Pagkadaghan sa mga Katarongan nga Ako Magmapasalamaton!

SUMALA SA GIASOY NI LOTTIE HALL

KADTO nahitabo sa among pagpaingon sa Rangoon, Burma, gikan sa Calcutta, India, niadtong 1963. Wala madugay sa pagbiya sakay sa ayroplano, namatikdan sa usa sa mga igsoon nga nagtulo ang aseite diha sa pako. Sa gisultihan niadto, gipahayag sa tripulante ang emerhensiyang paglanding. Kinahanglang ihaw-as una sa ayroplano ang daghang aseite una makalanding. Ang kamarero mipatugbaw, “Kon buot ninyong moampo, buhata na ninyo kana karon!” Miampo gayod kami nga kon kabubut-on ni Jehova, kami unta makalanding nga luwas, ug kami luwas nga nakalanding. Tinuod nga kami may angay nga ipasalamat!

OO, UG ako may daghan pang ipasalamat. Sa edad 79, ako may igoigo pang kahimsog ug kusog, nga gigamit nako sa bug-os-panahong ministeryo. Lain pa, dugang sa mga panalangin nga sama sa iya sa tanang katawhan ni Jehova, ako may daghang talagsaong mga kasinatian. Tanantanan, maoy akong bililhong pahat ang pag-alagad kang Jehova sulod sa abot sa 60 ka tuig, ug kapin sa katunga nianang panahona ako maoy bug-os-panahong ministro, o payunir.

Ang tanan nagsugod uban sa akong amahan sa dihang kami nagpuyo sa Carbondale, Illinois. Siya nakig-uban sa denominasyong Mga Disipulo ni Kristo ug naikag nga magministro. Bisan pa niana, ang iyang kasinatian uban sa duha ka kolehiyo sa Bibliya nakapalugda kaniya, kay siya may kaugalingong mga ideya bahin sa Trinidad, sa imortalidad sa kalag, ug sa walay-kataposang pagsakit.

Sa kataposan, siya natagbaw sa kamatuoran sa Bibliya nga gidala kaniya sa usa ka Bible Student nga colporteur niadtong 1924, sa dihang ako 12 anyos pa lang. Ang akong amahan nalipay sa pagkahibalo nga may uban pa nga sama kaniyag pagbati, nga ang Trinidad, impiyernong-kalayo, ug imortalidad sa tawhanong kalag maoy bakak nga mga pagtulon-an. Sa wala madugay ang among pamilya nakigtigom nga regular sa mga Estudyante sa Bibliya, sumala sa pagtawag niadto sa mga Saksi ni Jehova. Ang pagkasayod sa kamatuoran bahin kang Jehova ug sa iyang Pulong maoy butang nga alang niana ako mapasalamaton kaayo.

Wala madugay, hinunoa, nahitabo ang katalagman. Ang tawo nga nagdala sa akong amahan sa maong mga kamatuoran misangpot nga limbongan ug imoral. Gipandol niya ang akong amahan apan ang akong inahan ug ako wala. Ako, nga niadto 15 anyos na, mao ang kamagulangan sa unom ka anak, ug uban sa akong inahan ako nagpabilin sa kamatuoran.

Sa ting-init sa 1927, giabiso nga ang usa ka dakong kombensiyon sa mga Estudyante sa Bibliya pagahimoon sa Toronto, Canada. Si Papa miingon nga siya dili makaabot sa pagtambong, apan si Mama maoy usa ka babayeng determinado. Misugod siya sa pagbaligyag lainlaing butang sa panimalay, ug sa pagkapanahon sa kombensiyon nakaipon siyag walo ka dolyares. Uban sa maong kantidad siya ug ako misugod sa pag-angkas sa pagsakay paingon sa Toronto, nga 1,600 kilometros ang kalayo. Mikabat ug lima ka adlaw ug 37 ka pagsakay una kami makaabot, nga nakaabot didto sa adlaw una mosugod ang kombensiyon. Kay gamay ra ang among kuwarta, kami nangayo ug nakadawat sa walay-bayad nga katulganan. Sa nakadungog si Brader A. H. Macmillan sa among biyahe, kana iyang gisulat alang sa mantalaan sa kombensiyon ubos sa ulohan: “Ang Uswag sa Plete sa Tren Dili Makapabalaka Niining mga Estudyante sa Bibliya.”

