Mga Magmamantala sa Gingharian Nagtaho
“Ang mga Karnero Magapatalinghog sa Iyang Tingog”
◻ SI Jesus miingon: “Ang mga karnero magapatalinghog sa tingog [sa magbalantay], ug pagatawgon niya ang iyang mga karnero sa ngalan ug pagamandoan niya sila paingon sa gawas.” (Juan 10:3) Siya midugang pa: “Ako nakaila sa akong mga karnero ug ang akong mga karnero nakaila kanako.” (Juan 10:14) Ang mga karnerohon magapatalinghog sa tingog ni Jesus samtang siya mosulti kanila pinaagi sa Bibliya. Matikdi kon giunsa pagsubay kining dalana sa duha ka tawo nga buotag kasingkasing sa Italya.
Sa Kataposan Siya Nagpatalinghog
◻ Si Alberto misulat: “Ako 16 anyos pa sa gisugdan ko ang pagyupyop ug marijuana ug paggamit sa LSD, ug sa 18 anyos gigamit ko ang heroina. Aron makabaton sa mga droga, gibuhat ko ang tanang butang nga mahunahunaan. Ako mangawat, ako mamaligyag mga droga, ako manikas, ako mamaligya sa tanan nakong butang. Dili gayod ako makahunong. Mga bakasyon sa ubang nasod, tagdugayng mga panahon sa kabanikanhan, o politikanhong pakiglangkit sa mga grupong extremista nga determinado sa pagbugno sa inhustisya—kining mga butanga wala makatabang. Gisulayan ko ang kaminyoon, apan tapos sa makadiyut nga panahon ako nahibalik sa sinugdanan. Bisan ang pag-abot sa usa ka batang babaye wala makapahunong sa akong paggamit sa mga droga. Ngani, migrabe pa ang kahimtang, sanglit sa maong panahon gikinahanglan ko ang dugang salapi. Unya gibiyaan ako sa akong asawa, ug sa duha ka tuig nga pagpuyong nag-inusara, kaduha ra nako makita ang akong anak babaye. Ako sigeg kalagiw gikan sa mga tigbaligyag droga nga giutangan nako, ug sa daghang panahon nag-antos ako sa mga simtoma sa pagkagiyan.
“Dayon ako nahinumdom sa usa ka libro nga gihatag kanako sa mga Saksi ni Jehova pila ka tuig nga miagi. Kadto diha pa kanako ug misugod ako sa pagbasa niadto uban sa Bibliya. Sa maong panahon ako nakaila sa matuod nga Diyos, si Jehova, ug ako miampo kaniya alang sa tabang. Samtang hinayhinay nakong gipadapat ang mga butang akong nakat-onan, ang akong mga simtoma sa pagkagiyan nahimong dili na kaayo grabe. Ako nakakitag trabaho, ug sa tabang ni Jehova akong napabalik ang akong pamilya. Ako miadto sa Kingdom Hall, ug didto ako nakaamgo nga ang mga Saksi ni Jehova nakabaton sa kamatuoran. Kay nagkauliay na man, ang akong asawa ug ako nagtuon sa Bibliya uban sa mga Saksi ug sa kataposan nabawtismohan. Karon, pagkadako ang kalipay nga ipakig-ambit sa uban ang among paglaom ingong regular nga mga payunir!”
Pag-ampo sa Usa ka Babayeng Debotada Gitubag
◻ Usa ka babaye nagtaho: “Niadtong 1958, ako aktibong nakig-ambit sa mga kalihokan sa parokya, ilabina sa mga balaang pagduaw ngadto sa Sangtuwaryo sa Madonna sa Balaang Gugma sa Roma. Sa wala madugay ako nahimong suod nga higala sa usa ka kardinal nga mao ang bikaryo sa Roma, ug ako nagbaton sa daghang pribadong mga pakig-estorya uban kang Papa Paulo VI ug Juan Paulo II. Tapos sa 25 ka tuig nga pag-organisar ug balaang mga pagduaw, nakadawat ako sa usa ka diploma sa merito. Bisan pa niana, sa wala madugay ang akong pagtuo ingong masibotong Katoliko misugod sa pagkatarog. Namatikdan nako ang mga pangawat, mga panikas, nepotismo, ug katingad-ang pagbaligya. Ako misugod sa pagtan-aw sa simbahan pinaagi sa laing mga mata samtang naamgohan ko nga kasagaran kaayong ginayatakan ang kasugoan sa Diyos. Kanang mga butanga nakatugaw kanako, ug mihangyo ako sa Diyos nga tabangan ako kay nagkawala ang akong pagtuo. Ako sigeg hilak.
“Dayon, upat ka tuig kanhi, gidad-an ako sa akong anak lalaki ug pipila ka kopya sa Ang Bantayanang Torre ug Pagmata! nga iyang nakuha gikan sa mga Saksi ni Jehova. Ang mga magasin makaiikag kaayo nga gihangyo ko siya nga kuhaan akog dugang kopya. Sa wala madugay human niadto akong nakaplagan ang usa ka Kingdom Hall sa mga Saksi ni Jehova ug nagbilin ug mubong sulat sa pultahan nga naghangyong may moduaw kanako. Ang mga Saksi nangabot upat ka oras sa ulahi. Gisugdan ko ang usa ka pagtuon sa Bibliya ug miuswag hangtod sa punto sa bawtismo. Karon ako nakatino nga sa kataposan akong nakaplagan ang butang nga gipangita nako sa kanunay—ang kamatuoran!”
Kining mga tawhana nagpatalinghog sa tingog sa Maayong Magbalantay, si Jesu-kristo, ug ‘ang kamatuoran nagpahigawas kanila.’—Juan 8:32.
[Picture Credit Line sa panid 14]
Garo Nalbandian