Ang Ipasabot sa mga Balita

“Amahan Namo . . . ”

“Ang mga babaye sa tibuok nasod nagapahayag sa isigkamagsisimba nga natugaw sila sa paggamit sa bug-os lalaking pinulongan (‘Amahan Namo nga anaa sa Langit’) diha sa mga serbisyo sa pagsimba,” mitaho ang Minneapolis Star and Tribune. “Kini nagapabati kanilang daw segunda-klaseng mga lungsoranon, miingon ang kababayen-an, ug dili sila mapasuod sa usa ka lalaking diyos.” Gilabanan ang maong isyu, ang hunta sa mga tagdumala sa United Methodist Church sa Minneapolis, Minnesota, U.S.A., mibotar pabor sa bag-ong listahan sa mga ekspresyon nga gamiton sa mga maninimba dihang maghisgot sa Diyos diha sa pag-ampo, sa mga serbisyo sa pagsimba, ug sa ubang mga kalihokan.

And pila ka mga ekspresyon nga walay gitumong nga lalaki kun babaye nga giandan sa hunta sa iglesya mao “tuboran sa kalinaw, tuboran sa kaluoy, matinumanon ug usa nga mahigugmaon, kusog sa among kinabuhi, . . . hunahuna sa uniberso, . . . hataas ug usa nga balaan.” Ang paggamit niining mga ekspresyona maoy gisugyot ingong kapuli sa lalaking mga pronombre maingon man sa mga termino sama sa Ginoo, Hari, ug Amahan, nga nagpasidungog sa pagkalalaki sa Diyos.

Apan, ang pagsalikway sa paggamit sa Bibliya sa panglalaking paghisgot walay basehanan. Sa hapit na siyang mamatay, si Jesus, ang bugtong Anak sa Diyos, espisipikong migamit sa Aramaikong pulong Abba, nga nagkahulogang “Amahan,” dihang miampo kang Jehova nga Diyos. (Marcos 14:36) Sa susama, gigamit ni apostol Pablo kining pulonga sa pagpadayag sa suod nga relasyon tali sa dinihogan sa espiritung mga Kristohanon ug sa ilang langitnong Amahan, si Jehova. (Roma 8:15; Galacia 4:6) Busa, kon, gitudloan ni Jesus ang iyang mga disipulo sa pag-ampo nga nagaingon, “Amahan namo nga anaa sa langit,” dili ba angay mao usab kanay buhaton sa tanang mga Kristohanon karon?—Mateo 6:9.

Utangang mga Iglesya

Tapos sa miting sa sinodo sa Dutch Reformed Church sa amihanang Transvaal, South Africa, gikataho nga ang 134 ka mga kongregasyon sa iglesya utangan sa kantidad nga R13,890,000 ($6,667,000, U.S.). Mikomento bahin sa problema, usa ka editoryal sa mantalaang Beeld sa Africa nangutana: “Dili ba ang sayop anaa usahay sa ministro ug sa konsilyo sa iglesya?” Ang mantalaan mibatbat: “Kasagarang mahitabo nga ang deakono regular nga moabot sa binulang pagduaw sa pagpangolekta sa kuwarta, samtang ang ministro dayag kaayo sa iyang pagkapalta ug ang ansiano estranghero sa iyang dapit. Ang mga sakop ba sa iglesya, niining mga kahimtanga, ang mabasol sa pagbaton ug impresyon nga interesado lamang ang iglesya sa ilang kuwarta, dili sa ilang espirituwal nga kaayohan?”

Sa kasukwahi, gipasiugda sa ministeryo ni Jesus ug sa iyang mga disipulo ang espirituwal nga paghatag. (Mateo 10:8) Samtang ang mapabilhong mga mamiminaw kanunayng moabot sa pagtabang kanila pinaagi sa kinabubut-ong paghatag sa pangunang mga panginahanglan sama sa pagkaon ug kapuy-an, si Jesus ug ang iyang mga disipulo wala gayod mangitag materyal nga mga kaayohan. (Lucas 10:5-9) Sumala sa gipamulong ni apostol Pablo: “Wala akoy gikaibgan nga salapi ni bisan kinsa o bulawan o bisti.” Hinunoa, iyang gitambagan ang tinuod nga mga ministro sa Diyos sa “pagbantay sa [ilang] paagi sa kinabuhi nga mahigawas gikan sa paghigugma sa salapi.” Ang iyang mga pagduaw gikan sa balay-balay gihimo aron siya ‘makapanghimatuod bahin sa paghinulsol ngadto sa Diyos ug sa pagtuo sa atong Ginoong Jesus.’ (Buhat 20:20, 21, 33; Hebreohanon 13:5) Ang relihiyosong mga pangulo sa adlaw mao ang gihubit sa magsusulat sa Bibliya nga si Lucas ingong “mga mahigugmaon sa salapi.”—Lucas 16:9-15.

Daotang Kalingawan

Aron lamang malingaw, ang mga estudyanteng Aleman sa Lahnstein misugod sa pagdani sa mga espiritu sa okulto sa pagsulti pinaagi sa basong nagalihok gikan sa usa ka letra ngadto sa laing letra, nga “nagasulat” ug mensahe. Unsa ang resulta?

“Ang mga batang kinse-anyos, mahadlok sa pag-adto sa kaligoanan nga mag-inusara, nga magpangyamyam mahitungod sa mga demonyo. Sa magabii, ang mga batan-on gustong matulog uban sa ilang mga ginikanan,” mitaho ang Alemang mantalaang Rhein-Zeitung. Natarantar ang kadaghanan niadtong miapil “sa hilom nga mga miting nga nanawag sa mga espiritu ug sa kataposan kang ‘Lucifer.’” Mikomento bahin sa reaksiyon sa kabataan “dihang nakontak kuno sila ni ‘Lucifer,’” ang usa ka magtutudlo miingon: “Bisan ang labing sipat nga mga bata sa kalit napanton. Giabot silag kahadlok.” Tapos sa hitabo, gidili sa sentro sa mga bata sa siyudad ang maong “mga dula,” ug gihangyo ang mga ginikanan sa dili pagbilin sa ilang nahadlok nga mga anak nga mag-inusara.

Sumala sa mantalaan, “ang pag-uso sa okulto miabot ngadto sa mga pelikula, sa TV, ug sa mga plaka.” Apan, ang pagduladula sa okulto alang sa kalingawan wala makahatag sa mga estudyanteng Aleman sa Lahnstein sa kalingawan nga ilang gilaoman. Nganong wala? Tungod kay ang Bibliya nagpadayag kanato nga malalangon ang Yawa ug “nagapahisalaag sa tibuok kalibotan.” May kalabotan kini sa pagkahanas sa Yawa sa paghatag sa yuta ug ‘kaalaotan.’ Si Satanas ug ang iyang “daotang panon sa espiritu” (ang mga demonyo) angay isipon sa pagkaseryoso ingong tinuod espirituwal nga kapeligrohan, ug kinahanglang likayan.—Pinadayag 12:9, 12; Efeso 6:11, 12; itandi sa Buhat 19:19.