Singapore Nagyatak sa Kagawasan sa Pagsimba

SA GABII sa Pebrero 24, 1995, upat ka balay sa siyudad sa Singapore ang gironda sa mga polis. Ang gidaghanon nga 69 ka tawo gipangdakop.a Lakip kanila ang 71-anyos nga babaye ug duha ka 15-anyos nga mga dalagita. Ngano? Tungod ba sa kriminal o subersibong kalihokan? Dili. Walay usa kanila ang nalangkit sa bisan unsang kalihokan nga bisan sa kinagamyang diwa pagaisipon nga peligroso, imoral, o batok sa katawhan. Sila dili hulga sa moral nga mga prinsipyo, kahilwas, ug kaayohan sa ilang mga isigka-Singaporean. Bisan pa niana, human rikesaha ang upat ka balay, ang mga polis nagdala sa 69 ka tawo, nga nagtigom sa pagtuon sa Bibliya ug pagpahimulos sa usa ka salusalo, ngadto sa estasyonan sa polis. Wala sila buhii hangtod sa buntag, gisukitsukit, gikuhaan ug tamla sa tudlo, ug giletratohan​—oo, gitratar nga sama sa ordinaryong mga kriminal! Sulod niining panahona​—nga gidangtag 18 oras nga dili maayo ang mga kahimtang​—wala sila tugti nga modangop ug abogado ug gidid-an pa gani sa pagtawag sa telepono sa pagpahibalo sa mga membro sa pamilya kon asa sila. Mahanduraw lamang sa usa kon sa unsang paagi ang maong hinanaling aksiyon nakaapektar niining malinawon, masinundanon-sa-balaod nga mga lungsoranon!

Ang esena makapahinumdom sa mga kahimtang panahon sa makalilisang nga mga adlaw sa Nazing Alemanya ug sa yugtong Komunista sa Unyong Sobyet ug Sidlakang Uropa. Dili kini maoy dahomon sa usa ka ordinaryong bisita sa Singapore nga makaplagan nianang hinlo kaayo ug adunahang modernong siyudad-estado. Ang Singapore nakabaton ug dungog ingong ika-20ng siglo nga kahibulongan sa ekonomikanhon ug sosyal nga kauswagan. Usa kini ka dayag nga demokrasya nga adunay batakang-balaod nga naggarantiya sa mga molupyo niini ug pasikaranang tawhanong mga katungod, lakip ang kagawasan sa pagsulti, relihiyon, ug pagtigom.

Apan, kadtong gipangdakop sa Pebrero gipuntirya tungod lamang kay sila mga Saksi ni Jehova nga nagtigom aron magtuon sa Bibliya ug makig-ambit sa Kristohanong pag-ubanay. Ang sumbong batok kanila mao ang “pagtambong ug usa ka tigom sa kapunongan nga supak sa balaod.”

Sa pagkatinuod, ang mga Saksi ni Jehova wala hatagig legal nga pag-ila sa Singapore sukad sa 1972 sa dihang ang Kongregasyon sa Singapore gitangtang sa listahan sa rehistro, ug ang literatura, lakip ang mga Bibliya, nga gipatik sa Watch Tower Bible and Tract Society gidili. Walay kahigayonan nga gitugot sa pagsupak sa mga pangangkon nga gipasikaran sa maong aksiyon. Di pa dugay, ang legalidad niining opisyal nga pagpihig gitigi sa mga korte sa Singapore sa kaso sa upat ka Saksi nga nahukmang sad-an niadtong Pebrero 1994 tungod sa pagpanag-iyag gidiling literatura sa Bibliya. Ang apelasyon batok sa ilang mga hukom gibista niadtong Agosto 1994 ug sa madali gidismis. Ang Pangulong Huwes Yong Pung How sa Hataas nga Korte nagpagula sa iyang hunahuna sa misunod nga bulan. Siya naghunahuna nga walay paglapas sa relihiyosong kagawasan ug nga ang mga hukom makataronganon sa pasikaranan nga ang mga Saksi ni Jehova maoy hulga sa nasodnong kasegurohan tungod kay ang mga membro niini dili moapil sa militaryong pag-alagad. Sa Pebrero 17, 1995, ang upat ka Saksi nangayog pagtugot sa pag-apelar niining dili-hustong desisyon ngadto sa Korte sa Apelasyon sa Singapore. Ang aplikasyon wala dawata.

