Nahibalo siya nga wala masayang ang iyang mga paningkamot para nila. (1 Tes. 3:​5-8) Tungod ana, gusto pod ni Pablo nga magpabiling matinumanon. Nahibalo siya nga pinaagi niini mahupay niya ang mga igsoon, bisan kadtong mga wala pa makaila niya sa personal. (Col. 2:​1, 2) Sa samang paagi, madasig pod pag-ayo ang mga igsoon dihang makita nila kon giunsa ta pagtabang ni Jehova nga malahutay ang atong mga pagsulay.

13. Unsay padayon natong himoon dihang modasig ta sa uban?

¹³ Ipakita ang pailob. Kon ang igsoon naguol pag-ayo, dili tingali dayon moarang-arang ang iyang gibati bisan pag naningkamot na ta nga hupayon siya. Pero dili ta angayng mohunong sa pagtabang niya. Ang Bibliya nag-awhag nato nga ‘padayong magdinasigay.’ (1 Tes. 5:11) Maong ipakita ang pailob samtang maningkamot ka nga padayong tabangan ug hupayon kadtong mga nanginahanglan. (1 Tes. 5:14) Pero siyempre, naay mga panahon nga kita pod ang magkinahanglag paghupay. Unsay atong himoon?

DIHANG MANGINAHANGLAN KAG PAGHUPAY

14-15. Unsay angay natong himoon kon makaatubang tag mga situwasyon nga makapaguol o makapabalaka nato?

¹⁴ Ampo kang Jehova. Hangyoa siya nga hupayon ka dihang maguol kaayo ka o mabalaka. (Sal. 94:19) Himoang espesipiko ang imong mga pag-ampo ug isulti kaniya ang tanan nimong gibati. (Sal. 62:8) Tinuod, nahibalo na daan si Jehova sa imong gibati. Pero kon imo gihapong ibubo ang imong kasingkasing kaniya pinaagi sa pag-ampo, imong gipakita nga misalig ka niya. Tubagon gyod ni Jehova ang pag-ampo niadtong mga dunay pagsalig niya, ug usahay himoon na niya sa paagi nga wala nato damha. (Mar. 11:24) Ang Filipos 4:​6, 7 nagdasig nato: “Ipahibalo sa Diyos ang inyong mga hangyo . . . Ug ang kalinaw nga gikan sa Diyos, nga labaw sa tanang pagsabot, magbantay sa inyong kasingkasing ug hunahuna.”

¹⁵ Pangayog tabang sa uban. Isulti ang imong gibati ngadto sa hamtong nga higala o sa ansiyano nga komportable kang makig-estorya. Ang mga igsoon andam kaayong mohupay nimo, pero dili tingali sila mahibalo kon unsa gyoy imong gibati o gikinahanglan hangtod nga mosulti ka nila. (Prov. 14:10) Puwede nimo silang hangyoon nga maminaw nimo, o pangutan-on kon naa ba silay ika-share nga teksto o artikulo nga makatabang nimo.

16. Unsa tingali mahitabo dihang maningkamot ang uban sa paghupay nato, pero unsay angay natong hinumdoman?

¹⁶ Ipakita ang pailob ug magmapinasayloon. Dihang maningkamot ang mga igsoon sa paghupay nato, basin naa silay masulti o mahimo nga makapasamot na hinuon sa atong gibati imbes nga makahupay nato. Kon mahitabo na, maayo nga pasensiyahan nato sila. (1 Cor. 13:​4, 7) Ang Santiago 3:2 nagpahinumdom nato: “Kon dunay dili mapandol sa pulong, hingpit siya nga tawo.” Busa pagpokus sa maayong motibo sa mga igsoon, nga gusto lang silang motabang nimo. Hinumdomi nga “andam ang espiritu, apan luya ang unod.”—Mat. 26:41.

17. Unsay angay natong determinasyon?

¹⁷ Kitang tanan nagkinahanglag paghupay ug pagdasig, ug mas magkinahanglan pa gyod ta ani samtang magkaduol ta sa kataposan ug mas magkagrabe ang paglutos nga atong masinatian. Busa himoon natong determinasyon nga padayong maningkamot sa paghupay sa usag usa.