Si Mama nakigkomunikar kang Papa pinaagi sa mga postcard. Busa, sa kataposang gutlo, siya mihukom sa pagtambong ug nakaabot pinaagig kotse nga igo gayod sa panahon sa publikong pakigpulong sa kataposang adlaw sa kombensiyon. Niadto kami dili na kinahanglang moangkas sa pagsakay sa among pagpauli. Pagkatagsaon kadtong kombensiyona! Pagkamapasalamaton nako nga kami nakatambong niadto, ug pagkamapasalamaton nako nga kadto nakatabang sa akong amahan nga maulian sa iyang espirituwal nga panimbang!

Sa daghang katuigan sa dihang ako suknaon kon unsa ang akong relihiyon, ako motubag, “IBSA,” nga ang maong mga letra nagbarog alang sa International Bible Students Association. Apan ako wala gayod malipay sa maong pagtawag. Busa, ako mapasalamaton sa dihang sa 1931 nga kombensiyon sa Columbus, Ohio, among gidawat ang bag-ong ngalang mga Saksi ni Jehova.

Akong Karera sa Tunghaan

Apil sa daghang panalangin nga nakapatugob sa akong kinabuhi mao kadtong nalangkit sa musika. Ako mahiligon kaayo sa musika ug sa linghod nga panuigon nakakat-on sa pagtokar sa piano. Sa daghang katuigan ako nakapribilehiyo sa pagtokar duyog sa pag-awit sa kongregasyon. Sa wala pa mosugod ang Watch Tower Society sa paghimog mga rekording sa mga alawiton sa Gingharian, ang usa ka misyonaryong igsoong lalaki nga nag-alagad sa Papua New Guinea kas-a mihangyo nga himoon ko ang mga rekording sa ubay-ubay natong mga awit aron ang mga taga-Papua makatuon sa pag-awit niana. Kadto butang nga gikalipay ko sa pagbuhat.

Bisan pa niana, ang akong paboritong instrumento mao ang clarinet. Gusto kong motokar niana sa orkestra sa kolehiyo. Ang propesor sa kolehiyo nahimuot kaayo sa akong pagtokar nga mihangyo siya nga ako motokar usab diha sa banda sa mga lalaki. Niadtong mga adlawa walay babaye ang sukad nagtokar diha sa banda sa mga lalaki, busa sa dihang nadungog sa mga membro sa banda kon unsay gisugyot sa propesor, sila nagplano sa pagwelga. Gihunahuna nilag maayo kadto sa dihang sila giabisohan nga kon sila magwelga, sila ipalagpot. Ang laing tradisyon gilapas sa dihang ako gipamartsa uban sa banda diha sa tibuok-adlaw nga parada. Giklasipikar sa mantalaan nga kadto usa ka paukyab ug gitaho kadto uban sa dagkog-letrang mga pangunang-ulohan: “Babayeng Manunogtog Diha sa Pundok sa Kalalakin-an.”

Sa kadugayan, ako giinterbiyo alang sa pagkapropesor sa musika. Ugaling, sa paghunahuna sa tanang isyu nga mahimong motungha kon ako magtudlog musika, sama sa pagkahangyoon sa pagtudlo o pagtokar sa relihiyoso ug nasyonalistikanhong musika, ako mihukom nga motudlog lain ug naasayn sa pagtudlog kasaysayan sa kalibotan. Apan ang maong kausaban wala makapugong nako, katuigan sa ulahi, sa pagtokar sa akong clarinet sa mga orkestra sa kombensiyon diha sa daghang kayutaan samtang ako mibiyahe ngadto sa internasyonal nga mga kombensiyon sa mga Saksi ni Jehova.

