Thursday Island Nakadungog sa Maayong Balita

DIHANG milibot ang ayroplano, ang among makita lamang mao ang hugpong sa mga isla sa nagkalainlaing mga porma ug gidak-on diha sa tunga asul nga dagat. Dihang hapit nang motugpa, among nakita ang runway—pagkagamay—apan pagkadakong kahupayan!

Mitugpa kami sa Horn Island. Human sa biyahi sa bus ngadto pantalan, gidala kami sa lantsa ngadto sa Thursday Island, ang sentro sa Torres Strait Islands. Kining mga islaha nagkaylap samag mga batong tikanganan gikan sa amihanang tumoy sa Queensland, Australia, paingon ngadto sa Papua New Guinea.

Sa mainit, ulanong panahon (Enero hangtod sa Mayo), lunhaw ug lanubo ang tanan. Moporma usahay ang dagkong mga bagyo, nga peligroso ang pagbiyahi sa matag isla. Sa nanghibilin sa tuig, normal ang kainit ug abog.

Maayong Balita Miabot Niining mga Islaha

Tuig kadto sa 1938 dihang ang 16 ka metrong lantsang Lightbearer sa Watch Tower Society mihunong makadiyut niining mga islaha samtang nagpaingon sa Dutch East Indies (karon Indonesia). Misakay niadto mao ang pito ka mga Saksi ni Jehova, nga maikagon sa pakigbahin sa balita sa paglaom sa Bibliya.

Apan, wala mahibaloi niining mga igsoona, nga miabot usab ang usa usa ka misyonero sa Kakristiyanohan. Iyang gisultihan ang mga taga isla sa dili pagpamati sa mga Saksi o sa pagdawat sa bisan unsa sa ilang basahon. Apan sa dihang miabot ang mga igsoon sa iyang balay ug naestorya siya, midawat siyag upat ka libro. Nakita kini sa ubang mga taga isla, busa sila nagpalandong: ‘Kon siya makabaton niana, nganong kami dili?’ Niadtong gabhiona, samtang nagpasalida ang ubang mga Saksi sa mga slide, usa ka igsoon milingkod sa gawas nga may mga kahon sa mga libro. Sunodsunod, diha sa mangitngit, usa ka kamot nga may kuwartang dala ang mitungha, ug nangayo ang tingog ug libro. Sa usa lamang ka oras, 200 ka libro ang napahimutang! Sa ulahi, napakyas ang misyonero sa pagsulay sa paggamit sa mga librong iyang nakuha ingong ebidensiya sa usa ka sumbong batok sa mga Saksi.

Usa ka Kongregasyon ang Naporma

Kadtong unang mga binhi sa kamatuoran wala mabisibisi sa dugayng panahon. Hangtod na lamang sa ulahing katuigang 1950 nga miabot ang dugang tabang niining nahilain nga mga isla. Duha ka bug-os panahong mga mamumuo ang gipadala sa Watch Tower Society. Sila gisundan sa mga Rudd, pamilya sa tulo nga miabot aron sa pag-alagad sa lugar nga dako ang panginahanglan. Wala magdugay, usa ka gamayng kongregasyon ang naporma diha sa Thursday Island.

Malisod nga mga panahon kadto, diyutay rang makuhang puy-anan ug may diyutayng pagsupak sa kagamhanan ug sa natukod nang mga relihiyon. Sa sinugdan ang kongregasyon nagtigom sa gamayng lawak sa ibabaw sa mga hudno sa lokal nga panaderiya. Palandonga lang kon unsa kainit niadto diha sa tropiko!

Nakakita sa panginahanglan aron makapabiling malig-on sa espirituwal, determinado ang mga Saksi sa pagtambong sa kombensiyon diha sa kaulohang Australia, hapit 1,300 ka kilometro ang kalay-on. Sanglit walay iplete sa ayroplano, sila sa mainampoon nangitag paagi aron makaadto sa kombensiyon.