Kining kataposang desisyon gihatagag importansiya sa gimandoan-sa-gobyernong prensa sa Singapore. Walay duhaduha kining desisyon sa korte ug ang miresulta nga publisidad naglandong sa mga hitabo nga misunod. Sulod sa usa ka semana ang pagdakop sa 69 ka Saksi nahitabo. Ang mga sumbong nga gipasaka batok sa upat kanila​—mga lungsoranon sa Britanya, Pransiya, ug Luxembourg—​gidismis dayon. Apan, makalilisang gihapon ang kasinatian nila. Usa ka lalaki ang nagpuyo ug nagtrabaho sa Singapore sulod sa daghang katuigan uban sa iyang asawa. Nawad-an sila sa ilang mga trabaho ug sa ilang giabangang balay ug gipugos sa pagpanamilit sa daghang suod nga mga higala.

Ang nahibiling 63 ka hamtong gipasakaan ug sumbong nga sakop sa gidiling kapunongan, ug ang pipila gisumbong usab nga nanag-iya ug gidili nga literatura. Nag-atubang sila ug kinatas-ang tulo ka tuig sa bilanggoan o S$3,000 ($2,100, U.S.) nga multa o ang duha. Ang duha ka 15-anyos nga dalagita miatubang nga bulag sa korte alang sa mga batan-on.

Dili Hulga sa Nasodnong Ilhanan ug Panaghiusa

Sa tibuok kalibotan, sa kapin sa 200 ka nasod diin sila nagpuyo, ang mga Saksi ni Jehova nailhan ingong desente, matinud-anon, masinundanon-sa-balaod nga katawhan. Sila nailhan tungod sa ilang lig-ong pagdumili sa pag-apil sa bisan unsang matang sa subersibo, batok-gobyernong kalihokan​—dili-kristohanong buhat nga mahimong mosangpot sa pagpalagpot, o pag-ekskomunikar kanila. Sa pagkatinuod, ang gobyerno sa Singapore walay angayng kahadlokan kanila. Dili gayod sila usa ka hulga sa nasodnong seguridad sa Singapore o sa diwa sa nasodnong ilhanan ug panaghiusa. (Roma 13:1-7) Kini tin-awng gipahayag sa usa ka sulat nga pinetsahan ug Marso 21, 1995, gikan ni Milton G. Henschel, presidente sa Watch Tower Bible and Tract Society, ngadto kang Primer Ministro Goh Chok Tong sa Singapore. Kining sulata gikopya dinhi alang sa kaayohan sa among mga magbabasa.

Ang mahigugmaon-sa-kagawasan nga mga tawo diha sa negosyo, gobyerno, ug pribadong sektor maikagong magabantay aron masayran kon unsay sangpotanan niining maong kahimtang sa Singapore. Ang gobyerno ba sa Singapore molihok nga kaharmoniya sa pasikaranang tawhanong mga katungod ug mga kagawasan nga gisagop sa kaugalingon niining batakang-balaod ug sa internasyonal nga katilingban sa mga nasod? Tino, ang mga Saksi ni Jehova sa tibuok kalibotan dulot nga nabalaka sa ilang kaubang mga magsisimba sa Singapore. Mahinumdom sila kanila diha sa ilang mga pag-ampo ug mahinumdom sa pasalig sa Bibliya: “Si Jehova mahigugmaon sa hustisya, ug dili niya pagabiyaan ang mga maunongon kaniya.”​—Salmo 37:28.