Sa wala madugay, ako nahimong instruktor sa kasaysayan sa kalibotan sa usa ka dakong hayskul sa kanait sa Detroit, ug ingong instruktor, ako kas-a gihangyo sa prinsipal sa pagrekomendar ug usa ka basahon sa ubay-ubayng bag-ong teksbok. Sa pagsubli kanila, ako natingala sa kamatuoran nga bisan pag ang presenteng teksbok naghisgot sa ngalan ni Jehova sa walo ka beses, ang mga bag-ong libro wala magngalan sa Diyos sa mga Hebreohanon, bisan pag ilang ginganlan ang daghan sa mga diyos sa paganong mga nasod, sama kang Ra, Molech, Zeus, ug Jupiter. Sa dihang ang usa ka salesman miduaw, gisukna ko siya nganong ang Jehova wala hisgoti diha sa iyang teksbok, ug siya miingon: “Dili, dili namo ibutang kanang ngalana diha sa among basahon tungod sa mga Saksi ni Jehova.” Busa giingnan ko siya: “Mao diay! Nan dili nako irekomendar ang inyong libro.” Gibundak niya ang libro diha sa iyang bag ug midali paggawas sa pultahan.

Sa ulahi, gitaho nako sa prinsipal nga wala gayod kami magkinahanglag bag-ong teksbok ug gihatag ang ubay-ubayng maayong katarongan. Siya miuyon kanako. Ang tanan nalipay sa maong desisyon sa dihang, pila ra ka bulan sa ulahi, gihukom nga wagtangon ang kursong kasaysayan sa kalibotan gikan sa kurikulum sa hayskul. Ang usa ka bag-ong kurso, gitawag social studies, mipuli niana sa tibuok 14-tunghaan nga sistema. Kon mipalit pa ang tunghaan ug bag-ong mga basahon sa kasaysayan, pagkadako unta kadto nga alkansi!

Ako may daghang makalingawng mga kasinatian sa pagtudlo sa tunghaan ug maoy estriktong tigdisiplina. Kadto gibaslan sa ubay-ubay tibuok-kinabuhing mga panaghigala. Ako nakabaton usab ug daghang kahigayonan sa paghimog dili-pormal nga pagsangyaw. Apan sa kataposan ang panahon ug kahimtang mitultol kanako ngadto sa bug-os-panahong pag-alagad.

Internasyonal nga mga Kombensiyon

Tapos sa pagmaestra sulod sa 20 anyos, ang akong mga mata nagsugod sa pagkadaot. Dugang pa, gibati sa akong mga ginikanan nga ila akong gikinahanglan, mao nga gihangyo ako sa akong amahan nga mopauli, nga miingon nga may labi pang hinungdanong buluhaton sa pagpanudlo nga pagabuhaton, ug si Jehova magtino nga ako dili magutman. Mihunong ako sa pagtudlo niadtong 1955, ug apil sa una kong mga panalangin human niadto mao ang pagtambong sa serye sa “Madaogong Gingharian” nga mga kombensiyon sa Uropa. Pagkadako sa akong pasalamat nga mahauban sa among mga igsoon sa Uropa, nga daghan kanila nakaagig labihang pag-antos sulod sa ikaduhang gubat sa kalibotan! Kadto maoy usa ka panalangin ilabina nga mahiapil sa 107,000 nga mipuno sa Zeppelinwiese, o Zeppelin Meadow, sa Nuremberg, diin si Hitler nagplano sa paghimo sa iyang martsa sa kadaogan tapos sa Gubat sa Kalibotan II.