Una, mipalit ang mga igsoon ug daang lantsa sa panagat nga walay makina, pala, walay mga layag, ug angkla. Nangita tali sa nangagubang mga sakayan, sa kataposan nakakita silag usa nga dunay singko-silindrong makinang diesel ug kahon sa kagamitan. Gipalit kini, nalipay ang mga igsoon sa pagkakitag mga layag, mga angkla, ug uban pang mga piyesa. Apan, wala gihapoy ehe kun pala.

Gipangutana ni Igsoong Rudd ang tag-iya sa baraderohan kon makatan-aw ba siya sa palibot. Mitiaw ang tag-iya nga kon siya makakitag ehe bisan asa diha sa maong lugar, ihatag niya kini sa mga Saksi. Sa katingala sa tag-iya, usa ka ehe ang nakita. Samtang nagpamalaybalay sa pila ka buntag sa ulahi, may napatiran si Igsoong Rudd diha sa sagbot. Pala kadto nga mosibo gayod sa ilang lantsa!

Human giandam ang sakyanan, ang kongregasyon sa 25 andam na sa pito ka adlawng panaw. Dihang migikan sila, “gitunglo” sila sa lokal nga tambalan. Usa ka gabii nasangit ang lantsa sa katakotan. Gipahimuslan sa mga igsoon ang panahon sa pagdakop ug suplay sa isda. Sa dihang mitaob sa pagkabuntag, milutaw ang lantsa, bisan pa sa padayon nilang paglimas sa tubig sa nanghibilin sa biyahi.

Dihang miabot sila sa Townsville, Australia, gitagbo sila usa ka datong tag-iya sa baraderohan. Tingali nakabasa siya sa artikulo sa mantalaan bahin sa ilang mga paningkamot sa pagtambong sa kombensiyon, ug siya napukaw sa pagtabang. Miinsister siya sa pag-ayo sa kadaot sa lantsa bisag dili sila makaabot sa pagbayad ug sa pagtabang sa pag-ayo tungod kay adto man sila sa kombensiyon. Sa ulahi, mibayad lang sila ug 40 ka libra ($80, U.S.) inay 500 ka libra ($1,000 U.S.) nga rasonable.

Pag-abot sa Ubang mga Isla

Pinaagi sa pagtultol ni Jehova, ang balita sa Gingharian miabot usab sa gawas nga mga isla. Pananglitan, sila si Igsoong Rod Anderson ug Allan Webster, kinsa mibalhin ngadto sa Thursday Island sa pila ka tuig nga milabay, migamit sa ilang lantsa sa pagsangyaw sa ubang mga isla. Hangtod karong panahona, ginahimo ang pagsangyaw sa 12 taliwala sa 17 ka gipuy-ang mga isla.

Usa ka Matahom nga Tigomanan

Apan, dugay nagpalandong ang mga igsoon, kon makatigayon ba sila sa pagbaton ug ilang kaugalingong Kingdom Hall diha sa Thursday Island. Dayon ang espiritu ni Jehova nga nagalihok nakita. Sa Septiyembre 1983, si Igsoong Graham Keen, usa ka batid nga magtutukod, miabot aron sa pagtabang sa pagtukod ug tigomanan. Dihay ubay-ubayng mga kongregasyon sa Australia nga mahinatagong mitabang sa pagtaganag mga materyales nga gikinahanglan alang sa pagtukod. Gibutang kini sa mga container ug gikarga gikan sa Cairns, Queensland. Nakurat ang mga taga Isla sa pagkakita niining bungtod sa mga materyales sa pagtukod diha sa bakante niadtong lote. Mikabat lamang ug 140 ka adlaw nga pagtrabaho sa pagtapos sa tigomanan, nga may usa ka balay sa likod. Dihay 120 ka malipayong tumatambong sa adlaw nga gipahinungod ang bag-ong tigomanan.

Pagkadako sa kalipay sa tanang mga Saksi nga nakabaton niining bag-ong Kingdom Hall nga nagsilbing sentro sa pagpakaylap sa maayong balita sa Torres Strait Islands. Uban sa tabang sa espiritu ni Jehova, nalipay sila sa pagpahayag sa pagdayeg kang Jehova nga Diyos.—Isaias 42:12.