[Footnote]

[Kahon sa panid 30]

Marso 21, 1995

Goh Chok Tong

Primer Ministro

Istana Annexe

Singapore 0923

Republika sa Singapore

Lee Kuan Yew

Senyor Ministro

Buhatan sa Primer Ministro

460 Alexandra Road

37-00 PSA Bldg

Singapore 0511

Republika sa Singapore

Minahal nga mga Ginoo:

Ang usa ka bag-ong balita sa Reuters gikan sa Singapore nga pinetsahan ug Pebrero 25, 1995, makapasubo kaayo. Kini nagtaho nga ang mga tigom sa pagtuon sa Bibliya sa mga Saksi ni Jehova gibungkag sa mga polis ug 69 ka tawo ang gidakop. Kining maong taho nagtunong sa pagtagad sa kalibotan sa kahimtang sa mga Saksi ni Jehova sa Singapore, diin ang ilang mga kalihokan ug literatura gidili sulod sa kapin sa 20 ka tuig.

Lisod sabton kon nganong ang usa ka relihiyosong organisasyon nga dayag nga naglihok uban ang bug-os nga proteksiyon sa balaod sa kapin sa 200 ka nasod idili sa Singapore, usa ka nasod nga nagsagop sa mga prinsipyo sa demokrasya. Labi pang makapasubo kon tagdon ang garantiya sa batakang-balaod sa Singapore sa kagawasan sa pagsimba alang sa mga lungsoranon niini.

Ang mga Saksi ni Jehova wala gayod magpahinabog bisan unsang hulga sa nasodnong seguridad bisan diin. Sa pagkatinuod, sa tibuok kalibotan ilado sila ingong malinawon, kugihan, matarong ug moral, ug masinundanon sa balaod​—mga hiyas nga segurado akong inyong gipasiugda sa inyong nasod.

Tinuod nga sa ilang hugot nga pagsunod sa mga sukdanan sa Bibliya alang sa mga Kristohanon, ang baroganan sa mga Saksi ni Jehova usahay dili masabtan o masaypan. Apan, dili ba tinuod usab kini sa magtutukod sa Kristiyanidad kinsa nasaypan usab nga batok kang “Cesar,” ang gobyerno sa iyang adlaw? Ang mga Saksi ni Jehova nagsunod lamang sa panig-ingnan ni Jesus ug sa unang mga Kristohanon. Sila nagtahod sa gobyerno diin sila nagpuyo, nagbayad sa ilang mga buhis, ug nagpasiugda ug maayong moral. Sila matinud-anon ug matarong nga mga lungsoranon. Wala pa gayod moapil ang mga Saksi ni Jehova sa bisan unsang matang sa subersibong kalihokan sa bisan diing nasod ug ipasalig ko kaninyo nga ang ilang presensiya sa Singapore dili hulga sa nasodnong intereses sa inyong nasod.

Tungod sa bag-ong mga taho sa media, ang mga pagpugong sa inyong gobyerno sa mga Saksi ni Jehova sa Singapore sa pagkakaron nahibaloan sa kadaghanan. Ilabinang nakapabalaka kini sa ilang 12 ka milyong kaubanan sa tibuok kalibotan. Naghangyo ako sa inyong katungdanan sa pagsulbad sa kahimtang ug hatagan ang mga Saksi ni Jehova sa inyong nasod ug kagawasan sa pagsimba ug sa tanlag nga gigarantiya sa Batakang-Balaod.

Ako nagtuo nga ang prangkang panaghisgot uban sa mga hawas sa mga Saksi ni Jehova motabang sa pagwagtang sa bisan unsa nga wala masabti bahin sa among organisasyon ug kalihokan ug magpasalig kaninyo nga ang gobyerno sa Singapore walay angayng kahadlokan sa mga Saksi ni Jehova. Malipay ako sa paghikay sa maong miting.

Nagpaabot ako sa inyong tubag.

Matinahuron,

Milton G. Henschel

Presidente

[Picture Credit Line sa panid 31]

Nik Wheeler/H. Armstrong Roberts