Kadto maoy una lang sa daghang paglibot sa kalibotan nga nakapribilehiyo ako sa paghimo. Niadtong 1963 ang akong inahan ug ako nahiapil sa 583 ka kombensiyonista nga milibot gayod sa kalibotan uban sa “Walay-Kataposang Maayong Balita” nga mga Asembliya. Kadtong biyahea nagdala kanamo gikan sa New York ngadto sa Uropa, dayon ngadto sa Asia ug sa kaislahan sa Pasipiko una matapos sa Pasadena, California. Maoy panahon sa maong biyahe nga naagian namo ang makahahadlok nga kasinatian nga gibatbat sa introduksiyon. Ang ulahing mga paglibot nagdala kanamo ngadto sa mga kombensiyon sa Amerika del Sur, sa Habagatang Pasipiko, ug sa Aprika. Sa pagkamatuod, ang maong mga biyahe nakapatugob sa akong kinabuhi, ug ang pagkaarang sa pagtokar diha sa mga orkestra sa kombensiyon diha sa daghang dapit maoy dugang nga panalangin alang sa usa ka mahigugmaon ug musika.

Pagsulod sa Ranggo sa mga Payunir

Niadtong 1955, sa paghibalik gikan sa Uropa, mikuyog ako sa akong inahan diha sa buluhatong payunir sulod sa usa ka tuig, ug dayon ang Sosyedad mihangyo kanako sa pag-alagad uban sa usa ka gamayng kongregasyon sa Apalachicola sa kasadpang Florida. Sulod sa pito ka tuig ang laing igsoong babaye ug ako mitabang sa buluhaton didto, ug sa wala madugay ang kongregasyon nakatukod ug Kingdom Hall aron matagan-an ang pag-uswag. Mipadayon ang pag-uswag, ug sa wala madugay ang laing kongregasyon naporma sa Port Saint Joe. Gigugol nako ang 11 ka tuig sa pag-alagad uban sa tulo ka kongregasyon sa kasadpang Florida.

Kas-a ako gihangyo sa magtatan-aw sa sirkito sa pagpangitag usa ka dapit alang sa asembliya sirkito. Akong nakuha ang pagtugot sa paggamit sa madungganong Centennial Building sa Port Saint Joe sa $10 lamang. Apan gikinahanglan usab namo ang kapeteriya, ug naghunahuna kami sa paggamit sa usa ka pasilidad sa eskuylahan. Ugaling, akong nasayran nga supak ang superintendente sa mga eskuylahan, ug miingon siya nga kinahanglang ako makigkita sa hunta sa eskuylahan. Mitambong usab ang alkalde sa maong tigom, kay buot niyang among magamit ang kapeteriya. Sa nangutana siya kon unsa ang mga pagsupak sa among pagbaton niana, ang pangulo sa hunta sa eskuylahan miingon nga walay pasiuna ang paggamit sa usa ka relihiyosong grupo sa pasilidad sa eskuylahan. Ang alkalde miliso kanako alang sa tubag. Aw, ako nagdalag ubay-ubayng handbill nga nagpakitang among nagamit ang pasilidad sa eskuylahan alang sa among mga tigom sa ubang mga lungsod, ug dayon akong gipunting ang Buhat 19:9, nga nag-ingon nga si apostol Pablo nagwali sa usa ka awditoryum sa eskuylahan. Kadto ang naghusay. Ang hunta miuyon sa alkalde nga ipagamit namo ang kapeteriya​—sa $36 lamang.

Sa dihang ako 13 anyos pa lang, nga sa maong edad ako nabawtismohan, ako miampo: “Oh Diyos, itugot nga ako unta makadala bisan sa usa ka tawo sa kamatuoran.” Kanang pag-ampoa sa maong panahon gitubag sa pinilopilo kay ako gipanalanginan sa pagtabang sa daghan sa pagbarog dapig kang Jehova ug sa iyang Gingharian. Ugaling, nga balikbalik sa dili pa ang usa ka estudyante sa Bibliya mahidangat sa punto sa dedikasyon ug bawtismo, ako natudlo ngadto sa laing kongregasyon. Sa gihapon, ako nakapribilehiyo sa pagtanom ug sa pagbisibis, ug daghan sa maong mga estudyante nahimong tibuok-kinabuhing mga higala. Ang pag-ambit sa maong mabungahong mga kalihokan nagdalag daghan kaayong katarongan nga ako magmapasalamaton.

Ang Media Nakatabang

Samtang ang media sa daghang dapit matag karon ug unya nagtahong dili paborable sa kalihokan sa mga Saksi ni Jehova, ako malipayon sa pag-ingon nga ang media sa dapit sa De Land, Florida​—diin ako karon nagaalagad—​nakatabang kanako sa pagsangyaw. Pananglitan, samtang naghimo sa usa sa mga paglibot sa kombensiyon sa kalibotan, ang akong inahan ug ako nagpadalag tag-as nga mga dispatso ngadto sa lokal nga mantalaan, ug kini gipatik dayon, kauban sa mga letrato. Ang mga taho maoy diha sa paaging mga saysay sa biyahe, apan kami kanunay makagamit niana sa pagsangyaw bahin sa ngalan ug Gingharian ni Jehova.

Kana matuod usab sa akong pagsangyaw sa dalan. Ako may usa ka eskina sa kalye diin ako may duha ka silya sa tugkaran, ang usa akong lingkoran ug ang lain akong displehan sa among mga basahon. Kas-a, ang usa ka tunga-sa-panid nga artikulo uban ang usa ka letrato mipatim-aw sa usa ka lokal nga peryodiko ubos sa kapsiyon: “Taga-Deland nga si Lottie Nagpadayon sa Buluhaton sa mga Ginikanan Ingong mga Saksi.” Mas bag-o pa, niadtong 1987, ang laing mantalaan may tunga-sa-panid nga artikulo nga may usa ka dakong letratong dekolor ubos sa ulohan: “Si Lottie Hall May Kaugalingong Eskina nga Gitagana Alang Kang Kristo.” Sa sunod tuig ang laing mantalaan may atubang-panid nga letrato nako uban sa mga komento sama sa, “Siya atua didto sa kanunay” ug, “Naglingkod sa usa ka silya sa tugkaran, ang retiradong maestra nagagamit sa iyang puwesto sa eskina sa kalye sa paghimo sa misyonaryong buluhaton sa Saksi ni Jehova.” Dugang pa, kaupat ang lokal nga estasyon sa TV nagpasundayag ug mga letrato bahin sa akong pagsangyaw. Ako nagpadayon sa pag-ambit sa limitadong sukod sa tanang bahin sa ministeryo sa Gingharian: balay-balay nga pagsangyaw, mga balikduaw, ug mga pagtuon sa Bibliya sa balay. Ugaling, tungod sa pagkatigulang ug lawasnong kaluyahon, ako karon nagagugol ug daghang panahon diha sa buluhaton sa kalye.

Sa paghinumdom ako magaingon nga ako may daghang katarongan gayod nga magmapasalamaton. Dugang pa sa mga panalangin nga kasagaran sa tanang katawhan ni Jehova, ako ingong maestra nakapribilehiyo sa pag-impluwensiya sa daghang batan-on; ako nakabaton sa kalipay sa pagtambong sa daghang kombensiyon sa tibuok kalibotan; ako nakabaton sa labing mabungahong payunir nga ministeryo; ug ako gipanalanginan usab maylabot sa musika. Dugang pa, diha ang pagsangyaw nga akong nahimo pinaagi sa media. Sa pagkamatuod, ako makaingon uban sa salmistang si David; “Pagadayegon ko ang ngalan sa Diyos uban sa awit, ug pagapadakoon ko siya uban ang pasalamat.”—Salmo 69:30.